[viutv] Error唔至救自己亦都係救緊香港人
期待已久，Error終於有新節目《ERROR自救TV》。對上次Error自己4個擔正做節目主持可以話係《全民來電》(雖然得5集，仲要有埋《造星2》嘅參賽者一齊)。但再數佢哋真係4個做主持就係《花姐Error遊2》，但原來已經係9個月前嘅事。
去到今次《ERROR自救TV》，一開始已經講明Error成軍一年多，到底要點樣面對日後嘅挑戰，所以今次就透過唔同訓練同挑戰，加強佢哋喺娛樂圈生活嘅技能。我 #膠兄 本身對Error都有好大期望，之前193亦有DM我去講今次節目真係會令大家睇得開心，而且佢亦都有講到今次呢個節目同《花姐Error遊》好唔同，因為會係從佢哋四人角度出發。
之前喺Facebook Live宣傳呢個節目，佢哋亦都有講過今次製作組就唔再係「花姐組」，即係唔會再係格仔導演阿Mike去負責。而係另一隊製作組拍攝，呢組就係負責之前《港男入贅手冊》同《Chill Club》嘅製作組，193仲有講話係大製作，有6個導演去負責今個節目。
只於 我 #膠兄 睇到今日第3集，真係每晚都要坐喺電視機面前等睇。最初，第一集可能都有笑，但可能節奏上太快，要上網再睇多次先捕捉到更多笑位。但亦都明白第一集一開始係要介紹俾一啲從來未認識過Error嘅人去了解佢哋，而且用咗一個新潮方法去介紹佢哋4個由來，由《全民造星》去到而家，令到一眾未睇過嘅人都知發生咩事。跟住就去到「跳舞勳章」，而且搵嚟《全民造星2》嘅參賽者飾演「梅蘭竹菊」，再嚟一場鬥雞比賽。結果就邀請佢哋師傅「夏蕙姨」教佢哋定格大法，過程中最估唔到挑戰大佬係部PS1，仲要用跳舞機嚟玩， #膠兄 覺得呢集最痴線係你估唔到下一個劇情係做啲咩，真係笑完一個接一個。不過，唯一有個問題就係有啲後製嘅字， #膠兄 都要翻睇時先留心再睇到，可能對一眾上咗年紀嘅觀眾都未必睇得切。
去到第二集，亦都係 #膠兄 身邊唔少朋友有討論同Share嘅集數，就係因為「機械人指令」，肥仔同保錡要跟從阿Dee、193嘅指令去完成任務。令人最爆笑就係佢哋一路唱《大懶堂》一路要用羅志祥嘅「光速XX舞」嚟做呢件事，個個人睇到個個位都笑爆咀。
跟住第三集就係阿Dee個人訓練，相信令大家最記得一定係阿Dee要成為viutv一哥落街宣傳，保錡仲要用卡當成括括卡，去吸引人，而且不斷叫人大叫「支持何啟華一哥」，呢句說話搞到我呢刻都洗緊腦。
之前佢哋宣傳時都有講過，今次節目會令到觀眾睇到Error嘅另一面。有人認為去到今集仍然覺得佢哋係嘻嘻哈哈、都係喺到玩、無厘頭。但事實， #膠媽、#膠爸 都喺屋企大笑，會想睇返肥仔之前跳舞係咪真係咁叻，亦都知道原來有隊組合叫Error。(利申︰之前兩老見到《花姐Error遊》，佢哋睇完一兩集就走開咗) #膠兄 覺得呢個節目所謂睇到「另一面」，唔係實質見到佢哋變到「認真」、「老正」，而係令到之前冇睇過佢哋節目嘅人都會認識到佢哋，簡單嚟講就係「要入屋」。
呢個年代「要入屋」，相信比以前更加困難。因為上網資訊咁多，大家要留意嘅嘢亦都多咗，點樣令到唔同年紀嘅人都認識到佢哋。亦係唔同藝人所面對嘅問題。
亦有 #膠友 認為呢個節目唔知做咩、無聊，但 #膠兄 又覺得喺我哋呢個香港入面好多事情已經遇上唔開心、好大壓力，睇呢個節目令到大家開開心心、有半個鐘笑一笑，好耐未試過一家人都會坐喺電視機前面等個節目。相信製作組亦都估唔到會有咁樣嘅效果，而且佢哋FB Live亦有講述今次拍攝係非常困難，因為佢哋拍攝時期撞正疫情、限聚令，令到製作組原先想拍攝嘅內容都要更改晒，變成另一件事情。
呢3個星期除咗《ERROR自救TV》，亦有《中佬唔易做》，真係可以由晚上10點半睇到夜晚11點半，都可以輕輕鬆鬆、開開心心咁睇晒落去！
#阿Dee係咪真係冇還錢俾肥仔
#193話嚟緊節目會有重量級嘉賓
#膠兄都期待到底係邊一位呢
#最緊要大家健康同開心
ERROR 梁業-肥仔 何啟華 DeeGor Ho 郭嘉駿 Denis Kwok 193 Poki 吳保錡 ViuTV 黄夏蕙 游大東【鴻鵠志－影視筆記】 思想。影視媒體隨筆 港人講電視
=========================
Instagram：https://www.instagram.com/todui9atvshow/
Facebook：做乜膠睇電視
阿dee係咪真係冇還錢俾肥仔 在 阿dee係咪真係冇還錢俾肥仔- Explore 的推薦與評價
但再數佢哋真係4個做主持就係《花姐Error遊2》，但原來已經係9個月前嘅事。 去到今次《ERROR自救TV》，一開始已經講明Error成軍一年多，到底要點樣面對日後嘅挑戰，所以今 ... ... <看更多>