英國鄉下妹（3） 讀完第一個學期
轉下眼，阿女响英國讀pre-school都差不多三個幾月，就放暑假。就如上次講，我兩公婆都無乜特別要求，阿女讀嘅係普通鄉郊pre-school。
但係，厘個學期有幾樣嘢令我感受幾深。因為每個三歲以上嘅小朋友政府都會資助每個星期十五個鐘嘅pre-school費用，而pre-school每一節係三個鐘，分上下午，所以可能每個小朋友選擇番學嘅日子同時間都會唔同。而我個女就番四日下午，咁樣初頭佢最唔適應就係，比較難同新朋友仔熟絡，原因係頭兩三個星期，唔係每日都見同一班小朋友。加上，我個女係插班，挑戰就更大。
因為每頭下午班小朋友都係會帶lunch box，自己食lunch（响香港嗰時，食乜都有工人姐姐或者媽咪）。頭兩三個星期，我個女一入學校就唔肯同其它小朋友坐，自己要坐埋一邊，好似好慘咁...但係我兩公婆覺得佢點都要習慣，唯有順其自然。
最後，我地諗咗個方法，就係每日都遲小小番學，等佢無位揀，被逼要同其它同學仔坐。就係咁，好笑嘅事就發生，佢開始番學之前，有時會要求食乜食物侵同埋到學校嘅時候佢會扯住入學校，原來佢已經有一個好friend嘅朋友仔，要每日都同人地坐或者食差唔多嘅嘢。慢慢，個女番到屋企就講越來越多名，完全融合新環境，新學校嘅生活。原來對小朋友黎講，真係適應得好快好快！
第二樣令我好深刻嘅係，差不多學期尾老師（其實係care taker）見家長。其實，每日個女都會講下响學校玩乜，不外乎畫畫，手工，唱歌，story time同玩playground，而每個星期學校都有email update下咁。但係，一定唔會好似香港咁，學校點都show比家長睇，個小朋友學咗乜，我地亦唔太知佢學咗乜。
上星期見家長，我就問個女嘅care taker，我個女日常响學校係點嘅，學咗乜厘啲咁嘅普通嘢啦。佢竟然攞咗三版紙出黎，好長細咁話比我兩公婆知，個女同邊個最好朋友，喜歡乜嘢，我地平時可能無留意嘅習慣等等。而當講到學咗乜嘅時候，佢好認真咁同我地講，你個女係番pre school，佢地嘅責任係比小朋友玩，幫佢地發展社交，創意同了解身邊嘅嘢例如點解會有花呀，數下嘢咁。如果要學文字，佢未來大把時間學！
作為唔想做怪獸家長嘅我地，聽完我完全覺得無帶錯個女去英國！play group，幼稚園、pre school本來就應該如此啦，點解香港會變到咁？
最後，唔關學校事，但係我覺得好好笑嘅嘢。學校同我地講，其實我個女响學校都好鬼多嘢講。而我亦留意到，佢有時玩玩具嘅時候自己同自己講嘢都係講英文。但係，佢每晚story time嘅時候，我講乜嘢故仔佢都要我講「中文」（廣東話）。我就覺得好奇怪，因為响香港嗰時都唔係咁，英文story咪英文囉，中文咪中文。
有一日，我同佢玩嘅時候，我用廣東話問佢顏色，可能佢專心玩，無理我，咁我咪用英文問多佢一次囉。佢忽然間，好認真咁同我講：「爸爸，响屋企唔可以講英文，要講中文！」。忽然間，我覺得佢好似教番我，提番我係自己香港人，mother tongue係廣東話咁。原來佢先係真﹑香港人😅
#英國PreSchool #英國鄉下學校 #小朋友去英國 #英國PreSchool學啲乜 #我個女係真香港人 #只係玩唔代表學唔到嘢
