【如題。】
#長文慎入
早兩日同朋友食飯傾開，佢問咗我呢條問題。
我答唔到。
點解要開呢個Blog、有咩原因令我13年都冇放棄過，週年紀念果時我已經分享過好多次，甚至三年前我曾經好努力咁迫自己去執咗個網，因為覺得好無謂好花時間，最後都係執唔到，原來呢件事慢慢已經變咗生命一部份。衰啲做個比喻，唔通你覺得湊仔好累，就要殺咗你個仔咩？冇得咁樣。
呢個問題，我有諗呀，最後我都係答唔到自己。朋友話：你做咗咁多嘢、堅持咗咁耐，終於做到自己個brand，俾你玩到篇篇文上Google第一位喇，你應該都有嘢想達成架？你應該都有個目標架？
我諗，作為一個Blogger，每個人最終目標都係想將興趣變成賺錢途徑，有廣告、有收入，邊個唔想？但係，或者呢13年嚟我一早已經睇化曬，係有好多廣告搵我，但九成都係「冇Budget」嘅客戶；你唔係未試過自己send proposal出去傾合作傾生意，就算俾你傾得成，都係「冇Budget」嘅，漸漸你都蝕氣，不如罷了。你想有人課金、開個網店，可能一年真係搞到一次好成功嘅包場，但你閒時更多係問你拎呢樣果樣、網店買嘢唔想俾錢，或者講「你任何要俾錢活動我都唔會參與」。
喺大約四五年前，正正係我由Sina轉去自己個網時，係我好熱血最想「搞大佢」嘅時期，但經歷咗呢四五年不斷嘅失敗之後，你個創業夢、你個「興趣當飯食」目標早已磨蝕，間中網店有人幫襯、Patreon有一班人願意不離不棄課金支持，已經好好。事實上，間唔時無啦啦有無聊鬼會Payme課金1蚊俾你，話「當俾帛金啦！」我唔知點解有Hater會無聊到俾帛金你，以前我會嬲，依家開始睇化，有1蚊都叫賺到1蚊。
呢啲年，自己唔係冇試過其他嘢，做網台、拍過片、寫過唔同專題文章，反應都係咁上下。
最終，我想要咩？我答唔到自己。
我成日喺度諗，呢度點樣先會有終結嘅一日。好多同我同期嘅Blogger，或者事業有成、或者有咗家庭，都漸漸已經退出咗呢樣空有付出嘅行為。我會諗，其實係咪自己太無聊，又或者身邊冇乜朋友可以同你分享電影，先至咁得閒當咗呢度係個樹窿？如果我他日有幸成家立室、事業有成，仲有冇可能堅持到日日平均寫2500字？我幻想唔到。
如果，有一日我停止更新，可能都係件好事，我人生或者有個大轉折，終於有個網上世界以外嘅方向。
朋友又問，你成日遇埋咁多騎呢人、咁多Haters，你有冇懷疑過自己到底喺度做乜，為乜要搞到自己咁唔開心？呢樣反而係一段成長嘅過程，以為我對住騎呢人或Haters，我係會忍唔住去同人罵戰，但今時今日，三日唔埋兩日就俾人圍，圍到我都冇乜感覺，唔係太過份都一笑置之，我諗呢段時間入面，係可以好好訓練到我嘅EQ。
好老實講，呢13年嚟，我得到錢銀上、實則上嘅嘢就唔多，最大得著可能就真係識到大家。由分享會到買書到包場，喺你生活低潮事無大小都會有人關心你，甚至俾你身邊人更關心你，亦曾經因此得到過緣份，我諗會係我13年嚟最珍貴嘅部份。朋友問我13年努力就得呢啲，甘唔甘心，我又覺得呢13年儲到嘅人脈的確係無價嘅，亦都喺現實有需要時會幫助到我一把，都因為各種人脈，令我嘅眼界大開，我又唔會話只係得到呢啲而唔甘心。
朋友又好奇，你呢13年咁樣寫法，點都會有過壓力掛？的確，每一次睇完戲我寫到通宵達旦，寫完唔會有咩回報，分分鐘仲要俾人圍，但會唔會有壓力呢？我唔知道，可能我已經習慣咗呢種俾自己嘅「壓力」，漸漸，都唔覺得係壓力，有時打文，可能仲係我渲洩壓力嘅一部份。
朋友最終都回歸到呢個問題：我諗你要諗下，自己到底想要啲咩，我又唔覺得你不求回報咁。
我唔係善堂，不斷貢獻冇任何回報，我都會冇癮，但當你努力改變都做唔到啲咩嘢，而你又放棄唔到時，都唯有係繼續落去。朋友好佩服我堅持，我只能笑言不語，有苦自己知。
我諗咗幾日都唔知，可能我一早俾現實搞到冇咩希望可言，內心深處想要咩、呢件事最後又會發展到咩地步，我都想知。
希望有一日我會諗到，都希望有一日我可以搵到個完結嘅理由。
純粹俾朋友問完一大堆後，有感而發，多謝睇到呢度嘅每一個你。
‼️電影網店全新貨品已上架，低至$5起，快啲嚟搶購啦：https://bit.ly/3qLPkpk
【Patreon加強版】尊享優惠、更多深度獨家電影文章：https://www.patreon.com/travelerwithmovie
📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://bit.ly/3a9wOzy
或使用Payme link：https://payme.hsbc/jackyhei
或透過Paypal捐款：paypal.me/jackyhei
【IG請follow】www.instagram.com/travelerwithmovie
【MeWe請Follow】mewe.com/p/travelerwithmovie
🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu
