【龔成問答信箱】(Q22381-Q22400)
Q22381:
你好啊龔成老師,我現時係一個中五學生,我好希望可以得到你嘅幫助
我今年啱啱18歲,因為家庭環境問題,一直好想快啲賺多啲錢,因為咁我好快就踏上咗買賣股票,大半個月前我因為貪心,無經驗,
心急咁買咗美團嘅認購證,我好蠢咁擺咗成世人儲曬嘅錢落一隻股到(~35000),果陣頭兩日賺4000好開心,但第二日開始每日跌,跌二千,二千,三千幾,一萬幾,
跌到宜家我差唔多輸咗8成(~30000)我唔知點,
我心態好崩潰,好後悔自己貪心,明明畫圖分析咗佢跌,自己又唔肯走,仲覺得佢會升返,我宜家唔知點好,你可唔可以指導下我
龔成老師︰
首先,同學仔你對投資理念,存在一個好大誤解。你現時成個投資模式,都係同一般散戶一樣,犯上同樣,而且致命的錯誤。
其實我20年前,都做過同你一樣的事,短炒、炒孖展、炒衍生工具,輸左幾年我先識醒,後來發現全最賺錢的投資者、基金經理,只用一個方法「長線投資優質股,買股票就是買企業」,我就改變策略,長線投資,之後就賺多過輸。
你要好清晰一個投資"重點",我地買入一隻股票,就等同買入一間企業,一定要知道佢質素、行業前景、財務狀況等,才去考慮否投資。
當我地確認係值優質股後,我地會用平貴定入貨策略,並長線持有。而唔係做短炒股票或者輪證,去賺差價。因為短線股價會受市場氣氛、資金流向等,與企業質素不相關的事情影響。這些因素,我地係不能估計。
但長線,企業價值會係股價上展現出來。因此,優質股你買入後,長線持有,讓其自然增值,永遠都係最有效的財富增值方法。
我明白你家庭問題,需要盡快賺多D錢。但你要明白投資增值,係一件長線的事,你唔好預佢對你短期財務,有任何幫助。
全世界投資最叻,最賺錢的巴菲特,佢會唔會做短炒。佢只會叫大家,長線持有有質素股票,等佢地自然升值,達至財富增值效果。佢自己身體力行左幾10年,去證明這件事係行得通的。
所以,我建議你放棄短炒。現有的輪,就全數沽出,當買左個經驗。同時要認真去學好投資,之後才再出手。你可以睇我架《80後百萬富翁》、《財務自由行》和《股票勝經》,都適合你。
------------------------------------------------
Q22382:
老師 ,我現時的資產分佈如下
股票 36%
現金 23%
等跌市 41%
請問現時配置ok嗎?(因為我冇物業,所以比較簡單)
我現時總資產約85萬,首期都比唔起,所以冇諗過上車,只希望靠股票儲到多啲錢可以三年後移民
雖然有啲渺茫,因為我計過自己三人家庭,6年洗費都要2.5M。但移民係我短期目標,香港生活真係太壓迫了。
而且我曾經在英交流半年,我有信心可以適應嗰邊既生活。我每一日都會想像我喺英國冇咗姐姐、自己又冇工作能力又要湊住個(三年後六歲)囡搞唔搞得惦
答案係:未得
所以我比三年自己康復、去說服身邊既人我可以
請問老師你對移民英國有什麼看法呢?應該要有幾多錢先夠?
龔成老師︰
現時大市在合理區,股票佔比重,去到5-6成都係可以。你可以用分注形式,再慢慢加大翻股票佔比。
但若果你係好大機會在三年後移民,時間不算好長,我會建議投資選項上,要保守少少,以平穏增長股為主。
以下平穏增長股,都係有質素,現價都在合理水平,可慢慢分注。但緊記我地組合要平衡,個別企業和行業,不要佔組合15%和30%以上,以免出現過度集中性風險。
至於移民部份,每個人都有不同考量,有的為工作、有的為教育、有的為改生活模式。最重點,係你明白你目標係想點,而這個新地方,係未來長線係唔係可以做到,你心中所想,咁就可以。
但由於移民去新地方,好多野都要重新配置,所以資金係好重要。到時你要優先留有一定現金,去先處理好生活事宜,到一切都安定好,才好再諗投資。
在你打算移民前半年倒,你就要開始慢慢沽出股票套現,唔好等到要用才一次過沽,以免回報受價格波動影響。
至於要用多少錢,你要睇翻自已計劃,衣食住行各方面開支。因為每個人都有不同,單係住在不同英國城市,個租金和樓價,都可以有好大分別,故好難話要幾多才足夠。
所以,你要先計劃好,自己移民的落腳地。再去了解翻這個城市生活和住屋水平。由於這是個新地方,會有不少額外開支,故你要預鬆D。生活費用上,最少有半年儲備,才算理想。
------------------------------------------------
Q22383:
多謝你不斷提供正面資訊俾我哋,成日都覺得投資要盡早開始,自己本金唔大,成日睇住股價上上落落,短炒咗一段時間,真係輸多過贏 好後悔好後悔。
而家睇緊老師你出嘅書,龔老師啱啱聽你咁講,先增值後享受,有正如所講長線投資一定會有回報,我想問你個意見,我同先生月入大約四至五萬 ,正因為而家有兩個小朋友讀緊小學 開支好大 儲錢亦唔多
如果我手頭上有一間價值六百萬嘅樓居屋 係自住嘅 大概仲有一百六十萬未供完。因為短時間都升值咗好多 都算係人生第一桶金
你覺得能唔能夠賣出然後用二百萬至三百萬長線去投資 然後自己租樓住五至八年。咁到五年或者八年後 咁樣財富增值 係唔係一個好嘅選擇?
但如果最後升值唔多,有機會而家住緊嘅屋都會再升,但如果我唔用呢個機會 根本就冇辦法 拎到現金去投資
以上是我之前同你提及的方案
如果我真係賣出層樓,利用一百萬收息,例如電燈。一年都大概有70,000至80,000利息,咁樣可以蓋過租樓開支,然後剩返二百拎嚟投資,選擇一些有潛力的, 你覺得咁樣大概等幾年後收成,
我希望能夠右手上嘅300零萬,可以變到500幾萬 ,幾年之後再買返樓,目標希望可以買到600-700萬600呎新界私樓, 而且可以製造多啲現金流!
如果萬一有風險嘅話,咁就可能選擇買返一啲納米樓。
因為如果唔用呢個方法,我同先生每月嘅收入 就好似變成入不敷支,根本唔可以令資產再提高。
龔成老師︰
我自己唔係太建議你,沽出自住樓去投資。因為你會變成處於"沽空樓市"狀態。表面上,你計劃係可行。
但實際上,當個貸款息率上、租金持續向上、或者樓市升幅跑嬴股市,都會令你計劃失算。
我建議你自住樓部份不變,如果開支真係無任地方可以減少。你地睇下有無可能做些網上小生意﹐或做些兼職,去增加收入。最終可以做到,每月有一定資金,去做投資增值。
如果都係唔可行,你最後方法,就係去加按。現時仍處低息期,加按是沒有問題的。
但你要睇翻自己年齡,可承受的風險程度。40歲總負債大約可佔總資產7成,如果50歲就5成好了。
現時按息不高,將資金買入其他資產,創造更高的回報。但要新資產產生的利息回報,一定要比加按的利率高,這樣才值得做。
最好有比較明顯的息差回報,這樣才能抵銷加按後,加大負債為你所帶來的風險。因此,你加按前,最好先計劃如何分配新資金,如何平衡風險。
投資於股市時,相信中低風險會較合適,公用股、內銀股、收息股、房託等,都可考慮,策略為長期的增值及收息,期望股息回報大於加按利息,這樣就值得做。但絕不建議炒賣等方式投入股市。
同時,你要明白加按表面上無本生利,但實質有風險的,你負債增加,風險會增加。
另外,如果你投資的股票不幸股價下跌,你就會出現「賺息蝕價」,對你不利。如果日後加息,又或你收息股的派息減少,都會令你得到的息差回報收窄,你的回報會減少。
若你覺得以上風險,都係你可以接受範圍,你才好加按。
另外,我地投資物業時,緊記唔好投資納米樓。因為佢呎寸太細,連一個基本家庭需要(約300呎)都做唔到,投資價值會係比其他較大樓盤,弱好多。
------------------------------------------------
Q22384:
龔老師,我有事想請教。我之前聽你教導每月月供股票,現約有約:
1)40萬股票
2)另有20萬基金
3)及約10萬現金
我想用林鄭plan買一層約500萬,209呎開放式住宅(20年樓)住宅作投資用途,但要將手上全部股票基金放曬。這樣會否太高風險?
請指點迷津,感激。
龔成老師︰
我地財富組合除左要有增長力和質素外,平衡性都好重要。若你盡沽優質股,去買物業,會令你組合偏晒去物業類,因而產生風險。
最理想係,買物業之餘,可以保留一定優質股作增值,才算平衡。除非你發現的物業,明顯係旬盤,現價又好有值博率,才好考慮。
再加上,現時整體租金回報率唔高,從投資角度,投資優質股會較好。
另外,係你將來購買投資物業時,緊記要買一些最少有300呎的單位(能滿足一個家庭需要的大細)。單位太細,其實投資價值會被打折扣。
------------------------------------------------
Q22385:
阿sir 之前8.15開始入3918,分段入,入到開始懷疑人生,而家平均買入價係7.16
每一次佢再跌我又睇一次佢既負債,現金流,財務數據,仲有佢既專營權,有冇咩壞消息,相信係短期,再入。不過而家話全球疫情會反彈,相信又要再跌。
想問下佢跌成咁我有冇miss左啲咩風險?新興市場,較受中國旅客人數影響,比澳門賭股有風險我都了解。
另外,我理解呢類股注碼不能去得太盡,而我入下入下都變成一隻持貨較多既股,但佢大平賣我又真係想再入,我既步署應該點調整好?
多謝阿sir,正當全城人妻都睇緊mirror,我老公就話,你又睇龔成(仲要無樣睇)@@我同佢講睇龔成係唔會導致我地婚姻破裂,相反係為左我地既將來努力😆
今晚進階班見
龔成老師︰
金界控股(3918)其實佢本質,無大變動。正如你所講,佢較大風險係新興市場,故一定不能大注。
雖然佢現價已經係合理區中下,好似好抵。但你過度加注,表面上拉低平均價,實際上係加大左成個組合,投放係高風險項目的資金,咁係唔理想。
如果佢已佔你一定比例(組合5-10%),但停一停,再平都唔加注住。
現時佢一直跌,最大原因係疫情不明朗,特別係一些發展中國家。因此,你預佢中短期一定會好弱,但長線質素係依然存在,持有係無問題。
------------------------------------------------
Q22386:
龔sir, 你好。上完堂之後買了好多你的書,好有用,令到我更容易明白你的堂課。因為一直以來我好相信你加上你無論上堂及sms都好有心及好誠懇。
所以好想請教一下,你可以給意見我嗎?
現年60,計劃退休年齡想5年後,但唔想完全不工作及0工作收入,如果現在先學定開網店,待退休後的工作及生意,你認為可以嗎?
Facebook 見到有廣告講網店,但教學費大約要hkd8000好耽心能否學以致用,所以想聴下老師意見及有冇推介?
現仍在月供股票中,想加多1只3188,你點呢?
最近見152(有10000股)但跌好多,請問點解既?
見388, 700, 9988 跌中,如想入,請問合理價約幾多?好感恩遇到老師,感謝你的幫忙分析,辛苦晒也謝謝你。
龔成老師︰
我覺得可以,你可以把握退休前的5年,去學習和嘗試網店經營模式,去找出一個最適合你退休後營運的方法。
至於這些創業堂有無用,我就唔係好知。但你記住,「價值」最重要,「價格」是次要。
其實,只要你從你的興趣、強項、認識的事著手。例如你本身對某類產品很有興趣,你會在那裡買?如果你在網上買這產品,這個網站的模式如何?
你最初要有學習的對象,你先尋找一些自己認為不錯的商店,了解一下佢地的商業模式,最始好大型及小型都有,先以小型作學習對象,然後就試下佢地的模式,能否成為你創業的方向。
你最初創業,就係摸石過河,一路做,一路修正,然後再一步步發展。記住,最好唔好做得太雜,要專注在某一範疇,等人容易記得你。
另外,你可以睇一些創業書本,可以到坊間找找「XXX創業」之類的字眼就得,另外可睇有關猶太人生意經之類的書。但你要緊記,創業係唔易,好多事都係摸石過河,慢慢從經驗中修正。
而且,成功與否,最大關鍵位唔係你能力,而係你能否堅持。加油!
至於投資方面,近期大市氣氛較弱,故不股票都有明顯回落。但我地唔好用股價,去判斷一隻股票有無持有價值,我地要睇佢本質。
深圳國際(0152)本質無大變,你照持有收息就可以。
但華夏滬深三百(3188)、阿里(9988)、港交所(0388)、騰訊(0700)都係潛力股,唔係咁適合你年紀,如果係你女兒投資,咁就可以。
現價都在合理區中上至頂位,可分注。除了港交所(0388)較貴,要回多2,3成才好考慮。
------------------------------------------------
Q22387:
阿sir (1810)應該咩位入
老師 你另外個4本我都訂埋。可唔可以講一次我知 13本書個順序要點睇?
我宜家睇緊股票勝經
龔成老師︰
小米(1810)$24合理區頂。
但如果你現時完全無貨,現價入一小注先,都係可以。
你可以先睇我架《80後百萬富翁》、《財務自由行》和《股票勝經》,都適合初學者。
之後,如果你想了解多D有關企業估值,可以睇埋《選股勝經》和《年報勝經》。其餘幾本,你按自己興趣去睇就可以。
------------------------------------------------
Q22388:
龔老師你好我有個問題想請教你一下。有些股票係有股息分配,理論上是否我衹要在分紅之前一天,擁有該股票就有權分到每股的紅利?
如果是的話噉,每一個人衹要係分股息之前買入,賺股息之後賣出就可以賺到股息。
這個概念是否正確?
龔成老師︰
你對派息運作,似乎有點誤解。
如果你要收到股息,必需在「除淨日」前一天,依然持有股票。「除淨日」,其實就是用來確認那些股東收到這權益的日子。等到「除淨日」當天才買,派息就唔會有你份。
「除淨日」那天,股價就會扣除派息部份,例如原來股價$10,派息$1。那麼「除淨日」就會將股價,從$10下調至$9,以反映派息動作。
而「派息日」,就係這班合資格股東,正式收到股息的日子。
由於「除淨日」股價會下跌。而下跌比重同收到息係一樣,所以只係左手交右手動作,你唔會在此期間因買/沽貨,出現任何著數。
------------------------------------------------
Q22389:
謝謝老師。另外想請教一下微盟集團2013。我看見它2018 的總負債遠比總資產多?我不太看得懂發生了什麼事。是會計上的計算問題嗎?正常應該破產了吧? 謝謝
請問老師怎看6123圓通?
老師晚安,不好意思想問一下1070 TCL 股價現在是不是已回到合理區?
龔成老師︰
因為佢2019年才上市,在上市集資時獲得大量資金,故2019年資產比2018年明顯為多。由於2018年未上市,以一間開發中公司,總負債較多都係正常。
圓通速遞(6123)本身係一家以香港作為總部的國際貨運代理服務供應商,業務已擴展至多個國家,並在亞洲、荷蘭及北美設立了幾十個辦事處。
佢主要經營以下四項業務:空運及海運貨運代理服務、總銷售代理、配套及合約物流服務。
早前阿里巴巴(9988)入股增持,令股價大上大落,這的確會令企業有更多發展,前景正面,不過,估值方面已難。
因為這刻根本無法計算佢,之能賺多少錢,企業發展情況如果,只可以話好多不確定性,但股價就反映大部分利好因素。
因此,這股雖然有發展,但同樣股價上是有風險,相信之後的股價仍會波動。只可以話,這類股小注持有不是不可,但要明白風險因素。
TCL電子(1070)全球最大的電視生產企業之一,其產品銷售遍及全球各主要市場。
集團本質不差的,業務穩定,生意不差,有持續的盈利,不過,過往的增長力就不算強。
負債偏高會係一個扣分的地方,以現時估值來說,可說是處合理區的範圍。
------------------------------------------------
Q22390:
我朋友一直叫我改玩美股代替港股,話港股已冇得買,但本身美股一d概念也沒有
請老師請教
龔成老師:
我地投資,最重要是建立一個優質股組合,中國、美國,都是往後20年最強的兩大經濟體,我地在當中選股,點都唔差。
所以,你可以考慮配合投資,不過,不要認為港股玩完。正如我在2003年,聽到大量分析話香港樓市玩先,人是好表面的,我地要睇長期。
正如我持有的比亞迪(1211),港股,都升左10倍,過往跌到最低時人人話無得玩,但多年後就大升。
------------------------------------------------
Q22391:
龔老師,你好~我今年35歲,女,與父母同住,有62萬做了定期,會2023年到期。而股票是在今年六月才開始投資股票,現在有18萬在股票上,而現金只有10萬。
其實已經有一年多沒有上班了,原因是被診斷出我的腦部有一個先天缺陷,雖然已經經過一年多時間的治療和復健,康復進度理想,但始終影響了我半邊身的活動能力,
無論平衡力、腿部活動、手指活動能力、閱讀、寫字、表達或迅速反應的能力都受到影響。
但好在我是在大公司內工作,他們都具有一定的社會責任,仍然保留職位空缺給我,如無意外我將會在下個月復工。但人工相信將會下降至等同一個剛畢業生,
因為我的工作能力已經不及從前⋯
我估計自己將來的工資會是12K-15k左右,同時,我一直需要每月有1萬元給家裏作供樓用途,因此在這情況下我無法累積新的現金。
所以希望請教一下你,在這情況下:
1)我可以如何更有效地滾存現有的資金?
2)而我現有的投資組合有需要作出調整嗎?
同時,非常期盼你能來澳門開班,讓我能夠學習如何有效地增值財富。我已經買了五本你的書籍,但礙於現在的讀寫障礙,需要很長時間慢慢的閱讀,
期盼疫情過後能夠出席你的課堂。
00388 - 100股 $462.2
00823 - 200股 $75.3
01810 - 800股 $26.55
01928 - 400股 $29.6
02382 - 100股 $234.4
02800 - 2000股 $28.6
02845 - 50股 $154.1
03067 - 400股 $15.365
感謝你的寶貴意見
龔成老師︰
1) 你現時股票,都係有質素和適合你年紀,你照長線持有。但由於你本身健康因素,我建議你現金部份,留來備用會較好。
如果現時生活上未能儲錢,就唔好勉強去增加投資。到你身體狀況轉好,或者財政上較鬆動,才再考慮。永遠我地都係生活和健康行先。
至於你62萬定期,由於佢息口唔會太高,你可以將佢用來投資。至於投資目標,以你年紀計,應該係潛力股和平穏增長股。
但如果你每月收入,都未必能支付你基本開支,而這個情況,你預期係較長線,你可以用這筆錢,去買入一些收息股,目標係5-6%,大約每月都可以幫你創造$2500-3100現金流,去舒緩你每月開支。
潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里(9988)、騰訊(0700)、舜宇光學(2382)、小米(1810)、GX中國電車基金(2845)、三星FANG ETF(2814)
平穏增值股︰指數基金、港鐵(0066)、金沙(1928)、煤氣(0003)、恆基(0012)、中銀香港(2388)、長建(1038)、粵海(0270)、領展(0823)、希慎(0014)、太古地產(1972)
收息股︰港燈(2638)、香港電訊(6823)、工行(1398)、恆生(0011)、置富(0778)、陽光(0435)、深高速(0548)。收息基金(3110),都可以。
2) 暫時無需要,當然如果你有需要加強每月現金流,你可以將部份持股,換成收息股,都係無問題,緊記照顧好自已生活,永遠都比投資增值係優先。
至於澳門班,因為現時疫情,所以暫時停左,之後會再開翻的。
你或者可以預早留位,只要whatsapp 852-55457212我同事講,打「留位澳門班」就得。我地有具體資料就會 whatsapp你。
因為現時已有好多澳門人留左位。
------------------------------------------------
Q22392:
龔成老師:我的港股處於蝕錢階段,想請教你我應該如何做。
以下是我的持股:
9988: 平均價250,持300股
941: 平均價47.8,持1000股
939:平均價6.15,持10000股
883:平均價8.76, 持6000股
700:平均價685.75,持300股
388:平均價544,持100股
11: 平均價152.58,持200股
1038:平均價45.03,持500股
其實我想買英國樓,但D現金係股票度。謝謝你的指教。
另外,我亦有買了108股Tesla( 平均價為666.7),手持大概400,000港元現金
龔成老師︰
首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
你現時持股都有質素(港股和美股),但有少少亂,不同種類股票都有。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
如果你係年青至中年,0941/0939/0011這類收息股,就不宜持有太多,因為始終增長力較弱。相反,你係近退休之年,你投資上就可以集中係這些收息股上。
另外,中海油(0883)係商品類股票,價格自主力能低,質素只算中等,不宜持有太多。
現時大市只在合理區,未算係好平宜。你現有40萬現金,建議先儲起,等大跌市出現時,才動用。
至於是否買英國樓,你可以睇翻你有無實際需要,若有實際需要,你可以分段沽出部份股票套現。
如果只係為左投資,你就要考慮翻佢回報率是否吸引。以過往港股長線波幅,都大約有8-10%(連股息再投資)。如果你覺得都有這個數,你對相關物業、法規、市場等又有一定認知,你都可以考慮。
------------------------------------------------
Q22393:
龔Sir,你好,我今年50歳,有自往物業,現金一千萬,請問現在買樓收租好嗎?樓咁貴,仍有升值潛力嗎?謝謝你
龔成老師︰
從投資角度計,現時租金回報率不高,投資在股市,值博率會較好。而且,你本身已有一間物業,我建議你先用優質股增值,從增值角度或資產平衡性計,都會較理想。
以你50歲,可以選擇一些「平穩增值股」作投資目標。
以現時大市合理區狀況,你可以用200-300萬,以分注形式,慢慢買入以下優質股。餘下資金,我地就等大跌市,才加大力度入貨。
但由於你資金都較多,長線你都應該再加持物業。但現時先用優質股增值,到將來樓市有明顯回調,或你在期間發現優質又平的旬盤,才再去加注物業市場。
------------------------------------------------
Q22394:
龔老師你好。我今年23歲,是一位大學生,每月大約有4000元港幣的收入請問我可以怎樣投資在30歲前達到100萬的資產?
還想請教老師,母親今年48歲,有45萬元的現金,請問可以怎樣投資?
感謝你!希望得到您的回覆
龔成老師︰
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
以你現時23歲去計,是財富增值的黃金時期。除了盡力儲蓄、投資、學投資知識外。也要把握這個黃金時間,做好財富增值部份。
策略上,你可以投資「平穏增長股」和「潛力股」。你每月5成儲蓄,即是用$2000做月供。其餘先儲起,用一邊月供一邊儲蓄的策略。
餘下的另一半現金,我地就等機會,當大市出現較大回調,就加大力度掃貨,然後作長線投資。
假設投資回報有10%(連股息再投資),你每月投資$4000,30歲時大約會增值至45萬。雖然好似同你目標,有好大落差。但你很年青,收入增長力較高,你可以慢慢加大月供金額,以達至一個可完成你目標的水平。
至於你媽媽,由於佢已經係中年人士,投資要比你保守,只宜集中係平穏增長股身上。
現時大市只是合理區,你現有45萬資金可以先投入10-20萬,用"分注"形式,慢慢買貨。餘下資金,就等大市出現一定程度的下跌,才大力度掃貨,然後長線投資。
------------------------------------------------
Q22395:
龔sir, 你好!想問一下 偉易達 (303) 用市盈率估值法 or 用股息率估值法 比較好?
我用客觀方式用市盈率估值法(用五年數據: 市盈=11.88 至16.42, EPS=$6) 計到合理範圍$72至$99, 我的計法對嗎?
謝謝回覆!
龔成老師︰
其實2個計法,都係可以,你可以互相配合,去得出一個較立體估算。
市盈率你可以拿長少少時間,用10年個計法,去找出市盈率合理範圍。而EPS係正確,大約係HKD6。
但你計算後,你會發現個合理範圍較窄,你記得要加入緩衝區,對相關估值進行調整。
若以股息率計,佢達9%。但由於佢股息較波動,加上企業質素唔算好高,大約算係合理區底部。
根據2種分析,此股現價大約在合理區較底至初步平宜區。如果你目標係收息為主,加基本增長,此股可投資,但不能太過大注。
緊記,我地估值法有好多種。最理想就係用不同估值法,去立體得出一個答案,咁會較為穏當。
------------------------------------------------
Q22396:
老師︰微盟 11.32入左
9666 57.25入左
2400 62.5入左
493 1.7有49000股
巴巴 276 入
應該止蝕定溝貨,謝謝
龔成老師︰
首先你要正確了解翻,加注這個概念。我地決定加注與否,要睇幾個因素。但記住,絕對並不會是「拉低平均買入價」為目的。
第一,要分析這股的質素,如果無質素,就再跌都唔加。
第二,這股的類別,如潛力或增長或收息類等,是否與你的財富組合匹配,比例是否適合。
第三,你要先計算加注後,這股佔你股票組合的比例會否太多,因為同一行業,同一股票。不能佔股票組合的比例太多。
第四,現價是否有投資價值率,要平,或起碼合理,不能貴。
第五,你要在加注後,仍有現金剩。
記住,重點不是「拉低平均價」,而是組合比例與配置。
你現有持股,大多有質素。但金科服務(9666)、微盟(2013)、心動公司(2400)不確定性較大,只宜小注。。
而且,你持大部份都係科技相關行業,有過度集中性風險(個別行業不應佔組合3成以上),就算再平,都時不宜加注。
國美零售(0493),從過往分析,質素只是一般。
企業連續出現虧損,品牌價值遠不及從前,優勢不強,雖然正加強網上網售網絡。
唯一的賣點是創始人黃光裕回歸,可能帶公司變強,但發展仍有未知數,如果以這刻的業務、發展、現價,整體的投資價值唔算高。
當然黃生可能帶領公司變到好唔同,但這點真的無得計。以理性分析,這刻投資值博率,只是一般。
因此,你以上股票可持有。但考慮到組合平衡性問題,建議你新資金,優先投資在科技類以外股份(而非在現有股票加注),去令組合更平衡,才是理想做法。
------------------------------------------------
Q22397:
龔老師,想請教一下投資策略,本人現時48歲,沒有物業,存款有100萬,另每月可供$5000。請問我該選什麼股,ETF, REITs 呢?香港或外國都可以,可以教我嗎?多謝
我的計劃是買
$30萬(2800)
$30萬(2638)
$20萬(0066)
$20萬(0002)
每月供
$2500 美國(VTI)
$2500 加拿大 (Riocan)
請指教
龔成老師︰
以你48歲計,都有一定財富增值需要,但進行時就要保守少少。
你現時月供計劃,其實都已經可以。但RIOCAN係專注於單一行業,有少少集中生風險,我建議更改為$3000 VTI和$2000 RIOCAN,咁會較好。
另外,現時大市未算平,每月要留有一定現金,去等大跌市機會出現。
至於直接買入選股,都係可以。但同樣現時港股只在合理區,你可以先用一半資金,分注咁慢慢儲貨。餘下一半,就等大市有明顯調整,才慢慢加大力度入市。
以下是一些都適合你年紀的股票,除了ETF和REITS外,我都比埋一些單一企業的優質股你作參考。
平穏增長股︰VOO、盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
------------------------------------------------
Q22398:
龔Sir你好,我追蹤咗你嘅FB一段時間,好多謝你無私付出。我第一次問問題,希望你可以撥冗回覆:
我$14入咗6000股微盟(2013),我有持貨能力,但考慮到騰訊和阿里合作平台的消息,是否會影響到微盟長遠的賺錢能力,還可以長期持有嗎?謝謝你。
龔成老師︰
微盟集團(2013)集團主要在中國從事提供軟件即服務產品及營銷服務。
佢的產品分為「商業雲」解決方案、「營銷雲」解決方案及「銷售雲」解決方案三類。
「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及AI技術為商戶提供智能營銷服務。
這些都是將來發展的大趨勢,從業務潛力上,的確是有的,見佢財務數據的增長都強勁。
至於,騰訊和阿里合作消息,其實好多具體細節,我地都唔清楚,好難咁快判斷成件事,是好是壞。
只能說,此股中短期股價,一定會較波動。如果6000股佔你組合不多,你長線持有就可以。但若佔較大比重,你可以考慮沽出少少,去平衡一下風險。
------------------------------------------------
Q22399:
龔老師你好,你給予大家既意見好中肯,你寫既書都好有啟發性,多謝你分享咁多!
我自己最近有啲野念極都念吾明,所以想向你請教下啲睇法。6988樂享互動,營銷SaaS服務的定位,我覺得前景吾錯,公司有錢賺,但股價就未有反映出嚟!
我3.1入,現價2.6,我想知我係咪應該繼續持有?
麻煩老師解答,感謝老師!
龔成老師︰
樂享互動(6988)是中國的效果類自媒體營銷服務提供商,利用商業智能技術為行業客戶及自媒體發佈者提供服務。
睇翻近年的財務數據,佢增長力是有的,但上市前的數據參考價值較低。
相信佢長遠,業務都有增長力的,公司話佢自己能盈利高增長,但佢估值一直都唔平,你買入價都算係偏貴水平。
就算現時回落,都係合理翻D,未算平。此股你預佢中短期,都係較波動。如果你持貨不算多,可以守住先,再觀察。
------------------------------------------------
Q22400:
Hi 老師,-我想問家人有20萬現金 在股票市場應該如何分配?
-現時有:
$2.4買入1萬股中國銀行,$13.5 買入3000股中國人壽 需繼續持有定沽出?
-佢地半退休狀態,希望將儲咁耐的現金流,變更多金錢。為未來退休做准備,謝謝你
龔成老師︰
若你家人已進入半退休狀態,穏定現金流去支援生活開支,會比財富增力為主要,所以配置上,會較以收息股為主。
中行(3988)係唔錯收息,可持有。中國人壽(2628)有增長力,但質素只係算中等,近年賺錢能明顯弱左,不宜持有咁多。
未來組合,建議一半用指數基金,可以為組合帶來股息之餘,都有平穏增長力。
另一半,就係收息股。目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。
現時大市只係合理水平,現金佔比重大約3-5成,你可以再投入多少少資金,去分注入市。餘下資金,就等大跌市出現,才加大力度掃貨。
但留意一點,任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
特別係銀行業,佢營運模式較特別,風險會比一般行業為高。必需堅守30%這個準則,如果可控制在20%以內,會更好。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
華夏科技大學學費多少 在 龔成 Facebook 的精選貼文
【龔成問答信箱】(Q18421-Q18440)
Q18421:
Hi老師,我今年19歲,上年比媽媽介紹左股票呢樣野,由完全唔識就去抽9988,之後無意中睇到你個page,
認識價值投資,買咗兩隻潛力股,到而家得到一個可觀嘅回報
呢年經歷唔少起伏,有3月股災,果時"輸"唔少,因為明白價值投資而冇擔心過,想多謝你先。
你成日叫人Strong hold優質股,我明白佢如果有個特點係可以永遠優質,理論上係可以唔放
但係唔放咪一直入錢入錢而冇得享受?要直至足夠金額財務自由咪好耐?其實聽咁耐財務自由,
姐係有幾多(錢/收息股)先叫財務自由?
另外想請教潛力股,點樣去判定佢唔再有潛力?例如你所講嘅1211,你話要等電動車普及,先考慮放出,
咁其他行業呢?小米就可以等佢將平價手機引入啲生活用品比人購買,製造一個生活圈都用小米
同樣道理係咪姐係當佢生活圈普及就代表佢潛力會減左(同時亦代表佢成功左普及)到時就可以放?咁樣你認為點先為止普及?
有咩準則?你之前隻六福點解放左?因咩事/因素/準則你覺得佢潛力唔及1211?
龔成老師︰
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
在初期會投資較有潛力股票,去令財富增值加快。到一定金額後,可轉較平穩增值的股票。最後有相當財富時,才換成收息股去為自已創造穏定現金流。
而中間係唔係一定唔會沽貨,又唔一定。如果你無定平貴能力,咁一直持有一隻優質股,會係最安全架做法。
若你有一定投資經驗,當發現個大市好狂熱,估值已經異常地高。咁我地就應該增加現金持有架比例,因而要沽出部份優質股。
而點樣去判斷一隻優質股,已經無潛力。就正如你所講,現在投資比亞迪(1211),因為好大程度係由於佢係行內有很高技術,而且電動車未普及。當電動車普及,佢就會由潛力股,變成平穏增長股。
每個企業都會有不同原因,你要自已細心去研究,到底間企業架獨特優勢在那裡(可能係技術、品牌、壟斷性優勢等),從而知道點去衡量一隻股票潛力是否尚存在。
例如投資潛力股,好多時的原理是「由細間公司開始投資,等佢變大」,到佢真正變大左,就可以賣出。
而六福(0590)我個時賣出係好早期架事,當時係因為見佢升唔少,比亞迪(1211)又在$1X水平。其實要考慮好多值博率的問題,但原則上,會建議長線為核心。
------------------------------------------------
Q18422:
龔成,前幾日發生咗一件事,想分享一下同埋同你講聲多謝!
話說前幾日去銀行遇到個RM,都預咗佢會sell產品但見仲等梗就聽吓啦!佢一開始係sell年金,記得你經常強調「先增值後現金流」,我覺得以我年紀可以接受增值力強啲既投資所以推咗佢。
佢見我嫌回報低,就推界高息股票掛鈎xx(唔記得最尾幾個字),我突然閃出「大富翁致富藍圖」入面講既銀行高息產品陷阱,所以就用風險太高嚟推佢。
點知佢再解釋,果然就係期權,但呢兩個字完全冇出現過。
我就直接答佢:咁咪即係期權囉...佢呆咗5秒就答:期權?唔係...!佢可能係咪俾我拆穿之後唔知點反應...之後佢屢敗屢試,見我話風險太高就叫我買債券,但睇吓都係BB級別,何況而家低息環境債券都唔太吸引啦所以又再推咗佢
短短20-30分鐘我感覺好似係個考試,考梗我喺本書度學到啲咩
所以好多謝你,$168既書可以咁長知識
龔成老師:
哈哈,好呀,證明你的基礎知識不差。
銀行與坊間的投資公司,都會包裝產品去出售,不是話佢地的產品有問題,而是我地要有自己的知識,先可以「避免比佢地帶住走」。
2008年金融海嘯,當年好多高薪一族,就是買左大量累計期權(Accumulator),最後輸左好多錢。所以,你有知識,就可以有獨立分析能力。
就算到近年,唔少銀行賣債券基金,話裡面投資「高息債券」,所以派息穩定,但高息債券另一價名就是「垃圾債券」,所以,我地有知識是十分重要的。
保持進步啦!
------------------------------------------------
Q18423:
龔sir你好,我今年35歲,正常月入35000,另加bonus,唔穩定,因為我有家庭,減去家用、工人等等基本上每個月都無得淨。疫情前有bonus才有得淨。
有計劃置業但現在經濟差,打算買d有質素股票等多d資金再置業。想問如何建立一個健康的股票組合?麻煩晒龔sir
基本資料如下
現金500000
月薪 35000
股票 9988 $239 400,
700 $521 100,
1810 $23.8 1000
多謝指教!
龔成老師:
由於你收入與支出相等,未能儲到現金,因此要較小心運用$50萬,唔好太進取。
你現時持有的股票,都有質素的,可以持有。
你之後可考慮平穩增長股,由於市況唔特唔平,因此你動用$25萬好了,慢慢分注入優質股。
你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
------------------------------------------------
Q18424:
龔成老師
我在手頭上
有 2手1號長和 平均價$51.75
有 2手5號匯豐 平均價$42.5
有 2手2018 瑞聲 平均價$55.22
你覺得我可否長期持有?
有無升值潛力?
希望得到你少少意見
龔成老師:
長和(0001)有質素,有收息及少少增長能力,不過增長力就比過往年代弱。
瑞聲(2018)有質素,增長力會比0001好,你可以長線持有。
至於匯控(0005),賺錢能力與增長力的確弱左,但又未去到完全無質素,近期股價受壓,除左佢經營環境影響,佢派息問題都是因素,因為市場一向理解這股是「收息股」。
我從股息角度分析這股。
相信長遠是收息股,但股價增長就有限。可以先從佢近年唔派息及財務情況分析。
首先睇翻佢財務數據唔算話特別差,今次要停派息,主要原因係接獲英倫銀行透過審慎監管局發出的書面通知,要求匯豐取消派息。
所以,佢並不是自己好唔得,而去到要唔派息,而是因應翻英國監管局要求,才這樣做,所以,雖然是不好的利息,但不是核心性不利。
停派息對收息股從來都不是好事,但在這全球經濟咁差時候,為集團預留一筆資金備用,對集團和股東都是有利的。
在全球經濟環境影響下,集團中短情況相信都會維持波動,未來再停派息也說不定。但我地投資應該要集中考慮翻佢長線因素,雖然預期匯豐中短期表現會受壓,但長線質素依然存在。
作為收息股係可以,概念上,就是放棄中短期股息,而預期將來慢慢回到正常狀態,只要你投資組合唔好太偏重單一隻匯豐或銀行業就無問題。
但記得,唔好佔比太重就得。同時明白這只是收息股,唔好對股價有太大期望。同時不能持有太多。
------------------------------------------------
Q18425:
你好,我今年34歲,之前一直幫屋企人還錢,完全冇積蓄,月月清
終於今年還哂,我好想要有多啲錢
我月入35K, 每個月應該係可以有18K儲蓄嘅⋯
我想問
完全冇投資經驗,點開始好?
多謝!
龔成老師:
你要做三樣野,第一,增加知識,你要學理財及投資的知識,記住,投資並不是坊間的炒炒賣賣,你要從書本或課堂上認真學習。《股票勝經》適合初階者的。
第二,了解銀行及證券行,去開一個證券戶口,並準備做月供股票。
其實兩者都可以,銀行就較方便,但手續費就較貴,證券行收費就較平。你可以先了解下不同的收費。
第三,將每月的部分資金,去做月供股票,供盈富(2800)。對初階投資者來說,月供股票是一個很好的累積財富方法,因為可避免你一次過在高位買入的風險。
你現時可開始,每月供$8000盈富(2800)。
原理如同儲錢,不過就不是儲現金,而是儲股票。計劃要長期進行。
另外,盈富是一個組合,適合絕大部分人投資,風險不高,長期儲貨可助你財富平穩增值,記住要長線持有。
當你在做上述三件事的同時,開始學下股票,了解下那些股票適合你自己。上述只同你簡單供盈富,當你過幾個月,有知識及少少經驗後,就可以利用你手上的資金,其中一部分,去投資股票。
------------------------------------------------
Q18426:
龔老師,在現有的數隻房地產信託基金中,是否以領展最有發展潛力,並且收息較佳?
若想買領展,現在的價格是否合理呢?
謝謝!
龔成老師:
領展(0823)在當中,增長力較高,但股息率卻不是最好,如果要股息高少少及穩定D,置富(0778)會較好。
領展現價合理,分注投資,長線持有,可以的。
------------------------------------------------
Q18427:
你好,龔老師,我今年32歲,想幫小朋友做一個讀書基金,每月儲5000
而家開始,18年後可以用,請問股票可以月供邊隻同埋供幾多隻,等到18歲既時候有一筆錢,謝謝你
龔成老師:
最好就是月供ETF,你可以供盈富(2800)$3500、華夏恒生科技(3088)$1500,長期進行,這是一個較平衡,長遠有基本增長力的做法。
------------------------------------------------
Q18428:
龔成老師你好,我而家做緊餐廳生意,我生意唔錯搵到一舊錢,黎緊租約滿唔續租,我有以下打算
而家二選一
1.買樓+開間小型餐廳
2.同股東開間大型餐廳
如果是老師會點揀?那個風險較高?
龔成老師:
1)會較低風險,你可以平衡左你的財富,同時有基本的物業持有,對你來說較穩陣。
2)風險會較高,不過,如果你較年輕,想進取D,而你對你及股東又好有信心,就可以做。
------------------------------------------------
Q18429:
龔成老師 我47歲有2個20,14歲仔女,有工作,老公同我分開投資,想問呢個組合可以長期持有嗎?合適嗎?
我樓已經供完,有一份年金剛買每月供$1000供10 年,亦有儲蓄保險連危疾供$1000 現金有10萬如大跌市再可入貨
股票30萬,如下778佔15%,2388佔15%,1177佔15%,1448佔7%,14佔8%,1972佔15%,1928佔10%,270佔15%望到時退休财富已經纍積唔該
另仲想問強積金如恒指升到高位需要轉保本基金?
龔成老師:
儲蓄保險連危疾供$1000,可保持進行。
現金有10萬如大跌市再可入貨,方向正確。
至於股雲組合,都是有質素的股票,而你的年齡,財富仍有增長的能力。你可以用「先增值,後現金流」的方法。
你現時的股票組合,基本上都適合的,但個股去到15%佔組合,已經是上限你最好增長翻一些ETF,例如盈富(2800)、恒生科技(3088)(盈富佔較多),對你的組合平衡度會較好。
當你到近退休年齡時,你可以轉到收息類資產
至於強積金的配置其實唔複雜,你只要按你的年齡階段,去進行分配就得,年輕時較進取,中年平穩,退休前就保守。基本上你按年齡,慢慢跟這樣比調整就得。
強積金是一個超長線投資,中短期當然會有上落,但就唔需要轉來轉去。
只要按你的年齡,長線配置就得。我自踏入社會工作後,一直都是100%恆指,無變過,根本唔需要理會。
------------------------------------------------
Q18430:
1)老師你好,我是澳門的,今年27歲,現金約有十萬,亦因疫情關係未來薪金每月只有1萬多,扣除所有洗費月供基金年金供款等每月能儲2千
想累積財富未來兩年結婚或必要時用,但對股票不太認識,想了解老師常推薦的盈富基金適合嗎,月供多少比較好?及有其他推薦來分散風險嗎?如入手現在可入嗎?
2)可推薦新手投資的書藉嗎?
龔成老師:
1)如果你的資金,將會在1、2年內動用,投資股票未必是最好的選擇,因為買股票原理如同買企業,企業增長需時,而中短期股價只會因當時市況而波動,而無人知你1、2年後動用資金時,市況如何,因此,你應該持有較多現金,以「所需的現金」作最大的考慮,如果有資金剩,就可以投資股票。
當然,你不用100%持有現金,但就會大部分都是。你可以按你可承受的風險,小部分投資股票,盈富(2800),是可以的,這是一個組合,對未有選股能力的投資者來說,是較好的選擇。月供$2000可以,但你要先考慮現金情況。
2)你可首先睇:
《80後百萬富翁》
《股票勝經》
《財務自由行》
之後再睇其他。
------------------------------------------------
Q18431:
老師你好,我今年19歲,今年讀大二,外地讀書冇收入,積蓄有7萬元左右,想未來畢業後10年內草到第一桶金,請問可以點做?
龔成老師:
你最好試下做生意,這年齡最適合試,多d發掘身邊的機會,一些你地年輕人先見到的商機,好好把握。
如果你唔想做生意,都可以善用這筆資金,投資股票,$25000可以開始投資,另外$25000就等投資機會,要大跌市才動用。$20000就是備用。
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
你可以考慮盈富(2800)、銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:華夏恆生科技ETF(3088)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。部分要等回少少先入。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18432:
龔成老師您好,由2018年初至今follow 你FB 已經2年多了,睇住你由2年前得5-6萬follower,到今日既16萬follower,真係好戥你開心
多謝您2年幾前推介既1211,令我而家整個股票組合升值了不少(平均買入價4x蚊)。我諗我會繼續長期持有。
(不過估唔到既係0285升得仲勁、因為1211和0285如果同時持有就會有集中風險,所以我最後揀左1211)
龔成老師:
近幾年我的確發展得好快,比較有趣的是,當我FB的人數上到大約10萬,開始多行家針對我,其實我都唔知點解,但有趣的地方,反而係我因為咁樣而多人識多,有網友同我講就係因為咁樣而跟左我。
比亞迪(1211)可以保持長線持有,比亞迪電子(0285)都有質素,但有時我地投資,都要先從風險角度考慮。
------------------------------------------------
Q18433:
老師早晨,Q1. 看了你比亞迪短片,覺得應該持續長線持有此股。
不過,查返資料幾年前比亞迪試過來港搞電動的士,不過因為充電及電池續航性問題而失敗並徹出香港,擔心能否再在香港卷土重來
始終充電站設施不足在香港土地問題下是一個阻礙,如果香港始終難以普遍,對此股票會否有深遠影響?
Q2. 百勝中國質素如何?
龔成老師:
1)潛力企業在發展過程中,總會遇到好多問題,產品未得,這是正常的,如果產品已好成熟,就不是潛力股。
由於佢技術仍不斷進步,好多問題慢慢會解決。而佢主要市場在大陸,發展正面,因此香港市場對佢來說貢獻不會大。
2)百勝中國(9987)有質素,不過由於本身已好大隻,並不是快速增長的類別。
佢主要係中國大陸經營餐廳業務,旗艦餐廳品牌包括快餐品牌肯德基與休閒餐飲品牌必勝客(都係利用獨家經
營和授權經營權)。
佢另外仲有其他品牌代理,包括小肥羊(專營火鍋)、黃記煌(燜鍋品牌)、東方既白(中式快餐品牌)、COFFii & JOY(咖啡店品牌)、Lavazza(授權咖啡店品牌)等。
睇翻佢的資料,佢係中國的1400多個城市,共有約1萬間家餐廳,當中約85%餐廳由集團擁有及自營。
可見有一定的規模與經營網絡,過往的業務都不差,增長力都有。相信長遠能利用當中的優勢保持發展。
不過,現價都唔算平,加上本身已有一定的規模,所以預期佢只是平穩增長類,如果投資,要分注入,適合長線的。
------------------------------------------------
Q18434:
老師 我依家讀緊大學 我想問下你覺得如果邊讀書既話做咩副業會比較好?定還是專心讀書呢?
同埋我發現好多時候一啲優質股未去到好平,通常喺合理區中下部就開始回升,太貪心搞到錯失左機會。
咁係咪應該只留一半錢等待便宜價位,然後另一半喺合理區入手長期持有會比較好?
龔成老師:
你是大學生,應該有能力進行副業,單靠讀書在現時社會無用的。
你可以試下做生意,由你身邊人、年輕人的需求與商機開始尋找。總之,唔好想太多,「做」是最好的,不斷試就有機會。
有關優質股,的確有時會有這情況,因為優質股市場都好重視,好多時唔會跌得太多,所以去到咁上下已經會回升。
因此,我都會建議優質股在合理區,分注買部分(例如買入3-5成),同時留現金,等自己有一些貨,如果大跌就加注。如果唔跌上升,起碼都有基本的貨。
------------------------------------------------
Q18435:
老師想請問一下你
1.你當年離職,成為全職投資者,會唔會突然間冇左固定收入而不安,係咩原因令你決定係當時離職?
2. 3718北控制城市資源管理,會唔會係一個有潛力的股票,我覺得垃圾處理回收係一個大趨勢
龔成老師:
1)因為當時我的被動收入,以足以支持我的日常支出,所以不安感減少左。但最初都有少少的,因為賺錢模式變左,但我地都要克服的。最重要知道是大方向正確,就要自己大踏步進行。
當時我外面的業務發展理想,同時被動收入已足夠,所以辭職。
2)北控城市資源(3718)有質素的。
佢主要在中國從事環境衛生服務;危險廢物處理業務;以及廢棄電器及電子產品處理業務。
環境衛生服務方面,佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。
同時自2019年起開始,佢有係北京的若干商住區域提供物業管理服務。
過往財務數據不差,有一定的增長力,有長線投資價值。
------------------------------------------------
Q18436:
老師你好,本人平均價$7買入建設銀行三萬股
建設銀行現在的業務狀況你認為我將來$6.5 出售還是在低價購入拉低平均價好?
龔成老師:
建行(0939)有質素的,不過銀行業的賺錢能有所減少,加上壞賬問題,都影響企業的質素。
你原有的貨,可以持有。如果加注,你要先計算加注後,這股佔你股票組合的比例會否太多,銀行股佔股票組合的比例會否太多。
如果你計加注後仍不多,就可加少少。
記住,重點不是「拉低平均價」,而是組合比例與配置。
而這股只是收息股,增長力不強。
另外,你要在加注後,仍有現金剩。
如果你長遠想收息,可一直持有,如果想組合有增長力,就上翻$6以上考慮轉其他。
------------------------------------------------
Q18437:
你好!龔先生,本人因理財不善,今年二月申請了46萬貸款,供6年,每月供$9571,我計算了6年須付多二十多萬利息。
我現手頭有50多萬現金,想請教龔生我直接一次過清貸款好還用投資生財好,約須付42萬左右,已付6萬多利息,自己心想還未付那麼多利息,不如一次過清。
如果你建議我不清,50多萬用可建議我作什麼投資好?
請龔生指教,因本人是不善投資,感謝及等候你回覆!
龔成老師:
第一,你要先找翻資料,了解你這筆貸款的「實際年利率」,如果實際年利率太高,就應該盡快清還。
這個就是你的「資金成本」,除非你的「投資回報率」,能大過這個成本,否則,早點清還是有著數的。
另外,借貸投資是高階投資者才能用的方法,如果你在過往的投資經驗中,10年有8年都有錢賺,平均回報不差,就可以考慮將資金投資。
否則,盡日還錢會較著數。
------------------------------------------------
Q18438:
老師,我手上有400股9988,平均價195. 請問什麼價位可以增持?
另外手上有1211, 590($13x7000),1810($13.4x3000)
同問什麼價位可以增持?
唔該老師
龔成老師:
阿里(9988)有質素,你可以長線持有,至於增持,由於你本身有貨,加上現價唔算平,所以唔需要太急去增持。去翻$230以下,最好$200先考慮會較好。
或者你利用月供,長期入都得。
另外的幾隻,六福(0590)是合理價,你可以首先考慮這股加注(但要記住同一股不能佔組合比例太多)。而比亞迪(1211)、小米(1810),等回翻10%-15%先加注會較好。
同時,大市這刻唔算特別平,所以你加注後,最好有現金在手。
------------------------------------------------
Q18439:
Hi龔sir! 近來科技股一直熱炒,之前月供開嘅1211都有賺到D錢,但此版塊已被熱炒,所以我此刻反而唔想再月供,睇番舊經濟股覺得值搏率更高,我咁諗正確嗎?
龔成老師:
有不少科網股的確有點熱,雖然未到完全狂熱的狀態,但的確要小心。你停供是可以的,持有的貨,可以暫時繼續持有。
而你將資金轉到舊經濟,是可以的。
------------------------------------------------
Q18440:
老師,我之前買賣小米,有短炒情況,發覺好似行錯路。
之前,我心郁郁用左10000左右入左兩手小米,當時24.6,收市又有成25.6,賺左幾百,算係人生第一次買股用真錢,係有種興奮感覺。
但係之後開市26.6一開就即刻跌落25蚊就嚇左一下,即刻放左一手,之後又見佢升返又即刻買返一手
之後成日都心不在焉,時時刻刻都開手機睇股價,最後收市跌返落25.7。
冷靜落黎諗下,發現自己犯左好多新手毛病,終於明白你當初點解講跟市太貼唔係好事。
我個人第一次買成個人都好緊張,明明知要睇長期,但當時就係冇耐性,又有少少跟討論區既人風向行事,同埋俾個股價少少地影響左自己心情。
當交左小小學費攞經驗,純粹同你分享一下,我覺得真係要落一落場試下水溫先有呢種經驗,係幾有挑戰。我依家諗緊好唔好繼續留住兩手好,你有冇咩睇法?
龔成老師:
這些要你自己經歷的,想像投資,同用真錢投資,是完全不同的兩回事,這要你自己感受才得。
這都是學習。
希望你之後學識長線投資,因為成功的投資者、基金經理,都是好有耐性,同時能夠平常心面對股價。
而一般的散戶,好易會被股價上落影響左投資決定,例如在優質企業質素無變,但股價下跌的情況下,因為心理因素而賣出。
總之你記住,我地不是炒股,是配置,將你的現金轉為優質股,長線投資。小米(1810)有質素,但相信股價會好波動,平常心。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
華夏科技大學學費多少 在 龔成 Facebook 的精選貼文
【龔成問答信箱】(Q18401-Q18420)
Q18401:
成哥早晨!剛剛想起一個有關印銀紙與估值的問題。近排新經濟、醫藥股升幅驚人,估值上點都係貴。
但各國今年也行量化寬鬆,印了無數咁多銀紙,所以在資產、以及優質股的估價上,平、貴價區是否要大幅上升?
如08年後,資產價格急速上升。
所以照此邏輯,舉比亞迪為例,之前$40樓下平,量寬後不看業績,也應該是$80樓下平?唔知你點睇呢?
但如果量寬同估值有關,怎樣調升這個百分比?
知道成哥你很忙,不急的,有空才覆吧,謝謝
龔成老師︰
你的想法方向正確,在全球印銀紙下,貨幣將會出現貶值。所以,這些企業收入,有機會因為咁而上升。
所以《財務自由行》都有講這概念,現金只會永遠貶值,資產則是永遠升值。
當盈利反映出這個升幅時,我地的確有機會要上調這個企業估值。
但你要明白,我地係估值時,都係要偏重翻係企業本質、長線的行業發展、財務方面狀況等等,來到做決定。如果佢的資產、盈利、生意額等,有實質上升,即是佢受印銀紙或經濟因素,帶動佢價值向上,我地就會調高。
簡單來講,印銀紙會令現金貶值,這是一定的,所以,企業在業務上的各種數字,理論上是向上的,但我地投資者,就要具體見到佢地的財務數據,有實質地上升,才能確定這企業價值向上。因為每間企業價值改變的程度不同。
暫時,穩陣計,比亞迪(1211)$80以下合理,但遲d出業績,就有可能提高,可能$100。這股有潛力,但由於現時市場放入太多「期望」因素,因此,我暫時唔敢調高估值太多,但我自己的貨暫時都未賣,因為這刻就算貴,只要將來價值提高,就慢慢變為合理。
------------------------------------------------
Q18402:
Hi sir,想問下吉利vs大行報告問題
上完堂番黎玩大行報告好迷失LOL
用你進階班比你網搵到既報告呢
1/2020-9月8. 東吴証券 佢無比目標價我,但有行業平均預測PE(2020),我用佢企業預測EPS(2020)乘係咪就有目標價? (我直乘就23.9hkd)
2/但近期黎計其實得一份用PE估值,另一份2020-7月就用DCF.佢話目標價21.3hkd
[Q1:唔同角度無得比較咁點算好? 評估完其實d data都reasonable,但感覺好虛]
然後今日花旗提高佢目標到40蚊。首先我搵唔到個full report,中英都search左。然後佢花旗提高係因為新產品增加銷量,呢d係年報都講哂(之前睇左),所以大陸大行報告都take into account左呢d effect啦。
[Q2:花旗目標價同大陸d差咁遠,但我又睇唔到佢assumption, 咁我信唔信好?]
thxthx!
龔成老師:
其實你最緊要睇翻報告的「預期數據」,是否合理,如果合理的話,推算出來的估值就有參考價值。
而你用佢比你預測EPS,乘上行業平均預測PE,可以得出一價參考價,但如果你記得我地在基礎班都講過,當我地運用行業市盈率時,其實要作出調整,因應翻企業的質素、增長力,去調整,先元可以計得出估值。
另外,DCF的敏感度好高,因此計出來的數,有時都未必能盡信,參考可以。
至於花旗報告,我地要找到佢建基D乜,去做預測,先有答案,否則不能盡信。
另外,估值差無絕對的答案,當水有主觀的成份,同時,我地並不是計到23.7還是23.8,而是大約知道$20-$25是合理(大約是),因為企業價值,只是一個概念,並無絕對答案。
所以,我地盡量以不同的角度,不同的方法,去盡力計得立體。
------------------------------------------------
Q18403:
龔sir,近排買左你既書
最主要都係學習分析股票
另外想問一下MPF
今年30歲
因為mpf一直都買開北美嗰邊嘅投資,近呢半年都增長左九萬蚊,咁嚟緊美國大選嗰邊,都聽到唔少嘅消息
因為大部份人都話10月至出年一月,通常都會跌,需要去轉做其他嘅投資組合嗎?
咁如果真係轉其他投資組合,你有建議嗎?
龔成老師:
由於強積金是超長期的投資,我地只要好簡單咁人生階段、風險承受能力去配置就得。例如年紀較輕就進取,中年就平衡分配,年長就保留,咁就得。
因此,如果你現時30歲,仍可以進取的,可以將較多資金,投資在較為進取的類別,少少在平衡組合,咁已經得。同埋,強積金唔需要經常轉來轉去的。
我由初踏出社會開始,都是100%恆指的。
所以,你唔需要因為中短期因素而賣出,你持有就得,美國無問題的。
另外,無人能估到幾市大市會跌,唔好信。
------------------------------------------------
Q18404:
老師你好,認識你及跟隨你投資學習已有一年半,想同你分享下呢段時間嘅成果
當時大學剛畢業沒有投資概念,閱讀你著作及短片後稍作投資,一直持續月供優質股現回報超過15%。加上參考了你的意見和綜合自己的分析購入了持續增長的企業,在2年間累積到700k財富,感謝你無私分享和教導!
距離目標3年內累積到一百萬不遠,到時希望投資物業或為家人添置自住物業。
現有幾個問題想請教:
1)屋企之前落錯車十年來租樓住,只用儲蓄做定期,家人希望明年以我名義入市,你認為可行嗎?(本人24歲女,freelance平均月入35k)
2)0941同1316分別用$67同$6左右買入5手坐艇到依家,應該等股價回升再放?
3)每次睇好某啲新興股都猶豫冇落手,好似小米同平安好醫生都升左3-4倍。
如物色到好企業應用咩心態或咩情況下入市?
另外1833要入係咪等股價回落$100樓下先入較好?
龔成老師:
你的投資成績理想!相信你都有努力過的,之後保持知識進步與花時間研究投資。
1)可以,但不一定是明年,可以是後年,你可以按你地的財富情況去決定,記住,「供得起」是大前題。
相信香港樓市,中短期可能下跌(但不會大跌),因為經濟弱,長遠會平穩向上,因為始終有需求。
2)中移動(0941)只是收息股,增長力不強,如果你想組合有較強增長力,就等佢反彈時轉其他。
耐世特(1316)本質中等,近年的業績有點弱,但又唔算好差。我相信佢中短期仍會面對不利的經營環境,見佢生意並無增長,盈利都是。
相信要過一段時間,先會慢慢進入正常少少的時期,要耐心少少先等到佢好轉,如果想組合增長力提高,就可以現時部分賣出,轉其他。
3)潛力股有時估值難,股價變化大,但我地可以用分注的方法,就可以減少股價風險因素。平安好醫生(1833)$100以下較好。
------------------------------------------------
Q18405:
老師,我跟丈夫43歲,兩人月薪 $6.6萬,每月開支約$3.6萬,1/3為兩初中兒子的開支。由於之前開支較大,買股票賺少少就獲利
好多時都唔知賺左去邊,增值好慢。但因不用供樓,所以一直不太擔心,但踏入中年想好好打算。因為我曾月供$2000基金10年,$24萬現值$36萬,所以非常認同老師的平均成本法。現想請教老師:
現有一間已供滿的3房套房居屋,市值綠表價$750-$800萬。
現金約$120萬。
股票現值約$32萬,包括:
友邦1800股,長實500股,港鐵1500。(全都賺緊)
另月供新地、電能各$3000,新地已供一年半,電能幾個月。另曾月供工行及中國銀行,現已停咗,現分別市值3.3萬及1萬到。
基金:宏利富達增長基金$36萬,因基金公司改變策略唔比我再月供,2018年底停左。
保險:供款佔夫婦各自約5-6% (已計在開支預算內),各自保障額約150萬。
強積金現值:丈夫有110萬,太太50萬。
問題:想利用未來10年將資產增值,即使不退休也不用計住計住。現時應如何投資及配置資產呢?
1) 居屋:因為實用率高,自住沒問題,好闊落。但就不能加按或租出。所以常想換樓或多購一物業收租。
2) 投資股票:現時股票只佔很少(市價$32萬),有$120萬現金,見現時港股跌咗,想慢慢月供股票,想問新地、電能各月供$3000,要不要換馬。
另可再用$6000(每隻$3000)買盈富、領展、恒生、中銀,邊隻好呢?港交所曾有400股,但在$300元時獲利左用作裝修,有點可惜,不過都無法。
都想買啲潛力股,我的年紀係咪唔好太多?
因為我同先生MPF都是買盈富,所以投資股票之前就沒有配置盈富。
3)在宏利的基金加保留戶口(買康健基金及恆指基金$45萬)因已停供,現放在入面感覺好難增值。但現公司mpf 供款在另一家,表現一般,所以又唔想轉走之前的錢。
由於丈夫用兩子免稅額,如沒稅務優惠,我就要交稅,想問應否係宏利每年放$6萬供TVC基金,每年度減$6萬免稅額。
4)保險有打算加大純人壽,唔知好唔好?(虛擬保險:保額$100萬每月供款約$100)
唔好意思,講到好長,非常感謝你的意見。
龔成老師:
你可以這刻,先集中股票的增長,中短期唔好加物業,到長遠,如果已儲到一定的資金,以及股票有增長,到時先考慮收租樓。
1)由於居屋的實用性高,解決了你自住的問題,因此,你唔好換樓,保持持有居屋。
如果日後有足夠資金,就買多一層私樓收租。
2)你43歲,財富仍有增值力,當然不能太進取,但你都不用太保守。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股小注好了。
你可做月供股票,或自行分注投資,每月$10000。
你可以考慮盈富(2800)$4000。
另外再加3隻(每隻$2000):銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果想增長力高少少,可考慮:南方恒生科技ETF(3033)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177),但就要明白波動性比上述會高左,同時風險大左,你要自己平衡。
如果你不懂股,就集中供盈富$5000。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
3)如果長遠增長力較弱,就轉其他。你可以比較翻這基金,過往5年、10年,與整體投資市場的回報,比較下。
4)保險好個人化的,最重要是「適當」、「足夠」,不用太多,你應為安心、足夠的數目就得。
------------------------------------------------
Q18406:
龔SIR , 你好 , 我係9月份既學生 , 首先要多謝你的課堂 , 獲益良多 , 最後一堂本來想問你一個一直睇你的書的問題 , 但課堂後太多同學搵你 , 唯有係呢到請教你~
一開始睇了你儲一百萬的過程 , 亦明白有了第一個一百萬就好易有好多個一百萬 , 但好想知呀SIR 之後的投資分配 , 因為見呀SIR 你的入市不頻密 , 咁如何於短期內搵到之後的財富???又或可參照呀SIR 邊本書的重點~謝謝~
龔成老師:
我的策略是買入並持有。
而我地的財富,你可以簡單地用「現時的股票市價」去計算,當然我地唔好只睇短期股價,而是長期。即是當股價長期向上時,我地的身家都會上升,並唔需要賣出而得到「確認的現金」。
當我找到潛力股,例如當年的六福(0590)、中人壽(2628)、港鐵(0066)等都比到我倍計回報,這些我地持有了數年先賣出,當中已帶動財富明顯向上
你可以睇《80後2百萬富翁》,有詳細講我由零去到$200萬的經歷。
記得運用課堂技巧,多睇年報,多用「企業評估表」。
------------------------------------------------
Q18407:
688,和其他内房3333, 1918跌得很低,但1109 企得很穩。688 跌破了我的止蝕位22.5, 應否繼續持有?
我打算沽清再月供或分段入。
業績未見不理想,只是没有驚喜。
龔成老師:
最重要是睇翻企業的質素,去決定持有與否,唔好只睇賺蝕數,無意思。
其實上述幾隻股票,都不是無質素的。
中國海外發展(0688)、華潤置地(1109),風險度會低少少。
而中國恒大(3333)融創中國(1918)及,負債太高,風險不少,這類股不能持有太多。
你要睇翻自己的組合,想如何進行長遠配置,以及這類行業佔你組合的比例,以及佢地的質素與風險度,去決定持股比例,唔好只睇短期股價與自己的賺蝕數。
------------------------------------------------
Q18408:
多謝老師你介紹小米比我啊~
當時我疫情前買左2018長期係低位
於是聽你介紹之後我買左隻1810係6月中,12蚊買而家已經升左一倍並且放左一半啦~
我會繼續持有,如果跌番去合理區我會重新加注。
我希望到3 4年小米升到5 60米時,我可以大大聲同大家講我12蚊買左
我記得我大學老師都教我地,話係700身上賺錢既人好多,但係賺到最後既人真係冇幾多個
所以佢都教我地長線持有股票,而佢而家已經係財務自由可以做自己想做既野而唔為錢生活。多謝曬~~~
龔成老師:
你的大學老師講得好,我之前做銀行同證券行都見到這個情況,好多人買到優質股,賺到錢,騰訊(0700)、港交所(0388)好多好多,但一般散戶就是太心急,升少少就賣賣。
我見到好多客,原本可以賺到過百萬,但就係心急賺唔到。
你已經掌握左方向,之後只要保持進行就得!
加油!
------------------------------------------------
Q18409:
你好龔sir, 先講下手上的貨:
瑞聲$53,有2手
移卡$50.8有2手
舜宇$136.6有2手
3033 $7.79 有3手
想請教下投資期間的心態:眼見手上的股票上升了一個高位無放,慢慢跌回低位,甚至低過買入價,自己會抱怨點解唔賣去獲利,或者把所得的利錢去買其他有潛力的股票上。
這現象在過去2個月不斷出現左3至四次。次次都唔開心一輪。
但想返龔sir你的說話,投資係長遠的,亦係公司的價值,我都知這些係有潛質,但好似見到有魚上釣又拋回落海咁,唔知點調節呢?謝謝你的閱讀。
龔成老師:
這種心理是投資者經常會經歷的,你要平常心面對,最好的方法就是「少D睇股價」。
另外,如果你經常有「馬後砲」的想法,你要小心,因為好多散戶都有這情況,$10買升到$15,跌翻去$11。就會覺得自己「有本事在之前$15」,會後悔自己唔在$15賣,但根本無人會知到高位,以為自己能這樣做到買賣,是好天真的想法。
如果你要進步,就唔好同其他散戶一樣,以為自己做到。投資好需要你的理性,心理因素愈少愈好。
以為自己做到與真的做到是兩回事。
我會建議你唔少D睇股價,如果真的想捕捉當中機會,就用「升一倍,放一半」。
------------------------------------------------
Q18410:
龔sir你好,follow你個page兩個月,學咗好多嘢,亦都有買你嘅書,宜家睇緊《財務自由行》,好想去到被動收入養活自己嘅境界。因此我開始思考擺脱「僱員」身份。我41歲,係公務員(最死板嘅僱員),月入6萬,太太零售業,月入平均約有2萬,有1小朋友。資產/財產如下:
- 物業1: 7.3M,剩3.5M按揭
- 物業2: 樓花,5.6M,九成按揭,2021年年中收樓,收租用。(頭兩年減去供樓成本有正現金流)
- 股票: 約40萬,50%為2800,20%為66及823,其餘1928,1211,1810。亦有778,386,2388,幾年前買入,佔少於10%,不會再增加。
- 現金約80萬
- 儲蓄保險40萬
我知道手上物業較多,之後應集中股票,現時正儲現金等入市,目標是增持1211,1928,1810及入手388。現時月供2800($4000),66及823(各$2000),另外儲現金$4000左右。
1. 如果想有每月5萬被動收入,用5%回報計算,我要有1200萬。想問以目前所擁有嘅物與投資方向,我有可能10年達到財務自由嗎?
2. 如果不能,我的投資方向是不是應該集中增持高潛力嘅優質股以加快速度?
3. 買物業2因為被發展商的優惠吸引(頭兩年不用還利息),之後轉按銀行,租金應該夠利息及雜費支出,0現金流。
如樓價升,打算出售套現(估計有80萬以上),並轉另一回報更高的資產(高於物業預期回報率7%);否則便繼續持有以租養樓(但每月儲蓄/供股力會減少)。這樣做正確嗎?
4. 如果以我現時情況計算總資料負債比率應為:3.5M+5.04M / (7.2M +5.6M+0.4M+0.8M+0.4M = 接近60%,對不對?根據《財務自由行》P.74,以41歲來説是安全的。
5. 我現在是以月現金流5萬為財務自由目標,但隨著通脹,若干年後有可能5萬元不足以維持生活,財務自由豈不是失效?
若未來5年後我有望升級,每月人工比現階級多近2萬,但從現在起必須投放更多更多時間包括每天超時工作,及承受更大更多的壓力等。
雖然工資更多,但偏離盡早財務自由(其實現時工作都已在影響我學習財務智識)。撇開工作成就/使命感,我相信投放更多時間在學習財務智識上比放在事業上更令我快達到財務自由,龔sir你同意嗎?
謝謝龔sir
龔成老師:
1)你現時的財富,太集中在物業類別,這會有風險。建議你在之後的配置裡,加強翻股票類的投資。
當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
你這刻先集中「增值」先,我相信10年財務自由,都有可能的。
2)當然,你要投資較有增長力的股票,「潛力股」+「平穩增長股」是方向。
而置富(0778)、中石化(0386)較為收息的股,則不太適合。
3)由於買賣物業的成本較高,除非樓市到了好貴的水平,否則,你長線持有物業,作財富組合一部分,是可以的。之後你就要集中在「股票」方面的增值。
4)以你的年齡來說,仍是可以接受的。
5)所以,$5萬是基本數目,如可以的話,到時應該要再增加。
我相信你應該投放更多時間在「打工以外」,例如做生意、學投資,花時間研究股票等。
------------------------------------------------
Q18411:
成Sir 你好, 多謝你一路以來用心解答問題, 我都學到好多野
我今年28歲單身 , 人工每月$30000, 每個月會用$7000 元放入月供股票, 分別是
2800@$3000
0027@$2000
0006@$2000
月供股票現時儲咗大約$125000
另外每個月$6000元會放入定期, 年利率約3 %, 定期現儲共有約$140000, 現可隨時拎錢,停供或減少供款。
每月大約$3000 供保險, 扣除其他費用有$11000其餘會儲起來等待投資時機及備用。
另外我有以下股份
5 手 9988@$178
5 手2128@$10.2
4 手 1928 @$30.65
2 手 241@$19.86
5 手 3319@$39.9
以上5 隻股票現總值約$385000
扣除股票, 現有流動資金約$500000(連埋定期), 無其他資產
1) 我現在的月供股票中, 以我現時情況我需要更改投資組合嗎, 另外0006 很像沒什麼升值力, 我需要停供嗎?
2)我另外持有的5 隻股票中, 質素前景如何呢?可持有嗎? 而9988 同241 都係阿里系, 這個比例會太高風險嗎?
3)我現時月供股票連同其他股票佔我的總資產約50%, 比例有冇需要增加減少。 餘下的$500000可以如何再投資
4)我一年保險費佔我人工1/12, 這個比例算唔算合理
唔該!
龔成老師:
1)你的年齡,應該進取少少,你可以轉一隻,改為較有增長力的股票。
可考慮:華夏恆生科技ETF(3088)、阿里(9988)、騰訊(0700)、港交所(0388)、舜宇光學(2382)、小米(1810)、比亞迪(1211)、中生製藥(1177)。
2)都不差,但阿里健康(0241)風險度較高,唔建議持有太多。
業務上,有好大的潛力,不過,本質波動,股價上落大,消息多,市場炒作多,這類股風險都不少。最大問題是無人能正確估值,市場現時只是估估下,推將唔到佢將來的價值。
這類股只建議小注持有,唔好加注,原有貨,如果你本身目標是長線,繼續持有無問題,但你預佢股價上落大。
3)現時的大市平貴,你預持有3-5成現金是可以的。
現時大市處合理區,可以一邊投資一邊留現金,而餘下現金的運用,就是等大跌市時出手。
4)無絕對的,每個人不同。你比例可以的。
------------------------------------------------
Q18412:
龔Sir你好,本人現年40歲,工作環境不太穩定,想買新的ETF 3032,3033作儲蓄請問你有什麼睇法,投資價值如何?
現時開始很多人談論「新經濟股」,想問問如長期持有,要是投資你會選擇新的ETF還是盈富基金?
另外現在月股2800同27,但睇到27股價越來越高,是否仍建議月供?扣除開支,假設每月供款7000,有什麼建議可以給我?
期待並先謝謝你的回覆。
龔成老師:
我地投資,最重要是建立一個長期的投資組合。以你的年齡,可以有7成投資平穩增長股,如盈富(2800)、而另外3成就投資潛力股。
由於潛力股不少近期都升左好多,這刻並不是最好的投資時機,建議你以月供模式,慢慢分注入。如果你未有選股能力,投ETF是最好,你可以月供華夏恒生科技(3088)。長期月供就得。
至於盈富(2800)與銀娛(0027),兩隻仍可長期月供,唔需要太理會中短期。
盈富$3000,銀娛$2000,3088供$2000已可。如果日後有資金,就先增加盈富。
------------------------------------------------
Q18413:
你好呀龔成老師,我最近都好想好好做下理財同埋希望可以喺五年內買到樓。
所以都想研究下點樣可以增加我同我男朋友嘅資產,我同男朋友今年都25歲,我收入有15000而男朋友收入有16000
男朋友有儲蓄20萬但佢都準備讀書學費都要十萬,因為佢比較慳所以每月都可以儲1萬蚊。而我因為之前太大洗所以目前都冇積蓄但每月扣除必要開支後可以儲3000蚊。
我希望我哋都可以plan 下自己嘅資產,男朋友唔想打理所以話直接交俾我。
我暫時計劃我哋每月用8000蚊投資,6000蚊作月供股票2000蚊如果我買份5年嘅儲蓄保險IRR約5.6%你覺得如何?
定係比起儲蓄保險都係月供股票比較好呢?
如果係嘅話我暫時都係會買3000蚊盈富其他都未有諗法⋯⋯希望你可以俾啲意見,謝謝你。
龔成老師:
如果佢$20萬中,有$10萬是有用,餘下的$10萬又不算夕不如當作備用,除非大跌市,否則就唔會動用。
你利用月供及儲蓄保險可以的。儲蓄保險可以視為你財富防守性的部分,但就唔需要多,因此$2000可以。
至於月供方面,最簡單的做法是月供ETF,你可以供盈富(2800)$4000,華夏恒生科技(3088)$2000。
------------------------------------------------
Q18414:
本人34歲,現有股票價值大約$300k,現金$100k,本身月入$30k 開支如下供樓$12k,家用同日常開支$8k,淨$10k 想未來開始月供股票
我本身早2年半前已立定5年要蓄到100萬架目標,一直都有蓄錢,之前間唔中都有買下股票但都輸多嬴少,即到今年3月冇意中在fb 發現你架專頁
開始對你講架股票理財方法覺得好好,現在一直都學習中,還買了你的書優質潛力股同80後百萬富翁,希望在增加對股票知識,同埋我手持現在股票需要重新整合嗎?在此多謝你解答。
我手頭現在股票如下
788:買入價1.48~16000股
175:15.4~2000
823:59.9~500
270:11.96~2000
1211:36.6~1000
14:28~1500
未來想月供
2800:$3000
66:$2000
龔成老師:
你現時手上的持有,都是有質素的股票,你可以保持持有,長線投資。
不過,潛力股的比例就唔算多,只有比亞迪(1211)一隻。你之後可以加強翻潛力股的比例。
不過,由於你現時現金比例唔算多,因此唔需要急,可以儲下現金,等機會先。
至於現時月供,都是優質,無問題,但可以考慮加入少少潛力股。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18415:
老師,你好,追咗你page一段時間,依家終於立下決心儲錢
之前因為唔識理財亂洗錢,本身過幾年結婚但唔夠錢…
但唔係好識處理。
我依家廿六歲,月入18000,
家用:2500
供樓:3500,同屋企人夾錢係內地買,但最快都要2024年先賣得,都供咗3年
卡數:5530
依家每月可以儲到2500-3500
月供緊阿里巴巴同中電 各1000
有啲流動資金,諗緊好冇買一手領展定月供好
同埋諗緊方法可以點增加收入…本身有多一份part time
希望你有時間覆啦
謝謝
龔成老師:
第一,試下減少卡數,減少不必要的消費。
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
第二,可以找一些高時薪的兼職,增加你的收入。
第三,你現時的年齡,可以進取少少,中電(0002)只是收息股,你可以轉盈富(2800)或一些潛力股,視乎你的風險度。
你這刻儲多少現金先,等現金有一定的數量,就可以開始一手手買股票,又或再加多其他的月供。
如果你現時有一定的現金,就可以開始月供領展(0823)。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18416:
龔成老師:你好,我今年36歲,每月扣除開支及保險供款,有hk$13k -15k 可作儲蓄或投資,我手上約有hk$100萬流動現金,持有的股票只有多年前以較高位買入的
941 - 3手, 約$80買入
0303- 3 手 $110 買入
如果想用2年將hk$100 萬滾存至hk$200萬是否有可能? 應該選擇哪些股票作為一個投資組合? 謝謝
龔成老師:
現時持有的股票,增長力都不強,要上翻去差不易,你只能視佢為收息股。
如果想整體組合有更好的增長力,就轉其他較有潛力的股票。
另外,要兩年將$20萬滾存為$200萬,十分難,因為就算巴菲特,一年回報只是20%。
你要集中投資高風險股,你虧損的風險會好高,因此不建議。
如果你想有突破,可以考慮做生意,這都是一個方向。
當然,你研究投資都可,但要付出好多,要每星期研究企業,尋找市場忽視的潛力股,然後大舉投資,但這都會有一定的風險。
------------------------------------------------
Q18417:
你好龔成老師,留意左你一段時間,發覺你真係一個好有心既老師,教既野又實用。
講講我背景先,我係一個26歲出黎社會工作左一段時間既年輕人,月入$17,000-$20,000 ,自己有5萬儲蓄(層樓已經花左自己好多儲蓄)
每月開支$2400供樓& $4000 同另一半夾份供樓,$5000儲蓄投資,其餘既都係生活費雜費。
自疫情期間多出既時間,自學玩股票同窩輪,發覺窩輪本小可以利大,唔知係好彩定點,又成日比我賺到波幅差價,但聽你講解建議最好買D有平均增長既股票長楂,所以我好矛盾
係咪應該唔好玩今多輪呢? 定應該一半正股一半炒輪賺快錢呢? 我依家set左個目標比自己,每年都要有12萬儲蓄,平均每月想儲$1萬, 請問我投資方向應該邊方面著重多D先可以將財富滾大?
龔成老師:
我20年前,都是短炒者,炒輪、炒孖展,玩左幾年,輸足幾年,之後長線投資,就開始不斷賺錢。
我好後悔當時浪費左幾年去學這炒輪,我當時不斷睇書、上堂學短炒,但最後都是輸,好後悔,只怪我當時無知。
之後做銀行同證券行,見大部分輸錢的客,就是短炒的一群!玩衍生工具的!
這是我10年見到的情況,這是行內的秘密,根本大家都知佢地一定輸,但業界一定唔會講!
另外,如果你分析全球真正賺錢的投資者、經金經理,佢地都無人短炒,都是長線投資的,巴菲特更講明反對短炒。
------------------------------------------------
Q18418:
老師你好,想問一下,你接唔接受補習
我今年17歲我由細到宜家都冇咩賺錢相關知識,有聽媽咪講下。我自己大概知道,有分主動同被動收入。即係努力賺錢,儲錢然後投資。但係何謂投資?同埋點樣投資?所以如果可以,可唔可以搵你視訊上堂?
我真係對呢方面好有興趣,加上自己以後想比我出咗嚟嘅家姐犀利
因為我真係一無所知,想睇書學都唔知點開始
龔成老師:
我暫時只有【投資倍升股課程】及【倍升股進階課程】。
兩個都是股票班,只是「基礎」與「進階」,你可以報相關課程,而我除這兩個課堂外,無作其他付費教授。
「基礎班」適合初階投資者,你可以報。
或者你可以首先從書本學習,書本在三聯、商務、誠品都有得賣。由於部分書在一些書店已斷,所以若你見唔到,問下職員就得(又或向職員訂都可以)。
以下是我的12本書:
《80後百萬富翁》(第8版)
《80後2百萬富翁》(第4版)
《80後3百萬富翁》(第2版)
《財務自由行》(第6版)
《大富翁致富藍圖》(第4版)
《50優質潛力股》(第3版)
《50穩健收息股》(第3版)
《50值博倍升股》(第1版)
《股票勝經》(第3版)
《選股勝經》(第2版)
《年報勝經》(第2版)
《5年買樓4部曲》(第1版)
你入門可首先睇:
《80後百萬富翁》
《股票勝經》
《財務自由行》
之後再睇其他。
------------------------------------------------
Q18419:
你好,龔sir,我每個月月入20000左右,每個月供3000蚊2800,2000蚊1177,請問正確嗎?還可以怎樣改善理財策略?多謝
龔成老師:
可以。
你上述所供的都是有質素的股,你保持長期進行就得,如果日後有較多資金,應該先加大盈富(2800)的金額,之後就再入其他的股去進行月供。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q18420:
你好 龔成老師
有1000股 823 領展 均價93
點部署好 一直都想溝貨
唔知點算好
龔成老師:
這股有質素的,現價合理,你可以加注。
最重要是,你加注後,這股佔你股票組合的比例不會過多,同時,你仍有現金剩,等你可以在之後,如果出現大跌市,有資金買入股票。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。