《貓，講人話》
今日我同一隻政治冷感嘅貓傾計，佢叫夕夕。
我問夕夕：「喂，其實點解要罷工？」
夕夕講：「罷工唔係只係代表唔返工一日咁簡單，而係同班走係前線嘅年輕人講『放心，我哋嘅理念係相同嘅，重有好多香港人係你背後支持你』。罷工，係一種對佢哋嘅支持。佢哋要坐十年都唔驚，你唔返工一日唔係話唔得下話？如果唔返工一日，公司個老細都炒你，依間公司都唔值得做啦！」
我問：「罷工會影響香港？」
夕夕講：「唔影響香港罷嚟做咩？依家香港一直搞落去，班大MASTER好頭痛，鋪租人工一直蝕錢，你哋啲小企業就話得幾個員工仔，佢哋成幾百幾千人，咁搞落去唔掂架。你啲小市民講嘢啲官緊係唔會聽啦，就係要逼啲大企業老細出聲，啲豬咁蠢嘅官先會聽下，所以罷工同遊行係正確嘅選擇。」
我問：「啲人又話啲小企業罷工都冇咩影響力，係為咗博宣傳，你點睇？」
夕夕講：「你都ON貓貓嘅，如果個個人都覺得冇用唔企出嚟，咁就少一個架喇！一個都不能少！一個小企業緊係冇影響力，但積少成多，半個香港都係小企業，你話有冇影響力？係呀，博到宣傳架，咁大家一齊罷工博宣傳啦，幾好！記得，有良心嘅公司與人，先會罷工。」
我問：「點解你話自己政治冷感，又識咁多政治嘢？」
夕夕講：「奴才呀奴才，因為已經唔係政治嘅問題，係去到人性、道德、法治嘅層面，一個16歲少女被控暴動，而果班擺明打人嘅白衫人遲遲都冇被告，就算我政治冷感呀，都覺得睇唔過眼啦，係咪呀？而且，最重要嘅係．．．」
「最重要嘅係，我係一隻香港出世嘅貓，我支持香港人。」
#孤貓 #貓 #cat
