食咁多肉屙屎會好臭
#走素丫嘛
發聲的角度：
今日見到呢個POST，真係覺得好心痛，所以唔可以再唔出聲。點解做配音員要受到呢種對待？當中嘅配音員都係想同大家分享配音員點滴，最後就被電視台報導失實，而引起公憤。我地嘅表演藝術價值真係咁低？
咁多年唻配音員一直都被欺壓，但係大家都忍，點解？因為大家都只係想用聲音演繹角色，令角色有生命。 但係咁⋯係咪代表咗，我地要被欺壓？
眼見呢幾年配音員愈做愈冇存在價值，點解？佢哋配嘅角色，可能喺同一個電視台再出，但係電視台唔會有連戲嘅概念，隨時隨地都可以換聲，無論我配得幾好，但可能就因為外判公司唔同咗或者個領班唔想用我，而搞到被無期，試問咁樣我地又點會有存在價值？真心連少少尊重都無，其實我哋肯做freelance配音員，都係希望可以做到好似叮噹咁，令到大家一諗起個叮噹就會諗起保全叔把聲。
呢個行業，近幾年仲發生埋走數事件，令到配音員失去晒信心。亞洲電視之前用外判形式搵領班做嘢，再由領班搵配音員開工。不過亞視因為清盤，令到外判公司收唔到錢，最後係邊個承受責任呢？就係配音員自己。亞視清盤領班收唔到錢，順理成章配音員無錢收，成件事聽落好似好合理。但係當初我哋願意開工都係因為一個信字，最後佢收唔到錢，我哋都要捱義氣無錢收。
而最近，又出現咗外判公司走數事件，外判公司老細走佬，電視台話自己找晒錢所以唔關佢哋事，仲叫配音員唔好講電視台欠薪，但係配音員嘅聲係喺你個台出，咁點可以唔關你事？最後班配音員追到破欠基金，又話半年前所做嘅工作已經唔喺追討期限，咁樣又要配音員自己承受，開工無糧出嘅風險。
無論係電視台走數定外判公司走數都好，配音員都係要承受被走數嘅風險。當配音員越唻越得唔到尊重，又越唻越得唔到回報，最終我地會變成無存在價值。其實我哋都只係想為所有喺銀幕嘅角色發聲，係咁…今日又有冇人肯會為配音員發聲？
希望透過一人一分享，引起大家對配音員嘅關注。
