第8期已出！
《熱血少年》第⑧期
噓!呢本嘢，終於都嚟到第⑧期勒！
呢一期，又有乜嘢新嘢呢？有呀——最觸目嘅，自然係「謀朝篡位」呢個大行動勒！尚未知道呢個行動係乜嘢嘅仁兄仁姐，不妨喺買番本嚟！另外，《小雷的情書》、《香港獨立戰爭》同埋《咒法和弦》呢三ＰＡＲＴ作品，頗為上力！
講真，《熱血少年》出版至今，最令我哋欣慰嘅，係出咗幾個極具實力嘅「薄漫」新主筆——門小雷、ＤＯＬＬＹ、惠昌、馮展鵬同埋江康泉等等。
馮展鵬，本身有份高薪厚祿嘅設計工作，暫時未能全職投身連環圖界，有Ｄ可惜！亦因為咁，佢喺《熱血少年》連載嘅《實戰攻檔》，更加顯得難能可貴！
江康泉呢？手上又係好多ＪＯＢ，多到做唔切！一時間要佢全力泡製薄裝港漫，又係有難度！
至於門小雷咯喎．．．佢走嘅路線較為「有型」！我哋《熱血少年》請到佢嚟助陣，已經係好難得好難得！所以．．．鍾情小雷畫稿嘅朋友，真係要好好珍惜佢喺《熱血少年》入面連載嘅《小雷的情書》！
好勒，去到惠昌同埋ＤＯＬＬＹ又點呢？好大機會，係新一輩港產連環圖嘅中堅分子！惠昌唔駛講，佢出自薄裝連環圖公司，喺多年潛移默化下，必然投身呢個圈子！至於ＤＯＬＬＹ呢個小妹妹咯喎！牛佬睇好佢——事關佢好精靈架！佢嘅料，應該可以適應任何創作嘅圈子！而最好彩係，佢頗為鍾意繪畫長篇連載故事！
牛佬噏咗咁多嘢，係想講乜呢？係想帶畀大家一個訊息——一群充斥藝術天份，蠢蠢欲動，正待破繭而出嘅年輕漫畫家，正喺《熱血少年》默默地磨練．．．呢個時候，係最值得一眾看官「留神」嘅時候！
所以，大家係咪唔好錯過呢？
《熱血少年》第⑧期，各大報攤現已發售！
