販賣慈善（上）
十八歲，我終於擁有我第一張信用卡。
我有好多嘢想買，但我覺得，人生嘅第一筆信用卡消費，應該用喺有意義嘅嘢上面，唔應該買隻game就算。
所以我上網到處搵，搵一樣值得我消費嘅嘢。
呢個時候，我見到幾個朋友都share緊一個post。
有個叫Kate嘅女人揸車，但係揸到一半，架車冇油死咗火。
呢個時候，一個路過嘅流浪漢Johnny聽到佢嘅困境，伸出援手。
佢用自己身上僅餘嘅兩百蚊，跑到好遠，買咗一桶油返嚟，幫Kate入油。
事後，Kate好幾次返去搵Johnny，唔止還番油錢，仲送咗好多食物同舊衫。
原來，Johnny係一個退伍軍人，失業後就無家可歸。
Kate同男友商量，覺得以佢哋微薄嘅工資，冇辦法真正幫到Johnny。
所以，佢哋喺籌款網站開咗post，呼籲大家一齊幫助Johnny，等佢有足夠嘅生活費，可以舒服咁度過寒冬。
睇到呢個故仔，我好感動。
人間自有真情在，一個人喺最落魄嘅時候，仲會用自己嘅全部去幫助陌生人，咁先顯得出佢真正嘅人品。
我決定，將我嘅第一筆信用卡消費，貢獻畀Johnny。
雖然我能力有限，只係捐咗幾百蚊，但我覺得，自己都為Johnny嘅未來盡咗一分力。
所以，我好留意呢件事嘅發展。
我知道，全球各大媒體都爭相報導呢件事，過萬人被呢個故仔感動而參與捐款，最後居然籌咗幾百萬。
我有少少羨慕㗎，我唔知幾時先可以賺到幾百萬，但呢個都係Johnny善心嘅回報，合情合理。
Kate公佈咗呢筆善款會點用，話會幫Johnny買車買樓，開個銀行戶口畀佢維持生活，再幫佢搵份工。
後來，Kate同男友仲帶咗Johnny去紐約旅行，擺咗相上網，佢哋三個人笑得好開心。
直到幾個月後，我路過一條橋，見到一個執緊垃圾嘅流浪漢。
周街都有流浪漢，本來冇咩特別。
但我無意中望多兩眼，居然發現，嗰個流浪漢係Johnny！
我捐款前，睇咗好多Johnny同Kate嘅相，加上Johnny嘅流浪打扮，同影相嗰陣幾乎一樣，我先認得佢。
問題係，Johnny收咗幾百萬嘅善款，無論點講，都唔應該繼續流浪、執垃圾掛。
雖然我捐嘅錢唔多，但我都係一個持份者！
我跑過去，捉住Johnny，問佢發生咩事。
Johnny都好似見到救星一樣，係咁同我傾訴。
佢話，Kate同男友侵吞咗屬於佢嘅善款，只係帶佢去咗一次旅行，同畀咗十幾萬佢。
我嬲到震，Kate居然恩將仇報，侵吞善款？
我即刻幫佢拍咗條片，叫佢講晒Kate做嘅衰嘢，然後擺上網，tag晒各大媒體。
呢件事好快受到關注，大家紛紛幫手起底。
網民發現，Kate同男友過得好富貴，佢哋買咗全新嘅寶馬，包埋直升機去旅行。
好明顯，佢哋侵吞咗善款之後，一夜暴富。
下集：http://bit.ly/3qVtpMj
Patreon訂閱即時睇下集，快人一步：https://www.patreon.com/tomato28
#短故 #短篇 #小說 #陳美濤 #廣東話 #粵語 #tomatochan #販賣慈善
路過人間小說 在 蘇大大- 路過人間的流星『有緣無分的相遇像路過 ... - YouTube 的推薦與評價
... 從你的世界完美降落也許有本關於怎麼去愛的 小說 能教會我怎麼在你世界裡存活但是我還未來得及學會在人海中把你弄丟有緣無分的相遇像 路過人間 的流星 ... ... <看更多>