有今生…
冇來世…
一切由一個廣告開始…
Tissot同NBA出咗幾隻錶,想話搵我賣fb廣告
通常喺呢個時候,我就係要諗下有乜配圖好影…
我見佢其中有隻係公牛x Tissot錶…
於是立刻決定搵返我十九幾年前買落嘅嗰隻紅色Jordan護腕出嚟影張相…
想當年阿叔我十幾歲…
唔好講讀書嗰啲衰嘢,上堂就只會瞓覺
務求儲足精神,坐時光機響應特首呼籲
一放Lunch食完個快飯就打籃球
小息當然就係打籃球,放咗學…當然都係打籃球…
考試前…當然係打籃球…考完試…當然都係打籃球…
適逢嗰幾年公牛隊雄霸NBA
Michael Jordan、Scottie Pippen、Dennis Rodman
、Toni Kukoc、Steve Kerr...
個個上晒身咁
正正常常睇親NBA嘅都係鍾意公牛…
當啲囡囡用四大天王相嚟包書…
我同啲囝囝就係用NBA明星相嚟包書…
(我懶係與眾不同,會搵7號Toni Kukoc嚟包書…)
嗰陣晨早起身睇NBA真係人生一大樂事
一來可以睇到Jordan場場發咗癲咁係咁入…
二來可以睇到Rodman發晒傻起晒腳咁搶籃板…
三來可以聽到桂神晨早流流嗌破喉嚨咁講波…
當年阿桂神好興好大聲咁大嗌:
「嘩!!!!各位球迷!!!睇Jordan!
真係有今生!冇來世呀!!嘩!!」
細個覺得佢真係極度浮誇…
而家大個咗諗返轉頭,鼎,真係畀佢講中…
如果同阿叔我差唔多年紀嘅,應該都會認同
睇Jordan,原來真係有今生冇來世…
之後Kobe係勁,但始終都係Jordan 2.0…
LeBron James係癲,但都冇Jordan嗰隻霸氣…
好喇,我承認近期Curry係好喪,而且打出自己風格…
但你知道,人始終都係懷舊…
喺我哋呢輩心目中,Jordan係永遠嘅王者…
話說回來,我當年就係用零用錢買咗隻紅色Jordan護腕…
眾所周知,護腕梗係唔係用嚟護腕…
護腕嘅功用,有90%係用嚟懶型,有10%係用嚟索汗…
索下索下,就霉晒,而且隨住我慢慢冇打波…
佢亦都安葬咗喺我某一個襪堆之中…
冇錯,最後我都搵唔返個護腕…完全係喊出嚟…
呢張配圖,呢個畫上去嘅護腕,就當係一個紀念
紀念我有份睇過當年公牛隊兩次三連冠
紀念我有份睇過Michael Jordan
有今生…
冇來世…
Search