【龔成問答信箱】(Q21421-Q21440)
Q21421:
龔sir上完你個堂,我分析左152呢間公司,因為阿Sir有推薦過548收息,而152又係548嘅母公司,我睇過佢係業務覺得佢嘅增長能力應該好過548,
所以想考慮用作收息及有所增長。現在有幾個問題唔清楚,想請阿sir解答:
1 佢2020年嘅流動負債得大增一倍幾是否係收購蘇寧易購引致呢,對佢本身有咩影響呢?
2 這股近幾年都派特別息,是否會對往後派息不穩定呢?
3 我搵左佢近5年平均市盈率係7.6-10.4,以佢最新一年嘅盈利1.1嚟剩返,得出嚟嘅估值大概係$8.4至$11.4,是否太低?阿Sir認為合理價係幾多?點計算呢?
唔好意思新手上路要勞煩阿Sir幫幫手
龔成老師︰
先講深圳國際(0152),此股係有質素,是不差的收息股。
佢主要從事收費公路的開發、營運及管理;物流中心及綜合物流港的建設、營運及管理;提供第三方物流服務、物流資訊及金融服務、港口及相關服務、物流園轉型升級服務。
過往業務穩定,生意與盈利都不差,不過就不是高增長類。這股都有長線投資的價值。現價合理,投資收息可以。
1) 此變動與收購蘇寧無關,只要你留意資產負債表,你會發現變動,主要係來自"貨款"部份。
當你再仔細睇附註25,你就會發現,其實係一些"中期票據和債券"到期日,由以往多於1年(計入非流動負債),變成1年之內(計入流動負債),因此流動負債才會大增。
以集團現時財務狀況,負債問題不算大。
2) 由於近年特別派息,主要來自土地轉讓的收入,這些收入都是一次性。因此,有機會往後特別派息會有波動。
3) 我地係計算合理市盈率時,會用過去10年數據,抽取中間4個市盈率7.6 - 9.6倍,作為參考。但在採用前,你先要分析,這個4個中位數,是否可以合理反映其價值。
我地睇翻過去10年的市盈率圖表,你會發現自2018年起,整體數字出現明顯回落。
因此,我地就要先去了解當中原因,點解有這樣的變化。只要你仔細留意過去幾年年報,你會發現集團近年特別派息原因,主要係來自轉讓公路資產。
集團本身收入,主要來自公路收費。而公路,自然係集團的重要資產。當這些重要資產減少,市場會預期佢賺錢能力弱左,故近年給予的市盈率估值,都會較再早幾年為弱。
因此,我地計算合理市盈率時,要作出相應調整,大約係6-8倍會較合理。再以過去5年,平均每股盈餘HKD1.846計算。
合理價值︰約為HKD11.0 - 14.7。
當然,這只是其中一個估值的角度,而投資者在進行估值時,會同時用多個估值方法去進行估值,得出更立體的結果。預佢現時估值合理中間至中下。
------------------------------------------------
Q21422:
Hello成哥,上完股票班真係學到好多嘢,令我更有信心選股同埋計算估值。我最記得一上堂時你叫我地分清楚urgent同埋important,我相信上堂學終身受用嘅知識一定係最important
龔成老師:
我地一定要分清「urgent」、「important」。
香港人太多趕急的事,以至一直都唔做重要的事,所以我先第一堂同大家講,課堂好重要,比你用一世的,我見個有部分同學好認真,佢地會為左唔遲到上堂,而要求公司早走。
我見過有同學為左做最後的大功課,請左公司半日假。
如果你之後的決定,都明白「urgent」、「important」,集中處理「important」,你往後會好成功。
------------------------------------------------
Q21423:
龔Sir 你好, 想請教你一個問題, 如果有一隻股票, 股價年頭7元, 入左2000股, 年尾8元, 另每股派息0.472, 咁回報係咪21%? 見下計法:
原本: 7元 x 2000 = 14,000
一年後: (8元 x 2000) + (0.472 x 2000)
= 16000 + 944 = 16944元
回報: (16944 - 14000)/14000 = 21%
*以上所指係置富房託
如果回報有21%, 咁又唔錯喎
謝謝!
我指如果我無理解錯回報有21% , 收息股黎講好好, 對嗎? (雖然只有2手)
龔成老師:
對,你計算正確。
以房託及收息股來說,這個回報是高回報,其中一個原因是你買入時,當時房託受疫情因素影響而向下,所以能以一個不差的價位買入。
長遠來說,房託較難每年有這個回報,你預是收息及基本增長。這股可長線,你的投資不差。
------------------------------------------------
Q21424:
成哥,你好啊朋友最近誤入佐以下股票
8083中贊@3.9×8000
3833新彊鑫礦@2.13×20000
235 中策@0.2575x150000
3321 偉鴻@5.2×15000
1357 美圖@2.94×3000
[email protected]×200000
[email protected]×50000
請問應否繼續持有?如重新規劃組合現時有咩可以選擇,謝謝成哥無私既分享
235係0.2575至岩,希望成哥能卑d意思,幫幫我朋友可以重整組合,謝謝
龔成老師:
坦白講,持股大多無質素或只是熱炒類,部分就有少少質素。
首先你要明白一個概念,我地持有一隻股票與否,關鍵位是企業質素、前景,不要被買入價影響。買為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
中國有贊(8083)不是劣質,但不建議持有太多。
新疆新鑫礦業(3833)屬風險類股,不能持有太多。
偉鴻(3321)無質素,宜賣出。
中策集團(0235)質素唔太好。
佢主要從事投資證券、金屬礦物及產品及電子組件貿易、放債及證券經紀業務。
睇翻過往的業務情況,非常波動,生意上落大,有時大賺有時大蝕,風險高。加上企業規模不大,投資價值不高。
這股股價有時會大升,但可能只是中短期業務與消息,長遠未必一定利好。
美圖公司(1357)正面,佢過左最差時期,現時正向好。
佢主要從事提供在線廣告及其他互聯網增值服務;以及開發、製造及銷售智能硬件產品。
見佢財務數據改善,這企業仍有發展力,有長線投資價值。不過業務變化始終大,不建議大注投資。
結好控股(0064)質素一般般,不宜持有太多。
英皇國際(0163)質素不太好,賣出較好。
建議之後,投資翻一些穩健類的股,如不懂選,就投資ETF。
------------------------------------------------
Q21425:
老師,你本《5年買樓》的書好正!對我這對買樓O認識的人來說,可以在很短時間內對樓市有個整體概念和有信心可以去買樓!
可措現時樓市已回升不少,很多屋苑已破頂,現在只能繼續等待!
可否請間老師,現在手頭有大约五球,在等待樓市回調才買樓,現在應如何配置這五球呢?因為不知要等到幾時,又不想令這五球繼續遍值!謝謝!
龔成老師:
如果你本身無自住樓,而自己又有這需要,其實已經可以考慮,最重要是你資金足夠,在供款方面無問題,買樓後仍有現金剩,這樣已可買。
好多人會分析樓市走勢,但我相信這是好難的,反而考慮「自己的需要及配置」,才是你買樓更大的分析點。
香港樓市,中短期會有少少上落(但不會大跌),長遠會向上。
首先要睇經濟基本面,如果經濟持續地差,失業率上升,樓市終會向下,這會對樓市有中期性的影響,不過,就算跌,都不會大跌,最多只是小跌,如果經濟差的情況不是太大,甚至不跌,這是由於背後的需求大。
在長遠計,我仍相信樓市在長遠計,因供求關係,仍是向上多。因為現時香港買樓的需求仍大,而長期供應不足,加上政府往後施政只會更加困難,好多所謂的大計劃都未必能夠實行,又或最後規模細左。
另一方面,需求大,我見唔少適婚年齡的朋友,都正等機會買樓,但未買樓,這些是「潛在需求」,過往每年不斷累積,只要樓市跌少少,就會有需求走出來,這令樓市不能大跌。
另外,樓市另一作用是「投資」,現時的租金無大跌情況,以投資回報率的角度分析,樓價都不會大跌,因此樓市平穩。
長遠計,租金及樓價會平穩,有少少向上,但不是倍升,不會好似過往般倍升,而是平穩向上。
如果有自住需要,只要在供款方面無問題,買樓後仍有現金剩,都可以考慮下置業。
------------------------------------------------
Q21426:
老師請問成本上升算利好定不利消息? 我最近研究紙業,點解紙材成本上升,有d賣紙既公司會賺多左? 究竟成本上升係好事定壞事?
龔成老師:
其實這是複雜的問題,往往要睇行業情況,以及企業營運情況。
有些行業,當成本上升後,能將絕大部分轉嫁比客戶的,可能因為行業的競爭有限,又或全行的營運模式都相同,因此佢地會同步加價,而客戶無太大的選擇權。
當我地分析時,往往會睇翻企業有無「成本轉嫁」能力。
當你分析時,要同時睇企業的毛利率,如果成本上升但毛利率不跌,反映企業有成本轉嫁能力,即是成本對佢無影響,往往有一定的優質度。
------------------------------------------------
Q21427:
想問老師有冇一啲儲蓄型危疾保險推介
龔成老師:
無呀,因為我不從事這方面的銷售,你可以去銀行或保險公司問下。
最重要是,你按自己的「需要」去買,保險就是將你不想承受的風險,轉嫁比保險公司。這是防守的動作,不過,我地理財最重要是攻守兼備,因為不用太多,「足夠」就得。
------------------------------------------------
Q21428:
龔Sir你好!本人3x歲,想問一下長遠收息同增長,可以考慮以下股票持有或買或增持?或龔Sir 有甚麼推介?
1. 1310 ($11買)
2. 1830 ($4.4買)
3. 331 ($4.5 買)
4. 398 ($2.5 買)
5. 1373 ($2.5 買)
6. 1523 想買
7. 1883 想買
8. 3067 (月供1/2手)做增長股票
非常感謝!
龔成老師︰
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你3X歲,我一般會建議你用「平穏增長股」 + 「潛力股」的組合,先做好財富增值部份。
除非你個人極保守,或者本身有其他原因,需要有額外穏定現金流作支援。
否則,而一刻我唔建議你投資太多,中信國際電訊(1883)、香港寬頻(1310)這類收息股。
另外,東方表行集團(0398)質素較一般。這些股票,若持貨不多,可持有。但若太多,最好沽出部份換至其他股票。
珩灣科技(1523)主要以「Peplink」及「Pepwave」品牌從事SD-WAN路由器的設計、開發、推廣,以及提供相關軟件許可及保修與支援服務。
SD-WAN路由器可連接多個廣域網(WAN)連接、智能分配流量給多個廣域網、可集中管理,以及必須利用加密技術建立安全連接。
業務及盈利都有不差的增長,發展不差,不過公司規模始終較細,因此始終都有風險。
這股長遠不是無價值的,但都要明白發展緊的,都是有變數的行業,所以股價潛在波動可以較大。
現價都算是合理的,但不建議大注投資,長線投資都可考慮。
必瘦站(1830)長遠有發展,本身有一定的質素。
睇翻之前的疫情,佢身處的行業受影響,但佢的現金流及財務數據都唔算差,這點可以想象到,當正常的經營環境,佢的生意一定唔錯。
加上佢的野心愈來愈大,本身有一定的技術,同時不斷將香港的業務模式複製到其他海外地區,我見佢加強了發展其他地方,因此發展不差。
這股有長線投資價值。業績前計佢$4是合理區頂,業績後股價升左好多。現貨可持有,但暫不宜加注。
將來你可以投資以下股票,但若果你投資知識不高,可先較集中在平穩增長類股,至於潛力股,只宜小小注,最好是你提高投資知識,等你有一定知識,先慢慢增加翻潛力股比例。
現時大市只在合理區,資金唔好盡用。最好留有部份,等大跌市出現時,可以用來掃貨。
------------------------------------------------
Q21429:
龔成老師,您好!我見有讀者問你移民後的投資策略,但佢地冇提到一點,就係英澳等國家抽取資產增值稅,
例如股票買賣利潤,政府會抽取約30-40%税。如果考慮埋這因素,我們需要調整投資策略嗎?
例如減少平穩收息股(因為抽税後利潤所餘無幾)集中喺增長股?謝謝
龔成老師︰
我自己無對海外稅務作深入研究,比唔到太多具體意見你。但當考慮到這些增值稅項時,的確會令原先回報被打上拆扣。
但除非你不作投資增值,或者移民到低稅率地區,否則這個問題,基本上係無可避免。
投資策略基本上唔會大變,但你計算長線回報率時,要因應相關稅項作扣減,以免令預測過於樂觀。
最後,我建議你去問翻當地稅務顧問,看看有沒有一些節稅方法,從而減少這方面的影響。
------------------------------------------------
Q21430:
老師你好!
今年28歲
月薪34k
要比10k 家用
有月供2k(2800)
保險每個月1.5k (每年一次過付款)
有50k Savings
有意今年同男朋友搬出黎
啱啱開始上你既堂
想用月供/ 分注投資方法放啲錢入水桶1同水桶2。
另外,今年個市似好熾熱,身邊所有人都喺度講緊股票,如果我用計公司價值判斷佢價格係貴或平,其實係咪都可以放心入股?
今年會唔會算係一個較危險嘅買入時機?
想請教老師意見同指導。感謝
龔成老師︰
現時大市在合理區,雖然部份新經濟股,有輕微過熱架情況。但整體大市水平,尚算合理。
我地唔會去估個市點走去定買賣策略,只會繼續用企業估值,去定平貴咁買貨。
但當成個大市去到一個狂熱的情況,我地就要保守少少,現時未算去到好狂熱。
以你現時28歲,投資在水桶1同水桶2,係正確做法。但你收入計,每月月供金額太少。
如果你唔係有太多必需開支,我建議你盡量將月供金額,提升到1萬以上。因為你年青,應把握時間,盡力去做好財富增值部份。
而一刻,你唔需要急住去配置,或者新加其他股票去月供。因為投資係一個長線計劃,你可以等上完堂,有一定知識和明確概念,才去調整會較好。
------------------------------------------------
Q21431:
hi 你好 龔sir,我是一位18歲學生,沒有part time 現在一邊學習緊投資知識,
1現時我有一萬元想all in 入股票,想搵一隻股票收息邊隻最好?
2我現時打算購買你的書學習投資知識,邊一本系適合我這個BB新手,多謝
龔成老師︰
1) 你這個年紀,就算資金不多,都應努力學好投資知識,甚至小注去吸收經驗,為將來準備。所以,你做法好正確。
由於你暫時經驗和資金都不多,建議你先從以下收息股入手。如果你不太認識這些股票,可以直接買3110派息基金,都可以。
但將來到你有穏定收入,又對投資有一定了解,就要加大投資力度,改為買一些較有增長力的優質股。盡力把握年青時間,去為自已財富增值。
目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、置富(0778)、陽光(0435)或收息基金(3110)都可以。
2) 以下是我的12本書:
《80後百萬富翁》(第9版)
《80後2百萬富翁》(第4版)
《80後3百萬富翁》(第2版)
《財務自由行》(第7版)
《大富翁致富藍圖》(第5版)
《50優質潛力股》(第4版)
《50穩健收息股》(第3版)
《50值博倍升股》(第3版)
《股票勝經》(第3版)
《選股勝經》(第2版)
《年報勝經》(第2版)
《5年買樓4部曲》(第2版)
你可首先睇:
《80後百萬富翁》
《股票勝經》
《財務自由行》
之後再睇其他。
------------------------------------------------
Q21432:
龔成老師,很喜歡睇你嘅影片,好多分析都講得好好,特別係價值投資法。
本人看好中國嘅保險業,隨住14億人口開始富起來,相信保險嘅需求會越黎越高。
想問問你對中國人壽2628同財險2328嘅睇法?同業中,長遠有高升值潛力嘅股票又可以推介一下嗎?期待你嘅回覆,多謝
龔成老師︰
我自己都係用「價值投資法」,巴菲特用左這方法賺大錢好多年,這是公開的。
但一般散戶就是貪賺快錢,而不用這方法,因此,令到一般散戶仍是輸多贏少,我們仍是賺大錢的一群。
中國隨著人口增加,城鎮化、人均收入增升等,都對保險這類產品需求,只會有增無減,故長線中國保險叢係正面。
中國人壽(2628)不是無質素,但近年有質素下滑情況。現價合理,但投資價值只係中等。
中國財險(2328)主要於國內為各界客戶提供多種財險產品,包括機動車輛保險、企業財產保險和家庭財產保險。
過往的生意與盈利都不差,不過就無乜增長動力,質素算是中等。這股現價合理,可長線,但就主要預係收息,唔好對股價有太大期望。
如果你看好中國保險業和其增長潛力,平安(2318)會係較理想選擇。佢有規模,有品牌,近年的發展都不差,不過,股價有時會有少少波動,這主要受投資市場表現影響。
這股有長線投資價值,是平穩增長型。現價算係合理區中上部,分注投資就可以。
------------------------------------------------
Q21433:
老師你好,我最近幾個月開始留意你page,我以往只有3次買賣股票經驗。
但有一次錯信股票group輸了幾萬蚊,加上13元買入石油股,依家跌到得番8蚊左右,真心輸到怕。
想請教依家石油股係咪唯有繼續持有?
求指教
龔成老師︰
近期好多網上騙案,就好似你所講股票group,要小心。
記住,我地買入一隻股票,一定要知道佢質素、行業前景、財務狀況等,才去投資。
如果你連間公司點賺錢、行內有乜優勢、點解未來有發展和增長潛力,都答唔倒自已,純粹係聽消息,甚至係某某群組意見。咁你就要停一停,唔好投資住。
石油股,好似中石油(0857)、中石化(0386)、中國海洋石油(0883)質素都算有,但不是最高質類別,佢對油價較為敏感,所以,如果長遠油價向上,佢都會增值的。
雖然佢都有一定的規模及質素,但卻不是最高質素的企業,這是由於佢地的產品自主力較弱。
石油是商品,當中沒有差異性,佢地要將石油賣出,只能跟國際油價,這令佢地處於被動狀態,沒有價格自主的能力,這令佢地的獨特性有限。這類商品企業,都可投資,但就要明白不是最高質的企業,不要大注。
如果佢佔你組合好多,你可以每有反彈,就慢慢沽出部份。
------------------------------------------------
Q21434:
成sir 您好!小弟年29。已經有想財務自由的目的。不想再浪費自己的人生了。
最近學習窮人與有錢人的態度及資產與負責的分別。
月入17000
扣除一切開支可以儲1萬元。
銀行有70萬。
有留意你大推盈富 港鐵 領展等等。
以最終目標財務自由及每月被動收入約20k.
小弟投資經驗0。有睇過下成sir 教導以月供模式較適合初學者。留部份現金流等大市跌時可以大手購入長線投資收息股?
小弟會睇書學習如何去計算公司的真正價值。多留意不同公司的年報表等。
有一個最不明白的是睇財經新聞。是否留意新聞介紹公司背景及行業發展?長遠是會否留意公司會否接觸新行業等?
另一個最大問題是如分配70萬去錢滾錢達到 金錢為你工作。
小弟已經開始睇投資書。增值自己才是最大的財富。長遠需要報讀會計課程?好人一生平安
龔成老師︰
如果你希望最終可以每月有2萬蚊現金流,以股息率6%計,你需要本金400萬,這就是你初步目標。
你現時29歲,係財富增值黃金時期,除了增值外,也緊記要努力提升自己投資知識。
由於你未有投資經驗,好易會買貴貨,所以用月供或分注入貨模式,對你這類初學者,會較安全。
以你29歲,可以選擇一些「平穩增值股」+「潛力股」作投資目標。
以現時大市合理區狀況,月供最好用一半每月儲蓄,另一半就先儲起架策略。
平穏增長股:金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
潛力股:安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、GX中國電車基金(2845),但就要明白波動性比上述會高左,同時風險大左,你要自己平衡。
若你不懂選股,可以先用盈富(2800)作目標。其餘合適股票,到你對佢地有一定了解,才從中選股。
現時大市只是合理區,你現有70萬資金可以先投入15-30萬,用"分注"形式,慢慢買貨。餘下一半和每月所儲倒的資金,就等大市出現一定程度的下跌,才大力度掃貨,然後長線投資。
由於你很年輕,相信要達成400萬目標不難。
我假設投資回報有10%(連股息再投資),你每月投資$10000 + 70萬本金,大約10年多後,就會增值至400萬。
至於投資知識方面,新聞主要係睇有無一些事情,對企業本身質素,或者長線發展有影響。例如早前內地監管政策收緊,就令阿里巴巴(9988)等企業的風險度增加左,這就是要留意地方。
我地要不斷吸收「資訊」,例如宏觀經濟情況,企業發展,各行業的情況。但我地睇新聞不是要知道所謂的「意見」。
除了看書、年報、新聞外,你可以報讀一些投資相關課程,去提升相關知識。
本人的【投資倍升股課程】適合初學者的,每一課後都會有指引比你,要你在一星期內找那些資料,溫那些內容,只要你跟著去完成。
到你讀完整個課程後,你已能自己選股、投資、評估平貴,在投資上已掌握了一定的知識。
------------------------------------------------
Q21435:
Hi 阿sir你好,想聽下你意見,本人38歲,女,月收入$53000,現時有兩個物業,供款分別15000及18000,租金收入為$15000。每月開支$15000左右。
另一單位明年亦打算出租,大概收$11000租金左右。
睇左你好多資訊,有做月供股票,每月$13000,分別銀娛$2000、比亞迪$2000、中銀香港$2000、小米$1000、阿里巴巴$2000、友邦保險$2000、港鐵$2000。
現時股票有11萬左右,現金$25萬,手上保險有50儲蓄。
想10年後,可以有500萬,想問下你意見?我現時股票組合投資是否正確?
希望得到阿sir回覆
龔成老師︰
以你38歲計,應先做好增值部份,你現時持股都係合適合。但留意,比亞迪(1211)現價偏貴,要回到$120左右水平,才建議再開始月供。
此期間,你可以用GX中國電車基金(2845)- 這基金的目標是追蹤Solactive中國電動車指數NTR「相關指數」表現緊密相關的投資回報。
或其他潛力股代替,如中生(1177)、福壽園(1448)、安碩恒生科技(3067)、港交所(0388)、騰訊(0700)。
現時大市只係合理水平,現金和股票最好各佔一半,你可以多5-10萬去分注入多少少貨。餘下資金,就等大跌市出現,才加大力度掃貨。
另外,"保險"主要係用來防守,買足夠保障就可以。儲蓄成份架保險,我就唔建議太多,增值最好都係留比優質資產(如優質股、物業等)去做。
我假設投資回報有10%(連股息再投資),你每月投資$13000 + 本金36萬,10年後大約會增值至340萬。如要達至500萬目標,你要將月供加大至$22000,才較大機會成功。
所以,我建議你利用明年新增租金收入,加大投資力度,以助你達成目標。
物業方面,你現時已經持有兩個物業,之後就暫時唔好增加固定資產類別,令財富組合更平衡。同時,如果可以的話,盡快將手上物業出租能有助你提高現金流。
------------------------------------------------
Q21436:
龔成老師,你好呀!現年40歲女,剛離婚無業,賣了樓有200萬現金。現在有以下股票,請問我有買啱嗎?
應該長期持有或是到一定嘅時候賣掉獲利? 909跌了一半,我應該怎樣呢?
#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5
我嘅目標係可以在短時間內買一個細單位300~500萬內自住,唔駛再租屋,請問我嘅投資方向啱嗎?
應該怎麼樣更好呢? 麻煩老師解答,萬分感謝!
龔成老師︰
我想先要你明白少少財富增值概念,我地做財富增值,最重要不是睇「賺蝕」,不是睇「買入價」,而是睇質素。質素不好,增長力弱,就有可能賣出,蝕都要賣。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?
即是你想設計一個怎樣的投資組合?長期、優質、平衡、適合你。
所以,只要係優質的股票,我地一定會長線持有,而唔會半路中途去沽貨。除非成個大市好狂熱(現在未算),或者個企業長線質素轉壞,我地先會賣出。
回到你本身情況,首先,你有一個明確目標,就係短時間內購買物業自住。同時間,你現時在待業狀態,故中短期內對現金需求不少。
以你40歲計,應以增值為主。你持有股票,大致上係可以。
明源雲(0909)有潛力。
佢主要係中國房地產開發商及房地產鏈參與者,提供企業級ERP解決方案及SaaS產品。
睇翻佢之前的資料,佢係中國房地產開發商的第一大軟件解決方案供應商,市佔率有約2成。係呢個市場裡面,按收入計,亦為ERP解決方案及SaaS產品的最大提供商。
其實,佢的角色可以話中國房地產行業的數字化轉型,為房地產開發商及其他參與者,開發了一套行業垂直的ERP解決方案及SaaS產品,以助其管理廣泛的業務運營。
包括銷售及營銷、採購、成本管理、項目管理、預算以及房地產資產管理,佢的SaaS產品包括雲客、雲鏈、雲採購及雲空間。
業務雖然有增長力,但你買入價唔平。現時回落近半,但初步分析,依然都係屬於貴水平。始終市場現時對這類股有好大期望,此類股票,波動性較大。
此股可持有,但由於你持股比重有點高,我建議你每有反彈,沽出部份,去平衡風險。
另外,華潤啤酒(0291)都有質素,但佢佔你組合近半,太過高。緊記,個別股票比重不要超過組合15%,否則會出現過度集中性風險。所以可考慮賣出部分。
你可以用沽出部分以上2隻股票資金,再加上30-50萬,去分注慢慢買入以下優質股,並長線持有。
平穏增長股:金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
潛力股:安碩恒生科技(3067)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、GX中國電車基金(2845),但就要明白波動性比上述會高左,同時風險大左,你要自己平衡。
若你投資知識不高,可先集中在平穩增長類股,至於潛力股,只宜小小注。到你提高了投資知識,才慢慢增加翻潛力股比例。
餘下資金,主要係用作你置業基金。再加上,你還未有工作,最少都要留有半年基本生活開支的應急錢,作為後援。
若將來股市有明顯調整,你也可以考慮用部份資金來入市。這樣安排這200萬,相信會較有彈性之餘,當你都會較有保障。
至於置業方面,你係用來自住。緊記要堅守一個準則,就係「供得起」。
現時香港樓市算係合理區頂,你可以慢慢物悉目標,到有較理想價錢,又有信心可以供得到,就可以考慮出手。
------------------------------------------------
Q21437:
你好 龔sir。睇左你fb一段時間 先買入必瘦站 會繼續持有 多謝你既分享。
另外亦留意到你之前講既粵海投資 本身想入手 但最近參股嘉誠環保工程 但網上不多關於嘉誠環保工程資料。
消息公報後 股價有所下跌 請問你對於呢個公司行動有咩睇法?
會否影響你本身對呢個股票既評價呢? 謝謝
龔成老師︰
必瘦站(1830)長遠有發展,這股有長線投資價值。
但現價已經係偏貴,有貨可持有,就唔好加注住。
粵海(0270)宣布收購嘉誠環保工程註冊股本總額合共 53%的股權,在該收購完成後,嘉誠環保工程將成為其非全資附屬公司。
嘉誠環保工程是一家在中國成立的有限責任公司,其於 2005 年成立,主要從事環境工程工作,並為工程相關工程提供投資、設計、建造、運營、諮詢、設備研發和製造服務。
嘉誠環保於中國河北省及河南省的市政給排水工作,相信集團想進一步提升在華北地區的市場份額和品牌影響力,初步睇係正面。
至於中短期股價走勢,未必一定跟企業質素和發展潛力有關。我地分析時,一定要集中用長線質素去做判斷。
現價計,算是合理水平,可分注入貨。
------------------------------------------------
Q21438:
Hello 龔Sir, 最近1638佳兆業跌了很多,值得入嗎?
另外,1503招商局有成8厘息,係咪值得入當收息? thanks!
龔成老師︰
佳兆業集團(1638)主要從事物業發展、物業投資、物業管理、酒店及餐飲業務、戲院、百貨店及文化中心業務,以及水路客貨運業務等。
業務發展不差,不過盈利就較為波動。另外,由於負債較高,因此都有風險。現價合理的,但唔建議太大注。
招商局商業房託(1503)佢持有及投資中國相關的物業組合,物業組合有深圳市蛇口的多項物業,包括寫字樓綜合物業新時代廣場、數碼大廈、科技大廈及科技大廈二期,以及購物中心物業花園城。
物業有質素,不過較受經濟週期因素影響,租金會有少少波動,令到這股的股價較為波動。現價合理,有投資收息價值,不過唔建議太過集中在這房託。
------------------------------------------------
Q21439:
你好~~老師,我有少少問題希望你幫到我
1)想問一下康希諾6185 我400(200股)同260(200股)都有貨,呢兩日我見升返唔少,今日心大心細諗緊放唔放~~我唔係好識分析呢間公司前景好唔好?
2)我買咗中國電動車2845,138元400股~~有見過你講過買呢一個股票都不錯,我要唔要而家低價再入多少少
3)快手362 有200股,241元又入了200股
4)藥明康德189元 入了200股
我有啲股票分開兩次入,我應該取一個中間價,等升返上去放晒佢,定係低價入嗰啲,覺得升到一個價位可以先放咗佢,高價位嗰啲就照放喺度?
謝謝
龔成老師︰
你好著重個帳面數,其實你放貴個1手先,定平個1手先,係無實質分別。只係心理上,覺得放平個1手,你就賺左。貴個手就放係度,當無事,這種想法好錯。
你要明白一個概念,我地投資唔係賺差價。而係想將一些長遠只會貶值的現金,換成會增長的優質資產(如優質股、物業等),並長線持有。
因此我地持有一隻股票與否,關鍵位是企業質素、前景,不要被買入價影響。因為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
1) 康希諾生物(6185)主要於中國從事研發疫苗產品,疫苗產品線如下:3種臨近商業化在研疫苗:
包括腦膜炎球菌結合疫苗(MCV)組合(四價MCV及兩價MCVI,均為集團核心產品)及Ad5-EBOV(其由集團與軍事醫學科學院生物工程研究所共同研發,為中國第一種獲批淮作應急使用及國家儲備的埃博拉病毒疫苗)。
另外,有6種處於臨床試驗或臨床試驗申請階段的在研疫苗;包括針對白喉、破傷風及百日咳的DTcp疫苗組
合(嬰幼兒用在研DTcp、在研DTcp加強疫苗、青少年及成人用在研Tdcp)、肺炎球菌疫苗等。
業務有潛力,但估值好難,市場對佢有好大期望,股價炒得幾勁,反而風險高。
這類股,是有潛力。但因為佢無盈利基礎,市場都只是「估估下」。
如果持有係可以,但一定只能小注。若2手佔組合比重都唔少,建議沽出1手,去平衡個風險。
2) 中國因為能源問題,長遠一定要發展電動車,這是大方向,故此股有一定投資價值。
現價依然係合理區頂區,你已有一定貨係手,唔建議你加注。除非你資金好充裕,就可以而一刻加小小注。
3) 快手(1024)係全球數一數二大的直播平台,絕對是一隻優質股,有獨特性,有客戶群,有潛力,長遠的發展力正面。這股有長線投資價值。
快手與業務夥伴合作提供了一系列產品和服務,於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。
快手科技已建立了穩定的用戶,在全球已佔據了重要的位置,企業有一定的優勢,以及獨特地位。加上用戶仍在快速增長,以及增長趨勢仍持續,預期有一定的發展。
雖然這刻盈利不多,甚至因加強發展業務而出現虧損,但這類股的分析特點是將來,等之後的收成期。
由於已擁有一定的優勢,以及仍增長中,企業要將用戶化成現金並不困難,只是時間問題,以及多少問題,預期2022年盈利模式已穩定,同時有一定的盈利。
簡單來說,企業有質素,有發展。現貨可持有,但你預短期股仍會十分波動。
4) 藥明康德(2359)都有d質素。
佢主要從事藥物研發平台業務。係藥物開發過程,主要分為藥物發現、臨床前開發、臨床研究及商業化生產共四個階段。
睇翻佢的資料,佢的服務對應各個階段,可分為以下四個分部:(1)中國區實驗室服務(2)合約生產組織(3)美國區實驗室服務(4)臨床研究服務。
佢的客戶包括美國、中國、歐洲及全球其他地區的製藥公司及及生物技術公司。
業務其實不差的,過往的生意與盈利增長理想。
當中最大的風險,就是市場估值,現時的市盈率過百倍,就算有增長力,都計都貴,股價上落一定會好大。市場現時對佢前景有好大期望,但如果增長力比市場略減,股價都會調整。
只可以話這企業有增長,同時有風險。現貨可持有,但唔好加注了。
------------------------------------------------
Q21440:
阿sir, 我尋日入3690美團,今日跌
0285 同 2382 應該幾時入呀
剛剛$31入咗3319,係咪都高呀?
龔成老師:
你唔需太著重短期股價走勢,最重要是長期的企業發展。
美團點評(3690)有潛力的,過往一直虧損,到近一年,開始有正現金流,這是一個實質的利好因素,因為之前一直在燒銀紙,現時初步見到成效,不過,估值的方法好虛無,因為現時的市盈率仍過百倍。
如果有利好消息,佢可以上好多,但如果估值修正,股價可太跌。
只可以話,潛力是有的,現價唔算平,之前明顯貴,之後回翻好少少,大約合理區頂至略貴,不過,一定不能大注。小小注,是較好的做法。
只要你持貨不過多,都可持有的。
至於比亞迪電子(0285)去翻$40會好少少。
舜宇光學科技(2382)有一定的質素,但現價合理區頂至略貴。
過往手機市場高增長,令佢鏡頭業務受惠不少,但近年手機增速開始減慢,你預佢增長力會變得較平穏。不過,手機市場又開始向好。
在長遠,無論是手機鏡頭,又或是各種鏡頭方面的應用,只會愈來愈廣泛,前景正面,不過,中短期可能會有少少波動。
這股可以長線投資,分注或月供較好。
雅生活服務(3319)合理價,有質素,可長線。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
萬元以下手機推薦2022 在 龔成 Facebook 的最讚貼文
【龔成問答信箱】(Q21261-Q21280)
Q21261:
龔Sir, 請問銀娛現價PB 4倍,金沙PB 10以上,Why PB so different ?
龔成老師:
記住,當我地計算企業價值時,要同時考慮企業的業務價值及資產價值,這是配合的。由於企業是永續經營,不打算這刻清算,因此投資者一般會著重業務價值多過資產價值。
有兩點你要注意,第一,市賬率是衡量企業資產價值的方法,但你要了解翻佢的資產價值是否有具體呈現在資產負債表,簡單來說,就是報表上的價值,是否能具體向映該資產的真正價值,這樣去衡量賬面值的代表性。
第二,市場估值時,可能是否考慮業務價值多過資產價值,甚至有些企業,市場不理會資產價值,因此,你要了解翻這企業過往賬面值的情況,市場如何定義價格與賬面值之間的關係,從而推算該賬面值是否有參考價值。
------------------------------------------------
Q21262:
老師,我係你學生,我現在想問下
1. 如何判斷那隻股是增長型?
2 增長型及龍頭 PE 就可調高至25-30?
3. 目前在分柝一些光伏板塊嘅公司 eg 福萊特玻璃
及隆基
我覺呢兩家也是增長型 可以給 30- 40 PE 嗎?
龔成老師:
1)要睇佢身處的行業,現時的業務情況,發展,以及過往財務數據,例如過往生意的增長力如何,預期將來的銷售怎樣。
2)的確可以調高,但未必有一個好實在的數,因為估值對每一個行業來講,其實都不同的。
3)隆基泰和智慧能源(1281)質素較普通,投資價值未算高,盈利變數大。所以,在估值上,都不會比太高。
至於福萊特玻璃(6865)有質素。你可以比高少少市盈率佢,但就未必值得去到40倍市盈率。
佢主要在中國生產及銷售光伏玻璃,此外,亦生產及銷售浮法玻璃、家居玻璃及工程玻璃,並向中國大陸、日本、新加坡、韓國、台灣、德國及美國等地客戶,銷售產品。
睇翻佢的資料,佢的光伏玻璃產品主要用於生產晶體硅光伏電池,以及用作薄膜光伏電池的蓋板,而佢的生產設施位於浙江省嘉興市。
無論生意與盈利都增長理想,財務數據正面,這股值得長線投資。唯一擔心的就是估值問題,始終現價唔算平,近期股價有時在合理區頂,有時略貴。如果投資,可以小注慢慢分注,不建議這刻大注。
------------------------------------------------
Q21263:
Hello 成哥 如果而家2238廣汽集團同吉利汽車等嘅車股比較 算唔算係比較值博嘅一隻?
我見佢都有電動車業務 但係股價跌到好殘
如果而家要揀一隻值博又有發展電動車嘅傳統汽車股 會唔會有比2238同埋175更好嘅選擇?
因為覺得經濟好返傳統汽車行業都會逐漸回暖
龔成老師:
廣汽集團(2238)本身都有質素的。
佢係中國汽車製造商之一,主要業務包括製造及銷售乘用車、商用車、發動機及汽車零部件,亦從事一系列汽車相關服務及其他業務。
佢透過共同控制實體廣汽豐田及廣汽本田生產多個系列的乘用車。
業務發展不過不失,但增長力就不算強。
長遠仍有發展,但不是高增長型。現價合理。
吉利(0175)本身的質素不差,擁有一定的銷售網絡及品牌,不錯的市場策略及定位,而又能把握中國汽車市場增長的機遇。
長遠來講,佢的品牌與發展在中國仍理想,2018年,吉利透過旗下海外企業,動用超過$500億人民幣收購戴姆勒股份公司9.69%股份。由于戴姆勒股權結構分散,所以吉利已經成為了戴姆勒集團最大單一股東。這不單有利佢有中國發展,同時長遠,可能加快了海外發展速度。
另外,佢未必發展自己的電動車品牌,但會發展當中的技術,相信在合作及自身價值上,長遠仍是正面的。
現時價位在合理區中上部至頂位,股價波動,有貨可長線。如果現價入貨,小注都得。
如果講長遠發展,吉利會較好。
------------------------------------------------
Q21264:
你好,老師,仲有問題想請教你!
好耐之前家人幫我以67.5入過1200股匯豐,一直以收息為主,其後跌市,有再入1200股,現在成本價56.1,應該持有定賣出一部份擺入其他股?
之前亦有月供$2000中銀香港,現已停供,現持有845股,成本價是28.614應繼續月供定持有?
如果我有5000蚊用作投資,我應該如何分配資金?以平穩增長股為主?定係可以考慮一些潛力股?感謝
龔成老師:
匯控(0005)賺錢能力與增長力比過往年代弱左,但又未去到完全無質素。銀行業的賺錢能力比過往減左,因此不能視為增長股,但當經濟好轉,始終都會有錢賺,因此都有投資價值。
相信長遠是收息股,但股價增長就有限。
這股都有投資價值的,但就未必值得佔組合比例太多,同時明白佢是收息股,增長力有限。。
如果你投資目標是收息,可持有。如果你希望有較高的增長,就應該在匯豐股價上多少少時,轉其他。
另外,你持有中銀(2388),這會令你的組合太過集中在銀行業。
其實,我地最重要是建立一個組合,要平衡,要優質,同一行業不要多過30%,同一隻股票不要多過15%,你長遠要平衡翻。
至於每月$5000,就要睇你的年齡及風險度,最簡單就是投資優質,平穩增長股。
你可以考慮盈富(2800)。
另外再加:銀娛(0027)、恆基(0012)、港鐵(0066)、中銀香港(2388)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
現時大市處合理區,可以一邊投資一邊留現金,而餘下現金的運用,就是等大跌市時出手,如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q21265:
我想問,你成日叫長線,但假如我一直持股唔放咪冇賺囉??
龔成老師:
你有「賺錢」的思維,反映你與98%的散戶想法一樣。
你追求實在的現金,認為要賣出賺到現金,才是賺錢,但我地最重要是講求「財富最大化」。
當一隻股票上升,例如你買入價$10,現價$15,賣出可以賺$5。
但當你套現$15後,你怎樣將這個「$15」再次增值,令你的財富增長,比留在原有股,得到更大的回報?
如果原在的股票是優質股,即是我地持有優質企業,當你一直持有這股,企業長期價值向上,就會帶動我地的財富有最大增長。
簡單來說,我地是從「財富長遠最大化」的角度去想。
可能你會問,一直不賣,那麼永遠無法取出財富。
我地累積財富,會用「先增值,後現金流」作策略,前者著重增值,之後就會改變策略,將已增值了的資產,轉為現金流類別,而我地就是不斷享受資產產生的現金流。
------------------------------------------------
Q21266:
龔成老師:感謝你既回覆,另外想問多少少,小朋友有無話幾多歲學投資好啲?
同埋用咩方法去慢慢教佢理財知識好啲?因為你成日都講理財知識越早學越好
龔成老師:
我相信7-10歲,都可以有基本的理財概念,例如錢從何來(起碼要佢知道,錢是由父母努力工作得來),另外就是量入為出,以及儲蓄的概念。
在適當年齡你可以比零用錢,這是一個理財的訓練,同時慢慢由每日比,轉為一星期,甚至一個月,等佢自己分配。
你可以玩「大富翁」之類的遊戲,都是一個學習過程。我記得《富爸爸》這書的作者,有出過「現金流」遊戲,有兒童版的,你可上網找找。
------------------------------------------------
Q21267:
您好,龔成老師,我係19年5月股票班同學,最近睇完您本書 五年買樓四部曲,想同太太買一層細價樓,請教一下您既意見。
而家我本身有一層自住樓,同太太加埋現金一百五十萬,想係灣仔買樓,因為老師既書都有講過星街、堅彌地街都較好
而且近商業區,人口密度低,有名校網,區內供應預小,我預算550萬至600萬左右,老師您認為買灣仔舊樓收住租搏收購好定係買30年左右既相對新樓有流動性好?
而家我自住樓係我自己名下自己供,睇完老師既書,開頭集中睇堅尼地城、黃竹坑、大圍、九龍城,但堅尼地城好似嘉輝花園咁租金回報相對低2里都做唔到
黃竹坑買唔起,大圍冇咩樓盤都係金獅花園無咩選擇,一係就補地價居屋,感覺上唔係私樓升值潛力又差小小
灣仔區黎緊有會展站,學您教的方法,去左城規會度睇,告士打道以南莊士敦道以北全部係商業用地,地積比去到15倍,咁樣我推輪呢度既地價會唔同,所以想係灣仔區置業。
猶豫緊600萬內預算,買舊樓搏收購好,還是買30年內200尺以上既樓保持流動性好?謝謝老師!
龔成老師:
由於你本身有自住樓,因此現時的作用是投資,最好是建立一個平衡組合,即是你買完樓後,最好仍有一定的現金,以及其他資產剩。
至於灣仔區,有質素的,你可考慮。
我會建議你買30年左右既相對新樓有流動性較好。舊樓博收購,始終成功率不高,因為全港超過50年的舊樓有5000幢以上,要成功被收購並不易,而這段時間往往要支付維修費等,因此值博率並不高。
至於其他地區,你可以留意一些細少少,樓齡不太新的樓,睇下有無一些目標範圍。
其實,灣仔不差的,都可以留意,只是我書無特別講,但整體唔差,你可以細心發掘。
------------------------------------------------
Q21268:
老師,如果我在嘉里派特別息之後賣嘉里轉港燈是否可行?港燈現在會不會特別貴?
謝謝老師指點
定是由得他,放嘉里在度?
嘉里建設(636)
龔成老師:
兩隻股的性質有點不同,唔好貪特別股息,因為佢派息後會除淨,股價會自然調整的,所以不一定有著數。
嘉里增長力都有,但港燈(2638)就只是收息,所以,要睇翻你的投資目標。
嘉里物流(0636)這股不差的,順豐入股後長遠發展更正面。
佢本身由嘉里建設(0683)分拆上市,係亞洲的物流服務供應商,主要從事綜合物流及國際貨運業務,亞洲、澳洲、歐洲及南北美洲的35個國家及地區設有逾400個業務點。
業務以第三方物流服務供應商身份為世界各地的製造商、零售商及其他客戶提供綜合物流服務,包括主要在亞洲提供廣泛的物流服務,如倉儲及增值服務、陸運及配送、退貨管理及各種配套服務。
另外,亦有從事國際貨運:提供的國際貨運服務絕大部份位於亞洲區內以及亞歐大陸之間,涉及空運、海運及跨境陸運服務。
------------------------------------------------
Q21269:
阿Sir,請問吓你以下一條問題,希望你可以回答給我明燈。 方間有許多股評人及平台都教人或講有人因着股市波動而買期權。
所以想問阿sir, 你認為期權可以投資嗎?
唔該阿sir.
是不是不接觸為妙!
龔成老師:
我自己會有少少保留,因為我20年前,都有玩不同的衍生工具,但最都是虧損,之後集中正股長線投資,就贏錢。
當然,一定有人投資期權贏錢的,但我過往做銀行及證券行多年,觀察散戶的投資成績,玩衍生工具的,大多是輸錢。
------------------------------------------------
Q21270:
龔老師你好,我想請教一下,我有2隻股票,分別是3868/$6.18買入及6606/$76.3買入,想問下這2隻股票前景如何,要止蝕嗎?謝謝
龔成老師:
信義能源(3868)有質素,佢主要於中國經營太陽能發電場業務,並向國家電網的當地附屬公司銷售電力。而佢派息高的,因為管理層話會用高派息政策。
投資價值都有,但不能投資太多,因為佢業務都有風險的,要注意股價波動,如分注長線都可以投資。現價已略貴。
這股前景不差,你持有就得,但預佢股價較波動。
諾輝健康(6606)業務有發展,但之前貴。
佢係中國結直腸癌篩查市場的先行者,旨在推進技術創新,並加快癌症篩查技術於中國的採用。
根據報告,其專有的非侵入性多靶點FIT-DNA測試-常衛清為中國首個且唯一獲國家藥監局批准的分子癌症篩查測試。
佢的兩大家居結直腸癌篩查測試產品,常衛清及噗噗管協同面向不同風險程度的目標人群。
「常衛清」有一定的護城河,可避免施行一些具有侵入性的手術,就能得到一些結果,長遠有一定的發展。潛力度存在。
佢已於全球包括中國境外的17個國家或地區,建立包含71個專利及專利申請的組合。通過直接銷售渠道包括醫院、體檢中心、保險公司、藥房及網上渠道向終端用戶提供產品,亦在較少情況下通過分銷商提供產品。
發展潛力都有,但始終業務未算完整,未有盈利,因此風險都存在,這類股小注投資好了。
------------------------------------------------
Q21271:
想請問而家中國銀行(3988)
而家仲抵唔抵買,現時$2.96。月供緊2手,諗住賺下股息,現時價位會否太高?
龔成老師︰
中行(3988)由於內地經濟無過往年代咁強,股價無過往咁好,由中美貿易戰開始,中國的經濟動力已有所減少,加上最近的疫情,都是影響經濟的因素。不過,初步已好轉,但不是高增長型。
現價合理區中間,唔話係好高,依然係有投資價值。用此股收息係合適,但就唔好對股價有太大期望。
另外,我地最重要是建立一個長期的「財富組合」,要優質,要平衡。同一行業不能太多,同一股不能太多。
所以,若你係以收息作為目標。你可以投資多幾隻不同類型的收息股,令你組合更豐富,和平衡性更高。
以下都係一些有質素的收息股,供你參考一下。
目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)或收息基金(3110)。
------------------------------------------------
Q21272:
老師你好!留意了你的教學很久了,但第一次鼓起勇氣寫信給你,希望真向你請教投資的心得和方法。
本人28歲,已婚,我月入3萬,老公大約工資2-3萬,供樓大約1萬5千蚊,減洗費後大約能每月儲蓄2萬5左右,並準備迎接小孩出生。
現有儲蓄約70萬,並擁有以下股票:
11 - 200股,$162 (在2019年已買入)
1211 - 500股 ,$270(當時高位入但沒走貨亦未分注)
9988 - 100股,$253
請問老師我應如何做好我的資產管理和投資策略?
龔成老師︰
我地投資策略其實好簡單,主要係因應你現時人生階段和投資取態,去建立一個平衡的財富組合。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你28歲,應以增值為先,建議你用「平穏增長股」 + 「潛力股」的組合。
由於「潛力股」係需要一定經驗,如果你經驗較淺,可以先小注,大約3成左右。若你係有一定經驗,你可以投資到約5成比重。
現有持股方面,無大問題。雖然比亞迪(1211)係買貴左,但由於佢優質,你連同阿里巴巴(9988)、恆生(0011)一齊長線持有就得。
而你快將迎接新生命,相信會有不少小朋友方面的開支。所以,你係開始投資計劃前,最好先儲起約半年開支和小朋友出世前後的相關洗費,以後備不時之需,咁會較為穏當。
現在你每月先用$13,000做月供,其餘先儲起,用一邊月供一邊儲蓄的策略。
月供方面,你可以選擇投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、領展(0823)、希慎(0014)、太古地產(1972)
或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里(9988)、騰訊(0700)、GX中國電車基金(2845)。
大市現處於合理水平,股票和現金最好各佔一半。你可以睇下70萬資金,扣除半年開支和小朋友支出後的比例。若現金佔依然高於一半,你可以再以"分注"形式,入多少少貨。
餘下一半和每月儲蓄,就等大跌市機會出現,才大力度掃貨,並長線投資。
------------------------------------------------
Q21273:
老師你好,我$15.7買入968, 請問應該長渣還是搵機會放?
另外老師認為939和9888值得長線持有嗎?
如果有100萬存款, 股票比例30萬ok嗎?謝謝回應
龔成老師︰
信義光能(0968)本質不差,業務保持有一定的增長力,股本回報率處高水平,加上現金流強勁,是有一定質素,可長線投資的股票。
你買價係略貴,但又唔係追貴好多。而且畢竟佢係有質素,你長線持有就可以。但你要預這股股價上落較大,故不宜佔比重太高。
若此股現時已佔你比重較多,你最好沽少少,去平衡翻個風險。
建行(0939)本身質素不差,有一定的規模,在全球都有網絡,本身不會無質素的。
不過,這股增長力不算強,只是一隻收息股,你唔好對股價有太大期望。
前景不過不失,中短期會因中國經濟有影響,銀行業的賺錢能力不及從前,加上壞賬因素,都會令佢中短期弱。不過,初步已好轉,但你預此股不是高增長型。
至於百度(9888),佢係有質素,有獨特性,長遠發展不差。
佢係全球最大的中文搜索引擎「百度」的營運商,係內地用家搜尋資訊主要對口,用戶規模突破10億,百度App日活潑用戶超過2億,多個指標都處中國第一。
業務上,佢擁有好強大互聯網基礎的領先AI公司。自2010年起一直投資AI以提升搜索及變現能力,並使用核心AI技術引擎「百度大腦」開發新AI業務。
我睇翻一些報告:
1. 佢擁有中國最多的AI專利數量以及AI專利申請數量。
2. 按累計拉取請求計,百度的深度學習框架飛槳居中國深度學習框架榜首,全球排名第二,僅次於Facebook Pytorch。
3. 按開發者數目計,百度開放式AI平台擁有超過數百萬名開發者,係中國最大的開放式AI平台。
4.按開發者數目計,係百度雲基礎設施上運行的Baidu OSChina是中國最大的開源活動開發平台,全球排名第三。
百度核心業務(唔包括愛奇藝)由AI驅動,為其貢獻超過70%的總收入,主要提供基於搜索、信息流及其他在線營銷服務,以及來自AI新領域的產品及服務。
並廣泛使用AI技術開發創新營銷服務(例如動態廣告),為各搜索用戶推薦最適合的營銷客戶產品。
現時佢坐擁不少資訊和客戶群,就可以利用佢地去發展很多不同業務,可以話係一個好大的優勢。佢收入不差,長遠有發展,但由於本身有相當規模,因此,未必是高速增長型。
百度在規模和質素上,一定係有。但近期科網股波動,風險高左,同時到上市一刻不確定性高左。
此股都係有質素,你現貨可長線持有。
現時大市只係合理水平,現金和股票最好各佔一半。如果你有$100萬存款,你可以多用20萬,以分注形式,去投資一些優質股。而餘下50萬資金,我地就等大跌市出現,才加大力度掃貨。
但緊記,我地最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能太多,同一股不能太多。重點係要平衡,唔好集中晒係2,3隻股票身上。
------------------------------------------------
Q21274:
老師你好,我打算購買元朗尚悅嶺370尺單位作投資用途,因家人先前買入,但移民了,想轉俾我,等我供。
我依家係同老公租緊屋住,因為元朗不方便返工,所以不打算用作自住。
但擔心元朗地區升值潛力低,如資金用作其他用途可能更好。想你俾下意見,唔該曬
龔成老師︰
元朗區始終跟市區有一段距離,所以長線升值能力會較弱。
特別係跟港鐵站較遠地段,會更受影響。睇翻你元朗尚悅嶺這個樓盤,唔係話無投資價值。但會相對較一般,增長潛力唔會太強。
你可以先比較翻租金回報率,到底吸唔吸引,再作決定。
如果租金回報率唔算係特別吸引,而你本身資金又唔係好多。我建議你先集中用優質股去增值,咁會較好。
------------------------------------------------
Q21275:
龔生你好!一路有留意你講3067同1810
想問吓如果想長期每月入貨,呢兩隻股票邊隻潛力會大啲
龔成老師︰
小米(1810)有潛力的,佢的產品性價比高,相信在全球好多個國家都會有市場,佢長遠只會進一步增長。
同時,佢建立的平台是佢長遠的增長動力,先賣手機,再利用手機的平台延伸銷售小米家電。長遠正面的。
這股可長線,你可以用佢作為月供選擇。
安碩恒生科技(3067),有長線投資價值。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。
所以有長線持有價值。由於基金有30隻股票,比起單一股票,風險能減低。
此股可以月供,或自行分注小注慢慢收貨(例如每月買一次、或2個月買一次),然後就長線持有。
潛力度和質素,2隻都係有。但安碩恒生科技(3067)係一籃子的科技企業,相對小米(1810)會更能分散投資風險。
但長線我地係要建立一個平衡性架組合,唔可以成個組合,只係得1,2隻股票。
而且,這2隻股票雖然係有質素,但佢地波動性都偏高。因此,若你係較年長,或者係較保守的投資者,這2隻股票就不宜持有太多。
------------------------------------------------
Q21276:
龔成老師,多謝之前的回覆,長話短說,我人已在外地,最終留下一小住宅單位在港,本打算能在外地置業才賣的,但勢估不到香港狀況動蕩至此,租客剛剛完約搬出,由於我一心留在外地發展,加上對香港信心不大,我正考慮應否把樓賣掉(樓價跟買入差不多),所以想請教:
1) 對自己此決定有懷疑,此時賣出是不是明智決定?
2) 另外,萬一真的賣出了,又不想現金儲放在銀行,以致可以於3-5年後可在外地置業,有可建議?外地的投資理論差不多吧?
非常感激,能傾談此topic的朋友不多,你的建議對我很有幫助!
3)我有推介朋友參加你的投資班,會否考慮推出網上版?
龔成老師:
1)不如我講少少香港樓市分析,你自己衡量現時決定是否正確。香港樓市,中短期會有少少上落(但不會大跌),長遠會向上。
首先要睇經濟基本面,如果經濟持續地差,失業率上升,樓市終會向下,這會對樓市有中期性的影響,不過,就算跌,都不會大跌,最多只是小跌,如果經濟差的情況不是太大,甚至不跌,這是由於背後的需求大。
在長遠計,我仍相信樓市在長遠計,因供求關係,仍是向上多。因為現時香港買樓的需求仍大,而長期供應不足,加上政府往後施政只會更加困難,好多所謂的大計劃都未必能夠實行,又或最後規模細左。
另一方面,需求大,我見唔少適婚年齡的朋友,都正等機會買樓,但未買樓,這些是「潛在需求」,過往每年不斷累積,只要樓市跌少少,就會有需求走出來,這令樓市不能大跌。
另外,樓市另一作用是「投資」,現時的租金無大跌情況,以投資回報率的角度分析,樓價都不會大跌,因此樓市平穩。
長遠計,租金及樓價會平穩,有少少向上,但不是倍升,不會好似過往般倍升,而是平穩向上。
2)賣樓後,如果你已對外國樓有認識,加上租金回報率不差,其實已可投資外國樓。
另外,你可以投資一些流動性較強的項目,例如外國的ETF(如美股VOO、QQQ),而香港ETF,如2800、3110、3067都得。
另外,可以考慮投資收息股,因為股價變動相對較少,對你的情況都幾適合,你可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
3)我最近同天窗出版社,合作開辦左一個網上課程,題目是關於「資產配置」的,即是講述各種資產與投資工具的特性、投資價值、在財富組合中的角色,至於股票內容就唔算多。你有興趣可睇睇:
http://bit.ly/3pP252j
課程按「人生階段」、「財富累積」、「資產特徵」設計,更有給年輕人、已婚人士、退休人士的精明理財建議。
完成課程後,你會學到:
✓財富系統概念,不再被炒差價的框框束縛;
✓股票、基金、債券、的士牌等資產的運用和買賣技巧;
✓懂得分辨資產質素和平貴,在最合適的時機買賣;
✓如何以最低的價錢,買到最具升值潛力的物業
✓致富3部曲,如何從當下這刻開始啟動!
至於股票班,由於內容太重要,只有實體班,唔會開網上課程。
因為之前實體股票班試過比人偷拍,之後放左上網賣,最後要搞到報海關先處理到,好煩。所以,網上類的教學,都好擔心有偷拍問題,風險太高,因為好多課堂內容,都唔想太公開,只想自己學生知,所以暫時都唔會搞。
------------------------------------------------
Q21277:
成老師你好呀,我現年22歲,月入21k,我學習價值投資開始了大約9月開始月供11k股票直至現時,月供包括(均價):
2800($26.9)
0066($41.9)
0002($73.1)
0027($60.1)
2013($13.5)
0981($21.2)
9988($237.4)
另外曾一手買入9988($227.8)一手,0981($20.2)一手,0823($58.4),一手。
我想問一問我的投資組合風險會唔會唔太適合我這個年齡?
這個月供組合會唔會太保守是否需要作出轉換?
是否需要加大月供額?
我亦有儲現金作一手低位買入,如果需要買會唔會有一些建議?
我亦想好好把握黃金10年做好投資將現金轉換成資產。
應謝回覆
龔成老師:
現時月供的股票,都有質素的,基本上可以持續,長期進行。但要留意,微盟集團(2013)、中芯國際(0981)的風險較高,因此月供金額不建議太大。
其他就無問題。
至於現時持有的3股,可長線持有。
基本上,現時的月供組合,可長期進行,如果日後有較多資金,可以投入更多在月供,你可以考慮加入恆生科指(3067),$2000月供。
因為你22歲,可以承受一定的風險,所以應調高組合的潛力度。
另外,當然要同時留現金,你可以等一些潛力股下跌時出手,如小米(1810)、中生(1177)、舜宇光學(2382)。
加油!要好好把握黃金10年!
------------------------------------------------
Q21278:
龔成老師您好,我是您的忠實讀者,住澳門,香港人,今天已40年歲。首先想多謝龔老師的無私建議及幫助,知道老師每天收到大量來信,需要每天花上數小時解答,希望老師繼續努力,並祝身體安康。
自上年疫情開始,有幸在網路認識老師及您的著作,基本上有關老師所寫的股票書籍都已經閱畢, 亦由上年年中在香港某銀行開始月供股票如下:
2800 盈富基金
0823 領展
1038 長建
0669 創科實業
0066 港鐵
1211 比亞迪
9988 阿里爸爸
現在每月月供約16000。盈富佔供款比例稍多,其他都平均供款,現在談成績真的太早,但帳面上已經賺回買書錢有餘,高見有20%,現在回落至8%左右
但我很清楚長期持有不需要理會股價波幅,只想告訴老師所寫的是可行的,亦明白價值投資,持續購買並長期持有優質股的威力。期待龔老師的新作,定必拜讀,努力增強財商。
另想請教老師以下我的邏輯有沒有問題:
本人在澳門手持一自住物業,可轉按減輕利息同時套現約140萬,每月新供款額佔月薪約23%(原按揭供款佔約21%)。
打算利用這筆錢同時努力儲錢作進一步資產配置,希望10年後能財務自由,但供款年期又變回25年(原按揭尚有15年),總利息加行政費約需要110萬。
我想問利用現在低息環境套現,以現在的現金購買優質資產並長期持有,用未來貶值的現金償還。因為是長期,縱然新按揭還息還本比例又重設,但此計似乎可行。我的想法有錯嗎?
明白必須購買優質資產,先增值後現金流,並定期檢視資產情況,多多學習才能實現。月供是因為我尚未能掌握估值,希望日後老師能來澳開班,定必報讀。
謝謝老師的時間及幫助。感激萬分。
龔成老師:
現時你月供的,可以保持,長期進行就得,這些都是有質素的股票,同時處於一個平衡狀態,而適合你的年齡的,當然,你同時都要留一定的現金在手。
對,我地一定要長線的,不要著重短期價格因素,集中長期的財富累積。
至於轉按方面,由於可減輕利息,因此值得做。而之後只是佔月薪23%,這數目不高,因此可以做。
至於套現了$140萬,其實原理是增加了負債,這點你要明白。如果增加負債後,仍是佔你總資產的比例數不高,就無問題,同時你要明白風險度會高左。
至於現時低息環境,你的方向是正確,因為利用低息資金,投資得到較高回報,能有效創富,不過,你都要同時留意風險度,因為現時的投資市場,並不是特別平,因此在時機上,只是中等。
最好當然在「有明顯投資機會,利用借貸投資,就能創造最大效果」。
因此,你的大方向正確,因時機只是中等,所以就算套現後,都只建議部分投資,餘下等機會。
------------------------------------------------
Q21279:
龔sir你好! 我係你舊生, 遲啲都會上你的進階班。上咗你嘅課堂之後, 都有做月供股票 和 買入優質股, 現賬面都有15%的回報, 個別股票更升80%, 感謝你!
我剛買了綠置居(我名下) 並於2022年收樓, 我月入40K, 一個人做按揭, 每月大概供$9000。
由於現在大約有$70萬現金和$70萬股票, 所以想為太太置業 並預算購買約500萬的物業。她薪金大約45k, 並預計只有她做按揭。
Plan A: 買市區舊樓, 近地鐵站, 約250呎, 35-40年樓齡
Plan B: 買荃灣舊樓, 行10鐘到地鐵站, 約330呎, 35-40年樓齡
Plan C: 暫不買樓, 繼續月供股票 和 儲錢。伺機再為太太買樓。希望龔Sir賜教, 感謝回覆
龔成老師:
現時你的供款水平不算高,因此,就算太太置業,都可以考慮的,但你地要明白,這動作會令你地的財富較集中在物業,同時負債增加左。不是不可進行,但就要明白這風險。
Plan C,在這刻是較好的,因為當你地這刻買樓後,其實要用了不少的現金及股票。不過,如果你地大方向好想買樓,Plan B其實可以考慮,只是在這刻進行,還是過1、2年,等你地有更多資金才進行。
荃灣這地區都不差的,是市區與新界西的重要通道,配套發展成熟,如果日後發展大嶼山,這地區都能受惠。
因此,Plan B在大方向可以進行,只是在時機上,睇下你地有幾想這刻進行,還是等多1、2年進行。
------------------------------------------------
Q21280:
Hi 龔成,我係做股票經紀買賣的、想請教下你意見麻煩晒
我之前係做髮型師,而家立心想轉型去做投資股票工作,之前係光大證券。由於學歷不高,所以我不停努力去進修英文,同去HKU讀左Finance。
跟住考保險和證監牌,我自已本身都好鐘意投資。
睇股票市場,好似上一年,幫客人投資,自已每個月都會有一份收入。但當時況不佳,就算我唔理會輸錢個部份,分分鐘會變成零收入。
龔成老師︰
做股票經紀這工作,收入的確有一定波動性。其實就同好多銷售行業一樣,當市道唔好,無人買野,自然佣金會減少,令收入出現下跌問題,這是無可避避免的。
但我地決定一份工作是否合適,除了睇自已興趣和意願。更重要的,是用長期角度分析,你到底想5年後、10年後,你想收入如何?身價如何?生活如何?工作如何?
當你有左長期的設定,你這一刻就要想。現時這個工作,是否可以達至你的目的。而這個問題答案,只有你自已才會最清楚。
見你過往,都為這份工作,付出不少努力。
你可以睇翻如果證券工作真係適合你,你就要找方法解決你當下所擔心的問題。例如經濟環境差時,要找其他兼職,去平衡個收入。或者做些小生意,令自已多個現金來源等。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
萬元以下手機推薦2022 在 龔成 Facebook 的精選貼文
【龔成問答信箱】(Q13641-Q13660)
Q13641:
市場上有不少人都有教止蝕這個概念,例如跌1成止蝕,我知道你不認同這種做法,你比較認同長線投資。
不過,我覺得止蝕背後都有一定嘅道理,因為當某一隻股票不斷下跌時,可能代表你之前的基本分析是錯了,止蝕可以防止進一步損失。
龔成老師:
止蝕無絕對的方法的,可能你會找到例子,證明你是正確,但如果套用在港交所(0388),2008年,由$100以上,跌到$50以下,當時應該止蝕嗎?
如果止蝕了,就錯過了幾倍的回報。
六福(0590)在2007年去到$6,其後跌到$3,當時應該止蝕嗎?
但現價是$20。
所以,止蝕無絕對的方法,而坊間所講以股價去衡量的方法,可能會正確,可能會錯誤,你要小心想想這方面的邏輯問題。
「當某一隻股票不斷下跌時,可能代表你之前的基本分析是錯了」這句說話真的正確嗎?
短期股價只反映市場供求與情緒,可能中短期的確反映這企業不利,但如果我地以長線角度分析,那麼,市場反映短期不利,與我地長線投資,就無關係,我地亦不應因這方法止蝕。
其實,止蝕沒有絕對的對與錯,但我地以「長期企業本質」的優質度的分析,仍是最有基礎的方法。
------------------------------------------------
Q13642:
你好龔成老師,我今年26歲,初學投資,月入22k,下月開始會有25k,家用每月要5千,保險月供4千(分6個月),儲蓄只有25k左右。
睇了你的建議,希望可以開始投資,月供股票。我應該每月可承受月供最多3千蚊,你認為我可以怎樣分配?盈富/港鐵/領展/比亞迪?
龔成老師:
你這個年齡,是財富增值的黃金時期,要好好把握,盡你一切的力量去儲蓄、投資、學投資知識。
你可以投資「平穩增值股」+「潛力股」,不過,由於潛力股要求你有一定的投資知識,因此這刻不用急著投資,你可以集中在平穩增值股先,潛力股只要小注。
你可以考慮盈富(2800)$2000,港鐵(0066)$1000。
港鐵(0066)的賺錢能力好強,近期只是一些中短期的事件,無影響佢企業的長期價值。這刻反而適合去做月供。
佢收入主要有運輸、收租、地產,如果你從長遠角度,就能分析到近期的事件,對這幾方面長遠的影響都好少。
最多近期會影響了運輸收入,以及成本增加,但無影響長期情況。所以,只要你唔好理中短期股價,保持進行長期月供就得。
------------------------------------------------
Q13643:
我今年50歲,我兩個子女都有比家用我。一全職一個大學半職。想把他們給我的錢部份幫佢地投資,大約8000元。
3、66、1211、823、2388 可以嗎 或者有冇建議,謝謝
龔成老師:
你以月供模式,是最好的投資方法,原理就是幫佢地儲錢,因此一定要投資優質股。
盈富(2800)$3000、恆基(0012)$2000、港鐵(0066)$2000、比亞迪(1211)$1000。是一個適合佢地的組合,你只要長期進行月供就得。
------------------------------------------------
Q13644:
多謝您 龔成
係創業路上睇到呢篇文
「打工仔致富術」
令我好鼓舞
我而家都係要回歸返一份正職
但創業果度繼續去 , 只能周末去幫手
龔成老師:
創業這路並不簡單,要我地堅持再堅持,由於可以做到堅持的人不多,因此創業成功的人不多。
我其實都幾建議一邊打工,一邊並行創業,因為創業始終風險高,如果有打工收入支持,會比較好。當然,咁會比較辛苦,但如果想成功,就要付出,相信自己,一定有回報,加油!
------------------------------------------------
Q13645:
你好,本人29歲,香港的樓放租後,月供約一萬多,前兩年買了一點煤氣,盈富,金沙,目前現金流不多,但明年中估計會有一筆收入。
想月供以上已買入的股票外,想未來五年增值後再買樓,想問中國燃氣值得月供嗎?比例如何安排比較好?謝謝
龔成老師:
你可以利用物業,作為累積資產的方法,因此,如果你5年後資金足夠,緊守「供得起」原則,而到時樓價只要不太貴,你都可以再買多一層,作投資。
只要你兩層樓之間的買入時間唔好太近就得,因為唔想你同一經濟週期買入。
至於近幾年,你可以利用月供股票,作為財富增值的方法,盈富(2800)金沙(1928)中國燃氣(0384)你都可以月供的。盈富較多就得。
------------------------------------------------
Q13646:
本人今年28歲,月薪有二萬幾,今年8月先至開始投資股票,每月可以儲到一萬至一萬五(如果要做到好慳),現在手上有7萬現金作備用、應急錢,已投資左既股票總值十四萬幾,股票組合如下:
3煤氣16.44蚊@3手
257光大國際6蚊@5手
1876百威亞太28.7@10手
1821ESR16.8@1800股
2638港燈7.58@3手
11月會開始月供2800盈富基金作投資儲蓄之用
請問以上既組合有需要改進嗎?
手上既現金想留番股市下跌既時候再入貨,而我自己比較睇好1876百威亞太既前景。我應該等佢未來跌既時候再加注嗎?
我想在35歲之前能夠儲到首期,先謝謝成哥分析!
龔成老師︰
我地投資會運用「先增值,後現金流」作方法,初期應投資較多增值類資產,較後期則應投資較多保守類項目。以你年紀,是投資增值的黃金時期﹐應以增值為主。
煤氣(0003) - 有質素﹐有平穏增值效果,適合你。
光大國際(257) - 本質不錯的,但股價都幾波動,加上佢負債愈來愈多,只宜小注。
百威亞太(1876) - 有品牌和規模,有長遠投資價值。但你有留意我fb,都會見我經常講唔會太推薦人買IPO。因為業務上,集團就算有吸引力,但新股半新股真實面要慢慢先見到,加上佢估值困難。
所以,此刻只建議持有小注,同時你要明白當中的風險。
ESR(1821) - 同樣上市不久,較難估值,不宜大注。
港燈(2638) - 有質素,但只是收息股,無甚增長力,唔適合你。你持貨唔多,可持有,但不要加注。
如果你開始月供,你可以投資在平穏增長股︰盈富(2800)、金沙(1928)、恆基(0012)、中銀(2388)、港鐵(0066)、煤氣(0003)、港交所(388)、長建(1038)、粵海(0270)、領展(823)或潛力股︰比亞迪(1211),中生(1177)或福壽園(1448)。這些股票都有質素,而且具增長力,會較適合你。
假設你月供$15000,以恆指年平均回報10%計,到你35歲大約可增值出170萬資產,相信對你置業計劃已有一定幫助。
------------------------------------------------
Q13647:
請問老師對0012將來的分析如何?
我在$36入了一手,現在一直每個月供$1000
龔成老師︰
恆基(0012),是有質素的股票,前景正面,加上佢是全港持有最多農地的發展商,長遠的價值一定會慢慢釋放。
近期香港社會的確出現不少問題,對樓市中短期樓市一定構成負面影響,但當中還有很多變數,結果真係到時先知,但相這種動蕩情況唔會係長期。
香港長期往屋需求仍然大,因土地和供應不足,因此樓價長遠仍會有向上。作為香港持有農地最多的發展商,長遠盈利有一定增長潛力。
現價處合理區,你可以保持月供,長期進持有就可以。
------------------------------------------------
Q13648:
龔成老師你好,想問一下有關資產配置既問題,我自己本身32歲,月入大概5萬左右,有8000股騰訊,80萬現金左右,冇車冇樓,總共330萬net asset。
暫時未結婚都係同屋企人住,做野其實壓力都大,自己個人洗費唔大,一個月支出加家用大概2萬左右。
如果我想做到唔番工都可以財務自由既話,老師可唔可以比d建議小弟。
我都想好似你咁有8位數字身家,唔洗有番工手停口停既煩惱,感謝!
龔成老師︰
你現時每月開支2萬蚊,如果要達至財務自由,以股息率5%計,你需要有480萬資產才可以做到。以你每月可以儲$30000。以恆指年平均回報10%(連股息再投資)計,大約9年可以增值到你需要的480萬。
操作方面,你可以用15K去做月供股票,而餘下15K先儲下,用邊投資、邊儲蓄策略。
月供你可以投資在4-5隻平穏增長股︰盈富(2800)、金沙(1928)、恆基(0012)、中銀(2388)、港鐵(0066)、煤氣(0003)、港交所(388)、長建(1038)、粵海(0270)、領展(823)或潛力股︰比亞迪(1211),中生(1177)或福壽園(1448)之上,長線持有讓其自然增值。
至於80萬現金,可以一半分注買入上述票。而另一半和未來儲蓄累所得資金,待大市大跌才大手入貨,咁安排會增值得較好。
而你現有的騰訊(700)有質素,有長線投資價值。但你有8000股之多,有嚴重過度集中風險,萬一騰訊有什麼意外,你整個組合會出現嚴重問題。所以,你最好將部份騰訊換碼到以上股票中。
以你現時資產,加上月供股票,在9年後達到過千萬是絕對有可能!只要你在這段時間適當投資,保持累積真財富同時加強投資知識就可以。
------------------------------------------------
Q13649:
老師你好,自我介紹一下,我今年39歲,空中服務員,零投資經驗,唔需要供樓,現金有大約800,000萬喺銀行,有差唔多50萬港紙,30萬外幣,我諗住攞一半即係大約400,000出嚟買股票,你覺得我應該點樣投資好?
應該用月供嘅方式,定係我平均分去四至五隻大嘅股票入邊,每隻大約投資10萬蚊?例如匯豐煤氣中電等等等。
因為我自己覺得自己睇極啲資料都睇唔明,所以開始想保險少少,純粹收下息咁樣。
另外我嘅外幣主要都係美金,但係仲有好多唔等洗嘅嘢其他貨幣例如星加坡紙,應唔應該將佢哋換埋做美金或者做其他投資呢?多謝指教。
龔成老師︰
在投資的角度,外匯不是最好的投資項目,因為說到尾,這些都只是一些貨幣,即是「政府借據」,貨幣中期會以週期的模式運作,但長期來說,都是貶值收場,因為貨幣只有「交易價值」,並無真正的財富價值。
當然你工作需要,可能不時要用到外幣,故保留部份係有必要的。但作為投資增值,基本上持有港元就可以了。
我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
以你年紀,適合買入平穏增長股︰盈富(2800)、金沙(1928)、恆基(0012)、中銀(2388)、港鐵(0066)、煤氣(0003)、港交所(388)、長建(1038)、粵海(0270)、領展(823)。
如果你對這些股票唔認識,可以只投資盈富(2800),這是包括50間質素不錯上市公司股票的組合,有效平衡你組合的風險。
現時大市在合理區,你可以先用一半資金用分注形式買入,例如每月1號買入1手盈富,不論價格高低,每月1號持續進行,可以幫平衡價格波動風險。
至於餘下的現金,就等機會,當大市出現一定程度的下跌,就可以動用現金去投資,在平宜價加大力度掃貨。
同時間,建議你多看投資相關書本和新聞,和上一些投資課程。本人【投資倍升股課程】適合初學者的,因為整個課程的設計都是針對初中階投資者的。到你讀完整個課程後,你已能自己選股、投資、評估平貴,在投資上已掌握了一定的知識。詳情和時間,你可以留意我FB。
------------------------------------------------
Q13650:
龔成老師,如果買房托應該買那幾個房托好,現時價位是否不適合買,如果投資50萬房託,一年可以大約收到幾厘息?
因為本人不熟悉房託的投資,是否很大風險的?謝謝老師的用心教導!
龔成老師︰
房地產信託基金(REIT)的原理如同買樓收租,基本上是穩健的。而房託規定要將可分派的90%收入作派息,故利息有一定保證。而租金長遠一定會上升,故長期持有不錯。但要注意以下三點:
第一、房託分好多種,有商場、車位、酒店、寫字樓等,投資前要分析內裡物業組成及質素;
第二、租金在中短期可升可跌,當租金下跌就會令股息減少,同時亦有可能令股價下跌;
第三、股票市場波動,會令房託的股價有上落,就算本身物業組合無問題,也可以因大市下跌而受影響。
所以,房託是不錯的投資工具,但當中都要小心選擇,除了要投資質素較好,出租率較高的物業外,投資時亦要注意股息率,股息率太低,反映你的買入價過高。另外,無論是房託,或是某一股票行業,都不能佔你股票組合的比例過多,否則會有集中風險。
陽光房地產(435)、置富(0778)、泓富(808)這些房託此刻都在5%以上,現價已有長線有投資價值。
以5%股息計,投資$500,000房托一年可以大約收$25000股息。但要留意,此刻大市只在合理區,買入時要分注進行。
------------------------------------------------
Q13651:
老師你好!最近1211跌至$36-38,我只有一手價位在$44,現在應該大手入貨嗎?謝謝!
龔成老師︰
比亞迪(1211),早前出左業績,的確有點弱,除左中國車市競爭大,中國經濟轉弱,補貼減都是其中一個因素,相信佢業績、股價中短期仍會弱。
但要留意,我地分析時,唔需要太著重中短期的數據。佢出來的數據的確有點失望,但一年前,都開始預中國車市有不利情況,因此都是預期之事。
中國車市放緩、外來競爭、行業競爭加劇,都成為不利的因素,相信中短期仍會對佢不利,這會影響整個行業。
長遠來說,企業仍有潛力,發展仍是正面,因為這企業正在靜靜起革命,好多大型投資仍在進行中,例如超大型的電池廠等。加上中國政府對行業仍支持,佢長遠會慢慢有野睇。
可能你會問,補貼減,仍是支持行業嗎?
其實,中央的政策只是有所調整,而不是全面改變,減補貼是希望行業不會永遠依靠政府,而可以自己出到「市場化」的產品。另外,中央將來政策方向,會調整至補貼一些「有技術」的電動車企,而不是胡亂資助,簡單來說,就是希望行業發展技術,這是令行業長期更健康發展的方法。
同時,中國因為能源問題,長遠一定要發展電動車,這是大方向,行業成功是遲早的事,只要技術不斷提升,行業發展一定會更強。不過,一切都是長期的,而比亞迪這類潛力企業,總存有不確定性,所以,這企業長遠雖然正面,投資亦要注意風險,不能太大注,這是一直所強調的。
股價波動,如投資要分注(最好是小注月供),不能大注,同時一定要長線投資,車市要慢慢才好轉為這股要好長線先有野睇,所以要著重分析長遠的因素,唔好太理會中短期的情況。
同時,潛力股存有風險,你要衡量自己的風險承受能力,年齡較大的投資者亦不適合。
預期佢中短期有可能進一步弱,但所有野,都是有危有機,如果想買入後1年就有利潤,咁就買錯股了,這股從來都是長期的,預期3年、5年、7年,後先有真正的爆發情況。
現價已開始初步進入平宜區,可以加注,待跌至$35會更理想。
------------------------------------------------
Q13652:
你好呀龔Sir ,想請教一下組合投資
今年30歲,月入20000左右
月儲12000, 現時持有3500股(02388) 流動現金70000
想問一下老師如下月開始
投資02800 每月500股
這投資組合是否理想 還是有更好的選擇?
補充上述情況
我目標係4年後上到100萬
想問一下有無機會達成?
龔成老師︰
我地投資會運用「先增值,後現金流」作方法,初期應投資較多增值類資產,較後期則應投資較多保守類項目。
盈富(2800)和中銀香港(2388)都是平穏增長類,都適合你這個年紀。以恆指年回報10%(連股息再投資),月供12K在4年後約有66萬,當然要視乎當時情況。
現有流動現金70K,可以考慮分注買入一些潛力股︰比亞迪(1211)、中生(1177)或福壽園(1448),以加大增長力度。此舉可令你增值快點,但同時會增大了回報波動性風險,你要明白這點。
相信以上這計劃安排,4年後儲到100萬機會係有的。
------------------------------------------------
Q13653:
龔sir,我暫時個股票組合如下
2800 約10000股
66 約3000股
1038 約2000股
1928 約5000股
1211 約4500股
2638 約4000股
Total約90萬係股票到
現時仲有一百萬閒置資金,想請教一下根據依家既市場形勢 可以點分配d資金落呢個組合到?有冇其他股票你會建議加落呢個組合?
如果想穩中求勝 有冇一d 有穩定既增長力 派息又唔錯 現時股票屬於合理或平宜區 既股票推薦?
龔成老師︰
你現時持有的組合,都是有質素的股票。其實我地做資產配置,唔係睇市場形勢,而係睇資產質素和你人生階段。年輕的投資較多增值類資產,較年長則應投資較多保守類項目。
現時大市在合理區,你可以將100萬分成2份,頭50萬分注買入以上股票,其餘等大市大跌才入手。資金分配方面,4成買盈富(2800),其餘平均分配多其餘組合中股票就可以。
但留意翻比亞迪(1211)是潛力股,港燈(2638)是收息類,其餘都是平穏增長類。如果你較年青,新資金就不要分在港燈,反之就不要分在比亞迪。
穩中求勝、有穩定既增長力和派息高,金沙(1928)是這類型。但近期升了不少,已在合理區頂部,你可以等回調再分注買入。
------------------------------------------------
Q13654:
Hello老師,請問你點睇1114 華晨中國?
業務黎講,佢賣車,中國經濟放緩但仲有一定業績,點解2018個年既股價升到高位之後會跌到咁甘?
2017年頭 $8-9
2018年頭 $20-21
2019年頭 $5-6
2019 11月 $8-9
佢地仲有新廠房起緊 亦努力發長電動車業務 其實係咪意味住公司仲有進展空間?
其實佢既合理價大概係邊?
謝謝
龔成老師︰
華晨中國(1114)有質素的,但中國車市放緩、外來競爭、行業競爭加劇,都成為不利的因素,相信中短期仍會對佢不利。
加上佢品牌的市場並不是行低端,這路線相對經濟的敏感度較高,當經濟回落時,影響較大,因此,市場對佢的股價反應都較大。
未來電動車將為汽車業帶來很大發展空間,但華晨在電動車方面技術和品牌都唔算十分高,相比比亞迪(1211)等電動車生產商,優勢唔算明顯。故對這部份唔好有過高期望,但正面影響係會有。
股價由高位回落不少,除了反映過往處貴水平,現在回落至合理水平偏低位置,反映市場預期中國車市的不利情況。相信這股中短期股價仍會不利,但長遠前景仍在的,有貨可持有,無貨可小注。
------------------------------------------------
Q13655:
成哥,你好!覺得你所建議的投資策略比較隱健,希望獲得你的分析及指點。
我現年43歲,單身,每月收入56K,供養父母6.1k。自住居屋,用姐姐及老豆名,我月供9.7K,2022年2月供完。
有一份月供aia 基金,21 年期,已供14年,月供約1.6K,現有270K,現時持平冇增長,並沒有當日sell我時的增幅。
2018年12月開始一份恆生人壽儲蓄,每月4.8K,供5年,目的是迫自己儲錢,但25年後才可回本(以沒有紅利下)。
宏利MPF有約700K
現金有500K
股票約300K,如下:
1398,10000股,$6.74買入
0005,1600股,平均$67買入
1810,3000股,$15.62
1690,150000股,平均$0.47買入
8423,50000股,$1.47買入
386,10000股,平均5.948買入
想重整投資組合,是否應該將aia基金取出現金,投資到其他有穏定利息的股票上,例如滙豐?是否應停止供恆生,將現金投資在其他資產?500K現金應如何投資?
希望10年後退休可每月有15-20K零用錢,如想3-5年內置業,應該如何計劃?謝謝
龔成老師︰
保險公司的基金,有好有壞,我好難評論,但當中的潛在費用,往往不少,反而簡單的投資在指數基金,例如盈富基金(2800),長期回報往往更多,而且管理費好少(0.1%左右)。
你再了解下,你之前所投資的基金,當中的投資策略,以及投資在甚麼類別的項目中,分析是否有長線投資價值。如果預期未來餘下時,都是像過往10數年回報平平,取回資金會較好。
恆生人壽儲蓄,這類有保險成份產品係需要,我地投資要先做好防守,才去進攻。但重點係足夠就可以,唔需要多。
如果你計劃10年後退休,每月有15K現金流,以股息率5%計,你就需要有360萬資金。
建議你可以利用月供股票去創造這筆資金,以恆指平均年回報10%計(連股息再投資),你需用在這10年間每月供款20K,選股以平穏增長股為主,如盈富(2800)、金沙(1928)、恆基(0012)、中銀(2388)、港鐵(0066)、煤氣(0003)、港交所(388)、長建(1038)、粵海(0270)、領展(823),10年後大約可以增值至380萬。
到時你再慢慢換碼至收息股(5%或以上),以股息為自己創造穏定現金流。
至於5年後置業目標可以借用你現有50萬資金,同樣投資在平穏增長股。但現時大市只在合理區,你可以先將一半資金分注買入上述股票,其餘待大市大跌才入市。5年後大約會增值至70-80萬,當然要視乎到時情況。
最後講你現有股票,有2隻要特別留意。
立基工程(1690),此股市值不高,上市年期唔長,價格會較波動。加上財務數據表現一般,唔好再增持,長遠轉至其他優質股更好。
潪㵆發展(8423),市值和上市年期比立基更短,財務數據表現一般,同樣不宜持有太多。
------------------------------------------------
Q13656:
龔老師你好,本人女兒為2020 DSE考生, 原打算在本地升學後去才外國讀碩士,但近月社會問題現改變計劃提早來年英國留學,目標是4年,每年預算約45萬,由於事先沒有這個預算,故資金並沒有準備充裕,希望你指教一下:
*手頭資金約有30萬,現放銀行定期約2%
* 股票約10萬,其中兩手匯控(十年多前高位$140入一手,現在連以股代息之股數計僅平手多少少)
* 2020年中 及時 2022 年初有兩筆約各25萬教育基金,合共50萬
* 毋須供樓,每月可儲2.5萬(4年共120萬)
* 10年後退休約有160萬退休金可取回 (非MPF)
* 另夫婦合共有些已供滿保險可取回約30萬-40萬
* 居住已供滿居屋,必要時向房署申請加按
問題:
1) 第一筆留學費用約於明年5/6份前準備,是否應該全數將手頭現金兌換英鎊以防匯價上升? 還是持有港元用多少才兌多少? 因為睇過英鎊定期利率低到冇朋友,港元暫時仍有2%以上。但又怕匯率升高
2) 另外考慮借一筆約30萬稅貸,總利息約9千,分期36個月,每月約還8600,從每月可儲的錢內償還,此筆現金投資你介紹的收息股,一來抵銷稅貸利息,又可以留為緊急備用,這想法正確嗎?
3) 每月25000減去還款8600後仍有16000,應做月供股票嗎?
4) 現時股票除005之外其餘都是零碎一手手的IPO (包括1800,2007,0939,1898,1313,3998,0981,0808), 現階段應放晒轉去投資你介紹的收息股例如盈富煤氣港燈嗎?
本人投資眼光基幾乎是零,一直是明燈買邊隻死邊隻,故此十年前已不再投資股票,只會想穩陣保本去做定期,希望能為煩惱中的我指引一下,先感謝你的幫忙!
龔成老師:
1)你的確要開始轉英磅,第一,你有實際需要,所以你可以分幾次轉,同時要開始轉了。第二,歐洲問題有可能會明朗化,這樣英磅就有機會上升。
我地唔係要估事情點發展,而是要平衡你的風險,因此,你可以分幾次轉。
2)這類借貸投資,是創富方法,但都有利有弊,你一定要明白這點。
首先要考慮你本身的風險情況,你負債會因此而增加。當然,負債不一定有問題,但你要考慮自己的年齡、情況、風險承受能力,去決定是否增加這負債。
現時低息環境,如果你的「實際年利率」不高,投資一些收息股,已能取得一定的息差回報。不過,股票的價格總有上落,你如何保證不會出現「賺息蝕價」的情況?
這正正是你要思考的問題。
由於現時收息股及其他類別的股票,暫時只處合理區,未到平宜區,你好難確保不會出現「賺息蝕價」的情況,因此,這刻做加按買股的值博率,只屬中等。
如果大市處平宜區,那你投資,蝕價的可能性就會較低,你這動作的值博率就會大增。
因此,現時借貸買股,不是不可,但值博率只屬中等。而由於這筆錢增加了你的負債,因此不能太進取,你只能投資平穩增值股及收息股類別,同時最好有部分留跌市後先入。
3)可以,但由於你之後仍有資金的需要,你只能動用部分,不能全部用作月供,你可以動用每月$10000去月供,同時不能供一些進取的股,相信盈富(2800)最適合你。
4)部分較有質素,以及較適合你情況的,可以留,包括:建行(0939)、泓富產業信託(0808),如果持貨不多,華潤水泥控股(1313)可留。
至於其他,可以賣出,轉為收息股,會比較適合你的情況。
如果你過往投資成績一般,你就更加要集中投資穩健、有質素,業務穩定,有穩定股息的股。例如港燈(2638)、深高速(0548)、香港電訊(6823)、匯豐(0005)、置富(0778)、陽光(0435),盈富都可以。
------------------------------------------------
Q13657:
HI我係你讀者,我係初學股票既人,第一本股票書係你既股票勝經,你比到好好既價值觀我,但我有個問題。
本書睇到一半,依家有個觀念就係(揀優質投票 然後長期持有)咁趺又唔賣(因為會升返),升又唔賣(因為係優質會繼續升) 趺同升都唔賣優質股出去。
就係你本書比到我既觀念....咁咪正係得食息?
因為趺升都唔賣,無動作,唯一增資既動作就係派息,咁我揀隻派息派得勁既,然後長期持有咪得...係咪咁既想法?
龔成老師︰
財富增值,絕對唔係單單找有一隻高息股一直持有。
在增值過程中,只要股票是優質,而且質素不變,就價格變動都唔洗理。長期持有,讓佢自行慢慢增值。到退休之年,你就將佢換成收息股,為自已創造穏定現金流支付退休生活。
而優質股係唔係一直唔賣? 答案係"不是",除了優質股質素轉差時要沽出。當市況過熱,市場處牛市三期的狂熱狀態,股價被嚴重高估時都會沽出部份。
仲有一個情況,就是將近退休之年,將有增長力優質股換碼至收息股,都會作出沽售動作。所以,你最終賺到不是只有股息,仲有資產增長的價值。
我地選擇一隻什麼樣的股票,是潛力型、平穏增長型、還是收息型,要視乎翻你人生階段。如果你年青,應著重資產增值(即一些有潛力和增長力股票),但如果你已退休,就應以收息創造現金流為重。
------------------------------------------------
Q13658:
老師您好,我今年22歲,近一年開始接觸投資的知識,同時有追縱您的專頁的內容,現時持有︰
0788(18000股、平均價2.16)
3988(12000股、平均價3.14)
希望年輕可以慢慢累積財富,0788的賣入價較貴,請問︰
(1) 現時計劃將部分0788賣出,套現連同部分持有的現金買入增值股。
(2) 現時有留意0027、6862、0823、0345,請問老師您的意見。
(3) 除以上提及的股票外,老師您還有甚麼好的推薦﹖謝謝解答
龔成老師︰
1) 首先你要明白一個概念,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
中國鐵塔(0788)有質素的,早前有少少炒概念,所以這刻唔能夠太進取。這股本身有質素、有前景,中國的3大電訊巨頭,都是佢的主要客戶,以及大股東,當5G發展,佢一定會受惠,因此前景仍然正面。
佢現時的收入正不斷增長,盈利都保持向上,但股本回報率不高,是這股較弱的地方。這股有質素,你可以唔洗理現時價格波動,維持持有。但如果此股佔你組合比重比較多的話,你就可以賣出部份轉至其他增值股。
2) 我地投資會運用「先增值,後現金流」作方法,初期應投資較多增值類資產,較後期則應投資較多保守類項目。你22歲,是財富金增長期,你應以增值為主。
你選的4隻都有質素,而且都有增長力,都適合你。當中維他奶(345)雖然優質,但現時偏貴,最多只可做月供。而海底撈(6862)雖有一定的質素,但上市年期不算長,令企業的真實業務情況及價值,仍要時間評估,不宜大注。
3) 平穏增長股︰盈富(2800)、恆基(0012)、中銀(2388)、港鐵(0066)、煤氣(0003)、港交所(388)、長建(1038)或潛力股︰比亞迪(1211),中生(1177)或福壽園(1448)等都適合你,由於你年青有時間去增值,所以潛力股份佔你組合1/3都可以。
------------------------------------------------
Q13659:
老師,其實現時比亞迪的投資風險是否很高,因為總負債佔總資產近9x%。
現時汽車市場,中美貿戰的影響,1211倒閉的可能性會唔會好大。
龔成老師︰
比亞迪(1211)以佢現時負債指標來看,的確較高,但又去到9成,作為優質股的確是未必全合標準。但佢過往的現金流仍算不差,要去到倒閉,可能性好低。
而我地考慮番佢整體狀況,佢正在發展期和未來電動車潛力,其實係可以接受。早前出左業績,的確有點弱,除左中國車市競爭大,中國經濟轉弱,補貼減都是其中一個因素,相信佢業績、股價中短期仍會弱。
但要留意,我地分析時,唔需要太著重中短期的數據。佢出來的數據的確有點失望,但一年前,都開始預中國車市有不利情況,因此都是預期之事。中國車市放緩、外來競爭、行業競爭加劇,都成為不利的因素,相信中短期仍會對佢不利,這會影響整個行業。
長遠來說,企業仍有潛力,發展仍是正面。而且集團收入非全靠電動車,"手機部件及組裝服務"和"光伏部份"也為集團貢獻近4成營業額,可以見其收入多元化,故暫時睇唔倒佢有倒閉的可能。
你要注意潛力股存有風險,你要衡量自己的風險承受能力,年齡較大的投資者亦不適合。
預期佢中短期有可能進一步弱,但所有野,都是有危有機,如果想買入後1年就有利潤,咁就買錯股了,這股從來都是長期的,預期3年、5年、7年,後先有真正的爆發情況。
------------------------------------------------
Q13660:
龔sir 您好,本人近月在網上見倒您既文章有所啟發,我一向只存錢入銀行,現在亦有長供股票既意向,我亦有向家母提及您既事,佢亦都認同長揸既理念,今次想幫家母提問一下。
現年57歲,距離退休尚有八年,手持4000股滙豐,現金二十萬,另有一間屋收租但租金不能蓋過供款,每月大概需要供款一萬,尚有19年還款期,家母現時想長期月供股票,2800,12,778,66 各二千,請問應該四揀二,四揀三,定係四隻都可以月供?
個案重點
以下係家母的情況
今年57歲
現金20萬
四千股滙豐
另有一間屋收租後要供一萬元還须供19年
去除所有開资每月可儲2萬蚊
想開始月供
2800 2000元
12 2000元
778 2000元
66 2000元
麻煩哂
龔成老師︰
我地會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你母親尚有8年才到退休之齡,可作有限度財富增值,建議平穏增值股和收息股各佔一半。
你所選的4隻股票,除了置富(770)是收息股,其餘3隻都是平穏增長類。你母親可以將月供加大至$12000,組合可以用盈富(2800)供2K,置富(770)、港鐵(0066)和恆基(0012)各供$2K,再加2隻收息股,如港燈(2638)、深高速(0548)、香港電訊(6823)、工行(1398)。到接近退休之齡,就將這些股票慢慢換馬至100%收息股去為佢創造平穏現金流。
現金20萬和每月儲的8K︰可以分2份,一半現時用分注模式買入上述股票,另一半則待大市大跌時才加碼掃貨。
滙豐(0005)︰有質素,但增長力唔會高,是收息類,適合退休之用。這4000股可以持有,不用換馬。
收租樓︰由於扣除租金收後,還要多要供一萬元,令你出現負現金流狀態。就算租金長線會上升,但短期內估計唔會出現正數,故此項目對將退休的母親,不是理想的選項,對佢而言穏定現金流才是最重要。
如果這單位有長線投資潛力,你可以考慮將物業轉為自已名下,而你支付資金給母親也可以。
----------------------------------------------
多謝各位提問,若然你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網的,當然,會將發問者的身份,以及有關個人的部分刪去。
另外,由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。