[先旨聲明：呢篇係講自己嘢， Medium set 咗 paywall ，你哋鍾意就入去睇又得，鍾意喺度睇落去亦得，適隨尊便。]
呢幾年，我叫得人最多嘅係突破界限，跳出自己嘅 comfort zone 。「甘、窟、鬆」喎，當然應該盡早逃離，免致過份安逸，有咩事上嚟已經走唔郁。
咁我份人都算有口話人，都有口話自己嘅。過去十幾年，我雙腳著地嘅時間其實唔多。唔係拔足逃跑，就係跳高跳遠，絕少停低叉腰擺款透氣。如果唔係，邊度得嚟咁多篇《職場心經》過你睇，又邊度得嚟咁多篇《賴叔睇育》嘅波經？
正如好多人默默地做，我一樣有自己嘅私務低調進行，嗰樣嘢叫移民。係呀，學「旺角活地亞倫」葉念琛話齋，十個香港人，五個投共，四個移民，剩低嗰個仲諗緊。不過移民又唔係話講下就做到嘅事，除非你真係幾千萬未開頭，咁投資移民就邊度都會歡迎你。否則，對於一般人嚟講，升學、靠海外嘅家人、就業同技術移民，都係基本移民嘅套路。
我自身都算孤家寡人，雖不至於孤兒院長大，但親戚緣薄，扶持有限。又唔生鏽大學揀著啲乞食科，出到嚟入咗啲有做死、冇餓死嘅窮忙行業，最終兜咗半條赤道咁遠嘅路，讀完一個又一個嘅 degree ，終於企到去一塊跳板面前，準備好三、二、一就可以起跳，好似飛行棋起機咁，差在唔使葉太幫手。
然後，一起飛就遇著下家飛過，兜咗踢咗我返基地。呢個下家，同大家都好熟悉，叫命運。
唔係講笑，當我知道屋企發生咗大事，間接影響係移民大計可以擱置之際，嗰下我真係認命，係認撚咗命。幾乎跪喺度握腕揼春咁滯。你試諗下，歷史書《三國演義》入面袁術儲心積累要稱帝，喺孤苦無依嘅少年版孫策手上笠咗舊玉壐返嚟，殊不知劉備曹操壞佢好事，最終吐血數升而亡。搞咁多嘢而得個桔，唔嘔血都起碼喊三聲啦。
常言道 35 歲 (有說 40 歲，人口壽命因為醫學昌明而延長嘛) 係人生嘅分水嶺。梁詠琪都話自己播到卡式帶嘅 side B 咯。對於我嚟講，浪費咗二字頭嗰幾年兜兜轉轉，冇好似一啲朋友咁及早加盟跨國企業借勢 relocate ，又冇把握屋企人嘅帶摯去外國定居，唔趁三字頭嘅頭幾年搏盡，以期標個尾會、搭個尾班車出埠，真係對唔住自己。
因為咁，我畀咗幾十萬去「投資喺自己身上」，工都轉咗幾份，先發現原來朋友可以 relocate 嘅機會係鳳毛麟角。直接報海外嘅工， HR 直接投籃， headhunter 嫌煩唔鬼理你；想喺香港嘅跨國企業駁腳，你搞得掂人哋各地 office 之間嘅政治，再搞掂老闆冇咗你之後嘅生活，都仲要巴結到目的地嘅老闆肯接收你。三重彩呀，過三關，唔係打井咁圓圈交叉就贏咁簡單。
命運喺我轉身準備豁出去、明知未有海外 job offer 、第時可能要轉行做水電嘅情況之下都報名技術移民之時，好似考車師傅咁喺我隔離踩咗下迫力。首當其衝嘅唔係我本人，而係我屋企人，但係嚟緊我同整個家庭都有一場漫長嘅戰役要打。當天秤嘅另一邊係健康，你會發現自己押上幾多注碼都在所不計。金錢也好，未來居住嘅地方也好，只要能換來健康身體，要讓步同妥協都唯有照做。
辛苦一場，緣來一場空。呢種氣餒，唔親身經歷過，真係冇切膚之痛。我唔會因此而勸大家揸頸就命，但係會提醒大家，生命裡總有大大小小嘅訊號，話畀大家知咩路行得，咩路唔行唔通。你越係逆天而行，阻力就越大。到最後，承得擔起後果而又如願以償嘅，恭喜你。至少你做到我做唔到嘅事。
#賴叔睇育
