容祖兒一連18場嘅20週年演唱會開鑼喇！琴晚係第一場，有觀眾喺開場前大叫「光復香港！時代革命！」「香港加油！」「香港人！加油！」等口號，不過叫咗一陣仍然未開場，加上 VIP 區擾讓一輪影相，令在場觀眾一度鼓燥，大叫「開場啦！」「回水！」，更向 VIP 席發出噓聲「楊受成坐低啦！」「影完未呀？」
去到9點14分，容祖兒個衰妹終於蒲頭喇！佢喺一個巨型波波入面現身，唱咗《空港》，然後連串勁歌熱舞，不過去到第二部分，舞台出現嚴重故障，台中間升降出現問題，未能變為平地，令祖兒唔可以行入去台中心唱，要喺舞台四周走動，變相令排好晒走位嘅環節，都要臨時人手改動走位！
人急生智，好彩祖兒呢廿年舞台經驗都無白過，令佢非常冷靜處理，一班專業 dancers、工作人員同佢即場執生走位，就算壞 earmon 都無影響演出，觀眾不斷拍手鼓勵，加上嘉賓「逃犯剋星」張學友出現，將全晚氣氛推上高潮，佢大讚祖兒係現今樂壇「具備晒最好歌手嘅條件，對唱歌有熱誠、謙虛、努力、會挑剔自己」，仲話係佢最欣賞嘅後輩歌手之一，學友哥哥 i agree with you！
高潮一浪接一浪，對於舞台故障搞到唔可以呈現一個 good show，祖兒非常自責，原定下星期一（8月12日）係佢嘅休息日，佢即場決定回饋歌迷，12號補辦一場比琴晚嘅觀眾，只要拎住5號飛尾，12號就可以再睇多場！
#琴晚睇到一場專業級表演
#遲啲睇多場完整嘅再分享騷後感
#嚟緊18場繼續加油
