【劉威煌 Rebirth 音樂會 2021 感謝祭】
Part one (好鬼長)
首先要感謝我地成個show既音樂主幹成員：
葉肇中(音樂總監、Guitar & keyboard)：成單野既主腦，唔係佢我都唔敢膽粗粗做呢件事，11年既默契，我信佢仲多過信我自己，所有曲目流程編曲一手包辦，我只係比一大堆想唱既歌出黎同想表達D乜咁上下，佢就分好每一Part應該點攪，特別係所有既Medley部份，佢真係一個鬼才，要求極高，而且做野快而準，佢會顧埋其他人例如我唱唔唱到，夠唔夠體力，其他樂手配唔配合到，總之就每個層面佢都會諗埋，最重要每次做完一定要打番板波先安樂。😅
Jeff (Bass & Guitar)：佢都係李炳師弟，第一次見佢根本就唔知佢識阿中，我同佢係母校要一齊表演而認識既，講明係合作，但我諗呢個人咁搞笑彈Guitar咁勁既，可以完全唔理我，追到我氣都咳...😐音樂獨行俠，都要有融入既一日，今次音樂會幫忙整理歌譜不特止，仲背晒所有譜，不斷練習同融入樂隊，不能說100分，但對比以前已經係極大突破，夠膽行出一步先最重要。
熙哥Craig (Drum)：第一次就係出席一個大型表演，阿中話佢D鼓啱我玩，可以好鬼爆炸，而且穩定性好高，一夾即刻feel到好正😍，而且人品好好，斯文有禮，我當時講左如果我有一日再有機會玩Live band一定搵佢，不二之選，今次佢為左套鼓靚聲仲特別請埋阿鋒哥(Rubber band、恭碩良等等都係佢搞)Tune鼓聲，認真到嚇我一跳，出黎既鼓聲都唔駛講啦，正到飛起！好有Feel...我唔知日後有機會仲請唔請得起佢...😞
浠彤 (Keyboard)：呢位小妹妹係我有次去Vie Simple Live識既，第一次見就係直播前一日採排夾歌，我曾經夾過好多年輕樂手，個個身懷絕技，但好多都好Jeff...😂浠彤同Tomy比我感覺好唔一樣，好有準備而不死板，會跟歌手個Flow去玩，當時用左好少時間就夾晒，感覺非常良好，本來好想佢地兩位一齊黎音樂會玩，可惜我資源唔夠，我地亦只欠一個Keyboard手，所以就誠邀浠彤參與，現今年輕音樂人需要機會，佢地係香港音樂既未來，我希望可以出小小綿力。
阿業 (樂隊助理)：基本上識佢係阿中以前屋企天台新年賭錢先見到佢，唔知佢乜水，只知道佢玩$20蚊一鋪已經係好大膽個隻😐，後來阿中先話我知佢以前D show 都係阿業一直做後盾幫忙，於是之前我同阿中既Show就開始同佢正式音樂上既接觸，默默耕耘黎又唔怕蝕底黎形容真係無錯，由電腦控制、執譜到每個道具，超細微去執漏，每次完左採排都會每個部份整理出黎去提番我地每一位成員，佢自己又大把野要顧，越黎越成熟，係我地既天眼！
阿言 (Dummy成員、Bass手、作詞人、Designer、形象顧問等等) ：識佢因為Dummy，佢最叻就係吹水傾計，佢周身刀，但比我感覺無張利...😆有一段時間唔知佢做乜，因為我都只顧住搞我小生意，今次音樂會再次傾番，我發覺佢已經變左另一個人，吹水仍然係叻，但佢張張刀都開始有D利，我好多時諗Idea就叻，好需要一個有料既人去完成，而且阿言好了解我，一拍即合，本來只係搞張Poster，搞搞下好似乜都關佢事...又係另一個鬼才。
榴槤俠 思傑 (表演嘉賓)：30年既老死，細個印象最深就係佢歌唱比賽輸比我跟住喊，我當時覺得呢條友咩料啊？好正常啦...😎但依家諗番呢D就係熱愛唱歌既執著，佢呢把火今次比我地(包括你地)燒番起黎，一個意外食榴槤比網友發現再去到自己開奶，今次能夠有自己一首作品第一次麥花臣發表，我知佢好開心但我同中仲開心，佢既故事係可以話係好多香港人既縮影，但每個人都有權利去選擇自己想做既野，唔好成日比個框框死左，希望鼓勵感染到其他人。
廖sir & Lak哥 (表演嘉賓)：超級巨聲3隊長加佢既好拍檔Lak哥，今次擔任暖場嘉賓，唱歌好聽唔駛講，唔好覺得廖sir只係識得講粗口，佢係一個好有義氣既好人黎，我今次最低潮既時候佢安慰左我幫左我好多，我自己屋企玩直播都無話想做乜野其他直播嘉賓，廖sir既直播就係我第一次同中去擔任既直播嘉賓，亦因此集結番Jeff同熙哥，仲有利士收，開心到我飛起，大家都知直播都唔會有乜收入，佢真係好尊重音樂，今次叫佢即刻二話不說，無同我講提過酬勞，唔通佢大把錢？😉😁
我已經盡我能力去長話短說，真係感謝你地，音樂會既音樂基礎先成立，我好好彩遇到大家，三生有幸。🙏🙏🙏
待續....
