【好想用文字分享此刻心情】
（邪post黑腳論者及唔睇文字者請慎入🙏🏼）
心情複雜。
我依家拍緊個世界盃嘅旅遊特輯，去咗冰島、巴拿馬，依家喺秘魯，一邊玩一邊探討當地足球文化。
呢三隊國家隊都有個共通點，係大家都估唔到佢哋會入到決賽周，然而三個國家足球背景卻大大不同：
冰島，完全違反當今職業足球嘅制度，自小想踢波只要報名加入地區球會就得，唔會篩選，有心踢就得，全民快樂 part time 足球。
巴拿馬，長久夾喺政治角力戰場，一條運河改變命運，職業聯賽只有三十幾年歷史，中美洲足球新丁，但處處也見到足球足跡。
秘魯，一個沉寂已久嘅南美勁旅，因政局因經濟，足球發展停滯不前，36 年後，終於等到今屆一鼓作氣，有機會再次發圍。
呢段時間不斷接觸呢三個國家不同嘅球員、球迷、教練、高層，佢哋明知入到決賽周好難打，晉級過程必會戰戰兢兢，甚至最後一分也未必得到，但我喺佢哋嘅眼中睇到嘅係一種期盼同希望，一種不理賽果嘅無限量支持，不同層面如何為球隊付出同信任，好多次我都俾佢哋感動到熱淚盈眶。
歐聯四強首回合，利物浦先入 5 球，然後又因最後十分鐘體能及集中力下降被追回兩球，未能以最完美賽果得勝，張伯倫更因傷離場，傷勢不輕... 所以即使贏波，大家都難免有失落感，正如球員離場時也缺乏了笑容。
一個星期後嘅次回合，球員及高普以及整個球隊團隊將面對更大壓力，我們作為球迷又可以調整好心態嗎？兩球半嘅優勢，去到羅馬主場或許未必足夠，但與其擔心羅馬會追到 3 球，我們更需要相信利記球員會入到作客入球。
不理賽果的無限量支持，入紅軍我信。
（相片攝於秘魯利馬）
