我老公係同性戀（下）
上集：https://bit.ly/352nMnD
我連忙提醒自己，要掩飾對阿正嘅愛意。
我扮晒苦惱：「如果我唔係真大肚，好易穿煲。既然要真大肚，唔通我是但搵個男人生？第日佢威脅我哋，或者騷擾我哋個仔咁點算？」
阿正諗咗一陣，佢本身都鍾意小朋友，而且又面臨佢老豆嘅壓力，所以同意同我生仔。
嗰個月，我哋開始同房。
雖然阿正要睇住同性戀嘅影片，先可以同我行房，但可以有親密接觸，我哋嘅關係都行前咗一大步。
我好快就有咗，阿正嘅男友本來都理解佢要傳宗接代，忍痛接受我懷孕嘅事實。
但佢男友有時嚟過夜，我就故意呻呢度唔舒服，嗰度唔習慣，等阿正急急腳嚟照顧我。
一來二往，佢哋兩個人開始嘈交，阿正覺得我哋只係假結婚，男友呷醋好無謂，而且我係孕婦，應該多啲體諒我……
喺我不斷挑撥下，我哋個仔滿月嗰陣，阿正嘅男友終於提出分手。
有一刻，我覺得自己好衰、好綠茶婊。
但所有親友都話，我哋一家三口好幸福，我相信，我係帶阿正一齊行番正確嘅路。
阿正分手後，我冇鬆懈到，因為佢未當我係另一半，仲有機會識下一個男友。
好彩，阿正好錫仔仔，我開始實行下一個計劃。
仔仔五歲嗰年，阿正怒氣沖沖咁問我：「今日出街，見到兩個男人拖手，點解個仔會講『死Gay佬』？你平時教佢啲咩？」
我一臉為難咁解釋，仔仔打算考一間名牌教會小學，校長出名反對同性戀，我驚面試嗰陣會問起相關嘅嘢，所以提前同仔仔講定「正確」嘅立場。
阿正問：「點解仔仔要考呢間學校？你明知我係……」
「呢間係區內最出名嘅小學，我哋唔可以為咗一己喜惡，誤咗仔仔嘅前程。」
我話鋒一轉：「同埋老爺不嬲有啲懷疑，你有同性戀傾向。如果我哋同仔仔講，同性戀好正常，萬一仔仔唔小心向老爺講起呢個立場，又會引起老爺嘅懷疑。」
阿正眉頭一皺，勉強接受咗我嘅說法。
之後，仔仔真係入咗嗰間小學。
我一邊同仔仔灌輸，歧視同性戀嘅諗法，一邊經常帶阿正參加家教會活動，同其他保守嘅家長交朋友。
隨住個仔長大，阿正Del晒手機嘅同性交友Apps，同我都愈嚟愈親近，我諗，佢嘅同性戀傾向，已經俾我改好咗啦！
後來，老爺奶奶過咗身，阿正都冇提起離婚嘅事。
我哋就一直做恩愛夫妻，我覺得我嘅人生好成功、好聰明。
直到六十歲嗰年，我居然發現，阿正有第三者，係一個男人，佢哋拍咗拖好多年。
我難以置信：「你點解要瞞住我？你話你愛我架，你話你已經唔再鍾意男人。」
阿正沉默咗一陣，然後講：「你初時都話，我哋係假結婚，你明白我鍾意男人。」
我唔知點答好。
「我太蠢，到我發現你想改變我嗰陣，已經太遲啦。」
阿正一臉無奈：「我身邊嘅人都好反對同性戀，仔仔開口埋口就係『嗰啲死Gay佬，好噁心』，我只可以同你做恩愛夫妻。」
我有啲無力：「你都唔駛呃我，話你愛我……你可以反抗架。」
阿正苦笑：「假如我咁勇敢，我當年就唔會同你假結婚啦。」
我問：「你驚我？」
「唔知幾時開始，喺我心目中，你就好似我老豆一樣，好想改變我、扭曲我，我改變唔到自己，只可以瞞住你。」阿正居然露出如釋重負嘅神情。
我意識到，大話被拆穿嘅阿正，呢一刻，已經做好離開我嘅心理準備。
我忽然諗起，當年我幾咁討厭阿媽要控制我，幾咁討厭要費盡心思呃阿媽。
估唔到，結果，我都變咗阿正一心要呃嘅對象。
壓迫，從來都唔可以改變一個人。
愈多壓迫，只會換來愈多嘅謊言。
最後，呃人嘅一方耗盡心力，被呃嘅一方，都唔見得會滿足。
—完—
將專頁設定為「搶先看」/ "See first"，最新故仔馬上睇！
新書《筍工重生高科技》已經出版了，現正發售中，
詳情可點擊這裡：https://bit.ly/32hgoSN
你的支持是我最大的動力！
#短故 #短篇 #小說 #陳美濤 #廣東話 #粵語 #tomatochan #我老公係同性戀
阿正分手 在 [新聞] 不爽被人妻甩！已婚小王寄裸照給她老公- 看板Gossiping 的推薦與評價