同女朋友出街時俾箭射（下）
上集：https://bit.ly/3tQqmbq
結果，佢終於俾我問到受唔住，講出真相。
原來，喺「最後一日」嘅約會度，童童同我一齊去拜神。
童童好唔捨得我，所以佢喺神像前許願，希望可以永遠停留喺呢一日。
童童講：「我許咗好多個願㗎，但唔知點解，得呢個願望實現咗。」
「等等，拜神？」我明明冇同童童去拜過神，童童都冇講過今日想去拜神。
童童繼續講，我哋的確去咗拜神，之後繼續拍拖，到夜晚十一點幾，我送咗佢返屋企，就結束咗一日嘅約會。
童童喺屋企偷偷地喊，但過咗十二點，佢赫然發現，時間倒流番去前一晚嘅十二點，即係話，「最後一日」嘅約會仲未開始。
我問：「跟住你就好似電影《Groundhog Day》咁，不斷重覆同一日？」
「係啊，但我同電影嘅主角唔同，我重覆得好開心㗎，因為你每日都同我一齊，好畀心機陪我……」童童露出甜蜜嘅笑容。
而我，就好似《Groundhog Day》裡面嘅其他市民一樣，以為只係平凡嘅一日，唔會有「前一日」嘅記憶。
我又問：「咁你重覆咗幾耐？」
童童諗咗一陣：「幾個月掛，我每日都同你去唔同嘅地方，雖然只有廿四小時，唔可以去旅行。但我哋一齊行晒香港嘅大街小巷，又唔洗慳錢，好開心㗎。」
我跳去最重要嘅問題：「點解有咁多人追殺我哋？」
童童垂低頭，好尷尬咁解釋，因為佢嘅時間線不斷重覆，停留喺呢一日，呢條時間線嘅故障，對其他時間線造成影響。
有啲時空因為時間線嘅問題，正常人突然消失、有壞人突然復活…...總之就一塌糊塗。
所以，嗰啲時空派出特工，想逼童童喺神像面前再許一次願，等時間線回復正常。
與此同時，都有啲時空因為時間線故障而獲利，例如可以改變已經發生嘅災難、有好人獲得超能力……
所以，呢啲時空都派出特工，保護我同童童，希望可以令時間線嘅故障再延長一啲。
童童經常見到呢啲衝突，已經習以為常。
「最緊要嘅，就係我可以同你一齊。」童童捉住我隻手，含羞答答咁講。
突然間，背後傳來此起彼落嘅尖叫聲。
我回頭一望，原來小朋友刺客已經被黑寡婦殺死，成地都係血。
我難以置信：「你為咗延長同我拍拖嘅時間，要搞到世界大亂？我又唔係同你分手，我去外國讀書啫。」
「咁我哋好耐都冇得見面拖手攬攬嘛。」童童扁晒嘴。
我命令童童：「你依加，即刻去神像面前許願，畀時間線回復正常。」
童童仲辯解，話時間線嘅故障對某啲時空都有利，唔一定係壞事。
「你再咁自私，我依加就同你分手！」我斬釘截鐵咁講。
童童好灰心，唯有帶住我去許願。
但去到廟裡面，童童突然揮手示意，一件暗器從橫樑上飛落嚟，直中我頭部。
我就咁暈咗。
＊＊ ＊＊ ＊＊
我叫阿邦，聽日我就要飛去外國讀書，所以，我應承咗女友童童，今日要專心陪佢。
一見面，童童第一句問嘅居然係：「你個頭仲痛唔痛？」
「我個頭？」我一頭霧水：「我個頭一直都冇事啊，你點解咁問？」
「哦，冇事就好。」童童露出神秘嘅笑容。
之後，我就同童童開開心心去拍拖，唔知我哋今日會去邊呢？
＊＊ ＊＊ ＊＊
永遠唔好低估女人嘅執著，佢哋可以為咗愛情，犧牲全世界。
同時，佢哋亦都可以為咗愛情，犧牲你嘅意願。
—完—
新書《真實虛擬一鏡過》已經出版了，現正發售中，
詳情可點擊這裡：https://bit.ly/3eTPuHL
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #同女朋友出街時俾箭射
虛擬 讀書 會 在 【Python虛擬儀器設計】讀書會【3】 - Facebook 的推薦與評價
No photo description available. This event was canceled. OCT13. 【Python虛擬儀器設計】讀書會【3】. ... <看更多>