故事係咁嘅。
我住過一年劏房，位置係旺角近女人街嗰堆唐樓。
我住嘅係一劏四嘅單位，100呎唔夠。
住劏房有咩缺點？有嘈到仆街嘅冷氣機同雪櫃，夏天會傳出惡臭嘅廁所，一煮嘢食間屋就好似焗桑拿咁。
每朝早天未開，樓下就會有一班南亞裔負責開檔，嘈到完全訓唔到。
但一個男人住，其實無乜嘢。
嗰晚我訓到半夜，平時女人街夜晚攤販收檔之後，成條街人影都無隻，有時會聽到醉酒佬講粗口、古惑仔打交、情侶鬧交等等…
我記得當時凌晨三點，突然聽到街外傳來好奇怪嘅音樂聲，有人喺度打鑼鼓，仲有人吹笛、吹嗩吶…
『鏘～』『鏘～』『鏘～』
鑼聲愈來愈近，我忍唔住打開窗望出去，見到遠處有一隊人馬，好齊整咁兩人一行，一邊吹奏手上樂器，由街頭慢慢行緊過嚟。
由於當時太黑我睇唔清楚佢哋個樣，但帶頭行嗰兩個人，拎住一枝長竹，掛住個大燈籠，上面寫咗個我睇唔明嘅字。
當佢哋愈行愈近，我睇到呢隊人中間抬住一輪鮮紅色嘅花轎。
你可能會話「有冇咁誇張啊？」
我當刻都係咁諗，完全唔識驚，以為係惡作劇，有乜可能大半夜結婚啊…？
由於被人嘈醒嬲得濟，我講咗句粗口鬧佢哋，就閂返埋窗繼續訓，無幾耐打鑼聲就停咗。
又過咗一陣，打鑼聲再次響起，今次係另外一個方向傳出嚟…
樓梯…
我棟唐樓無升降機，要上樓就一定要行樓梯，聽到打鑼聲好有節奏咁『鏘…鏘…鏘…』愈來愈近，我就知道，佢哋行緊上嚟。
我住４樓，劏房設計有一道大門鐵閘，一打開鐵閘入去就係四戶單位嘅木門。
唔通我鬧佢哋一句，佢哋上嚟搵我？！我聽到走廊傳出碎密嘅腳步聲。
嗰一刻我嚇到完全唔知應該點做，劏房一開門就係張床，完全無遮無擋。我用張被蓋過頭，好驚一望出去就見到佢哋成隊人企喺我屋企。
好彩嘅係，過咗一陣我就開始聽到條街有啲鐵枝叮叮鏘鏘嘅聲，係親愛嘅南亞裔開檔啊～～我第一次聽到呢啲聲係咁感動。
我揭開張被望出窗外，個天慢慢開始光，門外嘅打鑼聲亦都停咗…
我問其餘三戶嘅鄰居聽唔聽到前一晚發生嘅事，其中一戶話聽到有人敲門，有個男人喺門外不停講嘢。
另外一戶話尋晚好早訓，無聽到任何聲，但朝早發現門外神主牌訓低咗。
最後一戶係貨車司機，通常半夜就要出門工作，佢話尋晚起身返工時，見到一個著住裙褂嘅女人坐咗喺廳，嚇到佢唔敢起身返工。
我無同佢哋講，以上發生嘅事，可能係我造成…
原來住劏房都有好處，撞鬼嘅時候，佢哋會搵錯門…
（完）
喜歡故事花半秒like & share
訂閱Patreon ，令我不用靠光合作用維生。
https://www.patreon.com/Bluegodzi
網購小說，書店沒有賣：
https://bluegodzistore.boutir.com/
