[供樓供平咗]今日平幾十,遲下平幾舊,甚至幾千
1. 經濟日報的原文(https://bit.ly/2xfKpXK)1個月HIBOR跌至月內新低部分H按跌穿封頂位 金管局今晨第6度接錢逾200億
2. 上回講到(https://bit.ly/2ShkTZp),3月兵荒馬亂時香港拆息持續高過美國,卒之呢排開始見到似乎有返啲套息活動,套利者(即係,我十幾年前返工做嘅嘢)借美金存港紙,咁當然要買港紙,港紙持續強勢,多次掂到7.75嘅強方保證,金管局接盤,注入港紙,港紙多咗,拆息自然低返。成個feedback system係咪好偉大呢。
3. 與此同時,金管局亦減發Exchange Fund Bill外匯基金票據—你可以理解做發呢啲東西就會吸走市場流動性,咁減發就紓緩返咁,當然實務上因為香港行聯系匯率,金管局可以做嘅嘢唔係太多,都係順手推下。
4. 上次篇文寫過(https://bit.ly/2ShkTZp),有人更正。是的,當時宣佈連續4次減發,每次減50億(港紙,下同),就係4月21,28,5月5同12。我篇文話4月21號結果冇做,係錯嘅,已做。4月28日都做咗,所以呢度已經多咗100億出嚟
5. 唔止,樓上咪話因為港紙7.75,金管局接盤,注入港紙。呢度只係昨日都注咗130億,呢輪夾埋已經200億。
6. 結論點?即係,個銀行體系結餘,4月20號都仲係540億,最新已經去到847億。6個交易日升咗6成喎。唔止,仲有5月5同12嗰兩次減發Exchange Fund Bill,即係會去到947億咯。Other things equal啦下
7. 咁最重要係乜?其實簡單供求啫,利息是甚麼?資金嘅成本(原來咁簡單嘅嘢都有人唔知)。Other things equal,咪供求定律,多咗錢,利息當然低啦。所以你見到HIBOR連跌5日
8. 以上都好似重覆講過幾次,雖然可能用唔同字眼。咁最重要係乜?最重要係,之前都話,H按一路仲係封頂位(一般供樓息都係H+乜乜乜,但上限P-乜乜乜,等你唔會因為個H忽然亂爆而大失預算),跌咗你都唔會供少咗 —但而家開始跌穿啦
9. 正如文中所講,當然睇你個H+乜乜乜同P-乜乜乜係點啦,人人不同。但文中例子,有啲夠平嘅plan,H+1.24甚至更低嘅都有,實供係2.47,低過封頂嘅2.5厘了。
10. 當然講咗咁多,講緊可能一個月慳二三十蚊,真係討論都費事 — 但,如果HIBOR一路跌呢?你諗下美國聯邦基金利率而家幾多?HIBOR跌到近零,有幾出奇?
11. 金融海嘯後,QE1,2,3嗰幾年,HIBOR講緊半厘都唔夠。直到聯儲局開始縮表加息,HIBOR先追返上嚟。如果美國經濟一路差,咁幾時先會加息?—不過呢個我幾有保留,你講嚟緊一兩季梗係極差,但可能好快反彈呢
11.5 當然再長少少睇,就算當一年,兩年後加息,加得幾多?而家啲人已經上晒毒癮,加兩厘息已經叫晒救命(正係過去幾年你見到嘅事)。咁你話, 「加兩厘息都好甘」。咁唯有講句, 「加兩厘息都痛嗰啲,當初根本就唔應該買樓」。
12. BTW,有人問,喂,好似幾有用喎,至少都同生活悉悉相關,人地講起都可以搭到兩句嘴,至少有人亂咁講,你可以話「唔係喎我呢見埃汾唔係咁講喎埃汾你都唔知快啲科勞啦」。咁做乜中學冇教呢啲?大學都冇教呢啲?
13. 簡單答案就係,教書佬,打份工啫,邊有現腥鐵乎?我教書都唔講呢啲啦。
深啲嘅答案係:呢啲係市場經驗嘛,你問下教大學嘅有多個自己落場炒過電(*)?我就炒過啦。
(*)呢個故事應講過,不怕再講。大約2005年前後,我做緊蕉行刁拿,未轉去耆英做證券分析員。咁當然一如我人生嘅哲學,maximize your options,有工見多啲。真過檔做肥魚又好,兇舊老細又好,八十歲後仲打飛機話「我嗰時都見過高盛啦爭少少就請咗我」(對,我都爭少少就泡咗李佳芯,你都爭少少就發咗達),實係好事。咁當時我去見工,去咗HKMC,唔係HKMA,係萬惡嘅HKMC,你做按揭保險就知呢間嘢,被原教旨liberal(我唔係呀下)視乎「港版Fannie Mae」嘅東西。
咁我去見工,有個類似馬時亨嘅肥仔見我,都冇乜廢話問。幾包客套話就單刀直入,「做刁拿架下話?呢排啲電點睇?」。
幸好,我問佢「咩電?中電?加電費咯」。電者,美電也。所謂USD/HKD是也。要問人「扒登?」嘅,應該即時可以抬走。行外人唔知唔奇,但你做刁拿都唔知嘅,死得。亦都係舊文成日講嘅故事,穿PRADA的惡魔,呀大口姐姐剛返工,人地打嚟留言,佢問人- "Can you please spell 'Gabbana'?",對方就cut佢線啦(https://bit.ly/35eTNaK)
講返,九吹咗一輪美電後,然後佢再問下我,如果有一碼(again,一碼係one billion,問乜嘢一碼嘅可以踢出門口)美金bond portfolio,我會點放。咁我就滴晒汗啦,廢講咗一輪,佢唔唔唔咁。我唯有最後佢問我有乜問題時,我問返其實佢地會點放。呀馬時亨冷冷咁回我一句:proprietary trading,唔方便透露。Translation :關你撚事
———————
版務:收費專欄已推出,支持埃汾高質文章。幾舊水睇三個月,一星期三篇
請去呢度訂:bit.ly/2wVXndj
課程編號填: CC01
科咗水後後有Login及Password畀你
逢一三五入去 homebloggerhk.com (見到就睇到《事先張揚》),亦睇得返以前嘅文。一般我都係會黃昏出文嘅。
Search