【龔成問答信箱】(Q22681-Q22700)
Q22681:
龔老師,我一直同股票談戀愛, 聚咗唔少老婆。
煤氣9095股,
九倉2000股,
匯豐2514股,
恆地8700股,
港鐵5032股,
港交所1254股,
騰訊744股,
領展1500股,
建行69700股,
中移1333股,
友邦2200股,
九倉置業3000股,
平保3087股,
中銀香港9000股,
2382(300股),
9988(300股),
京東(100股),
2269(1000股),
981(1000股),
6060(500股),
2588(500股),
285(1000股)
241(4000股)
我想在收息同新經濟股中取得平衡,未來應該會到英國生活。打算多用約1-2球重新執好個倉。想多d股息
望指點迷津,打攪老師了。by the way. 請問老師有冇開班
龔成老師︰
最緊要分析「企業質素」,如果企業無質素,就要賣出,如果有質素,就可以長線,當然,如果個人需要,就有可能要賣出部分。
首先,你現時股票太多,你會好難定期管理。建議你長線集中翻係10-15隻,咁會較好。
我假設你短期內,都唔會去英國,或者就算去英國,現有資產都可以保留。(如果短期要走,又要清空香港資產,現時就不要投資,反而要開始分段沽貨。)
你現時48歲,投資要開始保守少少。
港交所(0388)、騰訊(0700)、舜宇光學科技(2382)、阿里(9988)、京東(9618)、藥明生物(2269)、中芯(0981)、眾安(6060)、中銀航空租賃(2588)、比亞迪電子(0285)、阿里健康(0241)這些股票,不確定性和風險較高,不宜持有太多。
你可以考慮將部份,慢慢換至以下股票。
如果你想收息之餘,維持一定平穏增長力,可較集中平穏增長股。如果想保守D,只係收下收就算,可以集中係收息股。
以下股票,現價都合理,可以分注。但由於大市未算平,你最多投入多30-50萬資金好了,餘下部份等大跌市才動用,會較理想。
收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)、高息基金(3110)都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。
最後,我建議你定期審視組合,睇下有無出現過度集中情況。
任何股票、任何行業,我們都不應太過集中,因為一個行業就算更有優勢,也有機會面對行業週期及突發風險,太集中會對你整個財富組合不利。
因此,你要建立一個平衡的投資組合,當中有不同的類別、不同的行業,這是最好的平衡風險方法。相同行業不可佔組合多於30%,而單一企業不要高過15%。
特別係銀行業,佢營運模式較特別,風險會比一般行業為高。必需堅守30%這個準則,如果可控制在20%以內,會更好。
現時依然有開班,你可留意。
------------------------------------------------
Q22682:
阿sir 你好!本人41歲,本人嘅股票投資組合如下
( 現時市值約337萬)
股票No 買入股數 平均買入價
2 500 81
( 2 )月供 200 74.1 - 82.4
3 4515 14.94 - 15.56
12 7200 34.8 - 37.45
27 3000 44.1 - 51.1
66 9066 44.4 - 46
388 300 238.6 - 253.4
(388)月供 157 248.3 - 509.7
823 12000 59.1 - 70.2
1038 1500 51.3 - 57.4
(1038)月供 335 38.7 - 54.9
1211 1500 37.5 - 70.4
(1211)月供 776 42 - 235.6
1928 2800 32.8 - 36.7
(1928)月供 611 30.9 - 40.5
2388 2000 25.8 - 34.2
(2388)月供 625 21.9 - 27.4
2800 5500 26.1 - 30.95
(2800)月供 2119 24.5 - 28
3033 1400 7.8
9988 1400 176 - 206.2
我暫時每月可儲蓄$7000, 其中$4000係...喺今年8月份開始月供兩隻新加入嘅股票 , 分別係...1810 & 1177 各月供 $ 2000
另外4年後即係我45歲這年,便可增加儲蓄至每月2萬
我想問我選了以上這16隻股票作長線投資ok嗎 ?
資金比例合適嗎 ?
需要改變比例嗎 ?
我最想問現在這 337 萬嘅股票組合比例...及我 41 - 45 age 其間,每月可儲蓄 $7000 & 45 age 開始每月可以儲蓄 $ 20000 , 這種情況
其實我需要用幾多年嘅時間,才能增值至 1000 萬呢 ?因為本人想每月有 5 萬現金流
本人與另一半 2人一同於今年9月份,已成功報讀了成哥你嘅投資倍升股基礎班課程。
本人買了成哥你六本書
50優質潛力股 2017 - 2018
50優質潛力股 2020 - 2021
大富翁致富藍圖
80後3百萬富翁
80後千萬富翁
年報勝經
不過年報勝經好深,唔係太明白,還要多加研究
一直去閱讀成哥你嘅書獲益良多,現希望上完投資倍升股基礎班課程會有更多嘅得著
龔成老師︰
你現有持股,係適合你長線投資。但16隻其實有少少多,最好長線維持係10-15隻水平,否則你會好難定期管理。
月供股票中,比亞迪(1211)現價偏貴,建議回到$180左右,才重新開始月供。此期間,可以用GX中國電車(2845)暫時代替。
現時大市在合理區,你保留太約3-5成現金左右,去等大跌市機會出現,咁就可以。
我假設年均回報率有10%,以你現時計劃,大約50歲左右,就可以增值至1000萬,當然要視乎到時大市實況而定。
其實書本上,<<年報勝經>>係深少少。如果你係初學者,我比較建議先睇我架《80後百萬富翁》、《財務自由行》和《股票勝經》。這幾本書,對你吸收上堂知識,都會有幫助。課堂上見!
------------------------------------------------
Q22683:
我以前買了2888 和 698 揸了很久,跌左好多,都唔知點算好?
想請教下
龔成老師:
渣打集團(2888)質素只是一般。
雖然未到劣質,但質素不高,但本地銀行股中,賺錢能力算是較弱。加上銀行業近年的環境不及過往,賺錢能力不及以前咁好,相信佢之後,都只是好基本增長,不要對股價有太多期望。
投資價值只是一般,如果持貨不多,就當守住先。
如果持貨多,我會建議考慮將部分貨,轉其他更有質素的銀行股,或其他優質股。
至於通達集團(0698),算是不過不失。
佢主要從事電器產品(包括手機、手提電腦及其他電器產品)零部件生產;為電子產品及電器提供金屬外殼及其他五金部件;及提供塑膠機頂盒及生產體育產品。
現價合理,勉強可長線。但就唔值得持有太多,始終質素唔算好高。如果持貨多,就減。
------------------------------------------------
Q22684:
老師,純收息,及有增長收息,邊個風險度會高啲?應該投資那一個?
龔成老師:
其實好睇你的投資目標,如果單是收息,佢股息一般會高d同股價穩定d。而增長,雖然佢潛在波動會高d,但股價增長,以及往後增長,長遠會好d
------------------------------------------------
Q22685:
龔成老師,我想請教你,之前放了大部分股票。 只剩下9988 200股 平均價$258, 3手ibond 。 另外手上還有一堆美股 市值大約5000美金。
對於9988 我應否耐心持有或在合理價位再加倉? 謝謝老師
龔成老師︰
我地做財富增值,最重要不是睇「賺蝕」,不是睇「買入價」,而是睇質素。質素不好,增長力弱,就有可能賣出,蝕都要賣。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?即是你想設計一個怎樣的投資組合?長期、優質、平衡、適合你。
因此,係你已沽出大部份股票前題下,阿里巴巴(9988)相信佔你組合比重唔細。
個別企業和行業,不要佔組合15%和30%以上,銀行業更加不要高於組合20%,否則會有過度集中性風險。所以,我建議你唔好再加持住,反而你加入其他不同行業股票,去進行平衡配置。
另外,我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
如果你係年青至中年人士,阿里巴巴(9988)這類潛力股,係適合你。但如果你係退休人士,這股就風險太高,只宜好小注。
而ibond則是現金流產品,增長力唔高,同樣只適宜近退休人士。
你要因應自己人生階段,去作出相應的配置。
------------------------------------------------
Q22686:
龔Sir,你好! 我現在52歲,剛剛賣走了一個車位,所以有一些現金在手,經過一輪的研究準備 買入以下的股票作長期持有,到退休時把這些股票轉再為收息股。
請問我選出來的股票組合對我這年齡的人來說是否風險過高? 或者對以下的組合有什麼改善的建議。當然我唔會即刻買晒下面的股票,要等好價才會入貨。 謝謝!
招行(15%),石藥(5%),騰訊(15%),港交所(15%),比亞迪電子(10%),完美醫療(15%),信義玻璃(15%),舜宇光學(15%)
龔成老師︰
先增值,到退休時慢慢換成收息資產,去幫自己創造現金流收入,支援退休生活。這個方法,係正確的。
但由於你年紀,係比較近退休之年,係增值組合的選股上,不宜過份進取。
你現時選股都有質素,但潛力股佔比重太高(0700,0388,0285,1830,2382)。佢地雖然有增長潛力,同時風險都較高,不宜持有過多,大約佔2成好了。
你應以平穏增長股,作為你組合主力。佢地增長力不及潛力股,但都有平穏增長,而且有若干股息,整體穏定性較強,相信會較適合你的情況。
平穏增長股:金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)。如果有投資美股,可投資VOO。
------------------------------------------------
Q22687:
龔成老師你好,現時持有:
4400股 00005 平均$65
1100股 00012 @$47
100股 00700 @$505
900股 00939 平均$7.8
4000股 01177 @$7.5
7000股 02628 平均$27.7
200股 09988 平均$273
以前只懂買銀行股收息股,之後先開始買其他股票。最近打算買樓,想賣咁D股票,係咪應該賣5,939,2628
請指教一下,謝謝
龔成老師︰
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
你現時組合,算係一個有偏向增長型組合,若你係年青至中年,係適合。但當中匯控(0005)、建行(0939)、港燈(2638)是收息股,無太大增長力,若你較年青,就不宜持有太多。
另外,個別企業和行業,不要佔組合15%和30%以上,銀行業更加不要高於組合20%,否則會有過度集中性風險。
你現時銀行股、匯控(0005)、中國人壽(2628)明顯係超標,你要調整一下個比例。其實中國人壽(2628)近年增長力都明顯弱左,本身都不宜持有太多。
若果你需要套現買樓,而你又係年青至中年人士,你可以優先沽出匯控(0005)、建行(0939)、港燈(2638),順便調整埋個組合比例。
未來時間,你可以加入多一些平穏增長型股票,去令組合更平衡。
平穏增長股︰指數基金、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)。如果有投資美股,可投資VOO。
------------------------------------------------
Q22688:
請問平保2318 仲有冇前景,收購方正之後股價一直跌
龔成老師︰
中國平安(2318)有質素的,佢有規模,有品牌,近年的發展都不差,不過,股價有時會有少少波動,這主要受投資市場表現影響。
近期佢股價下跌,除了因為大市氣氛較弱外,其本身數據都唔係太理想。
但我地審視一間企業投資價值時,會睇長線。只要中短期因素,對佢長線投資價值無影響,這些中短期波動,我地就唔需要太在意。
這股有長線投資價值,是平穩增長型。現價算係合理區中間至中下位置,分注投資就可以。
------------------------------------------------
Q22689:
hi成哥,我打算在股災時動用15萬買這些股票.
A .3738[30%]
B. 2013[30%]
C. 708 [20%]
D.1585 [20%]
我不怕高風險,點睇這組合?
另外,等股票升晒之後打算用150萬購買這些收息股.
A.3988
B.1883
C.1382
D.2777
E.1628
Sir,這組合如何?應該點分配資金?
再另外想問下1628點解咁高息?高息既背後有咩風險?現價1.68,但PE有成1566,姐係好貴?再問下尼隻野收息穩定嗎?佢長期都係咁高息?幾錢是便宜區?
謝謝成哥解答!
龔成老師︰
我地投資,唔好盲目追求高增長,要先知風險,才想增值。
我明白你風險承受能力好高,但你這4隻股票,不確定性的確好大。特別係恆大汽車(0708)本身母公司財政有大問題,而佢本身到現在,一部汽車都無出產過,投資風險唔細。
我地唔好成個組合,只集中係3,4隻股票身上。最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能高於組合30%,同一股不能高於組合15%。要平衡,建立後長期持有,不是買賣賺差價,而是成為你財富組合一部分。
恆大汽車(0708)、雅迪控股(1585)同是汽車相關股份,我地就不要持有太多。
我建議你調整翻4隻股票比例,再加入適量平穏增長股,去將個風險拉低翻少少。
你要明白一點,高風險唔一定係高回報。若這些高風險企業發展理想,回報當然好。但發展不似預期,損失幅度會比一般平穏增長股高好多,你要明白這個風險。
你這個組合,會不會升到150萬,要多久才升到150萬,無人知,因為不確定性好大。如果升到150萬,你是否轉至收息股,你要再用你人生階段作考慮。
如果你依然係年青至中年,建議保持投資一些有增長力股票。若你已退近退休之年,換成收息股係可以。
你收息股組合中,大體上都有質素。
富力地產(2777)業務上是有質素的,股息好高。
佢本身負債高,相信會對佢有一定的影響。股價會因此較為波動,所以唔好只睇股息。你預佢中短期都會一般,但如果只是小注投資,都可以。
禹洲集團(1628)主要於中國廈門、上海、福州及合肥從事物業開發、物業投資、物業管理以及酒店業務。
佢係新加坡、香港、上海、合肥、福州、廈門等地均設有分支機搆。
整體質素都有,但未算好強,佢在行業中,未算有好大的規模與優勢,另外,負債較高都對這股造成風險。加上業務有點波動,這股唔建議投資太多。
現價合理,但不宜持有太多,長線投資價值都有,但未去到最高質類別。
佢PE去到過千,主要係因為過去一年,盈利大幅下跌所致。如果你用翻佢上一年盈利計,佢PE係個位數,所以係正常。
雖然佢上年收入下滑,相信主要係受疫情影響。疫情過後,會慢慢回復較正常水平。但始終佢質素唔係好高,唔建議大注。
最後,希望你記住財不入急門,一個平衡和合理風險的配置,增長潛力未必最高,但對你長線投資增值,相信會係最有利。
------------------------------------------------
Q22690:
龔成老師,我一直都是你的小粉絲,默默地跟住你的教導月供股票,最近家人強力推薦重資買入2448,請教老師對2448的前景分析如何? 十分感謝
龔成老師︰
首先,好多謝你一直支持。
恆宇集團(2448)業務主要係在澳門,以承建商身分承接澳門私營物業項目的裝修工程及樓宇建造工程。
集團於上年年末,開始想發展金融服務業務,今年7月更與總資產逾千億的國企青島西海岸發展集團就「青澳數字經濟產業園」及相關基金項目簽訂戰略合作框架協議。
市場或預期集團未來,會因為加入金融服務業分部,對盈利起到極正面作用。
但我地作為理性投資者,要學識客觀分析事實。新分部和協議框架,的確係有佢發展潛力。但問題係,佢只是剛剛開始,會發展到幾大,會否成功創造盈利,幾時才有盈利,都係未知之數。
只能說,佢潛力股係提升左。但根據現有業務和過去業績,此刻係好貴。
這代表佢現時股票,很大程度係建基於"未來"新業務的發展。若新業務發展不似預期,股價很大機會出現較大幅回調。
而且,佢雖然多年來都係有盈利,係經營現金流欲維持負數,代表佢表面係有錢賺,但實際上落到公司袋架錢,係負數。
我無仔細研究佢財務數據,有機會係正常,但都有機會係有問題,我一般見到這個情況,都會較有保留。起碼要仔細分析過當中數年數據,真係無問題,才會考慮。
所以,你投資此股係可以,現價唔平,加上投資風險唔細,你要自己衡量。佢有一定不確定性,投資時要控制注碼。
------------------------------------------------
Q22691:
你好! 本人年50 有屋(供完) 铺(供完) 收租$6500 屋企人给每月$10000 零用 〈 一半用來交保險 〉尼一 。二年 在網上才真正認識股票
伹股齡有十几年(短炒 不分析公司 跌市心驚) 近尼一年 才把蝕去 有(30萬几) 慢慢 賺回來 约20萬 持有以下股票 有部分已持3年 有的3個月
現在見有錢赚 想沽出部分 請問 那些可以長楂 謝謝解答
3993 (平圴價$4.2) 2萬4千股
716 $0.8 4萬股
189 $6 2千股
1177 $7.08 2千股(打算月供)
788 $1.52 2萬股
728 $2.33 2萬股
2198 $3.68 1萬股
451 $0.28 5萬股
520 $8.69 4千股
1357 $2.82 1萬股
769 $0.9 2萬股
1787 $15.8 2千股
1250 $0.113 20萬股
6885 $3.68 1萬股
1024 $85 1百股
龔成老師︰
我地投資股票,係希望買入一些優質企業,透過佢自然增長,達至財富增值目的。重點係長線持有優質股﹐唔係去做短炒,因為中短期走勢無人知。但長線持有,企業質素一定會反映在股價當中。
所以,你首先要改變自己過往十多年錯誤的投資方法,改為以長線投資作為策略。
投資前,一定要知道該企業質素、行業前景、財務狀況等,才去投資。如果你連間公司點賺錢、行內有乜優勢、點解未來有發展和增長潛力,都答唔倒自已,咁就要停一停,唔好投資住。
同埋,你唔好停留係「賺差價」的想法。當你一直持有這股,企業長期價值向上,就會帶動我地的財富有最大增長。成個效果,一定比你經常出出入入好。
你現時財富組合當中,已有一個住宅物業和一個收租舖位,比重都幾偏重左係物業類。故未來時間,應較集中累積優質股,令財富組合更平衡。
以你50歲年紀,都可以進行適度增值,但由於較近退休之年,選股上要保守少少。
中國電信(0728)係有質素收息股,可持有。
洛陽鉬業(3993),中國三江化工(2198)、協鑫新能源(0451)、呷哺呷哺(0520)、美圖公司(1357)、山東黃金(1787)、北控清潔能源(1250)、金馬能源(6885)質素較中等或波動性太高,唔建議持有太多。
中生(1177)、中國鐵塔(0788)、快手(1024)都有質素,但係是潛力股類,你可以照持有。但這類潛力股風險較大,以你年紀計,佔組合最多2成好了。
其餘無提及之股票,建議沽出較好。
未來時間﹐你可以以「平穩增值股」+「收息股」作為投資目標。若你想保守些,或預期自己距離退休年期不遠(5年內),可以較集中收息股。
相反,你依然有一定時間增值,想進取少少,可以集中在平穏增長股上。
但緊記,要隨著年齡增加,慢慢增加收息股的比例。到退休時,你收息股比例,應提升至100%。
平穩增值股,例如指數基金、金沙(1928)、長建(1038)、中銀(2388)、港鐵(0066)、恆基(0012)、平安(2318)、粵海(0270)、領展(0823)。如果有投資美股,可投資VOO。
同時,可以建立一個收息股的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)、富豪產業(1881)等(記住,股價略波動,不能太過大注)。
------------------------------------------------
Q22692:
老師9618 9988 長線仲值得投資嗎? 感覺冇咩起色
手上冇咩貨 9618只得2手 均價$328
9988 4手 $240
要點應對宜家嘅情況?
龔成老師:
仍值得長線,有兩點你要注意,第一,唔好太著重短期股價,你預科網類仍政策影響,中短期仍弱,要平常心面對。第二,都唔好太集中在同一行業,因此,要睇你持貨佔組合比例%,如果不多,就無問題,可長線。
就以阿里(9988)來說,佢有質素,中短期一般,但長遠仍有增長力,之前貴,現價去翻合理區。
係業務層面,擁有相當的優勢,不少業務處於壟斷狀態,同時增長理想。加上正不斷發展延伸業務,這都會成為企業增長的潛力,預期增長會持續,這是阿里最大的賣點。
以企業的長期發展計,這股的確優質,但股價都有一定的波動,現價算是合理翻D,但都不是大手時候。
始終將面對內地監管可能收緊,因此風險度增加左,不過,我相信佢的整體優質度仍在,內地不是不想佢賺錢,只是想規管佢。佢已建立好完善的業務,因此本身是無得輸,只是賺多賺少問題,現時監管多左,點都會影響賺錢能力。
對於這類優質、有發展,預佢現價約合理區中間,長線持有就得。
------------------------------------------------
Q22693:
老師點睇隻百度同B站?
內地科網股 一直探底
應否換股投資?
龔成老師:
你預中短期因政策風險,股價表現仍會弱。但本身仍有質素,只要耐心持有就得,除非你持貨過多,否則不用減。
以百度(9888)來說,有質素,有獨特性,長遠發展不差。
佢係全球最大的中文搜索引擎「百度」的營運商,係內地用家搜尋資訊主要對口,用戶規模突破10億,百度App日活潑用戶超過2億,多個指標都處中國第一。
業務上,佢擁有好強大互聯網基礎的領先AI公司。自2010年起一直投資AI以提升搜索及變現能力,並使用核心AI技術引擎「百度大腦」開發新AI業務。
我睇翻一些報告:
1. 佢擁有中國最多的AI專利數量以及AI專利申請數量。
2. 按累計拉取請求計,百度的深度學習框架飛槳居中國深度學習框架榜首,全球排名第二,僅次於Facebook Pytorch。
3. 按開發者數目計,百度開放式AI平台擁有超過數百萬名開發者,係中國最大的開放式AI平台。
4.按開發者數目計,係百度雲基礎設施上運行的Baidu OSChina是中國最大的開源活動開發平台,全球排名第三。
百度核心業務(唔包括愛奇藝)由AI驅動,為其貢獻超過70%的總收入,主要提供基於搜索、信息流及其他在線營銷服務,以及來自AI新領域的產品及服務。
並廣泛使用AI技術開發創新營銷服務(例如動態廣告),為各搜索用戶推薦最適合的營銷客戶產品。
現時佢坐擁不少資訊和客戶群,就可以利用佢地去發展很多不同業務,可以話係一個好大的優勢。佢收入不差,長遠有發展,但由於本身有相當規模,因此,未必是高速增長型。
百度在規模和質素上,一定係有。但近期科網股波動,風險高左,同時到上市一刻不確定性高左。如果持貨多,先要減,否則可守。
------------------------------------------------
Q22694:
想問下,维他奶的管理層令我失望,就是一間大企業,危機意識管理没理由那麼差,由於問題出自管理層,所以長遠好難返到身。
维他奶根據購股權計劃發行43萬股,每股發行14.792,較上一个營業日的每股收市价21.45,折讓约31.04%
另外,龔sir, 我好明白2800對散户最安全,出面啲人成日話你叫人買2800。
龔成老師︰
其實維他奶(0345)能否返身,都係言之尚早,要觀察。因為消費者,好多時都係好善忘。
至於佢發行新股,其實不少公司會發放一些購股權給員工作獎勵,如果該員工行洗權利,就會發行新股給該員工。
由於發行了新股,所以現有股東每股盈利會被分薄左。但這些購股權未必一定會行洗,所以你係年報會見到,每股盈利有2個。
一個係"基本",另一個係"攤薄"。前者係當期的實際每股盈利,後者係假設這些購股權(除了購股權,都仲會有其他金融產品,會影響這個數),全部被行洗後,每股盈利會分薄至那個水平,給投資者一個預算。
現時维他奶已發行10.6億股,43萬股只係一個小數目,對股東影響唔大。
而盈富(2800)係一個唔錯組合,所以我經常推介,特別係推比一些投資初學者。
因為如果你係一個數學教援,對著一個小學生,你會刻意教微積分嗎?有需要為表現自己的知識,教他不明白的方法嗎?
當我比理財意見時,最重要是「適合」,如果強行叫網友買風險過高或他不明白的工具,我認為有點不負責任。
其實好多年前已經有評論話我只懂叫人供盈富(2800),但我咁多年都照樣叫人買盈富。
其實我一直都明白,盈富(2800)並不是最高回報的投資,但這是一個組合,當中有58隻質素不太差的股票,對本身不懂選股的投資者來說,是一個很好的選擇,加上有平衡組合風險的效果。
就算對無乜選股能力的投資者,提供一個穩健,收息及平穩增長的組合。
至於我叫人月供,都是同樣道理,對於不懂掌握買賣時機的投資者來說,月供股票是最好的方法。
------------------------------------------------
Q22695:
Thank u!! How about 2828 vs 2800 le?
龔成老師︰
恒生中國企業ETF(2828)是追蹤恒生中國企業指數之表現,即是中國的企業,當中不少都有一定的質素。只要中國經濟長遠增長,而這些企業合理增長,就能帶動價格保持上升。
由於這些國企的股價較為波動,你最好以長期的模式去進行月供,每次供的金額不用太大,以較長時期去平均價格,自然能減少風險。
長遠來說,中國仍不差,你可以進行月供。但就要每月留些現金,因為這刻未到平宜區。
盈富(2800)是包括58間質素不錯上市公司股票的組合,這些股票有升有跌,但長期計,都有不錯的回報。
買入盈富主要有兩個回報(分別是股價升幅,加上股息回報),股息不多,大約只有3%,而股價升幅,其實有升有跌,每年都會波動,但長期平均計,都有5%-10%,當然,這是不一定的。
同樣地,若你以月供股票,買入的價格就能平均,不用擔心一次過在高位買入的風險。
2隻ETF都係有質素,但風險度2828會高少少,你要自己衡量。
------------------------------------------------
Q22696:
你好,本人月可儲5-7萬,積蓄因買了可購公屋只剩30萬,沒有投資經驗,有可能在1年後買到樓嗎?因看見一個粉嶺心儀地盤,
想盡可能在建築完成前,即2022年底有可能上車,而穩定女友又可夾大約50萬,本人做貨運收現金的,女友開鋪的,又大概要預多少做首期可過壓測呢?謝謝
龔成老師︰
如果從投資角度,其實1年係一個好短時間,就算再優質股票,都會有波動,令最終回報不確定性大增。因此不宜做任何投資增值﹐最多只可以做定期。
以你現時可動用資金,1年後大約150萬。若以你7萬收入計,買800萬以下物業,做9成按揭,供30年的話,應該都可以。
但當然,這個只係好初步計算,實際按揭是否批出,要視乎相關銀行準則。加上你工作係收現金,而且可能相對不算穏定,銀行計算你供款能力時,或會有調整,你最好向銀行問清楚,以免失算。
------------------------------------------------
Q22697:
請老師看看先父的股票,有沒有兩三隻可保留,謝謝
00536 貿易通 20000 股
00687 泰昇集團 70000 股
00737 灣區發展 12500
00889 連達科技控股 20000
00927 富士高實業 70000
00987 中國再生能源投資 88000
01080 勝利管道 21000
01123 中港照相 50000
01165 順風清潔能源 10000
01222 WANG ON GROUP 300000
01265 天津津燃公用 20000
01395 強泰環保 50000
01560 星星集團 100000
01685 博耳電力 20000
01900 中國智能交通 30000
02014 浩澤淨水 30000
02389 北京健康 54000
03332 中生聯合 20000
03882 天彩控股 20000
06161 泰加保險 10000
00596 浪潮國際 8000
00723 信保環球控股 3125
01041 林達控股 1000 (停牌)
00261 GBA集團 400000
00575 壽康集團 97379
00612 中國投資基金公司 8000
00831 利亞零售 10000
01142 西伯利亞礦業 50
02222 雷士國際 50000
87001 匯賢產業信託 15581
市值大約50萬
以上乃先父留下的股票,應該大部份是劣質股,我不知買入價位 ,現打算沽出,換入優質收息作媽媽養老之用,老師可否幫忙看-下 ,以上有沒有兩三隻可以留低不賣,謝謝你
龔成老師︰
其實買入價位,係你買入股票後,已經唔重要。持有與否,最重要係睇佢有無長線質素。
貿易通(0536)、灣區發展(0737)、匯賢產業(87001)、利亞零售(0831)係質素的收息股,適合你,你可以保留。
連達科技控股(0889)、富士高實業(0927)、中國再生(0987)、星星地產(1560)質素較一般,保留係可以,但最好只留下小注。
其餘股票,都係質素較弱,或者係不適合你這類退休人士持有,你可以沽出。
------------------------------------------------
Q22698:
日日已習慣係fb閱讀老師文章分析,遲來的學習。
我想入2800盈富,港燈,,價合理嗎?想各入5手,月供定現價入貨?用老師分析用1/5現金放入股票上,慢慢買入。勞煩老師百忙抽空教導。
另外開富途牛牛買賣,安全嗎?
龔成老師︰
富途牛牛做買賣,無問題。
除了盈富(2800)和港燈(2638),其他我之前講的收息股,全部現價都合理。但由未到平,所以投資股票的1/5資金,都要再拆細。
現價先用大約一半,分注慢慢入貨。餘下一半,等大市有明顯回調,就再慢慢加大入貨力度。
另外,唔好只加這2隻股,可以再加入多少少不同行業收息股,去令組合更平衡。
只要個別企業和行業,不要佔組合15%和30%以上,銀行業更加不要高於組合20%,以免出現過度集中性風險,咁就可以。
------------------------------------------------
Q22699:
龔sir,想問下澳門規管賭業既政策(吾俾資金向外流),對銀娛,金莎會係正/負/冇長遠影響?我地要點分析好呢?感謝老師
龔成老師︰
這個情況,相信主要係想限制一些人,利用貴賓廳便利,去轉移資金。
長線計,貴賓廳收入有機會因此而少左,但影響程度有多大,就要再觀察。
中短期,貴賓廳佔收入比重較高企業,會較受影響。銀娛(0027)和金沙(1928)都並非好集中係貴賓廳,故影響唔算係嚴重,同時近年已減少貴賓廳比重。
------------------------------------------------
Q22700:
老師,可以問下你對騰訊的睇法嗎?是否長遠來說都機會大升返$650左右呢?數碼人民幣會唔會取代它的電子錢包呢?
龔成老師︰
騰訊(0700)依然有投資價值,最近受中央政策和大市氣氛影響,出現較大回調,但整體質素唔見明顯轉差。
但集團已經好大隻,發展唔會好似以往咁快。要回至$650唔係無可能,但要點時間。
至於數碼人民幣會唔會取代它的電子錢包,係一個未知之數,2者有可能係並存。現時數碼人民幣都係試驗階段,好多野都未清楚。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
香港股評人排名2022 在 龔成 Facebook 的精選貼文
【龔成問答信箱】(Q21821-Q21840)
Q21821:
hi,龔sir,一直都有留意開你嘅Facebook ,本人30歲,都有買開股票有好幾年,都成日比老婆笑係燈神,買襯啲股票都跌,但放曬就會升⋯
就好似金蝶國際,吉利汽車,碧桂園服務,移卡⋯哩啲,買入時其實都係低位、但經唔起考驗,好早就會放曬⋯想請教一下,應該要點樣調整好心態
仲想問下百富環球同微萌點睇,百富環球5蚊時買入,但跌到4.7時同樣放左~
龔成老師︰
如果你每次投資都是「輸」,即係你存在一些核心性問題。譬如一些錯誤的投資觀念。
記住,正確和正常,是完全不同的事,多人採用,並不代表係正確的方法。
首先﹐股票是企業﹐你要分析企業的本質去投資股票。買股票也不是「賺差價」,而是享受企業成長以及產生的股息。
現你的情況,買入股票唔係無質素。但你錯用短線投資,賺差價的思維去諗這件事。令你可能一見佢跌,你就以為有問題,即沽貨,才做成你過去出現的情況。
往後,你只要以「長線地,投資優質股」,作為你投資策略。
緊記,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
而且將來再投資前,要先做好估值。價格偏貴,就唔入貨。等佢回到合理,甚至平宜區,才分注吸納,或者利用月供去儲貨。
我好有信心,你會結束過往一直虧損的狀況。
百富環球(0327)係一家電子支付終端機解決方案供應商,主要在中國從事開發及銷售相關產品並提供相關服務。
佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構(如支付交易處理商及金融機構)及商戶服務供應商。
質素都有的,但未算好強,同時業務與股價都有點波動。現價合理區上部,這股係有長線投資價值,但又未算好值得持有太多。如果小注長線可以的。
微盟集團(2013)集團主要在中國從事提供軟件即服務產品及營銷服務。
佢的產品分為「商業雲」解決方案、「營銷雲」解決方案及「銷售雲」解決方案三類。
「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及AI技術為商戶提供智能營銷服務。
這些都是將來發展的大趨勢,從業務潛力上,的確是有的,見佢財務數據的增長都強勁。但在估值上都唔平,所以,如果投資,這刻小注好了。
------------------------------------------------
Q21822:
你好龔Sir! 我係啱啱上完股票初階班嘅學生嚟,有野上向你請教一下。
福壽園(1448),喺堂上龔Sir你話呢隻係水桶1。 我好簡單咁睇返佢嘅市盈率,我以佢最近7年(計埋2021)嘅市盈率揾返佢嘅中間3年
27.4 27.44 28.06
之後我再搵近平均5年每股盈利係$0.2226(人民幣), 即係$0.27(港幣)。
咁佢嘅合理股價就係
$0.27x27.4 - $0.27x28.06
=$7.4 - $7.6
而現時嘅股價係$7.4。咁我可唔可以推論現時喺合理區嘅低位?
同時我根據篩選三步法分析,第一二步都冇問題,但去到第三步,我想揾佢嘅同行比較時,又唔太揾到真係同福壽園類近嘅企業,咁嘅話我上面嘅推論會唔會唔穩陣? 定係我會睇漏左其他因素?
謝謝你
龔成老師︰
你用佢近7年市盈率,再取中間3年,和用每股盈利5年平均,係可以。
但取出相關數據之後,你要都睇翻,到底這些數據,係唔係足以反映現時企業和行業發展的真實狀況。
你見集團盈利持續都有唔錯增長,故用5年平均每股盈利時,應該再加上5年的年均增長率(約16%)去做指標。(即大約HKD0.37)
另外,由於近年中國政府,對行業有不少新指引,主要方向都係控制價值,避免殯儀業相關產品和服務,出現定價過高情況。相信未來,殯儀業盈利會回到較合理水平。
因此,你計出來的個市盈率,需要打折扣,來反映這些因素,你預大約合理市盈率係15-20倍。
合理價值︰HKD5.5 - 7.4,故現價算係合理區頂部,無貨可先小注。
殯儀業本身好分散,而福壽園係當中龍頭,故真的較難找到相近對手作比較。因此,你係做分析時,應較集中在企業本身和整個行業發展。
最後,係計出合理價值後,你要留意佢是否相距多於20%。
若好似你計出的答案$7.4-7.6,區間太窄,我地就要將合理價值上下限,再額外加多10%緩衝區,令佢更能反映合理區情況。
------------------------------------------------
Q21823:
龔先生你好!我是最近才開始接觸 貴專頁,也報了基礎班,很欣賞你對投資和教學的熱誠,也明白了為什麼你這樣成功!
單親媽媽 兩子就讀小學,每月支出$27000,沒有工作 要照顧兩子
賣樓後現存270萬,希望以投資作被動收入,請問哪種形式或組合較適合我?
謝謝解答
龔成老師︰
這筆錢點樣用,要視乎你實際生活狀況而定,當中考慮重點,係住屋和就業問題。
首先,如果你長線住屋無問題的話,這資金可以用增值。若你有再買自住屋的需要﹐而又要短期內進行,就要先扣起相關支出。
另外,你現時無工作,若只係短期,你可以預留一筆生活費,之後餘下部份,就可以投資「平穏增長股」 + 「潛力股」作增值。
若你預期會較長時間,都無法工作,或者只能有限度咁工作。你就可以考慮,將部份資金,買入「收息股」,去創造現金流(即係股息),以舒緩日常開支的壓力。
但由於投資係一個長線計劃,我建議唔好急住行動。等你上完堂,有一個完整概念,才去進行會較好。
股票班見!
------------------------------------------------
Q21824:
老師,想問下653,見佢主席換左人,舊既大股東持股量都賣得7788,新人事新作風,股價可否睇好?
另外,請問點睇2148,可否長期持有?
謝謝
龔成老師︰
卓悅控股(0653)自更換主席後,加強了集團在電商方面發展,但長線有無成效,還有待觀察。
若用以往集團表現,只算是一般般。集團在過往的經營環境都唔算好好賺,經常出現虧損,近期面對疫情,情況更弱。
相信佢疫情過後會好翻D,但根據過往表現來分析,長遠的投資價值唔算高。
VESYNC(2148)有少少潛力的。
佢係美國小家電線上市場的市場參與者。根據報告,在小家電零售商中,佢係美國就通過亞馬遜產生的零售額而言排名第三及通過所有線上渠道產生的零售額而言排名第五。
係美國通過亞馬遜產生的零售額而言,其空氣淨化器於其類別中排名第一,空氣炸鍋於其類別中排名第二。
佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場,主要為美國最大的電子商務交易市場亞馬遜銷售其下的產品。
佢的產品主要銷往美國、加拿大、英國、德國、法國、西班牙、意大利及日本等數個國家的用戶。
業務不算差,發展有潛力,但企業規模始終較細,業務未穩定,加上現價略貴。整體都有風險。
這類股,小注投資都可以,但就要明白當中的風險。
------------------------------------------------
Q21825:
想向龔成老師發問:本人47歲,月入4萬。 與伴侶共同擁有一自住物業(樓按還有$4百萬)。互相財政獨立,對分日常開支包括供樓。
現在我每月花費$2萬(即日常開支包括供樓)和堅持貯蓄$2萬。
持有1,000股00016 和 3,000股00175, 現金流$50萬。
雖然工作穩定,但相信沒有打不破的飯碗。懇求龔老師的意見,我該如何策劃財務和投資以致可以盡快財務自由。 謝謝。
龔成老師︰
你現時已有自住屋,係財富組合上,物業類佔比重很高。所以,我地新資金應先投入優質股,令成個財富組合變得更平衡。
以你47歲,都有一定增值需要,你可以選擇一些「平穩增值股」+「潛力股」作投資目標。
我地投資前,先要做好防守部份,建議你先扣起12萬(即半年開支)作應急錢,才開始投資計劃,會較穏妥。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄(即$10000),另一半就先儲起架策略。
由於你投資知識不高,因此可較集中在平穩增長類股,至於潛力股,只宜小小注(<2成)。此期間,你最好是努力提高投資知識,才慢慢增加翻潛力股比例(最多3-4成)。
另外,你現時組合中,新地(0016)佔比重好高,個別企業和行業不要佔組合15%和30%以上,否則會有過度集中性風險。
但你不用沽出,用新資金慢慢調整個比例就可以,但暫時不要再投資地產相關股票,去平衡風險。
現時大市只是合理區,你可以用多5-10萬,用"分注"形式,慢慢買貨。餘下資金和每月所儲倒的資金,就等大市出現一定程度的下跌,才大力度掃貨,然後長線投資。
如果你能在這段時間學好選股等技巧,到大跌市時就能把握機會,財富增值會更明顯。
------------------------------------------------
Q21826:
龔sir,早晨,請問京東sw有10萬蟹貨平均315蚊 先平價。 京東物流已上市,係咪如果阿媽京東sw算係高位,分拆業務,阿媽就會跌返最少50蚊出黎?
2~3年都返唔到300蚊?
另外,我排左你d書成幾個月(哈哈)
龔成老師︰
你這個計法不正確,其實分析上市,只係集團將部份業務上市去集資,從而得到發展資金之餘,又可以釋放內在價格。
就算京東物流(2618)上市,其價值依然存在係京東(9816)之內,因此唔會因為分拆上市,而出現你所講的情況。
另外,你要明白,我地持有一隻股票與否,關鍵位是企業質素、前景,不要被買入價影響。買入價只是一個心理因素,如果企業核心因素未被影響,我地係唔需要理會。
京東(9618)業務有質素,發展仍是正面,不過現價就唔算平,算合理區上部。
至於幾時會上翻$300,我預計唔到。但此股有投資價值,長遠要回到$300,相信問題不大。
只要佢現時佔你組合,唔係好多,你照長線持有就可以。
至於書本,圖書館的確好多人在排。如果你有需要,建議你去買。因為用來做記號,抄筆記都會較方便。
------------------------------------------------
Q21827:
老師...你好! 本人39歲,有兩個小朋友,與先生月入8萬,現租住公司提供的房屋,持有三個物業,收租足夠供款,其中兩個十幾年前購入,
因為呎數太細(under300呎實用) 現在放賣中, 想用兩間細樓換一間大樓(700呎,千一萬,30年的二手港島樓地鐵上蓋,需借300萬)繼續收租,for 15~20年後退休一家人住,
如果換樓需付印花35萬,值得嗎?定等退休先換樓呢? 層樓到時已經五十幾年樓齡,對於樓齡太大有問題嗎?
現金100萬,有少量股票,但懂選股,蝕過三十多萬,所以敢買多,麻煩老師比d意見我,感謝老師。
3033 $8.2 8400股
914 $47.1 1000股
3918 $9.28 2000股
龔成老師︰
由於你現有2個細單位,呎數太少,連一個基本家庭需要的大小,都未達到。長線投資價值較弱,建議你找機會將佢換其他較大單位,唔好到退休先去換。
地鐵上蓋樓盤,始終有一定潛力,但由於已有30年樓齡,你要睇翻佢幾時會做樓宇大維修,因為這個是其中一個較潛在成本。
到你入住時,都已經50年樓齡。就算保養得再好架樓,相信都會出現老化,你要預備一定維修預算,係你退休入住時,甚至之前就要動用。
除左以上2點,你還要了解佢現時租金回報率,和長線增長潛力(如附近未來發展、交通配套等)。如果這幾個因素都過到關,那就值得你多花35萬印花稅去投資。
當然,若你退休時真係太殘舊,你都可以用佢去換另一間較新的自住樓,但相信當中會有一定差價。
因此,你現時可以利用優質股去增值,為退休所需資金,和潛在可能換樓的成本,作準備。令自己到退休時候,有較多本錢在手,令可選擇的方法也會較多。
至於財富增值方面,你現時組合太偏重物業類,令成個組合十分不平衡。因此,你新資金要優先放入股市,去調整翻個財富組合比重,咁會較好。
我地開始新投資前,最好先要找出你過往虧損原因,以免再出現不利情況。
你現時持有股票,都係有質素和適合你。我估計都有一定選股能力,大致能判斷企業好壞。但你都蝕過30萬,若不是選股出問題,較大機會係未能定平貴,或者用左短炒模式去投資。
記住,我地投資股票,就等同投資一間企業。就算再好的企業,都要時間成長,故必須長線持有。中間可能有些波動,但只要佢長線質素無變,照持有就可以,唔好太在意中短期波動。
若你對定平貴,無乜信心,又或者經常比大市氣氛影響,見多人買就衝入市。我建議你用月供模式去儲股票,會較安全。
以你39歲,可以選擇一些「平穩增值股」+「潛力股」作投資目標。
以現時大市合理區狀況,你可以考慮用部份儲蓄,進行月供股票。你可以每月先用一半儲蓄,另一半就先儲起架策略。
潛力股:安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)、三星FANG ETF(2814),但就要明白波動性比上述會高左,同時風險大左,你要自己平衡。
大市現處於合理水平,那100萬資金,你可以先用20-30萬,以"分注"形式慢慢入貨。餘下資金和每月儲蓄,就等大跌市機會出現,才大力度掃貨,並長線投資。
------------------------------------------------
Q21828:
龔成老師,你好,我今年33歲,月入2.5萬,另有物業收租1萬 (已供滿,未來婚後會收回來住),每月平均支出1.5萬。
現有現金 $60萬,現開始進行月供股票:
#2800 - $5000
#823 - $2000
#1398 - $1500
#270 - $1500
#3067 - 每個月買1-2手
目標: 穩定收息,提早退休 (或為興趣返工)
屋企人已經失業2年(現63),再過2年可以拎出強積金 約$60萬,現在考慮有什麼方案可以令到佢每月有穩定收入($2500-$3500):
1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到
老師,想請問我屋企人的情況可以有什麼更好的選擇,希望可以給我意見。
龔成老師︰
先講你本人部份,我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你33歲,應以增值為主,建議你用「平穏增長股」 + 「潛力股」的組合。
現在時大市只在合理區,你每月儲蓄不要盡用,建議先用5成儲蓄做月供,其餘先儲起,用一邊月供一邊儲蓄的策略。
你現時月供股票都合適,但有少少保守。建議你可以增大潛力股部份,以你年紀計,可以佔5成。但若你投資經驗較淺,或者相保守d,就要向下調整。
另外,工行(1398)只係收息股,增長力好一般,唔建議你用來月供。
潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里(9988)、騰訊(0700)、GX中國電車基金(2845)、三星FANG ETF(2814)。
現時大市只是合理區,你現有60萬資金可以先投入一半,用"分注"形式,慢慢買貨。餘下一半和每月所儲倒的資金,就等大市出現一定程度的下跌,才大力度掃貨,然後長線投資。
到你累積到一定資產,你就可以慢慢換成收息資產,透過其現金流,達至財務自由。
至於你家人部份,由於佢地已好近退休之年,投資目標會同你不一樣。以佢地人生階段,應集中係收息資產類,去創造現金流,來支援退休生活上的支出。
你所講的派息基金(我建議考慮用3110),和高息股都係可以。
如果你家人希望每月有$3000現金流,以股息率6%計,需要本金60萬。
因此,你可以建立一個「收息股」的組合,目標是5%、6%的股息率的收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)或收息基金(3110)都可以。
如果你家人能承受到風險,有些更有超過8%、10%的高息股,但股價就略有風險,要自己衡量,佐丹奴國際(0709)、中石化(0386)、互太紡織(1382)等(記住,股價略波動,只能小注)。
(你可睇下我本《50穩健收息股》當中仲有好多)
但要留意,現時股價只是合理,未到平宜,因此買入時宜分注,同時不能用盡現金。要留有部份,等大跌市才入貨。
------------------------------------------------
Q21829:
龔老師你好,本人30歲全職主婦,老公今年41,月賺3萬,一個月大約草到6000左右,有兩個小朋友,冇物業冇供樓。
資產如下:
黃金暫存5粒一兩重
港股有大約12萬,
2手匯豐005「44$,打算收息」
1手小米「24.5」
1手中國人壽「16.08」(打算18$離場)
1手868信義玻璃「高價26.9」
流動現金有5萬,外幣有4萬「留著旅行用」
想問一問868今年可以一直長持嗎?定要止賺離場?今日由31.3跌到30.4,未來兩日派息!所以好困擾!如果止賺離場又應該轉碼邊啲岩我?
因為暫時不考慮加錢到股票帳號,其他現金先留,股市下跌先入市
龔成老師︰
以你30歲計,應以增值為主。匯控(0005)只是收息股,增長力好弱,唔適合你這個年紀。你可以減持部份或全部,轉至其他增長股,對你較有利。
中國人壽(2628)近年增長力弱左,質素只係中等。你可持有,但唔好再加注。若相換碼,都係可以。
至於小米(1810)和信義玻璃(0868)有質素,都適合你長線持有。
你要記住,當一隻股票股價下跌,你一定要了解當中原因,基本上,股價中短期上落好正常,但如果上落太大,就要了解翻當中的事情,有無一些影響企業核心的因素。
信義玻璃(0868)近年的增長力弱左,不過,佢在技術上的行業優勢仍在,相信長遠仍是正面,不過就未必是高增長的類別,潛力度比過往略有減少。
加上佢不斷將較高增長的業務分柝左上市,令現時的信義玻璃增加,只是平穩類。你預佢中短期會比較波動,要長期先見到收成,現貨照持有就可以。
而黃金無現金流,我地持有佢,主要係為左對沖金融市場的突發性事件。因此,唔需要太多,大約佔組合3%就可以,而且以實金持有最好。
現時大市只在合理區,資金不宜盡用。你5萬可以留待大跌市才出手,咁會較好。
但同時間,你可以用每月儲蓄,進行月供股票。每月先用$3000月供,其餘儲起,同樣等大跌市機會。
現時你們資金較少,可以先集中係優質股,來進行增值。但長線計,當你累積到一定財富,就要慢慢加入物業類,成個財富組合才算平衡。
------------------------------------------------
Q21830:
阿sir 關於第七課的年報問題,想問這個新的租貸會計制度好像有點兒扭曲左真正公司實際情況,當我們分析企業的情況又要不計才有真正的意義,那為什麼需要有這個新的會計準則?有什麼好處?謝謝你!
這個會計數字對企業的情況有什麼implications?
龔成老師:
這是一個新的會計準則,全香港都會用,能夠反映企業「租金」的風險,因為過往不當負債,現時已變成負債,就能更有效反映風險。
但對於零售企業,我地過往分析的指標,同現時最新指標,就會有所不同,所以我地在一些量度佢是否合格的財務指標時,最好有合理化的調整。
------------------------------------------------
Q21831:
Hello龔Sir!很高興認識你,我是你股票班學生,剛上完你最後第八堂,無論在心態、理念、技巧、智識都增進不少
在此再次衷心感激你的無私教咗我好多嘢,希望將來你能在財務自由路上更上一層樓和更加Succeed!
還有在你課堂及FB帖文上的教學, 令我清晰了解選股策略和重要性!
龔成老師︰
多謝讚賞!
我只是盡力,將我所學、所研究,投資及成功的方法、技巧、心得、經驗,教大家,這些方法好多成功人士都做過,我只是用翻這方法,並教翻大家。
你要保持進步,多溫書,多用評估表,加油!
------------------------------------------------
Q21832:
你好,想向你請教本人的投資問題。你好!本人仲有6年便退休,月入$3.5萬,每月約有$13000作儲蓄,希望在2年後可以資產增值至100萬,現時持貨如下:
1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh
6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh
2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh
提問1: 每月堅持儲蓄$13000,可否達至2年后資產$100萬?(連同現有現金約$15萬)
提問2: 上述持股配置是否合適?須刪減部份/增持其他呢?
提問3: 上述那些持股係水涌1、2、3?
多謝你不段為網民解答疑問,祝身體健康。
每年額外花紅約5萬
龔成老師︰
1) 假設你投資一些較有增長力股票,年均投資回報有10%(連股息再投資),你每月投資$13000 + 40萬現有資產(25萬股票和15萬現金),2年後大約會增值至80萬。
但由於2年係一個好短時間,好易出現波動,令最終回報不確定性好高。而且,你都接近退休之年,我唔建議作太高風險投資。
以你年紀,只宜進行較保守的增值。
2) 你現時持有不少潛力股(1177, 1810, 6060, 0788, 9988, 2382, 6993),佢地增長潛力高,但風險都好大。
由於你接近退休,應該要開始減持這類股票,換至較平穏的「平穩增值股」和「收息股」。
還要隨著年齡增加,慢慢將收息股的比例提升。到退休時,你收息股比例,應佔100%。
平穩增值股,例如盈富(2800)、金沙(1928)、長建(1038)、中銀(2388)、港鐵(0066)、恆基(0012)、平安(2318)。
收息股,例如港燈(2638)、深高速(0548)、香港電訊(6823)、工行(1398)、恆生(0011)、置富(0778)、陽光(0435)。收息基金(3110),都可以。
另外,有些更有超過8%的高息股,但股價就略有風險,你可以小注考慮,例如佐丹奴國際(0709)、中石化(0386)、互太紡織(1382)等(記住,股價略波動,不能太過大注)。
壹傳媒(0282)近期股價較波動,長線投資價值不算高,建議你換至其他股票較好。
中石油(0883)只係商品類股票,佢價值自主能力好低,投資價值只係中等,唔建議持有太多。
其餘持股,都係有質素。
3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939
你現在要做,就是將「潛力股」,慢慢換至「平穩增值股」和「收息股」。至於現有資金,就等大跌市才動用。
另外,每月$13000的儲蓄用一半去月供「平穩增值股」和「收息股」,另一半儲起,同樣等大跌市機會。
若你想增長力大少少,可以較集中「平穩增值股」。但緊記要慢慢將比重,轉去「收息股」部份。
雖然這樣做,不能達至你2年100萬的目標。但由於你快將退休,唔建議你太冒險。因為若你此時投資失利,你無足夠時間去再追回這筆資金,風險很高。
所以,我建議你考慮我上述策略,相信會對你較好。
------------------------------------------------
Q21833:
龔成老師,想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確
本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)
現有現金:30萬左右
現有股票
買入價
已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5
近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9
剛入
02618 -100股 45.9
01177 - 2000股 8.65
唉!感覺自己在股票方面是盲頭烏蠅, 想重新建立一個老師講的長期「財富組合」,所以希望老師俾D意見
1. 想問問需要沽出現時股票?
2. 月供股票是否適合我? 大約月供多少(本身預$2-3K)? 那些股會比較適合我?
謝謝你的指導。
龔成老師︰
如果你過往經常出現虧損,反映你有一此核心投資問題,建議你增加知識。同時,你最好用月供優質股的模式進行,相信會較為適合你的。
1) 五礦資源(1208)主要從事有色金屬經銷、製造及鋁、銅製品分銷。
過往有多年出現虧損,企業投資的價值不高,加上股價十分波動,炒作多過實際。這股不建議長線。
2) 我地投資增值會運用「先增值,後現金流」作方法,初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到已累積了相當財富後,才漸漸轉成收息型股票,為自已創造穏定現金流。
你44歲,應以增值為主,建議你用「平穏增長股」 + 「潛力股」作組合,並以「平穏增長股」為主力。
你現時持有股票(除了1208),都適合你。唔好太在意中短期波動,你要清楚這些股票質素所在。就算出現下跌,只要佢長線質素係無變,你照持有就可以。
月供方面,你可以每月先用5成儲蓄,其餘先儲起,用一邊月供一邊儲蓄的策略。
以你家庭每月入息55K計,月供只有3K係太少。由於你已有物業類資產,建議你每月閒錢,都用來月供增值,咁會較好。
月供方面,你可以選擇投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、粵海(0270)、領展(0823)、希慎(0014)、太古地產(1972)
或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里(9988)、騰訊(0700)、GX中國電車基金(2845)、三星FANG ETF(2814)。
由於你投資知識不高,因此可較集中在平穩增長類股,至於潛力股,只宜小小注(不多於2成)。最好是你先提高投資知識,等到你有一定知識和經驗,才慢慢增加潛力股比例(大約4成)。
現時大市只是合理區,你現有30萬資金可以多用5-10萬,用"分注"形式,慢慢買貨。餘下資金和每月所儲倒的資金,就等大市出現一定程度的下跌,才大力度掃貨,然後長線投資。
------------------------------------------------
Q21834:
龔老師你好,本人今年52歲,想請教我現除了持有現金30萬。 每月可儲八千元。 計劃8年後退休。
還有以下股票數量
#763( 中興通訊)
7000股 21.5買入
4000股 20.3買入
#175(吉利汽車)
2000股 22.55買入
1. 請問我應否繼續持有或 止蝕?
2. 請問問怎樣可以將現有的現金價值8年內增加兩倍?
3. 請問你我的股票組合應該怎樣安排?
求指點
龔成老師︰
1) 我地是否持有一隻企業,主要係睇佢長線質素,唔好太著眼係「買入價」,佢純粹係一個心理因素。
除非你發現佢長線質素轉壞左,否則係唔需要賣出。
吉利(0175)有質素和潛力,此股可持有。
中興通訊(0763)從基本面分析,這股不差的,我亦相信5G的發展,會對佢長遠有正面影響,因此長遠不會太差。
佢本身係中國高科技通信設備主導供應商之一,通過提供客戶化的產品及解決方案,目前主要服務於中國及其他發展迅速的新興市場。
佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時,佢亦向全球多個國家銷售產品,但之前同美國果邊,因政治問題而有影響。
不過,政治等因素令佢股價大上大落,從生意分析,長期仍會有發展的,只是有潛在的政治風險,這點不能忽視,而這個風險好難分析及預測。此股可長線,但不宜佔組合比重太高。
記住,我地唔好成個組合,只集中係1,2隻股票身上。
最重要是建立一個長期的「財富組合」,要優質,要平衡,要適合你的年齡與風險承受程度,新舊經濟各類股都要有。
同一行業不能太多,同一股不能太多。要平衡,建立後長期持有,不是買賣賺差價,而是成為你財富組合一部分。
因此﹐我建議你每有反彈,就慢慢分段沽出部份中興通訊(0763),換碼至其他優質股,咁會較理想。
2) 你要8年做到2倍增長,需要每年平均升幅達15%,才可以做到。
要達至這個升幅,你必須要投資一些增長力較高,但同時風險較大的股票,才有機會做到。
由於你只有8年就退休,不宜承受這樣高的風險。因為投資這類股票成功時,回報當然可觀。但不理想的時候,你損失都會較嚴重,你要明白這個風險。
我會建議你,最好集中係「平穏增長股」。這類股票升值能力雖然不算好高,但勝在有平穏增值效果,波動性無咁大,較適合你這個年紀的人士。
到你接近退休的年齡,應該開始投資一些收息類工具,例如收息股,以平衡組合,同時減少風險,到退休時,就宜將較大比例,持有收息類資產,減少平穩增長股比例。
3) 你52歲,可以用「平穏增長股」作組合。現在你每月先用5成儲蓄,即$4000做月供。其餘先儲起,用一邊月供一邊儲蓄的策略。
月供方面,你可以選擇投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、長建(1038)、領展(0823)、希慎(0014)、太古地產(1972)
至於持有30萬和每月儲蓄,就等機會,當大市出現一定程度的下跌,就可以動用現金去投資,在平宜價加大力度掃貨,然後長線投資。
------------------------------------------------
Q21835:
龔成老師你好,現時我28歲已每月月供股票$5000大約有2年,但係理財方面仲係好生疏,所以想請教你的意見。目標想係之後的2-3年內儲到70萬左右,並為將來可以有財富滾存同時達到財富自由。
現金:10萬左右,月入20K
手持:
100股(00823)領展
800股(00005)滙豐
現時月供組合:
$1500(02800)盈富
$1500(00066)港鐵
$2000(00388)港交所
1.月供股票有無邊隻股需要賣出?
2.如果要達到目標是是否需要更變投資組合方向?如果需要增加, 哪些股可以?
3.想請問(00945),(00001),(01810),(00012)現價是否合理,是否可以分注買入, 還是適合月供?
4.基金投資是否適合我?
謝謝!
龔成老師︰
1) 當我地進行人生財富累積,會運用「先增值,後現金流」作方法,年輕人應投資較多增值類資產,而較年長的,則應投資較多保守類項目,因為年輕人的財富系統未成形,同時負擔較少,可承受的風險度較高,所以會著重增值為先。
例如初期投資較有潛力的股票,令財富較快增值,當增值到一定金額後,可開始將財富分配至平穩增值型股票,然後到年紀漸長或已累積了相當財富後,才漸漸轉成收息型股票。
以你28歲計,應先做好增直部份。你現時月供股票和資金分配,係合適的。
但現時大市只在合理區,最好每月的資金不要用盡。要留有部份,等大跌市出現時,可用來掃貨。
另外,我建議你將$2000,加到盈富(2800),因為盈富本身是一個50隻股票的組合,就算資金多一點都無問題,可以令你的組合更為平衡。
2) 以大市過去年平均回報10%計(連股息再投資),你每月投資$5000再加上你現有10萬資金和持股,5年後(已計算已供的2年)大約會增值至52萬。
如果要達至你的財務目標,你可以增加投資年期,例如去到7年,就會滾存到$75萬,較接近你的目標。
或者,你可以選擇現時將月供金額,加大至$9000,都是一個方法。
又或者,你可以提高你的回報率,例如投資較多潛力股,當然,這會令你風險度提高,以及要求你有更多的投資知識,你都要明白這點。
3) 這4隻都適合月供,現價月供係無問題。
但若要直接入貨,小米(1810)現價偏貴,要回多1,2成,才開始算合理區頂。其餘3隻,現價合理,可以分注入貨。
4) 要視乎基金投資目標、質素等去考慮。以你年紀,盈富基金(2800)、安碩恒生科技(3067)這類有質素和增長力的ETF基金,就會適合你。
------------------------------------------------
Q21836:
龔老師,我大約兩年前開始拜讀你的文章,資產在這兩年大跌巿間,幸有聽從你的建議,不但沒有少了,還喜見增長,多謝你。現想請教你,我可以如何改善我的資產配置,早日達到第一個一百萬,
從而步向財務自由呢?
我現時36歲,文職公務員,月入4萬5左右,持有現金$26000。另持有保險現金價值約有$63500, 當中有50萬人壽,100萬意外和116萬危疾保障。
MPF現有約27萬7千,過多一年半就過probation, 屆時僱主供款會增至15%。
現時每月債務還款約$12000, 2022年12月還完;交租及雜費$15000;孝敬爹娘$9500。
現時持股如下:
4手 3072 買入平均價$162.4
2手 3187 買入平均價$21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5
我對新上巿的2814有興趣,應否用來取代3072?還是可以同步進行?
謝謝賜教
龔成老師︰
首先,若你現時債務,貸款利息係較高。最好係開始投資前,先作清還,因為佢會拖低你長線回報。
以你36歲年紀,應先做好財富增值部份。
ETF三星亞太高息房地產信託(3187)和偉易達(0303)主要係收息,增長力唔高,唔建議持有太多。
其餘股票都有質素,你照持有就可以。
三星FANG ETF(2814)的投資目標,係追蹤NYSE FANG+指數的表現。是一個美股潛力股基金。
而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。
當中包括不少環球有潛力企業,例如阿里巴巴、FACEBOOK、AMAZON、百度等。
相對之下,3072會較全球性,而2814會集中在美股。2隻都有增值潛力和投資價值。你可以睇翻佢10-15大持股,去決定邊隻較適合你。
3072和2814同步進行都可以,但當中有不少股票,都係重覆。因此,這2隻ETF佔組合比重唔可以太高,連同其他科技類股票,你要控制在3成佔比以下。
另外,我建議你用每月閒錢,去做月供,來進行一個長線的財富增值。
策略上,你可以投資「平穏增長股」和「潛力股」。你每月5成儲蓄做月供。其餘先儲起,用一邊月供一邊儲蓄的策略。
選股上,你可以投資在平穏增長股︰盈富(2800)、金沙(1928)、恆基(0012)、平安(2318)、中銀(2388)、港鐵(0066)、煤氣(0003)、長建(1038)、粵海(0270)、領展(0823)。
潛力股可選安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)、三星FANG ETF(2814)。但佢地波動性和風險會較高,你要自己平衡。
如果你現時無太多投資經驗,潛力股這類風險較高的股票,你就不要持有過多,最多維持2-3成好了,甚至先集中係平穏增長股類。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
餘下資金,我地就等機會,當大市出現較大回調,就加大力度掃貨,然後作長線投資。
------------------------------------------------
Q21837:
老師,請問 7226 同 3076性質是否一樣,7226是否一樣可以長期持有。
如果我早年半前睇到你page就好,年半前那時係低位入過金沙,舜宇,但都只係賺差價,甚至騰訊係186同439有貨,都沽咗,真係好後悔。
現在開始要慢慢調整手頭股票,將無質素換有質素去長期持有。早前33.7入了一手金沙,諗住分注入,
(我理想價係希望30左右先入,但今年好似比較難去到30,所以33.7都先入一手)長期持有,不過這之後已升,又要再等下。
龔成老師︰
你才40歲,只要現在學好正確投資方法,依然有充份時間,去做好增值。
你現時入金沙(1928)策略正確,好多時優質股,都唔會咁易回到較平水平,所以我地要分注,去平衡入唔倒貨架風險。
現要時$33.7入左首注,你預每回調10%左右加注,咁就可以。
XL二南方恒科(7226)產品之投資目標為追踪恒生科技指數每日表現兩倍(2x)的投資業績。
雖然我長遠認為,恆生科技指數正面,但中短期可以較波動,由於這基金有槓杆,就會令價格更加波動,其實有風險。
雖然都係追蹤恒生科技指數,但我會較建議投資無槓杆的恆生科指ETF(3067),始終較好。
------------------------------------------------
Q21838:
阿sir 雖然距離1,000,000仲差好遠,但想同你講多謝你, 自從2018年尾同男朋友分手, 人生好似無咩目標!
但2019年初認識到你, 不停睇你fb, 我就由零知識開始不停儲錢同長線技資,供股etc. 2018年年尾由10幾萬努力儲錢投資到而家70幾萬(我知道雖然唔多錢, 比起好多80後既人)
呢兩年幾不停睇你既書同你介紹既書藉增值知識,然後2019年就報名上你堂, 更加明白價值投資法同長線投資嘅重要性....
你既正量真係幫到好多人,岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,
本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。
唔知阿sir你會唔會有d意見可以比到我?
PS 希望不久將來成為千萬富翁
我希望盡快可以cap screen到我第一個一百萬給你,多謝你。
同埋我2019年頭開始每個月供0003($2000) & 2800 ($3000),因為當時無咩投資知識,因為你話供股最少要3-5年先可以平衡風險,
想請教你 我係唔係應該繼續供到去5年就停? 到時就轉供潛力股?
定一話而家可以停供呢兩隻股轉供潛力股?
我今年34歲了
龔成老師︰
能夠有這樣成績,都是你自己努力學習和實踐的成果。記住,投資路上要一直保持學習,才會成功。
至於100萬,我相信你按部就班,可以好快會達成。
至於月供方面,我希望大家最少供3年,並持有5年以上。但當然,不論係月供年期,定持有時間,都係越耐會越好。
而幾時加入潛力股,這個係睇你人生階段作決定。
我地投資會運用「先增值,後現金流」作方法,初期應投資較多增值類資產,較後期則應投資較多保守類項目。所以係分配投資項目時,會因應番你的人生階段。
較年青人士,可以用「平穩增值股」+「潛力股」。中年人士,可以較集中翻係"平穏增長股"。當你已近退休之年,就應集中在「收息股」,去創造平穏現金流。
以你34歲年紀,應用「平穩增值股」+「潛力股」作組合。
潛力股︰可選安碩恒生科技(3067)、比亞迪(1211)、阿里(9988)、騰訊(0700)、港交所(0388)、舜宇光學(2382)、小米(1810)、中生製藥(1177)、福壽園(1448)、GX中國電車基金(2845)、三星FANG ETF(2814)
如果你現時覺得,自已投資經驗都未算多,潛力股這類風險較高的股票,你就不要持有過多,最多維持2-3成好了,甚至先維持現狀。
若你有一定投資經驗﹐潛力股比重可以相應調高,佔組合約3-5成,視乎你投資經驗多寡和了解這些股票程度而定。
另外,你要合法從事這門生意,這個成本始終都要投資。但若你覺得太貴,你可以睇下有無志同道合架朋友,一齊去開,去分擔成本。
但你要明白,當多一個生意合伙人,就會多一個變數,甚至係多一個麻煩,你要了解這個風險。
又或者,你最初可以到相關公司工作,最好是一些中小企,你要盡力了解該生意的營運,同老版傾計,這都是一個方向。
------------------------------------------------
Q21839:
呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢?謝謝
龔成老師︰
首先你要明白一個概念,我地持有一隻股票與否,關鍵位是企業質素、前景,不要被買入價影響。因為我地買股票就是買企業。
買入價,你的賺蝕,只是一個心理因素,該企業長遠的發展,才是我地是否值得持有的重點。
如果企業有質素,但股價短期下跌,就不用擔心,照持有就可以。
如果企業無質素,但你現時蝕錢中,繼續持有只會令你財富繼續貶值,因此要賣出。
如果企業質素轉差,就有可能要減持,因為這股佔你組合的比例,未必值得太多。
這3隻股票,都係有質素。就算你買貴左,長線企業會增值,慢慢會重回你買入價,故可以守。
但當中美團(3690)有潛力的,過往一直虧損,到近一年,開始有正現金流,這是一個實質的利好因素,因為之前一直在燒銀紙,現時初步見到成效,不過,估值的方法好虛無,因為現時的市盈率仍過百倍。
如果有利好消息,佢可以上好多,但如果估值修正,股價可大跌。
因此,這類不確定性高的股票,只能小注。若佢佔你佔合較大比重,建議你沽少少,去平衡下個風險。
------------------------------------------------
Q21840:
您好 ! 龔成老師,
1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?
2. 2021年 2月8日 $0.485購入#00451協鑫新能源, 可繼續持嗎?
3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)
12月31 日已收了股息$114,900 你覺得應該繼續持有,還是放再賣其他股呢?
龔成老師︰
1) 華晨中國(1114)自2021年3月31日起停牌,集團由於未能完成2020年年報,故要待公司釐清當中資料後,相信會有機會復牌。
但由於暫時無佢太多資料,根據以往數據分析,集團只算係不過不失,投資價值一般。
現時你暫時無野可以做,你預復牌後,如果2020年數據較差,股價會有較大波動。
2) 協鑫新能源(0451)主要從事光伏電站之開發、建設、經營及管理。
生意增長力不強,可過盈利十分波動,股價上落大,高風險類,市場往往炒作多過實際。
要睇你承受風險的能力,股價有時會大升,但又可以跌得好快。整體的投資價值,未算高。長線計,換至其他優質股,會比較好。
3) 利亞零售(0831)賣左「OK便利店」業務資產後,就只剩餘集團的品牌(聖安娜、Mon cher和Zoff)。
預期發展只是一般,同埋之後好睇佢資金的運用情況,投資價值只是中等。
若你持貨佔組合比重不高,你持有都可以。但若佔比重較大,最好估出部份,換至其他優質股。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。
香港股評人排名2022 在 龔成 Facebook 的最佳解答
【龔成問答信箱】(Q21301-Q21320)
Q21301:
龔SIR 我有問題想問
1. 想問股票班,第4堂現金流折現法如果用係股票, 適合用係邊類型股票? 還是呢種方法唔係太適合用係股票?
因為股現金流折現法用係有年期同穩定無增長既資產先適用…
咁股票全部都係無年期, 加上增長率難預測, 咁係咪現金流折現法唔岩用係股票?
2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係
(a) (100/200)X 100% = 50%
(b) (100/100)X 100% = 100%
3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?
參考第5堂Notes P.34, 388為例,,388因為係壟斷狀態, 要調高
咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?
4. 我用左388 最新數據去計佢個合理估值,.
年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63
近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer
(a) 想問以上估值計得岩唔岩?
(b) 因為我想增長率準確D, 我用左過往5年增長率相加再除5
[-28.96 + 26.88 + 24.38 + (-0.13) + 21.63)/5 , 得出8.76%,
我想問堂上你話實計既法(複式增長率) 係咪就係咁樣計? 定係我計錯?
(c) 都係關於增長率問題, 我上網睇番”預測每股盈利”
年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%
我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9
咁樣計法會唔會唔準?
(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%
5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析
有勞龔SIR!
龔成老師︰
1) 其實現金流折現法,係最正統的估值方法,基本上係適合於任何股票。
但由於計算上,有不少主觀數字。只要稍有偏差,最終計算結果的落差,係可以好大。
如果你經驗較淺,你用佢來計算現金流穏定,或者資產有固定年期的企業(好似西隧盈利),係可以。
但若果你想計一些波動性較大,增長力較高的股票,我建議你先用其他估值方法,會較為穏陣。
2) 假如你初步估值得出,合理區係 $100-$200。
你就用佢2者的差額,即$100。再去比對估值中最高價位,即係$200。
以100/200,得出結果係50%。由於合理價格範圍,高於20%,所以你就不用在初步估值上加入緩衝區。
但假若今次,你初步估值得出,合理區係 $100-$110。
以10/110,得出結果係9%,少於我們要求。因此,你要在初步估值上,加入10%緩衝區。
最終估值,會變成$90 - $121。
其實你要明白這個加緩衝區的原理,是希望股價能更有效反映合理區,你不要公式化去用。
3) 其實港交所,一直都係獨市經驗,你用佢過往PE作參考,已經可以。
因為當中已經反映其獨市優勢,不用作調整。
至於所謂的調高多少%,其實是當比較該企業及行業市盈率時,若然這企業是龍頭,若果以行業市盈率作基礎,就有可能調高,但調高多少%,無絕對的,因為最重要是衡量該企業比行業有多強。
4a + b) 我地算增長率,唔係單單用個平均數,而係用過往多年的增長,去計一個每年平衡增長率。
由2016年至2020年,每股盈利大致上升92%。
年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%,故再加10%緩衝區,估值變成︰$253 - $387
當然有代表的EPS,我用增長率18%,當我地運用時,要理性地分析,往後是否能增長18%,我地不能公式化運用,要明白每一個數字背後所代表的意義。而從18%推算出來的有代表性的EPS= $8.23,由於能有效反映近年的盈利情況,因此,我相信這數字有一定的代表性。
4c) 你都可以參考大行預測,但最好用多間大行的平均數。之後,你可以用佢結果,再更你計算結果,取一個平均數,去作為有代表性的EPS,都係可以。
4d) 以你上述例子,(322-258)/322 x 100% =20%才是正確計法。
5) 由於公用股,主要企業價值,都可以反映在會計資產上。因此,可以用市賬率,作為計算中電(0002)這類公用股平貴指標。
我相信你見到公用股佢PB去到10倍以上,是找錯左數字,你見到的數字,應該不是PB。
------------------------------------------------
Q21302:
龔老師 請教下,0548已過除淨日,係未再回落D再入好D呢
龔成老師︰
首先,你可能對派息運作,有點誤解。好多散戶都會覺得,「除淨日」後會跌,那時候買入就最抵。
其實,這個想法係不正確。
「除淨日」,其實就是用來確認那些股東收到這權益的日子。等到「除淨日」當天才買,派息就唔會有你份。
「除淨日」那天,股價就會扣除派息部份,例如原來股價$10,派息$1。那麼「除淨日」就會將股價,從$10下調至$9,以反映派息動作。
而「派息日」,就係這班合資格股東,正式收到股息的日子。
由於「除淨日」股價會下跌。而下跌比重同收到息係一樣,所以只係左手交右手動作。作為投資者,你唔會在此期間前後,去做買/沽貨,而出現任何著數。
所以,「除淨日」只係一個用來扣除派息權益的日子,與你是否投資一隻股票,係絕對無關。
深圳高速公路股份(0548)有質素的,這股持有不少有質素的資產,現金流穩定,不過增長力不強。
這股有長線投資價值,收息可以,但就不要對股價有太大期望。現價合理。
------------------------------------------------
Q21303:
你好阿sir,我已睇左三本你既書,分別係選股、股票同年報勝經
本人都對金錢系統同時間值有概念,識捕捉市場恐慌同熱市同有明確目標6年要有100萬
目前進度用左15個月18萬貨,4萬現金,問銀行借左平loan 10萬等恐慌入市機會
但睇完三本書始終吾識做估值衡量股票平貴
一般既市盈率同現金流折現法都明白,但吾識衡量股票平貴同搵潛力股
求指點
龔成老師:
對,保持閱讀與進步,長遠來說,你的知識一定同財富成正比。
至於借貸投資,則是有危有機,雖然利息不高,但你都要明白,這動作有風險的。我一般較建議「有明顯機會才動用「借」這個最後動用的「皇牌」,在一般情況,不太建議為借而借。
如果你現時已經借了資金,就可以等大跌市時,好好把握機會,但唔好心急動用,寧願輸利息,都唔好心急投資。
要計企業的價值,過程比較複雜,好難三言兩語就講到,就算在我的股票班,都要講5小時,裡面會講3種估值方法,有難有易,但同學都用到的。
簡單來說,你要考慮企業的生意、盈利、現金流、資產、負債等財務數據,同時要比較行業,考慮這企業的經營情況,之後的環境又會如何。這都是計算的基礎。
例如,我地會考慮佢有多少生意,有多少盈利、現金流,有多少資產,從而計算該業務值多少錢,同時會推算將來的盈利情況,去推算這企業長遠的價值。
如果要深入計算,基本上要好仔細的研究企業,要分析好多財務數據用比率,先至有較完整的答案。
------------------------------------------------
Q21304:
老師你好呀!
請問你點睇1358同2899呀?謝謝你
同埋358
龔成老師:
普華和順(1358)主要於中國開發、製造及銷售再生醫用生物材料產品;輸液器產品;以及骨科植入物產品。
本身業務有點波動,同時未見有好大獨特性與規模,整體的投資價值未算好高。
佢派特別股息後,股價除淨大跌,而派特別股息令佢現金減少,整體企業發展力不強。整體的投資價值唔高。
紫金礦業(2899)佢主要從事黃金及其他礦產資源的勘探、採礦、生產、冶煉及銷售。
但你要留意番,雖然這類資源股雖有投資價值,但只算中等。
原因是這樣,資源本身有一定的價值,但盈利始終受國際黃金價格影響,本質上會較為被動,無乜價格自主能力,同時產品無差異性,是典型的商品企業。這類企業都有一定的投資價值,但就不會太高。
江西銅業股份(0358)係中國一家綜合性銅生產企業,主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品,包括硫精礦、硫酸及電解金和銀以及稀散金屬,如鉬精礦。
佢亦會為客戶根據來料提供熔煉和精煉的加工服務。
就過往的業務情況來分析,這股不過不失,盈利較為波動,反映無乜產品價格自主的能力,長遠企業價值增長只是一般。
這股不是劣質,但都不是高質,相信股價長遠未必有明顯上升,只是較普通的企業,投資價值只是一般。
------------------------------------------------
Q21305:
老師,目前只有以下的股:
939@4000,
968@2000,
1177@2000,
1810@1000.
1257@2000
想問1257和956邊隻較好,
睇左老師的書,想入
1317或1569两者選一,
1448,1830,1928,696,1458,老師可以比d建議應該咩組合較好
另外,也想問下老師如何評價558,我見佢都升得多,
謝謝你抽空睇我的留言
龔成老師:
現時持有的組合,基本上都是有質素的股,長線持有無問題,但要留意,當中持有的小米(1810)、信義光能(0968)、中生(1177)都是潛力股類別,這些都是可長線投資,但都不能過度集中在潛力股。所以當你日後增加潛力股時,要留意翻比例及上限。
新天綠色能源(0956)本質不差,值博率會高少少,有一定的增長力,但由於都有一定的負債,考慮到風險因素,現價只是合理區,未算平。
你投資都可以,分注無問題,但由於這企業規模比較細,加上有行業風險,因此唔建議太大注。
至於教育股,可考慮楓葉教育(1317)。
至於另外的5間,都是有質素的,如果想收息及平穩增長,可考慮金沙(1928),如果想潛力,可考慮褔壽園(1448)、必瘦站(1830)(當然這兩股回翻少少就較有值博率)。
------------------------------------------------
Q21306:
老師您好,請問一下必瘦站1830,您如何分析及看好的原因,希望能夠詳細地瞭解一下您的看法。非常感謝您!
龔成老師:
必瘦站(1830)長遠有發展,本身有一定的質素。
睇翻之前的疫情,佢身處的行業受影響,但佢的現金流及財務數據都唔算差,這點可以想象到,當正常的經營環境,佢的生意一定唔錯。
加上佢的野心愈來愈大,本身有一定的技術,同時不斷將香港的業務模式複製到其他海外地區,我見佢加強了發展其他地方,因此發展不差。
這股有長線投資價值。
這股我自己都有貨,都是長期睇翻,見佢之前的發展一直唔差,加上疫情仍有錢賺,這是加分的地方,你可以推算到,當經濟正常翻,佢的生意一定會唔錯。但近期升了好多,已貴,最好回少少先小注,大跌先正式買入,會較穩陣。
------------------------------------------------
Q21307:
老師我剛開始月供股票,2800 $2000,823/2388各$1500,現在有2個小朋友約10歲,我想將佢地既利是錢用黎買股票希望在佢地成年時已有一筆唔少既錢比佢地繼續投資
如果我用佢地既錢用晒黎買3067長線可以嗎?還是有其他穩陣長線部署?
自己持有
8000 股 1313 $9.34
2000股 358 $16.76
可長線持有嗎?
龔成老師:
你現你月供的盈富(2800)、領展(0823)、中銀(2388),都是有質素的,都可以長期進行。
至於現時持有的股票,華潤水泥控股(1313)本身有質素的,不過業務就較有波動,佢過往的盈利數據上落都大,因此股價的變大亦會較大。
佢之前公布的中期業績,業務有回落情況。長遠計,房屋、基建發展等因素,都會利好水泥股。因此長遠是正面,你長線持有就得。
至於江西銅業股份(0358)係中國一家綜合性銅生產企業,主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品,包括硫精礦、硫酸及電解金和銀以及稀散金屬,如鉬精礦。
佢亦會為客戶根據來料提供熔煉和精煉的加工服務。
就過往的業務情況來分析,這股不過不失,盈利較為波動,反映無乜產品價格自主的能力,長遠企業價值增長只是一般。
這股不是劣質,但都不是高質,相信股價長遠未必有明顯上升,只是較普通的企業,投資價值只是一般。因此不建議持有太多貨。
至於你小朋友,集中投資恆生科指(3067)不是不可,但就始終有少少風險,要睇你地的風險承受能力。這是一個潛力股基金,當中都是潛力股,回報高,風險大。從你小朋友長線投資角度,不是不可,但就要明白這動作的風險,如果承受風險能力不高,就只宜部分投資這基金,不能全部。
------------------------------------------------
Q21308:
你好,想問下﹐我用個個估值方法對於某d股會偏差好大。
好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%
龔成老師:
當我地進行企業分析,以及進行估值時,最重要是找一些核心因素。
例如你見佢有時收入增長較多,有時就較少,而我地會著重佢長期的收入增長是多少,而不是一年半年。
同時,你不能只公式化去運用,你要懂得將財務數據「意義化」,你要解釋翻,點解佢該年會增長較多,而另一年增長少,當時的大環境怎樣,而將來的大環境發展又會怎樣,從而推算將來的收入及財務數據情況。
因此,你要利用對企業「核心」,及「長期」的因素作為分析點。
------------------------------------------------
Q21309:
龔成老師,如果3067咩價位入比較適合?
175,2600現價可入?
龔成老師:
安碩恒生科技(3067),有長線投資價值。
這基金追蹤恆生科技指數之表現,而恆生科技指數,都是一些有質素的潛力股,例如阿里(9988)、騰訊(0700)、小米(1810)、美團(3690)等的新經濟類公司,長遠有潛力。所以有長線持有價值。由於基金有30隻股票,比起單一股票,風險能減低。
不過,現價都唔平,大約在合理區頂至略貴,因此,這刻不能大注投資。最好的策略,就是月供,或自行分注小注慢慢收貨(例如每月買一次、或2個月買一次),總之慢慢入,不能用盡現金,原理如同不斷儲貨,這樣就能平均買入價,減少風險。然後就長線持有。
吉利(0175)業績弱將會對股價短期不利,企業價值都有少少影響,不過最重要睇翻長遠價值,吉利(0175)本身的質素不差,擁有一定的銷售網絡及品牌,不錯的市場策略及定位,而又能把握中國汽車市場增長的機遇。
長遠來講,佢的品牌與發展在中國仍理想,2018年,吉利透過旗下海外企業,動用超過$500億人民幣收購戴姆勒股份公司9.69%股份。由于戴姆勒股權結構分散,所以吉利已經成為了戴姆勒集團最大單一股東。這不單有利佢有中國發展,同時長遠,可能加快了海外發展速度。
另外,佢未必發展自己的電動車品牌,但會發展當中的技術,相信在合作及自身價值上,長遠仍是正面的。
現時價位在合理區中上部至頂位,股價波動,有貨可長線。如果現價入貨,小注都得。
中國鋁業(2600)主要從事鋁土礦、煤炭等資源勘探開採;氧化鋁、原鋁和鋁合金產品生產、銷售、技術研發;國際貿易;物流產業,火力及新能源發電業務。
過往的業務與盈利都較波動,反映企業較受外圍價格影響,產品價格自主能力較弱。
質素算中等,現價合理,但又唔算吸引,投資價值只是一般。
------------------------------------------------
Q21310:
啊Sir,多謝你之前回覆,之前請教過你後已減持左一半煤氣轉到9988,同時亦投入左一部分係3067。以下係小弟現時既倉。
想問以下問題:
1. 餘下的煤氣應在那個價位完全減持?
2. 鐵塔長期表現不佳,我應否轉股?如果轉的話那個價位開始減持和轉那一隻股票?
3. 小米和阿里,暫時是我第二、三大持倉,我應在那價位再增持?
4. 福壽園和舜宇光學我非常看好,應在那價位增持?我看福壽園最新業績理想,合理區會由$7上升多少呢?
5. 3067,我在$19.51入市,應該算略貴,我應該如何是好?和在那價位再增加呢?
麻煩晒啊sir
優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]
-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51
龔成老師:
1)煤氣(0003)不是無質素的,因此你餘下的貨,持有都無問題。
除非你好想集中資金在潛力股,但其實我又不太建議。
2)中國鐵塔(0788)不是無質素的。始終中國的3大電訊巨頭,都是佢的主要客戶,以及大股東,當5G發展,佢一定會受惠,因此前景仍然正面。
佢現時的收入都增長,盈利都保持向上,但增長比之前略減,加上股本回報率不高,是這股較弱的地方。若分析佢市盈率,會見到現時仍然處較高水平,反映佢雖然股價回落左唔少,但仍然未到平。
這股算是合理價。
這股長遠仍算有發展力,可長線。不過,潛力度比過往略減。
其實只要你持貨不過多,就無問題,如果你較擔心,就賣部分轉其他較有增長力的。
3)如果已經佔有一定的比例,就唔好心急,其實一隻股佔股票組合15%已經是上限,你可以考慮翻這個因素。
同時當你已經持有一定的比例,就更加不要心急加注,小米(1810)最好落翻2成以上,而阿里(9988)就落翻1成以上,先考慮加注。
4)這兩股都是有質素的,但經常都唔平,其實你可以考慮月供。如果你本身有貨,可考慮跌翻1成以上加注。
5)你預恆生科指ETF(3067)合理區頂約在$16/$17,如果低過這價,你又資金足,其實可以慢慢分注買入,以長期儲貨的模式進行。
------------------------------------------------
Q21311:
老師你好!之前因為要買樓俾首期所以將所有股票都賣晒,而家要重新建立股票組合,想再請教一下老師。
三十歲,穩定職業,月入大約十萬,扣除供樓及生活雜費後,每月大概有三萬元剩,打算每月投放兩萬蚊於股票投資,一萬作儲蓄,另外現金有30餘萬打算放入投資市場。
暫時自己選擇了
穩健的包括:
- 美股ETF: VOO
- 創科實業
潛力股包括:
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴
想請問一下老師我的選股是否正確,比例就應該怎樣分配?多謝老師,祝生活美滿!
龔成老師:
基本上,方向正確。
你剛買完樓,可以重新配置個整個財富組合,由於已置業,在之後的配置上,考慮以股票作為增值,是可以的,亦是較平衡的做法。
你所選的都是有質素的股票,都可以考慮,以你30歲的年齡,基本上是適合的,如果你本身有一定的投資實力,潛力股可以去到60%,如果投資實力一般,就大約30%已足夠,你可以睇翻自己的實力及風險承受程度去配置。
$20000作投資(可以利用月供或分注),以及$10000儲蓄,方向正確。
至於現金$30萬,以現時的投資市場平貴,你動用一半資金,以分注模式買股票,可以的。餘下就留現金,去等機會。
至於上述股票,無問題,VOO是ETF,佔比多少少都得,至於其他,就投資適當的比例。
要留意福耀玻璃(3606)、必瘦站(1830)、創科(0669)、舜宇光學(2382)現價唔算平,投資時要控制注碼或回少少先考慮。
------------------------------------------------
Q21312:
阿Sir!好開心我睇完你本書買左1211同1830,都係短時間升左好多
所以1211我無忍得住5手放左2手,不過已經攞返本金。必瘦站就吸收左經驗,無放到,但又後悔無買多啲
我呢種心態係未唔係幾好要改?
另外正題
我股票有
1830,13638股
1211,1500股
0066,1039股
1928,400股
823,213股
全部都係大跌嘅時候買,
所以以家全部都係賺,
但係而家有一個問題,
我唔知可以再買咩
因為好多都唔平,
但係我又唔想月供,
係咪一年只係等一次機會入,
儲多啲錢先?
龔成老師:
比亞迪(1211)同必瘦站(1830)都有質素,同時長遠有發展力的,你餘下的貨,可長線持有。
至於心態,我地永遠無得後悔,投資好需要你理性,因此你平常心就得。
其實,你現時持有的,都是有質素的股票,你持有就得,唔需要太著重當時買入價。
因為最重要不是睇「賺蝕」,不是睇「買入價」,而是睇質素。質素不好,增長力弱,就有可能賣出,蝕都要賣。
你要分析「之後的組合情況」,不是過去,是將來。應該持有那些優質股,比例如何,能為你帶來怎樣的長期財富。
你要分析你的投資目標,你想潛力股的比例多少?平穩股的比例多少?組合風險程度如果?
即是你想設計一個怎樣的投資組合?長期、優質、平衡、適合你。
至於你唔知可以再買咩,其實,投資不要心急,不要為買而買,要有機會才買,現時大市在合理區,如果部分較貴的股票,就不要心急入貨,但有部分股,其實現價仍可考慮,當然,你要有一定的資金留低,而不是用盡現金,因為以現時的整個大市平貴狀況,你留翻3-5成現金,其實都可以的。
如果你現金較多,可以考慮一些合理,平穩增長股,例如:考慮盈富(2800)。
另外再加:銀娛(0027)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)等,你可以了解下這些股票,然後從中選股。
如果不想月供,就分注進行。
但要記住,留部分現金,等機會,都是重要的。
------------------------------------------------
Q21313:
Hi, 你好. 有個關於轉工嘅小問題想請教下你
之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,
佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,
佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝
因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,
現時3X 歲. Thanks a lot
現時人工30k
龔成老師︰
你可以多從「長期」視點去分析,就工作來說,無論做那份工作,我地的主要目的都是薪金,以及興趣。
你可以想想,10年後你希望自己的薪金如何,職位是甚麼,當你有左這個大方向,就知道這一刻的情況。
因為2份工作表面上,工作內容係一樣。但當中可以學習,進升等機會,相信會有所不同。
你已在現在公司做了11年,應該會了解,5年後、10年後、甚至20年後,你發展會係點。而這個結果,是不是你想要的?
正如你所講,現職地方無乜升職機會。若果你目標係更上一層樓,咁你就要諗下現時工作環境是否真的適合。
如果不適合,我建議你可以考慮一個新環境,試一試。
當然,此前你都可以問下你轉左新公司的同事,了解一下這公司的情況,去再作衡量。
至於裁員會係一個風險,但唔係而一刻你決定去或留的主要理由。更重要係睇長線發展,邊一間先會更大機會發展到你心目中的目標。
------------------------------------------------
Q21314:
龔成老師您好,小弟對派息基金有疑問想請教下您。
留意到XXX有一種叫每月派息兩次既基金計劃,佢嘅做法係首先喺月頭買入一隻係月中派息的基金,等到佢除淨之後,就將舊錢轉落另一隻月尾會派息嘅基金度,
咁就變相一嚿錢同一個月收兩次息。我明白個本金,會因為要派息而下降, 但我留意到佢基金價格都尚算穩定,10年來只係緩慢下降,過往紀錄派息記錄好穩定。
就算基金價格慢慢下跌,但收到既利息係扣除基金價格下降後仍然有利潤 。計劃提及會有每月10%利息。
Btw我留意到XXX有同樣嘅做法,佢自稱一個月可以最多轉四次,但要喺操作上邊好完美先做到。
XXX動力亞洲高收益債券基金
XXX基金 - 亞洲高收益基金
龔成老師︰
首先,你要先了解,到底收息資產,是否適合你自己。
當我地進行人生財富累積時,會運用「先增值,後現金流」方法。年輕人應著重於增值類資產,而較年長的,就應著重保守類別。因年輕人財富系統未成形,同時負擔較少,可以承受較高風險,所以應以增長為先。
例如初期投資較有潛力股票,令財富增值較快,到一定金額後,可轉較平穩增值的股票。最後有相當財富時,才換成收息股去為自已創造穏定現金流。
因此,若你係年青至中年人士,而一刻應先集中財富增值,收息產品並不適合你。相反,你已近退休之年,又或者你係好保守架投資者,將資金投資在收息資產,係可以。
債券和派息基金,這其實只是「產品」,物業、優質股是「資產」,所以從財富本質上,我地應較集中持有「資產」,才對我地最有利(你可以睇睇《財務自由行》一書,我從財富本質上,講述了當中原理)。同時,現時息口低,但未來有機會重回加息週期,債券未必是最好的投資工具。
至於債券基金,坊間分好多種,你要小心睇,因為有d風險低,無乜問題,有d則有潛在的風險,絕對不是保本的產品,有機會出現了「賺息蝕價」的情況。
第一,有些基券基金,會投資「高收益債券」,即是「垃圾債券」,你一定要睇睇佢所佔的比率。
第二,債券基金往往不是單純地持有債券,而是可以作買賣,以及利用衍生工具作對沖等策略,即是可能有價格上的波動。
第三,不少銀行都會提供借貸,以槓杆去放大回報,以平息借貸去賺取息差。低息環境時間題不大,但進入加息週期,不止借貸成本增加,同時債券價格往往在加息期下跌,雙從打擊下,投資價值成疑。當然,若然加息步伐不快,息差利潤就可觀。
我不是說債券基金有問題,只是說明當中的風險,因為市面上的基券基金好多,你要仔細分析。
你以所以提及的,都是收息類產品。XXX派息基金計劃,派息係吸引。但你要留意翻是否全數為「保證部份」,還是會有波動。
而「XXX動力亞洲高收益債券基金」和 「XXX基金 - 亞洲高收益基金 」 ,主要都係投資一些「未達投資級別的高收益證券」。
這類所謂「高收益債券」,即是「垃圾債券」,風險唔細。
唔係話唔可以投資,但你要明白當中有一定風險,而非一個穏陣的收息選擇。
------------------------------------------------
Q21315:
龔成老師,你好!我現時剛出來工作,為專業人士,工作穩定,月入三萬,每月可儲2萬,現暫定每月固定存1萬去股票戶口。暫定來年會用16萬去進修,目標是30歲時買到700萬的樓。
上年開始接觸股票,現時股票戶口有 27萬,分別為
港股 15.6萬
美股 6.7萬
現金 4.8萬
另外有銀行有5萬存款、2萬 ibond及10萬定期 (4月到期)
以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30
6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515
問題1: 我打算等3313回去比較高位置就賣出,這做法可以? 除了3313外,想問問上述組合有甚麼需要改進的地方? 我需要多增加潛力股,還是增持現有個股(3319/1093),或增加現金?
問題2: 9988 佔倉好像比較多,但之後有機會波動,我應趁低吸納,還是維持現狀,甚或賣出一手?
問題3: 想問問我的買樓目標會不會太難達成? 我又可以以甚麼方式加快達成目標?
問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長,現時PE在15左右,亦不算太高
加上5G時代對其SD-WAN路由器銷售應該起剌激作用,初步分析正面。可是,由於沒有太多大行研究報告,所以不太肯定其預測盈利。
如果是優質股,同時想問問其合理價。
問題5: 想問問6186 中國飛鶴是否優質股? 因為其ROE在這4年都維持在40多%,且5年間淨利率增幅(10.91% 40%) 顯著高於毛利率增幅(54.61% 72.5%),反映公司有效降低成本及定價。
如果是優質股,同時想問問其合理價。
問題6: 想問問1297中國擎天軟件是否優質股? 初步分析: ROE平均有20%; EPS穩定增長,而2020年度更是有100%增長;
流動、速動比率持續有6以上,反映公司現金流動性甚高; 公司業務(退稅軟件)具低成本,高獲利性,且沒有太多競爭者。
如果是優質股,同時想問問其合理價。
感謝你的回應。
龔成老師︰
1) 雅高控股(3313)主要從事大理石開採、加工、貿易、銷售、商品貿易及貨運、倉儲和物流業務。
公司市值不高,盈利十分波動,質素不佳。企業不斷虧損,無乜投資價值,賣出這股較好。你唔好預佢會升翻好多,因為佢投資價值好低。如果你唔想一次過沽晒,你可以分注咁出都可以。
你才剛踏入社會,算係年青一群。投資上,可以較為進取,以「平穏增長股」 + 「潛力股」作目標,比重大約各佔一半。
ibond和定期這類收息產品,增長力好有限,唔建議用。
至於組合上,你而家太偏重左係潛力股,佢雖然有增長潛力,同時風險都較高,不宜持有過多。
未來時間,你要加大翻平穏增長股部份,令組合更平衡。
平穏增長股:金沙(1928)、恆基(0012)、港鐵(0066)、平安(2318)、粵海(0270)、領展(0823)、希慎(0014)、太古地產(1972)、長建(1038)
2) 阿里巴巴(9988)成個組合近3成,明顯偏高,有過集中性風險。緊記,相同行業不可佔組合多於3成,而單一企業不要高過15%。
就算佢跌,你都唔好再加注住。到你組合平衡翻,你先再作考慮。
3) 大市過去年平均回報10%計(連股息再投資),你每月投資$20000再加上你現有定期、資金和持股等(約值45萬),5年後大約會增值至250萬。
相信這筆資金,足夠幫助你置業。
4) 珩灣科技(1523)過往的增長不錯,相信長遠有發展,但公司好細間,一年盈利只有不足美金$1500萬,風險較高,現時估值算是合理,都有潛力的。
若你想投資,可以好小注博下。
5) 中國飛鶴(6186)不差的。
佢係中國從事生產及銷售乳製品,以及銷售營養補充劑,以生產嬰幼兒配方奶粉產品為主,當中可分為高端嬰幼兒配方奶粉及普通嬰幼兒配方奶粉兩大類別。
產品有一定的品牌與市場,同時過往的增長力理想,長遠有前景。
比較大的問題是估值,近期經常在合理區中上部至略貴的水平,股價有時投資值博率不足,因此要注意風險。長線投資可以,但就要控制注碼。
6) 中國擎天軟件(1297)本質不差的,市場擔心佢之後的增長動力減慢,因此估值上認為佢會較低,但如果佢能保持這增長,其實現時的股價有吸引力的。
這股的其中風險,就是規模較細,以及行業存有風險。現價其實有投資價值,但就唔建議太過大注。
------------------------------------------------
Q21316:
你好,龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在(30多歲)才閱讀你的書籍,浪費了很多時間。
我現在剛踏入股票巿場,想你幫忙分析一下組合是否合理?
周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 : 3% $17入
現在有2000是供基金(最少要多供2年,不算之後也會月供),月供$4000 (供2800,1929及 0586)。
另外,手頭有6萬現金,因要讀書。我應該先投資在股票巿場,都要交學費才換回現金,還是先保留?
最後,近來中國都在研究氫能量,請問你對1907 旭陽集團的前景有何看法?我比較擔心佢負債情況,但佢是行業龍頭,加上同地方政府有不同合作,也很吸引。
不好意思,一下子問你這麼多問題,希望你能騰出一點時間回應我的疑問。謝謝
龔成老師︰
你現時持有和月供的股票,都係有質素,適合你這年紀。但緊記個別企業,唔好佔組合15%以上,否則會有過度集中風險。
你周大福(1929)海螺創業(0586)明顯有這個問題,所以你月供可以先用另一隻股票代替。而現貨可持有,唔洗沽出,用新資金去慢慢平衡翻個組合,咁就可以了。
而盈富(2800)雖然超過15%,但由於佢係一籃子股票,而非單一企業,所以比重上係無限制。另外,恆生科指ETF(3067)反而你加翻少少比重都可以,但當然不是一次過加,只是這類ETF,組合佔多少少都無問題。
至於手上6萬現金,如果你1,2年內就要用來讀書,我就唔建議你投資了。因為時間太短,回報不確定性會好高。
中國旭陽(1907)無特別分析,只見之前有些報導。
佢之前公布,澄清最近涉及其於河北省定州市及內蒙古的氫能項目的若干媒體新聞報道,指定州項目試產,並擬於呼和浩特市建加氫站。
該集團指,有關於定州經濟開發區河北旭陽新能源產業園內建設運營氫氣儲運和建加氫站,有關生產基地去年7月開始試產,探索區內在氫能存儲、運輸和燃料相關電池布局機會,開拓京津冀市場等。
至於去年,該集團合營企業與呼和浩特清水河縣政府簽訂另一項氫氣項目框架協議,合作於清水河縣開展氫氣開發項目。
與定州項目相似,該集團將負責於清水河縣進行氫能生產、運輸和建設加氫站,把該市發展為華北地區氫能輸出基地。
只可以話有風險有回報的類別,如真的想投資,一定要控制好注碼。
------------------------------------------------
Q21317:
老師你好,本人24歲,扣除家用每月儲蓄約$15,000(自己較少開支和娛樂),現金約有$100,000。
目標是28歲前置業,但預計現時置業需$400-$500萬或以上,不知這目標是否在能力和資金範圍內,所以想請教你的投資方向和意見。
股票如下:
0003 11.5,10,000股
2382 175,100股
另外,想問繼續買0003,還是賣出?定轉移集中買其他潛力股如舜如丶中生或小米。謝謝。
龔成老師:
你有4年時間準備,都可以利用投資,去適當利用股票去進行財富增值,到你準備買樓前的一年,就要將股票分段賣出,準備所需的資金。
你可以投資「平穩增長股」,加上小量「潛力股」為組合,助你幾年內財富增值。
煤氣(0003)增長力不強,你不宜持有太多,建議減部分,但留部分是無問題的。
另外,舜宇(2382)、中生(1177)、小米(1810)都是適合你的,都是有潛力的股。不過,你不能只集中在潛力股。
你現時的現金,可以動用$5萬,分注投資。
至於每月儲到的$15000,初期可月$10000去做月供或分注,到後期,就要慢慢減金額。
------------------------------------------------
Q21318:
hello 啊Sir
想問問
#2318 中國平安
#2518 汽車之家
#388 港交所
呢3隻長期持有可以嗎?
合理價大概係幾多?
謝
龔成老師:
中國平安(2318)有質素的,佢有規模,有品牌,近年的發展都不差,不過,股價有時會有少少波動,這主要受投資市場表現影響。
這股有長線投資價值,是平穩增長型,分注投資都可以。
港交所(0388)絕對是優質股,獨市生意,加上香港的金融中心角色,這企業有長線投資價值。
多年來的生意與盈利都有理想增長,派息不差。
但要留意,由於這股的盈利會受股市成交影響,因此股價都會有影響。
這股雖然有質素,但近年成為市場焦點股,令佢經常處貴的水平。現價略貴,你預回1成較好。
這兩股都好有質素,你月供都得。
至於汽車之家(2518),都有質素的。
佢中國的汽車消費者在線服務平台。根據資料,以移動端日活躍用戶計,在汽車服務平台中排名第一。
透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。
根據資料,集團是最大的在線汽車廣告及線索服務供應商,就媒體服務及線索收入而言,於中國在線汽車垂直媒體廣告及線索市場中佔據的市場份額約3成。
佢收入源自媒體服務、線索服務及在線營銷及其他。
佢係2008年成立,最開始是一家內容型垂直媒體公司,專注於媒體服務。於 2016年,推出「4+1」戰略轉型方案,打造了一個囊括「車內容」、「車交易」、 「車金融」及「車生活」的平台,從內容型垂直公司轉型和升級為數據和技術驅動的汽車平台。
自2018年起,專注於用人工智能(AI)、大數據及雲技術(統稱ABC)開發全套智能產品和解決方案,透過提供跨價值鏈的端到端數據驅動產品和解決方案,構建一個連接汽車行業所有參與者的集成生態系統。
展望未來,計劃繼續利用「軟件即服務」(SaaS)能力連同核心AI、大數據及雲技術同時進行橫向和縱向擴張。
發展力是有的,但價位都唔算平,如果控制注碼,這股都可長線的。
------------------------------------------------
Q21319:
你好,想請教你,25歲,月入$25000,一直都是月光族
每個月要還卡數$7500(大約仲有1.5年)
但依家想改變,唔想再喺呢個循環,因為經常都會自責、內疚,依家想儲錢結婚、買樓,自覺好似得番好少時間,已經25歲
已報了你的投資班,希望學習投資知識,因為一直都無接觸理財、投資知識。
屋企人有買你的書,應該睇邊本先?
依家我打算先儲蓄、供月供股票,但係我應該供邊隻,同埋應該供幾多錢?仲有d咩可以做?
謝謝你!
之前只在中銀開左個股票戶口,我應該喺中銀做月供股票,定係有其他建議?謝謝你!
龔成老師:
過去的情況無得改變,自責無意義,你只要做好這刻就得,你現時25歲,只要行翻正確的方向,已經比好多同齡的人做得好。
現時,不要再增加卡數,如果卡數利息較高而又可以提高還款,就盡早處理。
之後,就要留有一定的現金,作為備用及等投資機會。
到餘下有資金,可以長期都不動用的,就可以做長線投資。
你25歲,財富有增長力,可投資「平穩增長股」+「潛力股」,在你知識未算高時,潛力股不用太多。
暫時,你可考慮一些ETF,如盈富(2800)以及恆生科指ETF(3067),至於個股,我會建議你上完堂後,先正式加入。
另外,現時大市波動,唔好用盡現金投資。
投資不用急於一時,這是一個長期的策略,所以好多野都可以等你上堂先進行配置。
------------------------------------------------
Q21320:
本人在銀行工作,part-time 要徵詢公司的同意,是不可能的事,但轉工是一個可行方案。不過,本人在這間公司任職,倘餘幾個月,快將7年了!
如果工作屆滿10年, MPF (僱主voluntary 部份)可以拿到100% 。現在要離開公司的話,損失40%, 大概都有幾十萬,唔捨得!
距離屆滿10年,尚有3年多,現在打算好好裝備自己。
老師,我明白在股票投資組合裏要取得平衡,投資增長力較強的股票的同時,亦要投資平穩增長股。
請問如果用7年的時間分別投資平穩增長股及增長力較強的股票,平均7年回報的差距有多大?
龔成老師:
其實我以前都做過銀行10年,我未過試用期,已經出現做兼職了,當然,銀行不會同意,佢地亦不會知。
這當然有風險,但有時做人,又唔好有太多限制思維。
但如果你不想做兼職,當然無問題,只要好好利用這幾年的時間,裝備好自己就得,因為我都睇得出,你的目標是起碼想做多3年,那你就好好利用這3年時間。
如果用7年時間,投資平穩增長股,我假設回報為8%,假設每月投資$10000,預期7年後滾存到$108萬。
如果用7年時間,投資平穩增長股,我假設回報為15%,假設每月投資$10000,預期7年後滾存到$130萬。
----------------------------------------------
若你有問題想向本人發問,可在龔成的fb專頁中(www.facebook.com/80shing)inbox龔成,但要注意如無特別聲明,有可能將問答放上網,當然,會將發問者的身份,以及有關個人資料的部分刪去。
另外,我所給予的各種意見,只是供大家參考,當中無任何銷售及推介,不涉及任何利益,其實大家應該要有獨立分析的能力,我只是給予一些方向及純參考模式。
由於提問人數眾多,見諒無法即日回覆,如果是普通的提問,預起碼要7天以上才能回覆,若然是較複雜的提問,起碼要10天才能回覆,希望各位能諒解。