歐洲球會人工 vs 戰績:後生仔 點上位篇
版務:事忙兼搞緊Patreon,出住呢啲儲稿先,咁啱歐聯又重開。圖就睇medium 版吧 (https://bit.ly/30z4hko)
1. 上篇講過(https://bit.ly/3gM2I8I),堆富豪球會,其實冇乜郁動。其實同現實世界差不多。你做咗豪門,就好少會跌落嚟,你確保自己唔好做AC米蘭或阿仙奴就得了。但,去到廿幾三十位嘅,等於香港地可能中產咁,就又另一世界。有啲真係會向下流的。但呢啲位都仲有啲流動性。其實同你現實一樣,你要做嘅,就係咬緊牙關,搏佢老味一輪,然後上到啲高嘅位置,唔易跌返落嚟,就可以學路明尼加(其實好多個都係)咁做廢老指點江山了。
2. Money League榜尾嗰堆就競爭激烈:延續上篇講嘅,有個別球會今次唔在表上,因為收入根本唔在30大,但戰績仲係極好的。上次寫過,西維爾薩克達,收入唔在30大,但系數上到頭二十的。類以嘅東西,仲有利華古遜,維拉利爾,基輔戴拿模,巴素爾,比錫達斯同薩爾斯堡。
3. 當中我覺得最堅嘅,係西維爾,維拉利爾同利華古遜:留意薩克達基輔同比錫達斯,財力在本土聯賽應該帶出其他人不少,加上烏克蘭同土耳其冠軍直入歐聯分組賽,所以易有歐聯踢。呢類情況亦在拜仁祖雲達斯身上見到。但西維爾,維拉利爾同利華古遜,其實國內賽競爭大,三間在國內收入都唔係頭四,但仲多數都入到歐洲賽。入親都有啲戰績。(update:剛剛利華古遜同西維爾今屆歐霸又入八強)
4. 英超會容易冇歐聯踢:相反,圖入面,你見藍色圈堆唔掂嘅會。曼聯就真係好差(但有錢,最後都搞掂),但阿仙奴車路士呢啲,正係迫悉匙收入最低嘅兩間。直接啲講,歐聯位係唔多穩陣嘅,兩間過去5屆都唔係年年有歐聯(車仔試過有年歐霸都冇),所以拖低咗佢地系數。以佢地收入同實力,如果去德甲之類,就實有歐聯打。
5. 阿積士冇你想像中咁霸氣:點解講阿積士?Money League頭22位,都係5年前已經係頭30。排23嘅阿積士,之前幾年都唔入頭30。打到入頭30,應該都因為上年歐聯戰績好,同埋賣人。但你見整體都係一分錢一分貨,系數唔係特別高,都係20咁上下。見到都戰績都唔係太穩定,歐聯四強之前嗰屆,歐霸外圍賽就出局。今屆歐洲賽亦早早出局。好難發圍,唔好以為真係靠青訓就得,本土市場太細,轉播收入又冇乜,好難搞。仲有賽制嘅問題,下段講。
6. 葡超同俄超先天有啲著數:介紹返,應該有聽過四大或五大聯賽(少啲人講三大或六大),四大就英西德意,五大加埋法國。在Money League 亦都係咁,30隊,英超11隊(但因為歐聯都只係四隊,所以系數出嚟反而有時唔及西甲),意甲5隊,但其實收入不及西甲4隊,亦不及德甲4隊。呢四大就30隊佔咗24。剩返係法國葡國各2隊(但法甲有超有錢嘅PSG),荷蘭俄羅斯各1。
7. 賽制令阿積士表現反而不及波圖賓菲加:頭先講過,阿積士在系數上唔係特別跑出,收入19系數又19咁。反而你見賓菲加波圖同辛尼特,R果行數字好大,即係系數排名高過收入的。點解?我估又係同賽制有關:俄超葡超冠軍,直入歐聯分組,但荷超唔係。
8. 請睇,歐聯分組賽,8組32個位。歐聯歐霸冠軍有得入,打後睇系數,咁四大聯賽入面,第一至第四嘅,直入分組賽佔16個位(往往仲要歐聯歐霸冠軍係佢地,就再多一個位)。第五第六嘅,俄超法甲,冠軍亞軍都仲係直入分組。季軍呢?就要打外圍賽,所以佢地嘅3個,其實係2+1。唔及四大咁穩陣(亦所以四大富者越富)。
9. 但打後先係重點,排7-10嘅,兩個位,但1+1,冠軍直入,亞軍玩外圍賽大屍殺。排11-15嘅呢?都係兩個位,但係0+2!冇直入的,全部玩屍殺。出事機會大好多
10. 咁你見到了,俄超就第6,2+1,辛尼特只要拎到亞軍就直入。葡超就第7一1+1,波圖賓菲加,拎冠軍直入,亞軍就外圍賽。荷超呢?就大鑊。剛好11!0+2!所以冇直入位嘅!(*)。即係話,辛尼特波圖賓菲加要入到分組賽,易好多,而入到就自然有分,亦都多啲錢,positive feedback的
11. 掉轉個情況就係英超啲細會,有戰力但冇歐洲賽踢:咪話愛華頓韋斯咸嗰啲,歐洲賽都冇得點打(韋斯咸幾乎降班添,好彩剛好大勝一場),其實如果出去打,我估戰力都係同收入相若嘅其他歐洲會差不多,但偏偏人地有佢地冇。但冇嘅,冇話公唔公平,唔同規則咪唔同贏家。
12. 但英超廣播收入又幫返啲細會:掉轉頭,都講過,英超比較好嘅係個廣播收入分配相對平均(同其他聯賽比),仲要個總額好大。所以你見愛華頓韋斯咸呢啲,雖然冇乜歐洲賽踢,但唔會話因為咁就冇晒錢。亦都畀你見到,點解電視廣告咁重要,點解可以閉門復賽,但一定要有電視播返。
13. 結語:認為錢同賽制唔重要嘅,Think again。你見有唔同賽制,就令到唔同贏家輸家。四大聯賽固然近乎牢不可破,但因為市場大收入多,佢地啲球會惡。然後又見,四大以外,俄超球會好踢過葡,葡又好過荷,亦係賽制同錢作怪。最慘係,你搵唔到錢嘅,好波都變屎波,你睇意甲(特別係AC米蘭)咪知。
14. 仲有一樣 ,早幾年(而家少啲)啲盲毛成日話唔使睇系數,甚至十幾廿年前有班傻仔話意甲本身已經最高水平去歐洲賽hea踢,而家你見到個系數幾咁重要。仲要唔止係你自己,係其他同國球會都會影響你
(*)阿積士個情況其實比較複雜。因為歐聯冠軍必然參加下一屆分組賽,如果咁啱佢又係在本土聯賽拎到歐聯位(其實機會好大),咁就變咗排11嘅荷甲冠軍(咁啱就係阿積士),原本冇直入都有直入。但,首先,始終都係俄超葡超著數啲,另外,其實荷蘭之前試過排到13/14 位的,咁就點都冇直入。
Search