【姻客（上）】
敲打車尾嘅聲響傳來，通常呢啲都係飲醉嘅人敲打部車，無論係想搭車定係路過發酒癲都唔係好事。我下意識伸手鎖車門，可惜已經趕唔切阻止滿面通紅嘅男乘客打開車門。
「小姪兒，你送我回去吧。」衝上車嘅老伯唔單止一身酒氣，心口嘅紅酒跡喺陰暗嘅車廂中，好似血跡一樣咁怵目驚心，加上一口普通話，厭惡之心油然而生。一聽佢講野嘅語氣，就覺得係經常憑語言強迫人跟佢意思做嘅人，如果無強大嘅拒絕能力，即使心中極度討厭佢，都好難唔屈服。下一秒，跟佢上車嘅後生仔就證實咗我嘅睇法。
「阿表叔，我有嘢趕住幫手呀。」口裡說不，身體已經拉埋車門，叫我去將軍澳。「我真不明白，為何酒這麼少？我不是說自己喝不夠，是擔心你哥失禮賓客。」呢段說話講下停下，重複下，由九龍灣輔警總部附近揸到上觀塘繞道先講完。「我哋香港人好少飲咁多，同你地唔同㗎。」阿小姪兒膠都費事俾，隨便應兩句就有得老伯自己講。
阿伯自得其樂，不停訴說個婚禮嘅種種不滿，由進場音樂播英文歌太唔莊重，又話敬茶儀式太隨便，唔明白點解佈景板用英文名等等。小姪兒再開口，已經係叫我開快啲，「我都想呀。」今次唔係應酬乘客，老伯嘅魔音真係嘈到人心煩意亂，最好即刻落車。
十零分鐘嘅路程好似成套劇集咁長，粗略估計老伯數咗五個婚禮上嘅缺點後，小姪兒爆佢一句：「我呀哥娶嘅係你姪女，唔係你呀。佢哋婚禮點樣搞關你咩事呀。」老伯大惑不解，原來佢係識聽廣東話嘅：「我姪女過門後，我們就是一家人那，怎會不關我事。」「我阿爸阿媽都管唔著我呀哥呀嫂啲嘢啦，幾時到你俾意見呀表叔。」小姪兒最後講呢句表叔，蘊含住相當程度嘅輕蔑，相信醉咗嘅表叔都感覺到。表叔仲想反駁，奈何我已經到達目的地，拉開車門同時收錢。
「師傅你等等我，我踢完佢上樓仲要出返九龍灣。」雖然我好同情小姪兒，但風險嘅嘢無辦法預計，所以我要求佢找咗條數先，然後等到我就等。小姪兒一拍褲袋：「頂，個銀包放咗喺新娘房。」佢都算有創意，喺我黑面之前攞一疊利是封出黎：「呢度夠數㗎，我好快你信我啦。」講完就跳落車。
我拆一封黎望，係二十蚊，成疊起碼二十張，搞到我好想即刻走，人格喺港幣面前，真係無咩價值。
幸運嘅係唔駛十分鐘，就見到小姪兒嘅身影，上返車之後⋯⋯
#擺酒
#lazytaxi
#的士
#taxi
#我的你的紅的
