荷蘭生活知多啲
IG: ally_blahblah
讀書篇 （下）
之前兩篇文章就講解過有關語言、當地普遍教育程度、學費、學校VS學科、呢邊讀書辛唔辛苦，學生生活，交通及住宿。今次就講一下好多人關心嘅兼職及實習、就業情況同埋簽證。
8. 兼職及實習
上文提到，好多當地嘅學生都會喺課餘嘅時候返兼職。咁佢地一般會做咩呢？好多都會喺餐廳或酒吧搵外快，亦有人會做文職。要留意，如果係非歐盟學生，喺荷蘭返兼職比較難。事實上，荷蘭係西歐黎講對非歐盟學生返兼職比較嚴格嘅國家之一（比德國或北歐更嚴）。法例上，用學生簽證嘅非歐盟人士每星期只能工作不多於10小時，或者全年只能於六七八月返全職暑期工，兩者不能重疊，而且僱主需要提供工作許可（Work Permit）【註一】，大大提高非歐盟學生返兼職嘅難度。
咁唔返兼職，返實習得唔得呢？
原則上，如果係非歐盟學生想喺荷蘭嘅返實習，係可以嘅。僱主並唔需要好似兼職咁提供工作許可（Work Permit），但學生要同僱主同學校簽一份實習同意書（Internship agreement）就可以【註二】。但原則還原則，實際操作又係另一回事。為避免「請黑工」之嫌，大部分公司聘請實習生嘅時候都會要求「註冊學生」（Registered student）。咁何謂「註冊學生」呢？即係未正式畢業，仲喺任何一所大專院校註冊緊，交緊學費嘅學生。係，你冇睇錯，仲喺交緊學費。只要你係「註冊」緊，就算你唔上堂，你一樣要俾學費。
喺荷蘭嘅實習同香港最大分別，荷蘭嘅實習一般係以半年，甚至一年計，唔似香港咁以暑期實習居多；而啲實習一般都係要返哂一至五，變相好難一星期返幾日學再返幾日實習。咁好多本地/歐盟嘅學生，一般都會「讀完」後，繼續「註冊」以保留「學位」（簡單講就係延遲畢業，簡稱延畢），然後一邊交學費，一邊返實習。
嗱，咁如果係歐盟學生，一個學期學費一千歐元，為左有「實質工作經驗」，其實都仲勉強講得過去。但如果係非歐盟學生，為左一個每月幾百歐元嘅實習，要延畢每個學期交好幾千歐元學費，值唔值得，就要自己諗。加上非歐盟學生要學校簽同意書，如果學校唔俾，都幾麻煩。筆者讀書嘅時候就好幸運咁攞到荷蘭某啤酒品牌（最大嗰間）嘅實習機會，但由於學校只容許一星期最多返三日實習，「以防阻礙學習進度」，唔願意簽同意書，最後被逼放棄。所以，有意要喺荷蘭返實習嘅朋友要小心哦！
9. 就業情況
出得國讀書，好多時候會有留低工作嘅打算。咁如果喺荷蘭嘅學校畢業，容唔容易搵工呢？根據一項統計，國際學生當中大約只有三分之一嘅人畢業之後會/能夠留喺荷蘭工作；當中，非歐盟國家畢業生佔少數。語言及簽證要求係主要障礙。
個人經驗：的確唔少國際學生畢業後會離開荷蘭，但當中好大部分唔係因為搵唔到工作，反而係因為想返去本來嘅國家/地區繼續發展。 當然，語言及簽證要求係有一定嘅難度，但情況不只侷限於荷蘭。筆者認識唔少國際生畢業後順利留喺荷蘭工作發展，而筆者自己畢業前已有大型銀行取錄並安排一次過五年工作簽證，更已經幫公司招聘過非歐盟國家人士。
稍後會再寫一篇【荷蘭生活知多啲——工作篇】，分享當地搵工及招聘心得。
10. 簽證
喺荷蘭讀書，當然需要學生簽證。留意番，申請人唔能夠自行申請學生簽證；必須由當地學校取錄之後，由學校將相關申請交到領事館，申請人收到通知後方能繼續辦理手續。所需文件亦會因為申請人嘅國籍而有所不同【註四】。至於同工作相關嘅簽證，記得留意【荷蘭生活知多啲——工作篇】。
【註一】https://www.educations.com/study-guides/europe/study-in-netherlands/student-visa-5837#:~:text=Foreign%20students%20(non%20EU%2FEEA,week%20outside%20the%20summer%20period.
【註二】https://www.studyinholland.nl/dutch-education/doing-an-internship
【註三】https://www.iamexpat.nl/education/education-news/majority-international-student-graduates-leave-netherlands
【註四】https://ind.nl/en/study
讀書篇 （上）
https://www.facebook.com/allyblahblah/photos/a.276193166080761/1216324908734244
讀書篇 （中）
https://www.facebook.com/allyblahblah/photos/a.276125036087574/1219379955095406/
以上內容只係個人分享，如有疑問，以官方資料為準。
#移民 #移民歐洲 #移民荷蘭 #荷蘭 #西歐 #出國 #留學 #歐洲讀書 #歐洲工作 #歐洲生活
