【柯豬上學去】
原本阿媽我係想頭三年都由自己湊直到柯豬適齡讀K1, 但一諗到要同時湊佢又要照顧新生兒，怕自己攪唔掂，心諗可能早一年送佢番學比較好，所以就決定同佢報幼稚園。柯豬係2014年出世，16年報名17年入學。柯豬媽要求唔高，但求地點近屋企的happy school就夠，學校名氣或者為將來舖路嘅嘢完全無考慮過。另一個要決擇嘅事就係應該揀N定係K1, 柯豬屬年底出世的細B, 如果為佢報讀K1怕會跟唔上其他同學仔，所以選擇了N班，成為班中嘅大姐姐~!
柯豬的學校安排了首2日為適應日，父母可以陪伴孩子上堂，雖然只有一個小時，已經可以俾我地父母了解多啲上堂嘅情況，亦幫助孩子習慣新環境。眼見柯豬對老師講故事，同同學一齊做勞作，玩遊戲都感興趣，而且肯聽從老師指示，一個跟一個排隊轉課室，食完茶點識得擺好杯碟等。上咗短短2星期的課已經見到柯豬說話時句子更有組織，用字亦豐富咗，講嘢語氣人細鬼大 😂 成日聽別人話小朋友一番學就大得快，而家深深有同感呢！
雖然在校表現唔錯，但其實每日夠鐘換校服時柯豬都會話唔想番學，會反抗及大喊。柯豬媽唔想俾柯豬覺得只要佢扭計我就會心軟，所以好堅定咁同佢重覆又重覆咁講：你要番學，媽咪會去接你放學。當佢心情平服後，就同佢講啲令佢開心嘅事，例如：放學番黎我地一齊食月餅/番學校有茶點食/玩遊戲/玩具，軟硬兼施。到了學校班房前，柯豬更加唔捨得爸爸媽媽，加埋其他喊緊嘅同學仔，成間學校充滿喊包！見住柯豬喊晒口咁真係幾心up, 但我相信老師嘅專業，交俾佢地處理係最好的。作為家長，送孩子到學校就要講byebye, 唔好拉鋸太耐，咁樣只會令佢同自己更加難受。分離焦慮是過程，會過去的，我地家長要有耐心，溫柔而堅定地幫助孩子渡過適應期。
#柯豬媽媽
#柯豬姐與些莉妹
#幼稚園
#幼園老師唔易做
#課後仲要whatsapp家長
#辛苦晒老師
