［江湖從此多事］FT 出咗篇Big Read，多人想我寫我就寫。不過等我Patreon寫埋篇日本股先
TLDR：馬爾代夫世界盃，Anyone？
＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！
＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
1. 基本上，歐洲足協（UEFA）就示範咗咩叫前門狼 後門進虎。以為粉碎咗歐超聯後，嚟個更加惡搞嘅國際足協（FIFA）（有話歐超聯都係國際足協背後搞鬼，難以證實，但我係信仩哋的）。
2. 我見網上普遍講法，都係講為錢。錯了，「權力都好重要的」。人類四大發明，名利權色。一般都痴埋一齊。
3. 你諗下，啲企業高管之類，點解要性騷擾？最表面嘅講法，因為佢地鹹濕，管唔好自己下面。
4. 差矣。
5. 你諗真啲，嗰啲企業高管，唔係咩搵四五皮嘅嘢VP，講幾四五千萬甚至四五億。To be honest，我地生活在一個極度金融化嘅社會，佢地要拎錢去滿足性慾（aka「出火」），或者古怪嘅癖好，有幾難？完全唔難。
6. 名句：Sexual harassment is not about sex. It's about power。
7. 正係咁，唔係性唔性慾嘅問題，而係權力。陶傑好早已經講過，咩係權力？就係我可以將我嘅意志強加於你身上。你想睇動畫，但你老母拎住個搖控一定要睇環珠格格（當年佢係用呢個例），呢個就係權力。
8. 你睇性騷擾，甚至各種職場上面嘅濫權（老細食飯唔夾錢之類），都係權力。就係「我唔妥你，我可以𢭃你；我唔鍾意你，我可以𢱕你。」。我鍾意嘅可以今日你入嚟摸兩嘢，你只能啞忍。我唔鍾意嘅，你以為自己得寵，我聽日就摸第二個。呢啲就係權力。
9. 咁足球嘅嘢，sorry，一樣。我地生活在一個極度金融化嘅社會，it’s not about football, it’s about money and power．得罪講句，歐超聯鬧劇，我見我識嘅球迷，兩邊都各有支持者，球會亦兩種取態。但，假使你捧嘅球會球星同你立場完全唔同，反對嘅球迷，有冇去杯葛唔睇？目測係冇嘅。
10. 表面上係國際足協貪得無厭，但，呢個不用講啦。Whataboutism話齋，難道歐洲足協就唔貪得無厭？
11. 更重要嘅係，邊個話事先？雙辦事人？唔得嘅。
12. 世界盃兩年搞一次，就係正面挑戰歐洲足協嘅權力。
13. 最正嘅係，你可以見到除咗國際足協主席Infantino外，仲有我年紀球迷好熟悉嘅三大推手
14. Namely：雲爺爺雲加，丹麥門神舒米高（老豆），同埋大哨仙童朗拿度（而家大肚腩嘅R9，唔係曼聯嘅C朗C7）
15. 見到呢個畫面，我即時諗起細個睇聖鬥士星矢！女神雅典娜嘅黃金聖鬥士倒戈幫冥王咁（放心，C朗美斯尼馬應該唔會出雅典娜感歎號）
16. 背後呢幾位仁兄收咗幾多錢，或者事成點榮華富貴畀個警務署長你做，就大家心照了。
17. 又，提提你，當然理論上球迷可以杯葛，歐洲球會可以杯葛，球星可以杯葛，歐洲同南美足協嘅國家都可以杯葛。但至少程序上要投票，「球迷球星球會都冇票」，歐洲同南美國家當然有票，但夾埋65票，而國際足協有211個會員國。你懂的，瓦努阿圖又一票，托布Wakanda又一票（聽講好先進，但寶寶不說），Ta Lo大羅又一票，法國又一票，德國又一票，民主真好（？）。「仲嘈？英國畀咗四票你啦喎」
18. 唔少人自動就諗，「中國卒之可以入世界盃」。差矣。首先2002年咪入咗。二來，即使世界盃維持舊制，都好快會到中國主辦。有（啲）錢，本土市場大，動員力強（你懂的），合理過唔合理。至於你話極權國家云云，卡塔爾俄羅斯都係咁主辦啦。
19. 真正大贏家係誰？係……孟加拉！Bangladesh World Cup，Anyone？
20. 本人不是玩膠，係講真的。孟加拉足總講明支持國際足協新計劃（雖然冇話會主辦世界盃，但你慌唔會？）。同時聯合聲明嘅，仲有尼泊爾（＊），斯里蘭卡— 同埋麥兜至愛，藍天白雲，椰林樹影，水清沙白，坐落於印度洋的世外桃源馬爾代夫（唔係墨心，但，到時陸沉未？）。馬爾代夫世界盃，真係諗下都興奮。
21. 係喎，呢篇只係引子。夠多人想我譯，我就譯。當然照舊用我自己鍾意嘅方法譯，原本唔會同你講聖鬥士星矢。不過等我Patreon寫埋篇日本股先
（＊）原本想講，嘩，尼泊爾個高原主場咪好勁？後來查下，加德滿都海拔1400米啫，甚至低過喀布爾德黑蘭墨西哥城，同坡利維亞La Paz 3640米爭好遠。諗真啲都估到，尼泊爾踢亞洲區賽事，都冇乜聽聞有乜優勢。係喎，我冇去過尼泊爾，但我識FC．
＝＝＝＝＝＝＝＝＝＝＝＝＝＝
已經2000人訂！多謝大家！Two thousand people can't be wrong！（扯，幾百萬人冇訂添！）．下一個目標當然係攞你命3000！
＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100． 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
葛斯齊年紀 在 [新聞] 葛斯齊爆「遇到大小S藥頭」！ 經紀人怒- 看板Gossiping 的推薦與評價