照舊，時事文原文畢錄如下。賞面嘅，可以去 Medium 睇。
Medium Link: https://link.medium.com/Hqf41ZK6fZ
//
你冇睇錯。喺我心入面，我曾經很喜歡嘅楊千嬅，一早已經死咗，不在人世。
日前講起，楊千嬅唱歌有個招牌動作：擰頭。或者準確啲講，係我唱佢嘅歌嘅時候，都會係咁擰頭。唔信？試下唱「若果親手抱住，或者不必如此」同埋「來吧你想殺便殺，不必心軟，只望你心酸」，唔擰住頭唱，唔通點住頭唱？
楊千嬅，或者暱稱「千fa 」，喺香港流行樂迷心目中永遠有一個獨特嘅位置。唱功不甚了了， live 水平永遠有保證 (穩定地差) ，但偏偏因為好命水，或者改名改得好 (原名楊澤樺) ，佢手頭上嘅好歌，真係一首接一首。千fa 最終嫁入豪門 (邊個讀者有錢過丁子高嘅可以舉舉手) ，可算係一代港女傳奇。
如果當初嘅楊澤樺繼續做護士，冇參加新秀歌唱大賽，佢當然就唔會加入華星唱片，唔會憑一首《狼來了》而彈出。「錯，錯對對錯錯反複經過」，令幾多青春期嘅少男單純地回憶幾多荳芽夢或初戀夭折嘅悲痛 (我真係未聽過有人對呢位大笑姑婆有半點性幻想) 。
下一張大碟嘅《直覺》係樓盤廣告歌 (好似仲要係港人九七之痛嘅主角灝景灣──更正：首歌係對眼鏡樣咁細嘅吳倩蓮主唱，《直覺》係眼鏡舖廣告歌至真) ，但真正街之巷聞嘅一首，肯定係《再見二丁目》。「原來過得很快樂」，林夕多年之後都攞返呢句嘅變奏「原來你非不快樂」嚟做新書書名。黃耀明翻唱就不在話下啦。
《少女的祈禱》將楊千嬅喺華星嘅生涯帶上高峰，而之後轉投新藝寶亦有《姊妹》、《野孩子》同《假如讓我說下去》三寶將佢嘅人氣推得更高。三首歌嘅共通點，兩個字：慘、 K 。可惜我唔係女人，如果唔係喺 K 房跟住音樂擰住頭唱，眼淚應該可以 fing 到過隔離房。
2002 年，《閃靈》、《楊千嬅》、《勇》、《向左走向右走》、《笑中有淚》、《可惜我是水瓶座》、《一千零一個》⋯⋯你不得不讚嘆楊千嬅班底當年幾高生產力，一年之內好似放煙花咁推咁多首到家陣仲可能喺大家 Playlist 入面、家傳戶曉嘅好歌，除咗黐撚線之外，我都唔知仲可以講咩好 (so99y 我詞窮) 。
呢一年，楊千嬅亦獲得人生中第一個最受歡迎女歌手獎。往後三年，佢每年都有貨賣，《自由行》、《小城大事》、《長信不如短訊》。當一個女歌手上咗神枱，佢派嘅歌今非昔比，都唔死得人。不過，我對佢嘅熱愛，已經喺不經不覺之中消減。
楊千嬅好有觀眾緣，拍港產片如《新紮師妹》系列大受歡迎，最犀利係，佢唔需要交出太多演技，淨係做自己，一個傻大姐咁樣樣，已經足夠撐場。後佢唱歌越嚟越少，拍戲拍劇拍到入大陸市場，同余文樂分飾余春嬌同張志明，三部曲由 2010 年玩到 2017 年，又係一個經典。
2015 年，楊千嬅加入向解放軍「致敬」嘅風潮，形象徹底染紅。不過，當我知道嘅時候都已經冇乜感覺。眼前嘅「樂壇人瑞」，已經唔再係當年為愛祈禱嘅少女。反正佢嘅禱告已經喺 2009 年成真，嫁到畀丁子高，仲想點啫。
2019 年，喺「反送中」嘅浪潮當中，楊千嬅最初貼出「RIP」帖文，但後來都係跟隨主旋律而講返香港係中國嘅一部份， blah blah blah 。冇所謂啦，佢都冇余文樂同彭浩翔去得咁盡，仲想點啫。
毋須天籟之音，更加唔需要超闊音域或雄渾聲線，亦無出神入化嘅演技。楊千嬅嘅走紅，同佢本身平凡嘅出身、為情為愛恨似病嘅投入、認真，有莫大關係。平凡民女都可以代入佢嘅位置，可以求神問卜、做個塔羅迷；可以傷心就旅行，盼會遇上安分；可以叩問如何用愛換取愛；可以求好姊妹抱一抱；可以只想趁天氣漸涼，好去讀一些小說⋯⋯
追憶逝水千嬅。縱使大家而家仍然有謝安琪、方皓玟，但係當年嗰位短頭髮、眼細細、性格豪爽、不拘小節嘅少女，始終獨當一面。香港人曾經有過呢一份手信，紀念樂壇鼎盛嘅一段時期，或者已經要稱心滿意。縱使只得一次。
閃靈楊千嬅 在 楊千嬅- 閃靈KTV - YouTube 的推薦與評價
林夕x楊千嬅(Albert Leung x Miriam Yeung) 廣東歌集v.3 閃靈丨一千零一個丨小城大事丨笑中有淚[歌詞同步/粵拼字幕][Jyutping Lyrics]. C90s 港仔音樂. ... <看更多>