《扮工鬥室》好地地打份工，點會諗到暗藏殺機？（試閱二）
作為一個身心健全而且血氣方剛嘅男人，我年中當然係睇唔少愛情動作電影。對於女上司喺辦公室同男下屬「大戰」數十回合嘅劇情更加係瞭如指掌。但真係發夢都冇諗到，自己有朝一日居然會成為片中嘅男主角，對手仲要係模特級數嘅大姐姐。
本來我一下腦充血已經準備好除衫，但僅餘嘅理智喺最後一秒將我拉返轉頭──喂喂，方璟佑，現實係咪真係會有咁著數嘅事先？會唔會所有嘢都係一個局？譬如公司有個奇怪傳統，專玩新入職嘅同事？
一諗到呢度，我即刻揭一揭旁邊嘅窗簾，睇下係咪已經有人喺走廊埋伏準備等我出醜之後拍片放上youtube……
但冇，走廊外面依然係非常平靜。
「你搞咩？」Me姐問：「快啲除衫然後過嚟喇，拿拿臨搞完我就要再出去。」
「Me姐……妳係認真嘅？真係唔係玩我？」
「玩你？喂新同事……都已經咁囉，你仲未搞清楚狀況？」佢一講完即刻交換左右腳再翹過，感覺相當具誘惑意味，「你再浪費時間我就走㗎喇。」
佢嘅語氣態度聽落確實又唔似係伏……如果因為生性多疑搞到錯失良機咁就太可惜喇。所以我最後都係豁出去，將西裝外套恤衫底衫除晒然後放喺側邊嘅梳化上面。但喺事情「更進一步」之前，我點都會守住條褲呢條最後防線。
＝＝＝＝＝＝＝＝＝＝＝＝＝＝＝＝＝＝
上集連結：
https://www.facebook.com/Echo.of.Heart/posts/2085452518253220?__tn__=K-R
《無異之地》已登錄各大書局。
＝＝＝＝＝＝＝＝＝＝＝＝＝＝＝＝＝＝
「過嚟。」Me姐招手叫我行埋去，再次認真打量我，「唔……外型係幾好，係瘦咗少少，同肌肉略嫌唔夠多，你平時冇去開做gym？」
「冇……」雖然除咗衫，但我反而開始覺得有啲熱，「都係落球場踢波多。」
「以後有機會就同我去健身室操下。唔訓練好體能嘅話，我驚你遲早會頂唔順。」
「好呀，得閒一齊操下囉。」
「咁喺開始之前，等我準備好個套先……」講到呢度，Me姐伸手入去自己嘅手袋裡面摷嚟摷去。
套？聽到呢度我當然感到訝異，估唔到喺高冷嘅外表背後，Me姐居然係一個咁細心體貼嘅女人，而且仲咁識保護自己……居然連套都準備好，確實令小弟欽敬。
「咦？點解搵唔到嘅……」
「如果妳要套嘅話，我銀包裡面有一個……」
「銀包？」Me姐轉過頭一臉疑惑，「你銀包裡面點解會有手套？」
「吓？」我呆咗，「妳原來係搵緊手套！？」
「當然喇，幫你打針更係要先戴手套，唔係你以為係啲咩？」
「打針！？」見佢真係喺袋裡面拎出一枝針筒，我當堂嚇到退後幾步，「我又冇病點解無端端要打針？仲有……打針最多咪除恤衫，點解底衫都要除埋！？」
「哦……」Me姐聽完突然露出恍然大悟嘅表情，「我明喇，你以為我想同你……」
碰！講到一半背後突然有人用力推開房門，我下意識即刻飛撲過去梳化嗰邊想拎起件西裝外套嚟遮醜……
「嘩！」推門嘅人係架叔，佢身後仲有另一位未見過嘅男同事，「好彩枝針未打落去，唔係就真係出事喇。」
雖然佢當刻冇拎住手機拍片，但我都唔敢鬆懈，極速九秒九著返好底衫同恤衫。
「架叔，你明明短訊話今日有新同事準備好加入『戰略部』……點解佢好似咩都唔知咁？」Me姐企返起身問。
「Me姐，今日冇錯係有新同事……但實際上係有兩位，呢位阿Yuk只係一般員工。」
「係阿York。」雖然仲係一頭問號，但我都不忘矯正佢。
「同埋我冇諗過妳今日就返到嚟，唔係都唔敢走去食煙。」架叔尷尬一笑，「我後面呢位先係『戰略部』新同事阿和。」
阿和聽完即刻同Me姐點咗下頭。
「架叔，下次唔該講得清楚少少，你應該比我更清楚成件事唔係講玩。」Me姐嚴肅咁講。
「係嘅，我以後會注意……哈哈哈……」架叔笑完之後望向我，「喂，著完衫就跟我出返去喇。」
「咪住，等我同佢講多句。」Me姐行到嚟我旁邊，「新同事，今次完全係一場誤會……但你仲想喺度返工嘅話，就要當頭先咩都冇發生過。」
「更係冇發生過啦，仲唔夠瘀咩？」我好大反應。
「清楚就好啦。」Me姐本來嚴肅嘅臉突然掛上一絲壞笑，然後慢慢靠近我耳邊細聲講：「但事實我袋裡面的確有你想用嘅『套』……咸。濕。仔。」
「吓……？」
雖然最後係咩都冇發生到，成件事又可以成為黑歷史之一。但Me姐當時最後呢句確實係令我心癢咗好耐……將來久唔久都會諗返起。
回過神嚟，我已經返番座位，架叔仲拎咗一疊嘢俾我。
「為免你又亂咁跟人走，我決定俾啲資料你處理下。」架叔解釋：「簡單嘢嚟，都係對下資料……上個月太多單喇，所以有人搞錯都唔奇。然後一陣就跟埋我哋去食Lunch喇，順便介紹工程部嘅其他同事你識。」
「架叔……頭先到底係咩一回事？」我忍唔住問：「點解『戰略部』嘅同事要打針？」
「你仲問？好地地打好自己份工，知道得多對你冇好處。」架叔終於收返笑容，然後望向旁邊嘅冷漠男同事，「喂士巴拿，記住幫我𥄫實佢，尤其係放工嗰陣。」
佢聽完即刻畀咗個OK嘅手勢。先唔講佢個名奇奇怪怪，明明塞住耳筒都仲可以聽到人講嘢……即係好可能根本就冇聽歌只係唔想我煩佢。
點都好，喺有啲嘢做嘅情況下，之後半日確實係過得特別快。當然，我周不時都會望返去戰略部走廊嗰邊……但幾個鐘都冇見過Me姐行出嚟，睇嚟好大機會係午飯時間出咗去就再冇返過嚟。
到底枝針係咩一回事？戰略部點解又要搞到咁神秘？當時我諗住時日方長，只要唔俾人炒遲早都會搞清楚……從冇諗到呢日會比想像中更快來臨。
記得一到咗五點放工時間，架叔即刻走埋嚟叫我：「喂新同事，收工喇。」
睇嚟佢仲未記得我個名，所以先叫新同事。
「但我仲有少少未執好，五分鐘應該可以搞掂埋……」
「你可能喺上間公司做慣奴工，但記住呢間規矩唔同……行喇，聽日準時返工就得。」
我當然冇自討沒趣，迅速執好嘢就離開辦公室。因為時間仲早，所以喺公司附近兜咗一圈睇下有咩好食，去到巴士站正好見到自己班車啱啱駛走。見要等成十分鐘，所以想拎返耳筒出嚟聽歌……
「咦？」明明記得Me姐嚟搵我嘅時候將耳筒放咗入西裝外套嘅袋裡面，但伸手入去卻咩都摸唔到。
「唔通係除衫嘅時候跌咗喺梳化上面？」我思考咗陣，越嚟越覺得有可能。
望一望電話，距離六點仲有成半個鐘。就算返公司搵下都應該唔會超時。我向來係一個有行動力嘅人，所以一諗完就即刻動身。
返到公司，雖然仲開住燈，但驟眼睇落已經冇晒人。雖然係咁，但我都冇慢慢嚟，迅速穿過幾個部門嚟到戰略部嘅長走廊，最後入返會議室裡面。
行到梳化位置搵咗陣，果然見到耳筒攝咗喺邊緣位置，好彩冇俾其他人執到……然而，就喺我起身準備走之際，會議室嘅門突然俾人用力閂埋。
「係邊個？」我即刻走過去想開門，但結果開極都開唔到，似係被人反鎖咗，「喂邊個咁大整蠱！？」揭開旁邊窗簾，只係見到有個背影高速跑走，太快所以睇唔清楚……
「喂！」我再敲一敲道門，「可惡，就快六點……點算好？」
我拎起電話，卻唔知下一步應該點做。因為係第一日返工，所以未拎到同事嘅電話。報警？如果第一日返工就搞單咁嘅嘢，肯定唔洗旨意過試用期。
越諗越混亂，唔知過咗幾耐，終於有人喺外面拍門，然後大聲問：「入面係咪有人？」
「架叔！？」我認得出呢把聲，「係我呀！我喺裡面俾人反鎖咗……」
「你退後幾步先！得未！？」
「得喇……」
碰！架叔用力踢開門，成個畫面不禁令我產生既視感。
「你條死仔……我明明睇住你走，點解仲會返轉頭㗎！？」架叔激動咁問。
「我跌咗耳筒所以……」
「耳筒？我話你耳聾就真！」架叔反咗下白眼，「提咗好幾百次叫你要準時走……」
「咁我都冇諗到會俾人反鎖……」
「算喇，此地不宜久留，你快啲……」講到一半，會議室嘅燈突然熄晒。架叔接住講：「慘喇，已經太遲……」
唔單止會議室，連外面走廊、其他部門都同時間熄埋燈。
「係咪頭先反鎖我條友去咗熄燈？」我越諗越不安，感覺完全就係兇殺案發生嘅前夕……拎起電話望咗眼，而家時間係六點五分五十六秒。
「阿佑仔……」架叔第一次叫啱我個名，表情卻係相當慌張，「你咪有好多問題想問嘅……而家有機會知道答案喇。」
就喺時間去到六時六分六秒嘅一瞬間，周圍突然著起紅色嘅應急提示燈，但光源依然係嚴重不足，反而有種陰森恐怖嘅感覺。
「……前題係，你有命過到呢一關。」
（待續）
＝＝＝＝＝＝＝＝＝＝＝＝＝＝＝＝＝＝
試閱只有兩集咋！想睇落去就訂閱 Patreon 支持我嘅創作啦。
第三集連結：
https://www.patreon.com/posts/ban-gong-dou-shi-41239279
除咗長篇故事，遲下仲會有精選短篇，以及分享下多年嘅寫作經歷同心得……當然有時都會講下心聲同秘密啦。
只係每月一餐飯嘅價錢，絕對可以幫到我延續創作生命。
IG：echoofheart
