未知全貌，不予置評。
無論喺日常生活定係職場，好多人睇嘢只會睇表面，好鍾意一知半解就妄下定論，例如有年青偶像彈起會聽到人講：「都唔知佢哋點解會紅，一街都係呢啲MK樣。」
唔知就應該搵答案，人哋紅嘅背後係包含好多付出、心血、汗水，有啲辛酸係外人見唔到。
又聽過人講：「IT真係易做，日日坐喺度涼冷氣對住部電腦寫code，有事頂多叫人熄機再開，呢份糧幾易賺，第日我都要個仔讀IT先得。」
聽住一個連IT Support同Programmer都未識分嘅人講呢啲，你都咪話唔諷刺。
之前先有人同我講差唔多嘅嘢，對方話：「你就好啦，每日嘅工作淨係寫一篇5分鐘睇完嘅文，一定有好多時間淨。」
佢覺得5分鐘睇完嘅文章，應該係用5分鐘就寫完，如果咁計，一套兩個鐘嘅電影，理論上都係兩個鐘就拍完啦係咪？
早排我仲聽到有人話：「同事有銀屑病，會傳染㗎！仲唔可以掂到泳池水，因為有氯氣，不過聽老人家講，其實有偏方可以醫。」
呢單真係忍唔住要出聲，唔好搵啲咩偏方，亦唔好亂咁噏會傳染啦，一知半解就發表偉論除咗自暴其短，仲會累到人㗎！其實銀屑病係唔會傳染，而且已經有多種治療方式，包括外用藥膏、光學治療、口服嘅免疫系統抑制劑，同埋較新嘅注射生物製劑，搵專業醫生幫手就得㗎喇！
非牟利組織 香港銀屑病友會 Hong Kong Psoriasis Patients Association 嘅平台仲會為患者提供協助同服務，令有需要嘅人可以互相交流，連相關嘅飲食同埋運動資訊都有齊，想更加認識同埋了解銀屑病，記得去佢哋嘅專頁喇，或者click入以下網站都得👇
http://www.psoriasis.org.hk
