*** 以下是小編的親身經歷 ***
前日 (19 / 7) 早上十一時多，小編正忙於工作的時候，電話突然震過不停，一看之下大驚失色：原來是信用卡公司以短訊通知多筆交易記錄，涉及的商戶是支付寶（香港）。第一筆交易涉及的只是十多元，緊接着卻有數筆幾百元到一千元的交易。
小編從來沒有安裝支付寶（香港），馬上察覺信用卡資料可能被人盜用，故火速致電信用卡中心取消信用卡。正在等待的同時，電話再接獲兩個短訊，今次是信用卡以 SMS 發送的認證密碼，也許是騙徒所消費的金額已觸及二段認證（2 step authentication）的的額度，故這兩個交易未能成功完成。
今次事件令小編懷疑支付寶（香港）的流程存在嚴重安全漏洞，於綁定信用卡及首次支付時，並沒有要求 SMS 認證。本着尋根問底的精神，小編用太空電話及太空卡開啟支付寶（香港）戶口並縛定信用卡，確認了以下的事實：
１）開啟支付寶（香港）戶口只需要電話號碼以接收短訊確認，完全不需要任何其他個人資料。
２）縛定信用卡只需要信用卡號碼，到期日及卡後的安全碼，完全不需要任何其他個人資料，亦沒有要求銀行以 SMS 作雙重認證。
３）縛定後雖然不能提款或轉錢到銀行（需要身分認證），但已可立即透過二維碼在支援的商戶消費。
４）支付寶（香港）對新增信用卡的首次交易，亦沒有要求信用卡以 SMS 去認證身份。
５）支付寶（香港）對可疑的消費手法，例如新戶口在短時間內多次消費，並沒有任何阻礙或要求進一步認證。
除了致電銀行跟進之外，小編及後亦致電支付寶（香港）的客戶服務熱線，提供資料以作日後跟進之用。在對話過程中，職員親口告知，近日收到不少類似的投訴。顯而易見，支付寶（香港）的流程存在嚴重安全漏洞，騙徒單憑信用卡上的資料已經可以成功消費數以千元，而開戶過程不需任何個人資料亦令警方事後難以追查。即使最後有關的損失由信用卡公司或支付寶（香港）負責，受害人亦要花上不少時間及精神去申訴及處理。
現時本港類似的電子錢包各有不同的認證方法，例如 PayMe 需要用電話影身分證，Apple Pay及 Google Pay 則需以信用卡登記電話收 SMS 認證，唯獨支付寶（香港）不需任何認證。我們前線科技人員認為金管局及警方應從速行動，檢討並統一類似的電子錢包的認證要求，以保障市民的財產安全。
#資訊安全即是財產安全
21/7 6:24pm 補充
今朝小編分享咗自己嘅信用卡畀騙徒經支付寶盜用嘅事，其實目的都係希望支付寶可以加強認證，以免將來更多人仲招。估唔到引起咗大家嘅興趣，但睇咗大家嘅留言，當中似乎有唔少誤解，等小編喺度嘗試解釋得清楚啲：
Q：小編係唔係話裝支付寶 App 或者開支付寶戶口唔安全？
A：唔係。小編係今日之前並冇裝支付寶 App 亦冇開支付寶戶口。隻 App 本身係唔係安全並唔關今次嘅事。
Q：咁係信用卡公司問題啫，關支付寶乜事？
A：今次嘅問題係出喺支付寶綁定信用卡嘅認證流程，同其他電子錢包相比，支付寶係冇咁嚴謹。例如支付寶並冇強制要求信用卡公司用 SMS 做雙重認證（參考 Apple Pay 或 Google Pay 或 WeChat Pay 嘅做法）又或者要求申請人提交身份證副本（參考 PayMe 嘅做法）， 所以好容易被騙徒借用支付寶做平台，用偷番嚟嘅信用卡資料去套現。
Q：咁件事係唔係完全係支付寶嘅責任？
A：又唔係。用唔用 SMS 做雙重認證，係發卡銀行同埋支付寶兩者嘅共同決定，所以公道講句，應該話兩者都有責任。
Q：但我上網買嘢訂酒店 book 機票，好多時都唔駛用 SMS 做雙重認證㗎啦，點解小編個個都唔鬧，剩係鬧支付寶？
A：無錯，支付寶並唔係唯一冇強制做雙重認證嘅商戶，但係因為電子錢包容易俾騙徒套現而且難以追查，所以電子錢包對認證嘅要求應該比一般商戶為高。而且同 PayMe／Apple Pay／Google Pay／Samsung Pay 等相類近嘅電子錢包比較，支付寶嘅認證要求最低。
Q：唔好剩係識鬧，咁你有乜建議比支付寶先？
A：最基本都要參考 Apple Pay 或 Google Pay 嘅做法，第一次綁定信用卡嘅時候需要用 SMS 確認。
資訊安全即是財產安全 在 #資訊安全即是財產安全 - Explore | Facebook 的推薦與評價
資訊安全即是財產安全. We didn't find anything. Make sure everything is spelled correctly, or try searching for a different hashtag. ... <看更多>