今日香港富豪排名出現異動，如果要描述當中變化，可以話係包含離奇、曲折、勵志…等傳奇元素。
先講李嘉誠，佢自1999年起，已經坐穩香港首富之位，而佢嘅地位暫時可以話係牢不可破，牢到一個點係，應該有一種神秘力量去保護，種神秘力量叫－－「李！氏！力！牆！」。唔係講笑，過去兩次有人想挑戰佢香港嘅地位，「挑戰者」身家都即時會唔見一截！
大家齊考古，喺2014年1月，賭股大升，呂志和開賭場做莊家，身家靠銀娛（027）水漲船高高高。當時彭博更大字標題報：各位注意！呂志和身家已經超越李嘉誠，成為本港及亞洲首富！大膽！李嘉誠首富之位，邊會咁輕易失去！果然，好快彭博真係Say Sorry話計錯數，仲拿拿臨執岩Formula，正確結論係呂志和只係第二，超人仍然係首富。然後，銀娛股價喺當月見頂，最新股價，連當年一半都唔夠。
到今日，大陸N間傳媒，又係大字標題寫「順豐王衛身家超越李嘉誠」，佢哋點計到呢條數，真係無從稽考。總之就計來計去，王衛都係要再多兩日升停板、即係最快星期五，先有機會挑戰香港首富地位。果然，神奇嘅事又發生了！順風經過連續幾日霸氣升停板，但畀傳媒報一報錯話佢贏超人，隻股晏晝就曾經轉跌！全日收市升幅得番4.8%！
果然，超人，真係超人！
至於今日另一個傳奇，應該係甘比……對囝囡。大劉今日分身家，甘比個囝，只係一個4歲大嘅人仔，就已注定有73億元身家；9歲嘅囡，亦分到40億元。兩個人身家加埋113.4億元，相當於14億美元。以福布斯最新富豪排名計，呢兩粒人仔身家加埋，已超過胡應湘、簡志堅等！你說，佢哋往後嘅人生，應該點安排呢？
至於前面講到，今日富豪榜嘅變化，係「離奇、曲折、勵志」…咁點離奇？點曲折？點勵志？你解讀到咁有慧根嘅，我真係恭喜你啦。
by千頌C@堆填區
http://fb.com/winbigwok
