我個女十二歲自殺（下）
上集：https://bit.ly/3baw3aw
我已經準備好變聲器，仲喺網上買咗一套細路女嘅裸照，大家都冇懷疑我。
好快，第一個男人約「我」出嚟，我同佢講，我唔方便出街，但屋企人冇人，叫佢上我屋企。
嗰個色慾薰心嘅男人，毫不猶豫地上咗嚟。
門鐘響起，我將佢捉入嚟，然後，殺咗佢。
我唔知佢係唔係心之美人，我連問都冇問佢。
因為我覺得，會咁樣呃細路女嘅男人，都應該去死。
即使佢唔係害死雯雯嘅凶手，佢嘅存在，都只會害到其他細路女。
殺咗一個人之後，我已經有坐監嘅準備。
但過咗一排，都冇人拉我。
我估，呢個男人諗住上門搞細路女，唔見得光，所以佢唔會同親友提起要上我度，甚至會特登講大話。
咁佢失蹤後，自然冇人懷疑我。
然後我就繼續殺人，第二個、第三個…….
雯雯，你在天之靈見唔見到？我已經幫你報咗仇。
或者我未幫你報仇，可能心之美人仲未出現，但我相信，只要我一直殺落去，報仇係遲早嘅事。
我開始有一種奇異嘅快感。
每次殺人，我都會將死者嘅一件衫，擺落雯雯個小櫃桶度，話佢知我幫佢報緊仇。
有一日，我又殺咗一個人。
櫃桶就嚟擺滿晒，我打算執走雯雯嘅舊功課簿。
執執吓，有本功課簿被風吹起咗兩眼，我掃咗一眼，啲字寫到出晒界，唔似係功課。
我拎起本簿，居然係雯雯嘅日記，或者冇日記咁有條理，只係散亂地寫咗雯雯嘅心情。
「今日默書一百分，俾老師讚，好開心！」「好想食燒鴨……」
我好認真咁睇，終於搵到一段：「今日識咗個朋友，佢叫心之美人，好好人㗎，話會幫我買最新嘅套裝，真心好期待^w^」
然後，雯雯寫，心之美人真係買咗點卡畀佢，令佢好開心。
過咗一排，就有呢一段：「我好驚，佢話要Send我啲相出去，畀我爸爸睇、畀我老師睇……」
我個心揪住痛，我繼續睇落去，好快就去到最後一段。
「我想同爸爸講心之美人，但爸爸話呢啲係不知廉恥，連雞都不如。」
「不知廉恥」四個字，雯雯用紅筆寫咗四次。
我努力回想，我幾時講過「不知廉恥」？我一定冇咁鬧過雯雯。
噢，我記得啦，嗰日我哋一齊睇電視，劇中有個女學生同男友拍拖，Send咗啲裸照畀男友。
然後我就話：「佢不知廉恥，連雞都不如，佢老豆有個咁嘅女，真係恨不得冇生過。」
我係想話畀雯雯知，咁樣做係唔啱，但我點估得到，雯雯當時正準備向我坦白心之美人嘅事？
從雯雯嘅日記中睇，佢被心之美人威脅後，佢係好困擾，但佢仲未諗住自殺。
我嘅一句「不知廉恥」，就成為壓垮駱駝嘅最後一根稻草。
我唔想雯雯早戀，我唔想佢受到傷害，所以我一直都話佢知，性係骯髒嘅，係要避之則吉嘅。
所以，當雯雯出咗事，佢寧願死，都唔敢話我知。
我成個人震晒，個腦一片空白。
我望到，眼前有一條屍。
點解會有條屍呢？哦，係我啱啱殺咗個變態佬，想幫雯雯報仇。
但原來，害死雯雯嘅人，唔止係心之美人，仲有…….我。
好多人都話，屋企人係最強嘅後盾，會為我哋遮風擋雨。
但正因為屋企人咁重要，佢哋嘅期望有時會製造一種壓力。
最後，面對風雨，我哋最恐懼嘅唔係風雨本身，而係點樣面對屋企人。
—完—
真人真事改編，某些兒童遊戲中，存在大量戀童現象。
男子以廉價遊戲道具，引誘女童發送裸照、自慰片段，甚至發生關係。
有家長發現蛛絲馬跡後報警，亦有男子被捕。
但是，幾乎沒有受害女童，會主動把這件事告訴家長。
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我個女十二歲自殺
變聲器 自然 在 [閒聊] Vtuber使用的麥克風疑問。 - 看板C_Chat - 批踢踢實業坊 的推薦與評價