【#電影裡的另類住宿 Part 4 - 再次Hostel篇：《殺人慾室》（Hostel）+ 真人真事恐怖經歷】
講起Hostel嫌《小失戀大漫遊》太正經，作為一個恐怖片迷，又點可以唔提呢一套？好多朋友講起虐殺片（Torture Porn）就會諗起《恐懼鬥室》系列，其實同期呢一套仲癲。故事個意念好「爆」，當人有性需要會去搵性工作者、咁當人有殺人慾時，又會唔會有個「機構」俾人咁做？如是者就有咗一個咁嘅地方，喺Hostel專捉Backpacker去俾人殘殺至死，當中行刑手法層出不窮，挑腳根已算小兒科，最經典要數燒眼珠，真係諗起都毛管棟，搞到出完碟都要回收做個刪剪版。前大半段根本唔係虐殺片，甚至可以話係一套咸片，其實都寫得有少少貼地，因為Hostel呢個地方咩人都有，識著好人就好，識咗怪人都幾詭異。
睇呢套戲時我仲未住過Hostel，第一次住都有少少陰影，其後住過千百次，有好多好好回憶，都有更多癡線回憶，當中比較深刻，或者講驚嘅一次要數呢次：
話說有一次同朋友喺澳洲森林式嘅度假Hostel住，一間八人房就係一間屋果種，本身就淨係得我地四個人「包房」，點知半夜三間突然聽到有人係咁搖度門，佢又唔係敲門，但係咁拎度門個把手。
咔。。。噠。。。
初頭半夢半醒我都唔知佢想點，朋友本能反應諗住開門俾佢，但果陣時已經凌晨兩點幾，reception又收咗，無啦啦點會有人半夜三更check-in？果個地方根本唔係鬧市，唔會有人夜晚走入嚟。呢個時候，突然嘭一聲，佢明顯想撞開度門，但係唔成功。果時已經天黑，我哋附近又冇其他住客，度門就係我地最後防線，因為「黑鬥黑」，我同朋友拉開窗簾望望，出面乜都冇，又或者講咩都睇唔到。咁我哋唔理啦，點知隔咗一分鐘，佢又撞度門，我哋大嗌：「Hey! What do you want!」
出面有把擺明玩嘢嘅聲：「Please, I've lost my key, I wanna come in」，好肯定間房得我哋四個人，完全冇其他人行李，佢擺明就係白撞，仲要扮到楚楚可憐聲：「Can I come in and get something？」
我朋友就大佢：「Leave us alone or we will call the police!」
「Oh ya? Police? I am so scare…」佢即時變聲，變成挑釁意味：「Hahaha! I am so fucking scare! Screw you! 」呢個時候先知原來唔止一個人，係一班人。我哋唔知佢哋有幾多人，但佢哋都唔知我哋有幾多人，然後我哋好似睇戲受害者問：「What do you want from us?」
「What do I want? I just want to come in! Ha! Ha!」佢問同伴：「Right?」然後又扮可憐：「Please… Please… I can’t find my way home… OPEN! THE! FUCKING! DOOR!」
我哋唔理佢，佢係咁撞門，撞唔到直頭拎重物係咁撞，撞完再chok度門，我哋深知度爛門唔頂得幾耐，佢堅衝入嚟肯定賴嘢，因此我同男性朋友喺房拎定武器隨時「開波」。我哋打算報警，但另外兩個女性朋友勁驚，深知警察嚟得荒山野嶺，佢哋都應該衝咗入嚟，即時急智生才扮報警特登講到好大聲，最後加句：「We have called the police!」
出面班友完全唔驚：「Oh please… It’s so cold here, I want to come in… I am lost… I am so sorry about that…I don’t give a shit to the police! You fucking whore!」睇嚟佢哋唔肯放棄，完全好似睇緊《國定殺戮日》第一集咁，點知我個friend好勇武咁一腳踢落度門：「Get the hell out of here!」
咁做好似激咗少少，之但係佢哋真係嚇怕咗，其中一個人就制止條友覺得玩夠，但佢仲唔肯認輸，繼續扮喊：「Mommy, I want mommy, I want to go home… I feel so lost…」我再大叫：「Tell the police you want your mommy, you fucking idiot!」
「Idiot? I am a fucking idiot?」我咁講擺明辣慶咗佢，但似乎我哋扮報警嚇到其他人，叫佢「that's enough」，我哋聽到腳步聲走咗，隔冇耐先敢開門。嘩，睇見出面都覺得好彩，佢哋唔止用張木凳飛埋嚟，掟到成張凳腳都斷埋，仲拎個垃圾筒撞，出面一地雜物。如果真係俾佢攻咗入嚟，應該未必夠抽。
今時今日諗返可以當故事咁講，但當日真係諗起都驚！
作為一個恐怖片迷，呢啲情節電影睇過好多次，現實遇到都咪話唔恐怖。諗返當日同佢哋都接近對峙咗成半個鐘，如果唔係有朋友一齊，而係得一個人嘅話，你都咪話唔淆！
有故事的旅人 / 迷．忘於澳洲360天
想聽小弟更多旅途上嘅住宿奇遇，或大家輕輕鬆鬆吹下水，請記低以下日期參加分享會啦！
時間：7月30日
地址：White Wall
（長沙灣昌發工廠大廈D座9樓08室 - 長沙灣地鐵站C1出口直行1分鐘）
時間：18:00-20:00
詳情可看：goo.gl/DdQiMk
電影裡的另類住宿 在 #電影裡的另類住宿 - 探索 - Facebook 的推薦與評價
explore #電影裡的另類住宿at Facebook. ... <看更多>