（長文，慎入）
如果大家是用iPhone，而還未update去iOS 11.1.1的話，請三思！我update了，惡夢連場！首先我不能上我家中的Wi-Fi，搞了一大輪都搞唔掂，於是就去Apple Shop。嗰位姐姐聽我形容我嘅問題之後，第一個反應就係「你屋企個Wi-Fi個Password出問題！」咁如果真係password出問題，就應該連我個MacBook都上唔到網啦，但係MacBook上到喎！跟住佢攞我部機㩒㩒㩒，然後話你睇喺呢度都上到網喎，梗係上到啦因為呢度都唔需要用Password！我喺屋企每次想登入Wi-Fi嘅時候佢都問我攞Password！打咗一萬次（係誇張咗嘅，應該冇一萬次）同一個正確嘅Password佢都話唔啱，咁我先至嚟啫！
佢見我唔打算收手，就走去問一個比佢更有經驗嘅男子，不過嗰個男子都係話我依家幫唔到你喎，因為呢度又唔係你屋企個Wi-Fi！我夠知啦，但係我更加清楚呢個唔係我屋企Wi-Fi嘅問題，而係你update嘅問題呀嘛！（後來得高人👽指示，喺手機入邊㩒嚟㩒去，終於搞掂咗呢個password incorrect嘅問題👻）
咁就算啦，跟住我同佢講自從update咗之後個WhatsApp又發咗癲，成日接收唔到，好多時send嘢出去俾人又send極都send唔到，而最麻煩嘅係我一向用嘅dictation，自從update咗iOS後，首先佢將語言設定喺普通話，我將佢轉返廣東話之後，我嘅廣東話發音就開始變得唔update啦，譬如我啱啱寫段嘢俾朋友話「我上嚟攞」，結果變咗「我想你囉」，嘩，如果俾佢老婆睇到就真係乃嘢！
咁你話既然你見佢寫錯字，改咪得囉，就係唔知點解update咗之後嘅WhatsApp係改唔到嘢嘅，一行冇問題，但係當我寫完三行之後佢只係顯示第一行，我亦都唔可以scroll落下一行睇，咁delete啦，又唔得喎！而新iOS之下嘅廣東話dictation，我嘅發音又變得唔標準，於是喺睇唔到草稿所以冇得改嘅情形之下，就出現「我想你囉」呢啲咁樣嘅小三情節！
所以如果你未update，都係三思囉，等佢清哂啲bugs至update都唔遲呀。
#何嘉麗callmegaga #何嘉麗 #iOS11.1.1 #盡可能唔好update住 #IOSUpdate咗之後我嘅廣東話發音忽然變得不標準 #AppleShop #除咗買機之外AppleShop係越嚟越幫唔到手 #上網發現updateIOS之後上唔到WiFi原來係一個全球性嘅問題
