大家好,唔知你仲記唔記得一個追左我四年既故事
《弊傢伙,我女朋友有咗》
上年出完實體書,今日我將正文放返上黎,比有追故既朋友睇埋個結尾佢,原諒我咁遲先放,因為我之前想保障返支持我實體書既朋友
但最近我諗通左,反正實體書有額外內容,以後我Post正文就可以,將延續既故事留返比支持既朋友
其他朋友,我都會提供一個完整故事比大家,答謝大家支持
首先!!!
應該唔記得自己睇到邊吧……
不如,我地重頭黎過!!
-------------------
第一回-阿鋒
我中學阿Sir講過,有好多嘢,先後次序調轉咗,就會好事變壞事,其中一樣就係生仔,有小朋友絕對係好事,但未結婚就有小朋友……我唔敢講係好事定壞事,之不過肯定有麻煩,仲要係大麻煩。
我叫阿鋒,剛剛大學畢業,有一個拍咗唔長,亦唔算短嘅女朋友,叫阿儀,我二十四歲嗰年,喺譚仔食緊雞肉墨丸小辣走腐皮嘅時候,當我夾起第三粒墨丸嘅時候……我聽到一個改變我一生嘅消息。
「阿鋒啊……我仲未嚟……」阿儀面色唔太好咁講。
「係囉,我都就食完喇,你個米線仲未到!阿姐!!!差碗嘢!!」我催咗催阿姐,順便吹咗吹粒墨丸。
「唔係啊……我話我仲未嚟M啊……」其實呢一句講得好細聲,我亦屬於耳嗚嗰一類人,但耳仔好似怕我聽唔清,特別開行Turbo咁等我聽得清楚,直情係有震撼嘅感覺。
男人思維,通常係第一時間尋找問題,我好仔細咁諗,唔通係上次?飲咗少少酒,未戴就放咗入去幾吓,喂,幾吓咋喎,阿Sir,比次機會啦!
定係另一次紅燈嗰陣挺而走險,大哥,咁條路無車,唔通唔過咩?
咦,唔係喎……上個月安全期……
「你有冇聽我講嘢㗎?喂……喂……阿鋒……喂……」阿儀嘅聲音將我扯返現實。
「睇住啊,畜牲勿演酸柴清湯!」遲遲未上嘅米線終於到。
我望一望米線,然後用好冷靜嘅聲線同阿姐講:「其實呢……我哋就無叫酸菜,你失驚無神比個酸菜過嚟,我好難食㗎喎,同埋問題唔係我哋鍾唔鍾意食酸菜,而係我哋無叫到嘛,退一萬步就算我鍾意食,你送到上嚟,我呢個Moment唔想食,咁算點先?」
「痴孖根,幫你夾走佢啦!講咁多做乜!」阿姐懶得理我,一句一手將米線拎返走。
阿儀好深沉咁啤住我,我用第三粒墨丸將就快想嘔出嚟嘅兩粒墨丸壓住,然後好平靜咁講:「不如我哋去驗下啦,唔好估估下,有就有,無就無。」
離開譚仔,我行入轉角嘅萬寧,拎起二十八個九嘅驗孕棒,好記得收銀姐姐淡然問:「有冇積分咭。」「無。」「比八達通?」「係。」「要唔要膠袋?」「唔駛。」「多謝支持環保。」
支持環保?無錯……之前我就係為地球出咗一分力,支持環保,所以依家要嚟消費,可以比我揀多次嘅話,我發誓會戴返個套,慳返支驗孕棒,兩害取其輕,前者明顯再環保少少。
喺海港城嘅廁所外面等嘅時候,我打咗比我一個死黨兼好友-肥仔。
「鋒哥?好日唔搵我?你轉行做保險啊?我爛命一條,唔需要喎!」肥仔劈頭一句就將我沉重情緒拉開,證明我打比佢係無錯嘅……
「有樣嘢我唔知同邊個講好,但係我想搵人傾訴,我條女遲咗嚟……」人生中有好多事唔知點開口,而呢樣係其中一樣。
「OMG!Happy Father’s Day!Happy Father to you, Happy Father to you, Happy Father to you, Happy Father to you!」呢一刻,我有種自己係亞視嘅感覺,即係點?即係死咗佢好過囉!
「其實呢……我打嚟想你安慰吓我,你唔安慰都算喇,都唔駛潤我嘛……算喇,唔同你講,下次見獲打獲!」憤怒地掛線之際,仲好清晰聽到肥仔大叫:「爸爸,爸爸,唔好唔要我啊!爸爸……」
咁多人死唔見你個肥仔死,我都唔明點解自己會同一個咁口臭嘅人做兄弟,更加唔知點解鬼掩眼呢個時間打比佢!
利申,我唔係教徒,阿儀都唔係,呢一刻,我好理智咁諗,有咗咁點?
「落咗去!阿仔落咗下層喇。」商場有個男人同佢老婆講。
落咗佢……
我二十四歲,剛剛有份一萬二千八百蚊嘅工,住緊公屋,有三萬八Grant Loan仲未還,部iPhone供緊無耐,下個月嘅情人節禮物我仲煩惱緊……
綜合一切,好似……我未適合做爸爸……
阿儀神色沉重咁走出嚟,我深呼吸咗一口氣等佢宣告自己命運……
「阿鋒啊……你可唔可以認真咁答我一個問題啊?」
「好啊,你問嘅我一向都好認真咁答。」
「如果……我有咗,你會點?」
「呃……有咗……我覺得可以生出嚟嘅……不過……依家我哋事業先剛剛發展,又無樓又未結婚,如果……如果呢一刻我哋……」
「我有咗啊。」
好似粵語殘片咁一道旱天雷打落個頭一樣,我完全無晒意識,阿儀繼續問:「我有咗,所以我哋唔好太多廢話,一句講晒你要定唔要?」
「我……我……」
後來聽阿儀講返,我講「我……」長達五分鐘,而我自己係唔覺嘅……
突然阿儀笑笑口咁講:「我呃你咋!傻瓜!睇吓你,咁驚青,真係有嘅話點做人爸爸啊?」
聽到呢一句嘅我終於醒返,心入面一啖氣呼咗出嚟。
真係要唱返句「來回地獄又折返人間!」
--------------------------
接下來,因為Facebook有字數限制,所以請到Google Doc入面觀看:
http://bit.ly/2MXiCDt
睇到尾,再返黎呢度睇最終回吧
--------------------------
第三十五回--承諾
大婚當日,最終Kitty都有出現,仲係伴娘,呢段日子我對佢已經無再嬲佢,即使佢係針對我,莫芷盈同我講,對付針對你嘅人,你唯一辦法就係做好自己,拗?有乜用,佢針對你你又點會拗得贏佢呢,要令佢哋失望,就係你活得比佢好。
兄弟到齊時,阿Kent佢拎咗條Banner出嚟,上面寫住立即開門,否則發射卸妝水,仲有幾支裝有不明物體嘅水槍……標叔叔就帶咗一堆破門工程用品,話有乜事就破門而入……肥仔佢話,拎咗個直升機公司電話,後悔的話可以直飛澳門,佢包。
而呢一切,都俾攝影師完全拍低,有時我哋會拎返出嚟睇,阿儀當然睇一次嬲一次話你班咩朋友啊!
最後,動用咗幾多人力物力嘅器材一樣都無用到,大家笑完爽完就正經返,接新娘了。
開門利是,其實流程好一致,一封大,再加一封細,除返開每人一千左右都已經收貨,但都要形式上留難一下大家,添少少再開門,咁先顯得有戰鬥過嘛。
但我嘅開門利是,除咗錢之外,早兩日我問咗阿儀,你班姐妹鍾意咩,最後我每個姐妹都買咗份禮物,有香水、有唇膏等等,俾利是佢哋之餘,我話:「多謝你哋咁多年都照顧住阿儀,陪伴佢成長,作為佢老公,我好想感謝你哋,雖然平時同你哋唔算熟,我相信你哋對我印象都唔會好得去邊,所以我希望你哋可以原諒我,以後大家一齊令阿儀更幸福。」
姐妹們都幾驚訝,對我班兄弟都好似無咁大敵意,果然,雞髀打人牙骹軟。
幾個環節過後,去到最老套嘅愛的宣言,一大篇不平等條約係我面前,我笑咗笑問佢哋:「仲有冇嘢要加?係就一次過喇。」俾著以前,我會好認真咁計較,但依家只係一笑置之。
隔住道門,司儀問有冇嘢想係見新娘子之前講,我話,我想唱一首歌。
雖然,我對周柏豪無乜好感,亦唔喜歡陳詠謙,但呢兩個人嘅《我的宣言》,真係呢個時間我最想唱嘅歌。
阿儀知我鐘意唱歌,佢話夜晚人多,你千祈唔好唱,要唱就朝早唱好喇,當我接到阿儀之後,佢真係好靚,果然一個要萬八一日嘅化妝師唔係惹少,將阿儀嘅美放大好多倍,我望住阿儀,無出聲,只係不停傻笑。
佢問我笑乜,我話,無,覺得你好靚,覺得我執到,覺得你唔好彩,哈哈。
跟住我再問佢,頭先首歌唱成點,佢話:「化妝姐姐話聽過咁多新郎唱歌,你算唱得好。」
我笑住咁拖實佢,開始敬茶。
中段時間無乜特別,都係影相,影到個人笑到好奇怪,阿Kent係我身邊不斷提我,笑啊,笑啊!
笑,其實結婚當日真係幾開心,但真心係攰,原來做主角,每分每秒都為你而生真係好大壓力,加上我一直都好緊張一陣要講嘅嘢,唔知其他人結婚會唔會特別開心,但我肯定係特別攰,終於明洞房花燭夜於現代社會唔存在。
一路影相、迎賓、握手、祝福、感謝,我唔知將來仲會唔會睇返呢張相,亦唔知對方會唔會睇返,但相只係留念,人到就已經好有心了。
律師上場,終於到咗準備證婚嘅環節,我已經知會咗律師將會講少少嘢先證婚,經佢介紹之下,我踏上呢個台,拎起咗一支咪。
「喺證婚之前,我有少少說話想同我未來老婆,以及大家講,相信熟悉我同阿儀嘅朋友都已經知道,我哋係奉子成婚,亦即係之前我哋仲未有結婚打算,直到我哋之間突然出現一個生命,我哋先做呢個決定。
二十四歲呢個年紀,算相當早婚,而且未有經濟基礎之下,呢場婚禮對我哋相當困難,過程之中,我哋都有爭執過,有卻步過,有猶豫過。
婚姻,我覺得係戀愛嘅墳墓,放心,唔係貶義,而係戀愛嘅終結,我哋以另一個形式一齊生活。
我,程日鋒,唔係一個咩絕世好男人,超級荀盤,有阿儀一個咁好嘅女仔肯嫁俾我,係我嘅福氣,係呢段時間入面,我做過好多事令佢傷心難過,唔似得其他新人一樣,大家上嚟讚吓對方感謝一吓,我希望俾到一個最真實嘅自己我老婆。
點解兩個人要結婚?係咪因為佢已經搵到心目中完美嘅另一半?知道對方係樣靚身材正,高富帥,溫柔體貼,無微不至?現實唔會有呢種完美情侶。
我曾經問過阿儀佢點解會肯同我結婚,我相信一定唔係有咗我嘅骨肉,而係,佢明知我有千樣萬樣唔好,佢清清楚楚,而且接受並同意咁做,唔似得大家從未睇過就click嘅條款及細則,阿儀佢每一件事都親身經歷,笑過喊過,但佢都願意接受我呢個人,呢個唔爭氣嘅程日鋒。
婚姻係一場修行,每日都見,會有開心事,但亦會有傷痛,兩個人,係完全獨立,大家唔同背景、文化、性格、習慣,邊個敢肯定自己另一半係Perfect Match?以後嘅日子,我唔敢講一定會令阿儀每日都開心快樂,但我希望無論面對任何事,我哋都可以一齊面對,一齊渡過,一齊解決。
我問過我老豆點樣會令一段婚姻更好,佢話我已經做咗,諗咗好耐我終於明,只要你一直問自己點去令呢段婚姻更好,你已經係做緊。
愛情又好,婚姻又好,無所謂完美,因為人隨時會變,只要佢唔再愛你,再完美嘅人都會離開,結婚從來都唔係終點,律師都唔會保證兩人將來唔會分開,而踏上呢種婚姻嘅賽道上,思考點去令兩個人更好,先係唯一嘅方法。
張佩儀,我應承你,一直都會努力令我哋更幸福,無論咩事都好,我都會對你不離不棄。」
阿儀無出聲望住我講完一切,我再次單膝跪低:「你願唔願意成為我嘅合法妻子啊?」
阿儀示意律師俾支咪佢:「問問問,唔願意仲會係度聽你講咁耐啊!程日鋒,我依家要在座咁多位見証,佢,程日鋒將會一生一世對我張佩儀不離不棄,會好好反省有咩不足,會一直進步,而我張佩儀會一直陪住佢,依靠佢,有咩事都會支持佢,鼓勵佢。
如果你清楚明白並接受的話,你就可以成為我嘅合法丈夫。」
「清楚明白接受!」
「我願意。」
律師佢接返支咪:「好,見証過咁多新人,我都係第一次見咁自動波,雖然佢哋兩人嘅誓辭同普遍唔同,但我相信咁多位來賓都感受到佢哋濃濃嘅愛,亦作出比誓辭更緊密嘅承諾,我在此宣佈兩人,成為合法夫妻。」
終於,我結婚了,終於,這個關於結婚的故事,完結了。
-----------------------
感謝你看了這個長達八萬字的故事
陪伴程日鋒一起成長,見証了一對小情侶在現實之下的掙扎
如果你喜歡這個故事,可以留言購買實體書
實體書會比網上版多了以下內容:
1)莫芷盈
2)五年後的程日鋒
3)蔣薇後記
另外會附送兩個網上故事《商戰》《方舟》,每本正價88元正,留言及分享可獲10元折扣,每本書也會有簽名
想購買的朋友,請留言查詢
亦歡迎大家說說看畢整個故事的感想
如果你是新讀者,可以看看我另一篇長故《老婆最後的十二個難題》
第一回連結如下:
http://bit.ly/37UXIw5
再次感謝,謝謝你花時間看我的文字
面對現實好攰但都要掙扎 在 野鞋子 - Wild Shoes Facebook 的精選貼文
[是他也是你和我]
寫得太好, 不能只有我看到.jpg
篇文好似唔關行山事, 但其實好關事.
嗯,我仲未放棄.
"身體變差了,易攰易病易眼瞓,到某次沖涼照鏡,明明瘦足廿年既你,竟然開始有肚腩,你崩潰之餘亦立志學人做Gym,這亦解釋了何而那麼多人由細到大無運動,到中年卻無端端開始跑步行山投奔大自然。除了身,還有心,你會感受到自己對很多事情、活動驟然失去興趣和熱情,所以除了運動,也會無離啦更搵野學,打鼓結他畫畫鋼管舞二胡乜都好,只希望在日日返工放工既迷霧裏,找到一點生活的變化。"
“呢排身邊好多好多朋友迷茫失落,不如意事十常八九,唔知前面會係乜,但同十歲估唔到廿幾歲係點一樣,一路走來,繼續前行,總會捱過。2018過左兩個月,提提大家返屋企同爹娘食飯,珍惜果幾個僅餘下來搵你唔係買基金保險既朋友,把握時間行山跑步轉工學野,有另一半既,多謝佢一路走來仍然不離不棄。”
【絕望真相】-《廿幾歲原來真的不像你預期》
相信每個人細個都曾經幻想過自己廿幾歲係點,而年少無知、天真爛漫既少年總會偏向相信自己係天資聰穎,獨一無二,前方等緊我地既必定係精彩傳奇的黃金十年,就算唔係維護世界和平,化解核彈危機或者解決糧食問題,至少都可以成為一個發火發熱、貢獻社群、受人注目既有為青年。
可惜,轉眼間三字頭都逼在眉節,生活卻有如星爺喺《功夫》入面幾經辛苦搵到火雲邪神,最後發現係一個底橫膠拖既呀叔一樣,你回首畢業後的數年,原來只係一個不外如是既打工仔,庸庸碌碌、渾渾噩噩返工放工咁過左大半,青春小鳥靜靜飛走,唔止世界,連廿幾歲都真的不像你預期。
踏入廿幾歲既最大震撼,係曾經以為自己可以青春不老,但某年某月某日某一下你會驚覺,原來生命只係不斷倒數,仲用緊升壓窩瘋狂加速。
明明中學六、七年、大學三、四年都過得異常漫長,每次諗起將來都覺得「三十歲?有排啦!」;但一出黎做野,喺返工放工括號N次方既無休止輪迴下,你會久唔久就想大叫「啲時間過得咁快既!」,三字頭由遙不可及到近在咫尺,成為即將要面對既現實 — 原來自己係會老。
西歷新年之後又到農曆,明明岩岩先定下「今年目標」,轉過頭已經聖誕。慢慢你會分唔清邊年打邊年,「幾時入呢間公司呢?」「Tiffany前年結婚架,唔係喎,定大前年呀…」可能係要記既事太多,又可能係生活已經平淡似水,當年讀書的多姿多采無以為繼,從前所期盼的五光十色、意氣風發卻沒有出現,依家只能靠Facebook memories,去丁返當日的年輕貌美同年少輕狂,這是你第一次怕老。
而人事除左變得好快,亦變得好快。講起Facebook,十年前覺得開左Facebook已經係潮流尖端,你點估到今日Facebook原來係「呀爸呀媽先用」,能夠咁快榮升父母,究竟應否欣慰?當你見到果條好hit既補習社片,條得烕既靚仔笑人用Facebook,你心中難免有煎佢兩巴既衝動,然而,你心知肚明,今日仲養緊蛙,聽日再post都俾人笑啦,生活、社會的節奏好比樓價和樂瞳身材爬升的速度,當你留意到已經太遲。
當有些事物光速般前進,有些人事卻不斷倒退 — 父母徐徐老去,身體記性轉差;曾經追/丁過既女今天不復當年勇;當日你覺得充滿威嚴、睿智的老師亦老態畢現,曾經的球星唔係即將退休都職業生涯晚年,個個由TBB轉睇泡菜劇聽泡菜歌,當你想繼續堅持那些由細陪到你大的廣東歌,你赫然發現佢地竟然出現係《流行經典五十年》,更震撼的是,連愛情動作片的女主角都已經係千禧BB。
跟手你會覺得從前的歌手才是明星,當年的歌曲才是音樂,舊時的電視電影永遠好睇啲。星期日的下午,你還會坐下來睇足成套《午間星期日影院》,對著那套睇左一千次既《家有囍事》和《嚦叶嚦咕新年財》發笑,「Shit..」,你終於留意到,自己開始變成小時候恥笑的父母親,這是你第二次怕變老。
仲係學生時銀根短缺,唯有期待長大後的夜夜笙歌。到終於有啲錢,又點估到自己由以前的千杯不醉,變成去食飯淨係想要杯暖水。當天打通宵牌、唱通宵K第二日仲可以飲早茶,依家一點鐘都嫌夜。偶爾一次朋友請飲飲到不省人事,頭痛左兩日發誓唔再飲(咁多)酒,你已經由抗拒變成接受自己不再年輕。
不斷劇變的世界加速你的老態,而返工既生活就會令你覺得乜都變哂。
十年前,你無諗過起身返工原來比起身返學痛苦十倍,亦無諗過每天起身都會check港鐵會否延誤和大市股價有否插水。唯獨不變的是每早喪屍般出門時也應承自己今晚要早睡早起,到晚上卻又不捨在床上僅餘的私人時間而狂碌電話。
身體變差了,易攰易病易眼瞓,到某次沖涼照鏡,明明瘦足廿年既你,竟然開始有肚腩,你崩潰之餘亦立志學人做Gym,這亦解釋了何而那麼多人由細到大無運動,到中年卻無端端開始跑步行山投奔大自然。除了身,還有心,你會感受到自己對很多事情、活動驟然失去興趣和熱情,所以除了運動,也會無離啦更搵野學,打鼓結他畫畫鋼管舞二胡乜都好,只希望在日日返工放工既迷霧裏,找到一點生活的變化。
慢慢你心裏有一千件事想完成,好告訢自己青春還在燃燒,生活仍可改變,但理想歸理想,得不到也等於妄想,工作疲累與生活壓力,已經讓你無法持之而行全力做好一件事,最後只能不了了之。所以每到新年,看到身邊人話要多愛自己身邊人,開心樂觀積極減肥學呢樣果樣,你慢慢明白,同香港既民主運動一樣,「口號黎既姐」。
身於香港異常的矛盾和壓逼,旅行成了你的終極娛樂,甚至是一種信仰。相信只要有旅行去,一切問題、煩惱、迷茫也能取之而去。年少時的旅行,盤川所限只能窮遊,沒有物質的享受,過程辛苦卻難忘,那時你下定心日後賺到錢,必定要重遊那些曾經走馬看花或甚至無錢踏足之地。今天錢真的搵多了,但估錯的是無論時間、假期、精神也只容許你趕頭趕命早機去晚機返,曾經幻想的「一個月漫遊東歐」已經不切實際,能夠偶爾「東京四日三夜」已算不錯,但中間仲要不斷諗買咩手信返公同覆老細同事Whatsapp。在Facebook IG 瘋狂分享刺身海膽和帶子,成為你一張引以自豪的成績單,整年的快樂建基於離家出走,你分不清應該高興還是失落。
廿幾歲的第三個震撼,係你終有一日要接受,自己不是太出色和優秀,甚至比7仔更普遍。
曾經你憧憬自己即使不能穿梭於中環金鐘,面對無敵海景,生活閃爍得讓人眩目,也至少是一個飽讀詩書既知識份子,可以盡一己所長,在喜歡的工作中追求卓越。唯獨今日和卓越最接近的一刻,是偶爾到卓悅買落妝水。幸運兒還可以戴個MT光環,卻打份普通得從未想像過會做的19工,不幸的甚至只能在中型公司做個「Executive」。最初你難以接受,深信是懷才不遇,千里馬總會遇上伯樂,但隨著年華逝去,你逐漸醒覺,原來並非「不遇」,而是根本「無才」。
看見公司的Fresh Grad新人,你笑他們戇下戇下的同時,也十分懷念自己的衝勁,你接受唔到自己已經唔再「新」,但身體卻非常適應公司甚至社會的一切規則 — 不太大癲大肺、情緒沒有起伏波動,失去主動幫助別人的心,每天上班下班沒有特別感受,返工笑臉迎人,放工木無表情,漸漸竟然成為曾經所討厭的人。
而人工成更加成為了你意想不到的重大考驗,曾經你覺得搵萬幾兩萬蚊都好多好夠洗,大個先發覺搵得愈多,洗得仲多,錢儲極都唔夠,每個月一出糧又交咭數,交完咭數又好似無出過糧,然後又要碌咭。若然廿到尾仲搵緊一字尾二字頭,其實真係唔知點講出口,你會懷疑讀左咁多書究竟為乜?但你見到報紙話香港廿幾萬人住劏房,當中有5000個係行政人員,自己能夠成為全港三份一既公屋戶其實已經OK。你親身領匯緊香港愈趨誇張既貧富懸殊,同埋缺乏上流空間,寧願經濟冧樓價跌都唔想市道好,因為你知道就算經濟幾蓬勃,都係「從來沒我份 犧牲當做例行」。
到你捱到慘過做狗加人工,以為錢搵多了就會更開心,生活卻無隨之變得更快樂。責任重左,要兼顧、計劃既事多左,父母、愛情、前途,樣樣都逼在眉節,刻板生活卻又不斷重覆,明明每天安坐Office,放工放假都攰到唔想出街,如果真係住得遠,返工放工兩程車,已經夠你情緒跌入黑洞,返到去乜都唔想煩唔想做唔想理。
除左人工,唔知自己「做緊乜」同「想做乜」先係更加濕滯。可能你已經轉左幾次工,但好似無一份真係好鐘意,你開始明白唔係無鐘意既工,實情原來你根本唔鐘意返工,只係愈黎愈著緊人工同埋幾點收工。當你仍然毫無方向,前途和收入沒有多大晉升希望,你竟然開始去考從來無諗過做既政府工,當然,唔係話考就考到。
偶爾回看Facebook Memories,想起讀書時的夢想,又或者受左太多氣,都有祼辭、再讀書、Working Holiday既衝動,但一諗起無收入、無家用俾,你既遐想就瞬間消逝。
因為你諗起你爹娘,佢地可能就退休,甚至已經無收入。偶爾凝望好耐無細心留意的雙親,會發現他們多了很多的皺紋和白頭髮,你記得自己曾經好唔鐘意屋企,喺Facebook打過「點解要生我」,諗過廿幾歲一定要搬出去,到今日明白原來已經唔知可以對多幾耐,仲有幾多餐可以同父母食,吃到他們親手煮的餸,你的眼眶有點紅,這刻你終於成熟,但同時伴隨既係傷感 — 好想俾更好既生活佢地,但你有心無力。
呢個時候,你想搵人傾下心事,抒發下平日視而不見既鬱結。但望住contact list,大部份朋友已經變成「好耐無見啦」「幾時出黎呀」「好呀」之後對話就會停止。你估唔到曾經一星期打四日波既好兄弟,出五次街既好姊妹,都一一失散,你甚至連咩原因無再見面都諗唔起,係你約左佢19幾次佢都唔覆甩底,定發左佢脾氣,還是各自有新朋友?
那些曾經一日一千幾百條message既Whatsapp group亦不再活躍,當年Grad Trip後約定的旅行,你知已經無可能,就算係平日普通食個飯,都可能要搞兩三個月,仲要OT遲到,然後閒話家常同做啲基本update就要趕住走第日返工,珍貴既星期五六日亦未必排到你。慢慢去到一個境地,新相識不太熟,舊友又找不回,真正keep到的好友屈指可數,有愈黎愈多去飲先見到既朋友,其餘的只能在IG Facebook看到他們的近況,還有充斥著海量既長輩圖。
當年可以講通宵電話,今日即使徹夜難眠,想搵人吹下水,打算WhatsApp某人,但諗起寒喧幾句之後都唔知點收尾,又或者只會收到「下,你過得好好啦咁都唔開心?」,你寧願繼續上IG、高登。最後,你會發現一個人都可以好好生活,習慣很多事只能自己解決。
但諗係咁諗,望到快要到來既三十歲,你有啲怕獨自面對,想起自己曾經昐望的真命天子的模樣,曾立志要幾歲結婚,婚後生活多麼甜蜜動人。奈何情路崎嶇既,繼上次分手後,已經2年無拍拖,曾經笑人用交友App,估唔到今日自己都想用。堅持的擇偶條件竟然變得愈黎愈少,或者男性比較專一,仍然只睇外表,但女既已經轉移重視人工、事業,「做政府喎」、「有車有樓!」,或者真係要搵到岩條件既唔難,但心跳的感覺已經一去不返。
而有拖拍既,幸運既可以早日行禮,唔好彩既仲要為首期操心。而喺等待成為樓奴既途中,更加可能出現比力威更嚴重既掙扎 — 已經要討論成親,卻懷疑到底呢個是咪真的可以付託終生,同時又怕關係有變,適心栽種全力貫注既感情付諸東流,呢個年紀分手又要重頭黎過。算真係買到樓,結到婚,今時今日既香港,生仔與否已經係一條會考級數既選擇題。
我們被逼成熟,但未來得及成長,便已經老去。做仔做女既時候總係「相信」、「以為」,到今日最多既係「竟然」、「原來」。「還記得有多久未好好哭過嗎」,聽周國腎的《Children Song》,第一句已經入心入肺。
雖然估唔到既事十件有九樣衰,但認清現實既殘酷先更能夠勇敢向前,好彩今日廿幾歲既我地,係睇日漫日劇、聽勵志歌長大,熾偉用四集輸左二比零,仍然會講「比賽依家先開始呀!」;就算好似三井壽咁崩潰,安西教練都話,「以家放棄既話,比賽就結束了」,我地都深信日後盡量別教今天的淚白流,誰都辛酸過,那個沒有?
呢排身邊好多好多朋友迷茫失落,不如意事十常八九,唔知前面會係乜,但同十歲估唔到廿幾歲係點一樣,一路走來,繼續前行,總會捱過。2018過左兩個月,提提大家返屋企同爹娘食飯,珍惜果幾個僅餘下來搵你唔係買基金保險既朋友,把握時間行山跑步轉工學野,有另一半既,多謝佢一路走來仍然不離不棄。
原來,呢篇文打左14個原來。
原來,廿幾歲真的不像你預期,但只要一息尚存,始終可以重新做起,只要你仍未放棄。
逆行
#有無人會睇哂四千幾字
-----------------------------------------------------------------------------
前文共賞:
【生活點滴】- 《做空姐既另一半其實唔易》
https://goo.gl/S1TJ5g
【絕望真相】 《新界西人絕對係一群堅毅既物種》
https://goo.gl/p8f6zD
【絕望真相】-《每個人睇完六樓后座,都應該幻想過出黎做野之後要同朋友租個地方一齊住...》
https://goo.gl/DWQV4g
【絕望真相】《一生人只為搵一個,與你相隔半小時車程的女友》 https://goo.gl/y6dcNd
【絕望真相】-《同人講鐘意Twins一定俾人笑到喊出黎,但我真心慶幸經歷過佢地既全盛時代》
https://goo.gl/EuQbc5
【絕望真相】-《擺酒派帖絕對係一個反思自己做人處世既好機會》https://goo.gl/oB5fwG
【街坊劇場】- 《一對情侶去到某個年紀,總會為將來罵交》https://goo.gl/YgoEkk
【絕望真相】- 《每次有好朋友失戀,自己都會有所成長》
https://goo.gl/cwxvZ4
【絕望真相】- 可以同另一半成功去到一個旅行,呢段關係你要好好珍惜 https://goo.gl/FWXsTK