【全民媒體】Bitcoin Game Over?（佟 若喬）
Bitcoin爆煲，一地花生殼：「由一開始就等呢日」、「他們不能以苦主自居，只可以說自己是蠢豬」Bitcoin交易平台Mycoin.hk突然倒閉，估計受影響人數達三千人，涉及金額高達30億港元，「苦主」集體報警求助，個個花生友就是心涼，始終條路自己揀，損手唔好喊。
但講緊的係30億？真係唔係講笑，即係平均每個投資者都有成1,000萬Bitcoin，Not easy！其中包括年過八十的婆婆成副身家瞓身買，損失過百萬元。香港目前沒有法例直接監管Bitcoin等虛擬貨幣，財爺又好，消委會又好都多次呼籲市民投資（其實係投機）時要加倍小心，投資者隨時血本無歸。
其實，自Bitcoin面世以來，一直爭議不斷。不少交易平台受黑客攻擊之餘，亦一直同洗黑錢、毒品交易等扯上關係，舊年全球最大交易商Mt. Gox爆煲，更一度引發市場恐慌。而且Bitcoin亦風光不再，由2013年高峰的逾1,100美元，大跌超過80%至現時大約230美元，成交亦縮減。
不過，今次只是其中一個Bitcoin交易平台爆煲，不代表整個Bitcoin就此爆煲。而且，虛擬貨幣在亞洲已非常普及，台灣及韓國的便利店已經可以買到Bitcoin，只是香港一直紅唔起。eBay、PayPal及Microsoft都接受Bitcoin支付。大孖沙都有投資，李超人旗下的維港投資去年向美國Bitcoin交易平台Bitpay注資約270萬美元。所以話，一個Bitcoin交易平台爆煲，不用即時一沉百踩。只不過，在缺乏監管之下，唔啱你同我玩咁解。無咁大個頭，都係唔好戴咁大頂帽。
不過，從Bitcoin在香港的發展，可以反映號稱「亞洲國際金融中心」的香港，在Fintech金融科技的發展實在落後得可憐。FinTech在歐美，尤其係英國已經發展得成行成市，但在港僅屬起步階段。倫敦已成為全球創造最多FinTech職位的城市，比起紐約和矽谷加埋都仲要多。英國金融科技公司年收入達200億英鎊（即約2,356億港元）。Well，可能有朋友都仲係未知咩係FinTech金融科技。簡單嚟講，FinTech即係Financer加Technology，發展方向分支付、融資、投資理財、風險管理四大類。講到賴technical，其實一早已經深入我地的生活，好似網上支付和流動支付都是FinTech的重點，支付寶你有用過啦掛。
另外，金融類手機App，P2P借貸等都係FinTech的例子，相信將來會蓬勃發展。還有小妹之前寫過的Crowdfunding網上投資及集資，這也是未來金融科技發展的新常態，但可惜，現時在香港網上集資是犯法的。當然，FinTech有其風險，但呢個發展方向已經係大勢所趨。有人話，證監有責任保守，Oh dear！ But the world is evolving！去年正是FinTech爆發的一年，全球投入FinTech的資金高達180億美元，約1,400億港元，比08年急升20倍，被稱為「Record Year of FinTech」，而且市場潛力非常巨大，相信像Bitcoin這類電子貨幣亦將獲得廣泛應用，相信對全球金融制度都會帶來翻天覆地的變革。
香港和倫敦一樣，都係靠金融業撐起經濟，但發展新科技方面香港已被遠遠拋離，研發方面更加係簡陋。市場估計，現時香港FinTech市值不足1億美元，而政府亦毫不積極鼓勵或監管金融創新。當英國財政大臣George Osborne已經大力推廣FinTech，承諾政府會修改法例配合FinTech公司的同時，我地香港政府或監管機構又做緊咩呢？嗯，我們的前保安局局長還未曉email保安；我們的特首還講自己不懂Facebook。
頭痛醫頭，腳痛醫腳的政府，眼見Bitcoin平台爆煲，可能才會行動啟動立法監管，保障投資者權益。FinTech可以話係全球金融業的發展方向，但慢足9拍的政府，唔知要等到幾時先後知後覺，有政策出台支持FinTech。結果，只會令有意開發的人才北上發展。而到時，可能我們又要從海外(內地)「引入專才」了。
佟若喬
我開咗Facebook啦，請add http://ift.tt/1D0zKXL
