有時候，我都幾佩服自己啲做marketing的同行。化腐朽為神奇你聽得多，但化「刨冰」做「冰沫山」，我都係第一次見。「刨冰」聽落真係cheap雞野，但叫做「冰沫山」個感覺即時升呢，唔止感覺好good，連個價錢都好good，呢個白桃冰沫山，盛惠78蚊港紙！
當然，呢個世界上又貴又唔抵嘅野太多，如果只係因為咁，我絕對唔會出文婊揚，但今次真心拜倒在U字頭媒體的白桃裙之下。你睇下個tag line係真心正爆：「香港都食得到」！睇到呢個標題，我真係以為香港已經打風打到飢荒。乜料呀？你當香港人前世未食過水蜜桃刨冰咩？就快又打風，難道真的不怕風大閃了舌頭嗎？
不過算啦，大家都係寫字搵食的朋友，我也不好為難你了，正所謂受人錢財，冇得enjoy，我婊死你都係冇用。同埋，可能真係有人前世未食過水蜜桃刨冰，我咁樣恥笑人，也是不對的。咁我地都係講返盅刨冰的本身啦！
講甜品當然係講賣相，各位團友睇下本文兩幅配圖，一幅係店家自己的宣傳圖，另一幅係U字頭媒體的實試版。嘩，＿你正呀喂！睇相白桃就細細粒，實則啲桃大到成舊午餐肉咁款？是冰凍版部隊鍋嗎？駛唔駛加個冷麵落去？大佬呀，出鱔稿呀家陣，錢又俾左，你可唔可以俾啲心機切靚少少、鋪返靚少少？你前線廚房同個marketing 有仇呀？依家昆水魚都咁嘅衰樣，遲啲佢班讀者真金白銀去買黎食咁點算？定係 #香港都食得到 係指切呢種切到老蓮咁大粒嘅奇異韓式刀章？
另外我仲想婊揚那個曬傷左嘅鬼佬pat pat咁款嘅大白桃，根據店家所講係「入面藏住雪糕球」，但真相係將個桃切開兩半後，中間夾一餅雲呢拿雪糕，既沒有藏，也沒有球。「滿園春色關不住，一餅雪糕中出來」，話說蜜桃呢樣生果呢，在西方本身係頗具性暗示，一般廚師用桃做甜品通常都會避免原個或切半上，一來吃起來太大舊不雅致，二來好似呢個case咁，「在鋼鐵般堅挺的湯匙挑逗下，兩片肉桃中間緊緊夾著的白色雲呢拿汁液慢慢流出來…」 好吧，我不能再寫落去了，再寫會被檢舉的說。總之，大家現在先跟我一起去面壁思過吧，食甜品食到要去思過崖，何必呢？
好，唔講價錢，又唔講賣相啦，總會有人話甜品呢家野駛乜講賣相，好食咪得囉！好，咁我就同你講味道。某U字頭媒體的試食評價係「可是冰沫不算十分幼細，而且奶香味不夠」叫一個刨冰，冰唔夠碎、個醬又落唔夠香，咁成碗野有咩係食得架？點解夠膽叫雪沫都可以唔幼細？因為佢係刨冰而唔係雪沫呀傻豬，你估改左個名真係會變到好似羽雪咁幼滑咩？係嘅話你改姓膠去轉運啦！結果，咪就係俾78蚊食幾粒冰鎮白桃囉…
呢一個水蜜桃刨冰，完美咁演繹左香港飲食界盲目崇韓的怪風，崇韓不要緊，但崇得黎要形神俱備。刨冰呢樣野，始於日本，成於台灣，韓式刨冰是將奶漿直接倒進冰機去刨，所以奶味香濃。黎到香港，可能係偷工減料、可能是沒用上韓國的白桃、又可能是單純的學藝不精，總之就係慘不忍睹卻還要厚顏無恥地漫天要價。香港太多魚目混珠欺世盜名之輩，形似不神似，借韓風之名，行MK之實，結果就是出了一隊又一隊的Faith，開了一間又一間的偽韓國料理。（溫馨提示：Faith 不是18禁內容，但我相信你google完呢隊組合之後，你會寧願google返我平時叫大家google開的猛男們…）
#好耐冇婊人
#今次出師有名
#出師婊
#Bad_Taste
#遠離U字頭是智慧的開端
#唔好話我網絡欺凌
#你個page人多過我點算欺凌
#我只是在進行智力的無情輾壓而已
#你昆水魚嗰陣又唔係欺凌咩
#歡迎大家tag水魚朋友入黎
#你應該多點關心佢
#我擔心佢遲D會去買韓國山區肺
#係買都買瑞士呀大佬
#唔明就吊到你明為止
#唔好見到有個韓字就狗衝過去
#爭氣啲啦好冇
#呢篇唔係廣告
#等陣先你唔係睇完反而想去破地獄呀嘛
#你同我即刻去思過崖面壁
#有冇留意冇人講過用邊度產地的白桃
#平時啲文咁鍾意認s認屁認韓國但竟然唔打鑼打鼓話自己用韓國白桃
#我覺得呢個人相當有嫌疑
#唔係香港都食到
#係香港先有蠢人會俾78蚊食
#受騙的那個比騙徒更混帳
#唔好問我點解知道鬼佬patpat曬傷左係咩色
#我係唔會出賣我老公架
