等咗9個月,終於可以接金毛飛返屋企啦,但我要從Seattle飛去Dallas湊佢返來。
個行程好攞命,我都覺得自己有病。即日來回,倒塔咁早7:30am 由Seattle飛3個半小時去Dallas。金毛飛既breeder會湊佢去Dallas機場,將佢交俾我。然後我再搭5pm既班機由Dallas飛返Seattle,成個過程費時12小時。
我知道大家會問我點解要咁大費周章?狗狗培殖場周圍都有啦。因為,飛飛係一隻微型混種狗,相當罕有。養開狗啲人可能會話:唓!微型狗好普遍嗻,駛乜咁大陣仗?係,微型狗仔混到九彩,幾細,幾得意都有。但通常混出來,都會有啲傻傻地,唔係太醒目。但金毛飛呢種混法,就相當少見。佢外婆係金毛尋回犬,外公係玩具貴婦狗,媽媽係一半金毛尋回犬,一半玩具貴婦狗,爸爸係微型貴婦狗。因為佢媽媽超迷你,所以要用人工受孕,先至可以培殖到飛飛呢種微型混種狗。
優點?佢保留咗金毛尋回犬同貴婦狗既極度聰明,有金尋既善解人意,愛心爆棚,但冇咗金尋嚴重甩毛既麻煩,有貴婦既機靈敏捷,但冇咗貴婦既刁蠻任性同吵暄巴閉,再加上體積微型,成人犬都只係得3-5磅重,可以擺落手袋度帶出街,非常過癮。
玩物喪志?狗奴才知罪😅🤣🐶
Search