從大飛曬冷事件，香港人睇到香港警方真係流流地，替佢哋個行動力著急！
回顧 2020 年 8 月 23 日，12 名香港人於保釋期間，懷疑坐大飛企圖偷渡台灣，及後被廣東海警局拘捕，並移送至深圳鹽田看守所扣押。
《眾新聞》記者向警方查詢是否知情，「警方回覆稱，該十二名香港疑犯被內地執法部門拘捕，行動與警方無關」（見《眾新聞》，「12港人被中方截獲前 飛行服務隊定翼機上空一帶盤旋 疑涉警方行動 家屬質疑中港勾結」，2020 年 10 月 9 日）。
當時好多香港人唔相信警方，認為 12 人坐大飛咁大件事，香港警方有法必執，情報網遍佈全香港人個心裡，連人哋心裡面諗乜嘢都有辦法知道，又有乜可能會唔知情，點可能會畀呢 12 個人離開香港水域？
點知而家睇到大飛曬冷事件，先至知道原來香港警方真係流流哋。佢哋唔係扮唔執法，而係真係唔識執法！去年香港警方無力阻截 12 港人偷渡離開香港，要麻煩廣東海警出手，而家連大飛曬冷咁大件事都無法阻止，唔通今次又要麻煩廣東海警出手呀？
中美形勢咁危急，大飛曬冷件事可大可小，萬一有人用大飛走私 iPhone 13，影響華為銷情，情況更是不妙。
反正而家都話要引入醫生、引入護士、引入教師囉，如果香港警方做唔到嘢，不如叫廣東公安過嚟𢭃你份人工，做埋你嗰份啦！
圖：前外籍水警 Les Bird 拍攝到大飛走私幫曬冷的情況。
