［A1頭條］埃汾上報紙A1之時，就係見底。
其實都冇你想像中咁荒謬。諗真啲。正路（唔好唔正路啦）埃汾上得A1，就梗係因為金融，因為股市。
咁又正路地，多數大跌先會股票上頭版（大升可能都有，但少好多）。合理的，唔止話報紙報喜不報憂，而係大升往往只係同少數人有關，但股災多數都一齊受—至少股災啲起因或後果都係其他社會政治經濟嘅東西。
咁又所以，上得A1，就梗係人心最驚恐之時。唔通跌五百點上A1咩。
個原理同《經濟學人》封面定理差不多。唔係人地燈，而係反映緊大家關心乜。咁去到人人都關心，就應該見底（或頂）。
其實呢類研究而家極多人做，整個program識得上網爬嘢，識睇twitter 睇wisenews咁，加多幾句咩機械學習呀，大數據呀，人工智能呀乜鬼，就又一間科企。「記住將個Excel放上Drop Box變雲計算」「加個密碼鎖住就區塊鏈合約了」
至於埃汾在邊？有緣人就睇到啦。你咪理，A1嘅山腳位都仲係A1！巴塞嘅大後備都仲係巴塞！
又，題解，戲嚟的！2004，陳冠希李心潔呀！幾年後陳冠希就真係上A1了！「可惜冇李心潔」。
不過話說回頭當年我睇過個標題叫「李心潔下嫁彭氏兄弟」，可惜已搵唔返。可能只係（偽）曼德拉效應，根本冇出現過。
