由地圖嘅最邊緣行去另一個邊緣，大概要用8至9個鐘！
隨住市場競爭越嚟越激烈，遊戲作品要跑贏大市，要突出，就一定要Show到畀玩家睇隻Game有與眾不同嘅特色，而《Just Cause》系列喺呢方面就做得好成功，不論你鍾唔鍾意都好，呢個系列嘅特色非常明顯－－就係「大」！《Just Cause》系列作為一隻一線動作遊戲，每集都擁有極之遼闊嘅沙盒式大地圖，呢度講緊嘅大真係非常之大，用第三集嚟計下，總遊戲地圖大約有1000平方公里，即係大約係《GTA5》地圖嘅四倍左右，更有玩家測試過，由地圖嘅最邊緣行去另一個邊緣，大概要用8至9個鐘。而即將推出嘅第四集當然亦都繼續咗呢一個超大地圖嘅傳統，更過之而無不及。
當然《Just Cause 4》唔係淨係得個大字啦，除咗有大地圖，今集亦大幅強化咗物理引擎同埋天氣模擬器，透過採用全新嘅Apex遊戲引擎，Game入邊嘅極端天氣模擬表現以幾何級數提升，而極端天氣亦係今集嘅遊戲重點之一，玩家今集將會喺龍捲風、沙塵暴、暴風雨、大型雪災當中進行各種不可能嘅任務。玩過前作嘅朋友都知道呢隻系列係幾咁熱愛「爆炸場面」，基本上三關一小爆，五關一大爆，而得益於全新嘅物理引擎，今集嘅爆破場面規模同表現亦得相應提高咗，直逼電影質素。
《Just Cause 4》將講述扮演特務嘅主角深入南美地區，一邊追尋父親留落嚟嘅線索去解開「某個謎團」，另一方面將以各式各樣嘅極端手段（基本上就係爆破）擊倒當地嘅私人軍事組織「黑手軍」。同系列作一樣，新作都會採用沙盒式開放地圖，玩家可以喺高自由度下「用自己嘅方式」完成各個任務，而前作中大受好評嘅「鉤索」裝備亦會強化並強勢回歸。
《Just Cause 4》暫定喺12月4日登錄PS4、Xbox One同埋PC平台，遊戲將提供繁體中文語系。（特別留意新作官方講明要專注單人劇情，所以並冇提供多人模式）
__________________________________
想睇精彩短片，即去：http://bit.ly/2IRwZ8a
