《最佳損友》
♂：早晨
♀：早晨
♂：我依家去緊機場送機
♀：阿豪要走喇？
♂：係，佢趕住去個邊交收層樓，都好，早一日過去，就早一日可以休息，佢留係香港無好處
♀：咁你買佢層樓個度搞成點？
♂：都簽好晒野，到時銀行會匯錢過去比佢，英國樓又唔係真係咁貴，佢唔等我呢筆錢用
♀：依家你地心情點？
♂：我頭先行過離境大堂，真係好似生離死別咁，反而我地就好輕鬆，要喊都喊過喇，依家可以笑住咁送佢走
♀：英國對佢病情好有幫助，大家都知呢個決定係好既，更何況佢好返都會返黎探你地啦
♂：比起呢度好多人我地係幸福得多，頭先我見到有幾個老人家喊到幾慘，個孫仲細，但都感覺到老人家個種傷心
♀：我父母都有諗移民，但應該係去台灣，唔駛隔離的話，同入大西北差唔多時間
♂：你唔會去？
♀：唔啦，我要搵錢，我走左經理人一定想殺我，公司拎住張合約告到我返黎都仲得，點走？
♂：佢起飛喇……我都係忍唔住喊左出黎
♀：想喊就喊啦，有冇聽過，小朋友喊，係想得到，而大人喊，係要失去
♂：生離都喊，死別既話，我唔敢想像……
♀：每個人都必經既，因為失去先會懂得珍惜，你仲有大把朋友係香港，咪珍惜同佢地一齊既日子
♂：頭先同佢地一齊搭車，我返屋企，Derek返公司，九叔去買野，我地目的地唔同，去到轉線站，一個落車，然後去到屋企附近，再各奔東西，朋友就係咁，大家係一齊，但目的地唔同，我開始明一個家既重要性
♀：係，只有家中個位先會等你返屋企
♂：如果我同你一齊，你會唔會等我返屋企？
♀：唔會，我會陪你去送機
♂：答案滿分
♀：你食野未？我地一齊食飯？
♂：都好，你係邊，我過黎搵你
♀：係屋企，今晚出job，依家都得閒
♂：多謝你陪我
♀：你都係陪緊我啊，佢有新生活，你都就返新工，唔好為左傷心而停低腳步啊
♂：我唔係咁既人，我傷心會再加快腳步，放心
♀：咁就好，成年人就係明白痛係無補於是，好似打針咁，痛咪痛，必須要受既，痛完就繼續生活，係小朋友先會糾纏係痛苦入面好耐先走得返出黎
♂：你有冇聽過一個理論，就係任何人都會失敗，都會痛，而愈厲害既人，就愈快企得返起身
♀：我相信你會愈黎愈厲害
♂：雖然我大你三年，但你會唔會覺得我好細路仔？
♀：你係，男人就係大細路，但我重申我唔喜歡太成熟既人，我自己好成熟，成熟到有少少冷漠，或者我就係係你身上先會有返多少情緒起伏
♂：但我幫你唔到，好似成日都係你教我野咁
♀：我唔希望教你太多，因為我教既都係好痛苦既成年人生存方式，你唔同我，保持住一定既天真對你寫作比較好
♂：但我覺得自己都無形中成熟左
♀：你要記住，每個人都需要一個避風港，需要一個安全既地方去展示自己既懦弱同唔成熟
♂：我都希望係你既避風港
♀：你係，我做野喇，講定先，晚安
♂：晚安
PS. Patreon 獨家短篇 四條仔去Staycation上篇《響21》已上載，這是一個講述出軌的短篇
#長傾不見 #蔣薇 #小說 #故事 #好久不見
未睇過既重頭睇：
https://www.patreon.com/maydreaming/posts?filters[tag]=長傾不見&sort=published_at
