https://www.patreon.com/posts/jin-ji-de-ju-ren-47198051
好多人話MAPPA做嘅巨人同Wiz水準有差，但其實單單第一同第六集嘅精彩程度，已令我翻睇咗兩次：當然則Wiz處理嘅動作場面唔係唔好，尤其係細微嘅攻擊動作簡直係去到神檯級數，但無論係最初攻堅中東聯盟要塞一役，定係艾倫突襲瑪雷宣戰會場一刻，MAPPA就係造倒果種戰爭嘅迫力出黎
另外好多人話今集啲人樣畫到好衰，但其實如果你睇到第八集就會明白，背負著仇恨、責任、悲傷同無盡煩惱嘅成年人，就係連個樣都會變得猙獰──天真無邪嘅面孔，真係只會響天真無邪嘅熱血少年先能夠展現出黎。
最後一部《進擊的巨人》，係長篇科幻作品有時會遇到嘅問題，我統稱叫「當權者的憂鬱」。最初作為一個NOBODY又或者作為下位者要挑戰統治階級，係好容易塑造倒果種一發逆轉、以弱勝強嘅培血情節出黎。
但不停下剋上，點都會攀到盡頭；然後當你回頭一望，自己經已企響當日想打倒嘅當權者位置，然後敵人就由統治者變成挑戰者，響呢個情況下，點樣可以再寫出吸引人嘅情節呢？由當日《DUNE》系列嘅《沙丘之子》去到《反逆者的魯魯修》第二部，都有類似情況。
雖然我目前係極度唔鍾意諫山創想塑造出黎嘅左膠大愛大結局（雖然我仍然期待結局黎個終極一Twist），但佢的確係好成功將複雜嘅種族議題用最通俗嘅方式響作品帶出：艾爾迪亞曾經係世界嘅壓逼者，但響被推翻之後就一轉而成世界嘅被迫害者──瑪雷表面上係一個搾取、虐待艾爾迪亞嘅民族，但原來同世界上面其他國家相比，瑪雷經已算係相對仁慈。
而果啲被壓迫嘅艾爾迪亞人之中，有啲為咗要向被壓逼者表達忠誠，結果就成為瑪雷人嘅尖兵，走去帕拉迪島屠殺自己人……其實響現實世界，俄羅斯亦有一支精銳而殘忍嘅特種部隊，就係由車臣人所組成，早排就被派咗去敘利亞前線做炮灰，你可以話佢地就係現實世界入面嘅「艾爾迪亞戰士隊」。
諫山創同時亦好努力想將果種成人在位者果種壓抑同憂鬱，向同呢部漫畫一齊成長嘅讀者表達出黎，睇住法爾可同賈碧果種單純嘅正義感點樣同上咗年紀嘅主角群碰撞，作為由廢青踏入廢中階段嘅我，亦深有同感。
所以如果話第一部嘅巨人係少年向嘅青年漫畫，第二部就係名符其實嘅青年漫畫，而第三部則係掛住青年漫畫外殼、實際係一套憂鬱嘅成人漫畫。
車臣 殘忍 在 看板Gossiping - Re: [爆卦] 車臣軍誓師大會 的推薦與評價