《法羅群島趣聞一則》
話說上星期二，女人A去完超市買野。出黎見到架同佢架車一模一樣嘅車，而架車嘅車匙仲插喺車入面，無熄匙，於是女人A二話不說走左上車開車走人。
然後女人B出黎，發現自己架車唔見左，即刻報警。過左無耐，女人A發現架車唔係自己嘅，即刻還返架車出黎。
最後，女人A無被罰，因為佢無心偷架車。而女人B就被罰款，因為停車唔熄匙係犯法的。
故事教訓我地喺法羅群島記得要誠實！偷左人車乖乖自首就無事架啦🙈🙈🙈🙈但最重要記得要熄匙！熄匙！熄匙，重要嘅野講三次！自駕人士要小心啦🤣🤣🤣🤣
講起誠實，法羅群島完全係將Honor system 運用到極致嘅地方。我同大地之子睇咁多次戲，都無見到有人會喺門口查飛。大家自動自覺乖乖買飛入場。
有一日我去超市買水果，見到一蚊一個桃，於是買左十個。去到畀錢，收銀員問返我轉頭：「d桃幾錢個呀？😊」「1蚊1個」「哦」然後check都無check佢就收左我十蚊。
又試過買意粉醬，有兩個價錢牌，一個寫住13蚊，一個寫住25蚊。到畀錢嘅時候，佢收左我地25蚊，我問：「唔係13咩？個牌寫住13」然後佢又check都無check畀返12蚊我。後來有次我再買意粉醬，發現繼續有兩個價錢牌，決定問左先買，一問發現25蚊先係正確價錢。
我問大地之子：「嘩。咁做生意，咪蝕晒大本。」
大地之子話：「咁少錢佢地唔會同客人爭論。大家開開心心先會繼續幫襯。」
我諗最重要係因為呢度人人都好誠實，唔會有人刻意欺騙，大家都互相信任，所以店員都好信任客人。如果喺其他人多嘅國家，我諗間超市一早執左。雖然呢個地方無咩娛樂，生活都幾悶架有時，但係呢度所有野都好簡單，人同人之間無咩以虞我詐，大地之子返工氣氛輕鬆，無辦公室政治，輕鬆鬆鬆又放工，無咩生活壓力。
有人問大地之爸：「阿大地之嫂放棄左香港咁多野，為左你個仔搬黎法羅群島，好大犧牲wor，你點睇。」
大地之爸話：「佢唔係放棄左香港，而係選擇左法羅群島。」
大地之爸嘅語言技術好高超。其實即係凡事有兩面。你可以負面咁睇，你犧牲好多野。但亦可以正面咁睇，我選擇左生活簡單嘅法羅群島：）
---------------------------------------------------
❤️我從九龍半島搬到法羅群島出左網頁啦！想知道更多法羅群島旅遊資訊或者想分享法羅群遊記，記得去 www.whereisfaroeislands.com
❤️如果想睇更多大地之嫂同大地之子嘅無聊小故事，大家記得去我個page度較返See first 呀！
❤️仲有要記得follow埋ig: whereisfaroeislands ，
https://www.instagram.com/whereisfaroeislands
