$22蚊機票進入大直路，阿布都執左張飛返轉先～ :D
《九十後領隊喜與悲》-【第十回﹒唔好啊！我唔想痾到上九寨溝啊！】
做領隊，除左怕麻煩客人外，亦都好怕自己唔舒服。係九寨溝團出發前兩日嘅早上，阿布我彎住腰，攤係床，肚內萬馬奔騰，來回洗手間又折返房間，情況非常唔樂觀，唯有打電話回分行請病假……
阿布：「早晨，我係阿布，唔該搵主管聽電話……」
主管：「係，阿布，咩事啊？」
阿布：「我唔得喇……我肚痾得好緊要，今日要請假返唔到分行啊……」
主管：「好，你小心身體，好好休息！」
阿布：「仲有死喇！我兩日之後要出團去九寨溝，點算啊？我依家應該點算啊？我兩日後都未好番咁點算呀？」
（人生第一次咁唔想兼咁擔心放病假）
主管：「你冷靜d 先，你拿拿聲去睇醫生，情況唔ok的話，即刻電郵張醫生紙俾我，要幫你通知公司推團，取消你個機位。」
阿布：「知道！唔該晒，麻煩晒，保持聯絡！」
幾經辛苦，終於以龜速爬行到屋企附近的診所，大夫求求你救救阿布啊～要將佢肚內的萬馬一舉殲滅。
醫生：「你腸胃炎，由依家開始要戒口，要食得清淡d，白粥麵包；準時食藥，好好休息。」
阿布：「醫生啊，我係領隊黎，依家咁嘅情況仲適唔適合帶團？」
醫生眉頭緊皺打量一下阿布：「你係……球隊嘅領隊？」
阿布：「哈哈！唔係啊，係旅行團的領隊，兩日後安排左要去九寨溝啊！」
醫生眉頭仍然緊皺：「估唔到你細細粒係做領隊，但你個肚依家搞成咁你仲打算飛去果d地方？你想一直痾？」
阿布：「唔好啊！我唔想痾到上九寨溝啊！咁醫生麻煩你寫一張證明俾我帶返公司，唔該你……」
就係咁，面前的九寨溝團就俾我推走，公司再找領隊頂上。身體要緊，但領隊這一行，病假撞正出團的話，付出的代價就變得沉重。一個月平均兩至三團，出團係領隊收入主要來源，如果公司不給阿布補團，一次腸胃炎就令我的月入有機會少了至少三份一。
阿布睇完大夫，交好推團的資料，瑟縮於廁所一角，吟起詩：「無團無收入，提起家用口窒窒，究竟仲要痾多幾多日？幾多日？」
身體健康最緊要啊，咁多位！
-----------------------------------------------
曾經，我以為只要滿懷熱誠就能自由自在地漫天翱翔，有一天便會飛得很高、很遠。
