史上最長《希特拉救港攻略》閱讀報告
終於睇完《希特拉救港攻略》。買呢本書當初最重要嘅原因，其實就係「希特拉」三個字；點知睇完本書，發覺最大賣點都係呢三個字「希特拉」。
其實之前都講過，上次買《有沒有XXX的八掛》其實覺得有啲呃錢，因為本書太薄，又好似有啲文熟口熟面，再加上一向對鄭立演繹歷史有啲地方其實唔係好同意（後面再講），所以本來已打算唔會再買佢啲作品；點知今次佢竟然夠膽以「希特拉救港攻略」一個法西斯到痴撚線嘅書名，為咗鼓勵香港作者能夠繼續往「禁忌」題材挑戰，所以買書支持係義不容辭嘅事。
不過響正式出版前都有一段波折，話說封面設計原本只係有《希特拉救港攻略》幾隻字，不過有班友話好驚呢個書名「太敏感」推廣唔倒出去，鬼殺咁嘈話要加埋《希特拉都頂唔Ｌ順香港》幾隻字上去，搞到個封面而家又七又肉酸，該煨。當然呢種擔憂唔係沒來由，因為一班以明報編輯袁兆昌為首嘅左膠，剩係見倒個書名經已癲撚咗咁話「唔識講」、「啲樹做錯啲咩」、「希特拉都有娛樂性？我有無聽錯」無知愚昧之餘，道德塔利班程度仲撚痴過明光社──但又話說回頭，你響香港睇書，尻有人會理你睇咩咩，香港有幾何會響街撞倒呢啲虛偽文青呀？
所以當見倒有班怕死鬼話「如果你唔改咗個封面，我就要包咗書套書衣先敢拎出街睇架啦」，我只可以講，香港人各有各膠，其實無一邊係值得同情。
咁講番本書，簡單黎講，就係一本《我的奮鬥》精讀、選讀再加延伸詮釋，將書入面嘅內容再套入香港目前政治形勢：我見倒高登對呢本書評價不高，但其實你最應該欣賞嘅，係鄭立嘅選輯功力：想當年我讀大學之時，亦曾經囫圇吞棗咁睇完一次《我的奮鬥》，果陣其實都有諗過入面有好多嘅論點對香港政黨發展都好有啟發性，但絕對無諗過可以結集出書。
好多人誤解咗《我的奮鬥》只係希特拉建立日後納粹德國嘅意識形態嘅基礎，但其實佢成書之時，只係一個小小政黨嘅頭目，距離真正奪取政權尚遠；所以入面好多論述，其實都有關作為一個在野黨，他們應該如何爭取大多數群眾支持，直至成功奪權為止──而你要多謝鄭立，因為佢好有條理咁根據番香港目前政壇幾個重要嘅議題，即係政治論述、政治板塊、工會、社運、愛國教育、宣傳、群眾集會……一一將《我的奮鬥》相關嘅內容分門別類、去蕪存菁，令你唔駛睇原典花多幾倍時間去整理番啲論點出黎，呢樣亦係《希特拉救港》攻略最值得買嘅原因。
睇完呢本書之後，我不得不佩服希特拉真係對政治運動同埋政黨政治有非常深刻嘅認知，好多佢入面嘅建議，其實直到而家都仲係一啲都唔過時；而你係唔明白點解香港啲傳統政黨係可以犯上希特拉指出嘅幾乎每一個需要避免嘅地方；希特拉對於佢心目中嘅理想社會制度同國家發展嘅想法亦都非常完整，足以令全香港所有所謂政黨政綱看起來好似學生習作咁嘅水平──當然某啲政黨響政策、或者理念上可能有啲可取之處，但係擺埋一齊就全部都係千蒼百孔。
有幾句QUOTE由於真係正到仆街，所以不得不響度同大家分享：
「一個政黨解釋世界的方式，應該是獨特的，不能和政黨相容的。因為這樣才能讓大眾了解你存在的必要性，而不是與別人太相近、難以分辨的模糊政黨」
「我們社會的中產階級，根本就無法推動做任何對人類有意義的事情……大部份政黨想討好中產，使他們在議會中，能盡量保存自己的議，結果往往是做出違反他們的原則和論述的行為」
「我們國家社會黨集會，絕不是『平靜』的集會；兩種不同世界觀的對抗，在散會的時候，每每引起觀眾的狂熱，並不是唱一隻沈悶的愛國歌曲所能了事的」
不過要講到全書最大問題，就係鄭立本身嘅「延伸詮釋」，響引用全文之後，鄭立通常都會再寫段字，咁呢個當然係必要，如果唔係一般讀者係未必掌握倒原文含義。問題係呢段字係分咗四類內容：
1. 原文嘅延伸：即係段野嫌唔夠詳細，再寫多段「《我的奮鬥》仲會講……」
2. 原文嘅註解：即係段野比較深，要寫多段進一步解釋
3. 原文嘅補充：即係《我的奮鬥》對於希特拉嘅諗法都唔係太完整，所以要再引其他資料補充說明
4. 原文嘅借題發揮：即想將段野拉埋去同香港政局比對，所以要寫多段將兩者拉埋一齊
但問題係，鄭立並無響佢寫嘅文字入面清楚講明究竟係邊一類，結果就會令我覺得好困域，究竟邊啲係《我的奮鬥》嘅意思，邊啲其實只係出面嘅人對希特拉嘅想法，甚至只不過係你自己猜度希特拉會咁諗，其實效果係會爭好遠。如果響每段文字加番個icon講明係邊一類延伸，咁會好好多。
第二個問題就係正如前面所講，對於鄭立某啲嘅詮釋，其實我唔係好同意。除咗有時有啲係「技術性錯誤」（例如我以前曾經無開名講過佢將雅典同斯巴達關係簡化得太犀利），另一個原因係佢太想將一樣嘢套入佢心目中嘅比喻，以至在無意識間扭曲咗件事。
例如明明佢段QUOTE係寫緊「（政黨）的觀點應是開放討論，可以隨時修正，絕不要把初衷視為不可修正、不可動搖」；但鄭立之後嘅演繹卻變成：「在公開黨綱前必須三思，確保黨綱十全十美後才可公開」，基本上係完全相反。
又例如希特拉話「社會福利是不能濫用的止痛劑」，你就唔可以夾硬類比做港鐵短期優惠就係止痛劑，回購長期減價先唔係──因為用公帑津貼車費，就係社會福利，以希特拉價值觀，應該係提升低下層生活水準，令佢地唔再覺得車費係負擔先係正確解決方法。
仲有希特拉就群眾集會紀律上面，完全係「大台支持者」，要求主席有絕對嘅執行紀律權，呢點其同支聯會搞六四、飯民搞佔中嘅諗法係好似。入面講到「集會裡常有赤化份子參加，他們常常是結隊而來的，偶爾還有少數的煽動份子混入其間……唯有主席的魄力，以及會場衛隊的防衛，才能挫敗破壞者的陰謀」擺明就係講緊反對「拆大台」，當中郭紹傑更係希特拉理想中嘅衝鋒隊成員榜樣（雖則佢酗酒問題會為希特拉所厭惡），而你點可以係隻字不提呢？
但總括黎講，政治入門書其實好難寫得好，因為太淺就變成阿媽係女人，太難又離地得滯無人睇得明。今次呢本《希特拉救港攻略》，雖然有好多人鬧校對問題、又或者內容好零碎之類，但響我角度黎講其實都係好濕碎嘅瑕疵，因為佢真正價值在於借希特拉把口，同大家講解政黨政治一啲最基礎嘅原則，等大家知道一個日後響世界政壇呼風喚雨嘅人，認為一個政黨有啲乜嘢係最重要、有啲乜嘢係會導致佢地最終失敗。
所以其實我都幾慶幸班左膠一見倒希特拉三個字就敬而遠之。比佢地學倒呢套，反過黎打擊港獨派，仲得了嘅？
香港政黨發展 在 「香港政黨發展與展望」講座-- 關信基教授 - Facebook 的推薦與評價
關信基教授，乃著名政治與行政學研究專家，曾任本系之系主任，現為本系榮休講座教授。2006-2011年間任公民黨之主席，對香港的政黨發展有豐富的認識。 2012 ... ... <看更多>