第二季回顧
//
第二季度完結，係時候作個總結，檢討得失查找不足。青冰認為第二季度是幾稱心滿意，不過若以贏錢的幅度計，仍然遠遜首季，這個當然不能同日而語，年頭港股火爆，肯衝便會贏，只是去到二、三月時旺市爆破，守得穩變成最重要的打法，青冰有幸股齡較深，防守時亦較出色，慣性會用年度最高盈利作指標，簡單啲講，最勁時賺了一百蚊，變到得返八十五至九十蚊，已經要提高戒備，低於八十蚊時已經要沽出大部分持倉，今年二、三月時的確散得好快，所以一度低見六十五蚊，其中一個敗著是三月尾抽了隻百融雲(6608)，打亂了部署，所以第二季的確是在愁雲慘霧中開始。
戰友心裡可能會暗吊，喂你仲keep到六十五蚊，仲愁乜鬼呀，的確，以盈利計仍然是令人滿意，但好明顯在三月時很多的操作及打法，都是進退失據，尤其是揩咗隻IPO，一開波已經穿底，係較難駕馭，所以上文所講這季度是稱心滿意，其實是畀個叻自己，可在愁雲中重新部署，在慘霧裡逆流而上，最後在季末可以回升至盈利高位的八成半，真係阿彌陀佛。
咁今季有乜殺著呢，先講策略，當倉位重創，首先就是將注碼減少，贏谷輸縮個個都識講，但有時為了追數，有信心的股份都會大注啲，諗住可以翻身，但當天氣不似預期，個倉唔得，有信心嗰隻又唔得，自然就會跌入深淵，進退失據，所以減注碼是本季的主旋律，平時每注買一蚊，現在每注五毫子，加了幾注都唔識行，最後向下插，已經揩少好多。睇返個excel，次季出手的次數比首季少25%，以前買兩蚊貨可以兩次就搞掂，依家要四次，可想而知，其實次季的目標係縮窄了，一堆核心股為主，買買賣賣，密食當三番，當然亦會走甩很多沒太有把握而又暴升的股，但現在不是年頭嘛，學懂放下，慢慢來。
青冰在好幾個月前，說過暫時不會碰科技巨頭及板塊，最有科技味道的，應該係小米(1810)及上月買的高偉電子(1415)，所以其餘的股份，都分佈在不同板塊，亦主要在舊經濟。本季有三大股份是貢獻最多，完美醫療(1830)、歐舒丹(0973)及時代天使(6699)，前兩者都係密食的主角，亦算係透明度頗高的股份，講晒畀你聽大概條數係點，唔會忽然有太大驚嚇，但股價就有適當波動，讓你可以上下其手，至於天使呢，就不需要太多技術，只需要雙重運氣就可以了。次季的確買了不少本地股，這些常被人唾棄又唔sexy的股，都將士用命，交出成績，如鷹美(2368)、美聯(1200)及國際家居零售(1373)。
最後要提的就是指數更替的機遇及IPO市場，MSCI、富時及恒指每季都會作檢討，其實每季都會有機會，大茶飯就肯定無份，但勝算都頗高的，當中以富時最正氣，MSCI次之，恒指就真係要膽博膽；睇返次季的IPO，百融雲之後真係停賽了近兩個月，之後去到京東物流(2618)才熱吓身，可惜無乜肉食，天使就有兩個運氣波，肥美，科濟藥業(2171)就唔掂喇，老暗穿價即掟，慘蝕利息，至於隻奈雪的茶(2150)，亦慶幸老暗走得切，仲飲到餐茶，近期十幾廿隻IPO，花多眼亂，講真邊隻先好，青冰都唔識，都係沿用返舊有策略，睇飛睇基石睇業務，揀幾隻博下咁，唔算太有信心，希望佢哋在第三季響到頭炮啦，但即使響唔到，股市常在，有用功就一定搵到機會嘅！
//
