《換鞋》
♂：早晨
♂：再唔起身，就唔可以空肚食早餐喇
♂：我相思病發，就黎死喇
♀：相咩思，最多比你單思，好眼訓啊，比我訓多陣啦
♂：你捨得我等你咩！
♂：好……你用行動表示左你真係捨得
♀：大個喇，你要獨立知唔知！
♂：之前咪話23號食飯既，我覺得可能食唔成喇
♀：嘩，我訓緊既時候好似發生唔少事喎
♂：可能我太直接……佢咪失婚既，剛剛佢話自己想搵過個好男人，我就同佢講，佢無好好珍惜佢前夫，只係因為性生活唔協調就離婚，依家性生活係好滿足，但就搵唔到好男人
♀：性生活真係咁重要？
♂：唔重要咩？
♀：唔……我唔知喇，但我唔覺得值得離婚囉
♂：子非魚，安知魚之悲
♀：子非我，安知我不知魚之悲？
♂：其實佢性生活係點我都無權過問，但我同佢講左我對於婚姻既睇法，講完一輪佢就話，其實佢係想我安慰佢氹佢，而唔係說教
♀：哦～你只不過係犯左天下男人都會犯既錯誤，不過今次你犯既錯，我覺得幾好，咁你對婚姻既睇法係點啊，我都想開下眼界
♂：你有幾多對鞋？
♀：十到二十對左右掛，我都無認真數過
♂：咁你著得最耐既一對鞋係幾耐？
♀：應該有三年掛
♂：咁你最喜歡個對鞋又著左幾年？
♀：一年左右
♂：我覺得婚姻就好似買鞋咁，一對鞋再貴再好睇，都敵唔過時間既考驗，有日對鞋都會殘會爛，最後唔想再著
♀：你知唔知點解女人會有咁多對鞋？因為女人比男人對細節要求更多，顏色、衣著、場合都需要配唔同既鞋，咁我又問返你，你有幾多對鞋？
♂：三對
♀：我估，皮鞋，出街鞋，波鞋係咪
♂：中晒
♀：女人係唔同時間段，會有唔同既需要，我以我為例子啦，讀書個陣我都係得三對鞋，一對返學，一對出街，一對盛重少少既，當時係好簡單，但讀大學個時，你會發覺，得三對鞋係唔夠，當你身邊同學著唔同既潮鞋，你就會審視自己，係唔係需要更多既鞋
♂：繼續
♀：我承認係人有我有既心態，但當你接觸唔同既鞋時，你先發覺呢個世界唔係得呢三種鞋，原來唔同既鞋會令自己著衫，氣場，感覺完全唔同，世界好大，以前自己係幾咁無知；到返工既時候，你會發現身邊同事開始著名牌鞋，有個logo係度，識貨既人係會知佢對鞋係賣緊幾錢，當年為左證明自己唔會輸比其他人，我儲左兩個月錢去買左對Chanel，係靚既，但一著就覺得唔舒服，不過我都忍住痛咁著，然後習慣左
♂：我聽緊
♀：到自己有返一定既成績，我都會有唔錯既鞋，但我更想要對著得舒服既鞋，因為我已經唔需要用鞋去證明自己，我自己本身就可以證明到，所以，今日我著既都運動鞋，呢個款，我已經買左第三對，因為我知道係適合自己
♂：咁我想問，當你見到有人著對名牌高跟鞋時，會唔會羨慕對方呢？
♀：我買得起啊，只係我唔買姐，有乜好羨慕？名牌唔會日日著，為左一年著幾次而去買對鞋，除非真係好喜歡啦，唔係我都唔會買
♂：點解我聽落好似話中有話咁呢……但一對鞋，係應該去保養佢先可以令佢著得更耐，呢個係我既睇法
♀：你要用鞋去比喻嘛，鞋，再好著都只係著幾年，先唔講款式好唔好，但如果你日日著都肯定會著爛，拎出去整都好，都會有完結既時候，你有冇聽過希修斯之船？一隻船，佢換一塊木都仲係個隻船，如果隨時日一塊一塊去換，到最後，全艘船已經無一塊係原來既船，咁呢隻船又係唔係當初既希修斯之船呢？
♂：所以，人要變，當你不斷更新自己既時候，先可以歷久常新
♀：你要保養，要修補，都係其中既方法，但最好既係一路好似電腦咁更新，唔係只會有一日比更新既型號取代
♂：有你真好
♀：做乜
♂：無，有個可以令我心悅誠服既人，令我可以諗多左諗好左，真係好好
♀：我係幾好啊，所以我從來都唔怕會無人要
♂：咁我都要急起直追你先得
♀：追我唔難，但追到我之後，可以跟上我步伐，可以令我跟埋你步伐既人真係唔多，追一個人，只係永遠係佢身邊，而真正既伴侶，應該係身邊
♂：今次，我聽你講，你的確比我諗得更多
♀：知唔知每個運動員都想有個好對手，一時勝利或失敗唔重要，但好對手可以令自己成長，成長係永遠都屬於自己既，你係一個好對手，雖然唔係能力好強，但我覺得同你交手係好令我有驚喜
♂：我唔介意一世都輸比你
♀：喂，我介意啊！
♂：咁我認真咁對付你喇！
♀：咁就好，我幾驚你話你之前已經好認真！我好少期待人啊，你唔好令我失望
♂：好，我會出盡十二分力去等你追返我轉頭，到時拉你一把
♀：咁我期待你既背影！
♂：我諗起朱自清
♀：爸爸
♂：畫風變左！
♀：爸爸唔好唔要我，我要抱抱
♂：好啊，到22號我抱你，比你騎膊馬添！
♀：你夠力先好啊！
♂：一定夠，晚安
♀：好啦，晚安喇，聽日我全日都忙，你要乖乖啊！
——
長傾·不見 第一回 @筆友
https://bit.ly/LongchatEP1
長傾·不見 第二十九回 @呷醋
https://bit.ly/LongchatEP29
好久 不見 第一回@久違
https://bit.ly/LongtimeEP1
好久 不見 第七回@換鞋
https://bit.ly/LongtimeEP7
運動鞋修補 在 修鞋公社- 運動鞋修補後跟內裡...... | Facebook 的推薦與評價
運動鞋修補 後跟內裡... 鞋子因為常穿，鞋後跟內裏布都磨破了，送去坊間修鞋店，結果不僅補了皮革，重點是顏色還不一樣，客人一整個大傻眼⋯ 人客ㄚ⋯只要使用 ... ... <看更多>