《 李懂媽周日漫談 》之「 莊嚴的故事 」
最近香港乜都話要莊嚴，搞到人人都精神緊張，今日同大家轉換下話題，講一個軟性啲嘅《莊嚴的故事》。
姓莊嘅藝人，年紀大嘅會記得莊靜而，同埋皈依我佛嘅莊文清，後生嘅就梗係識得最近同蕭定一解咗約，不停拍全裸照嘅莊思敏。
莊思敏本身嚟自馬來西亞，我最近就去左佢家鄉，不過唔係吉隆坡呢啲行貨，而係一個叫芙蓉鎮嘅地方。
呢個芙蓉鎮，並非姜文劉曉慶80年代拍嗰套得獎電影《芙蓉鎮》，而喺吉隆坡南面嘅森美蘭州。
我經過一個「 莊嚴同鄉會」，覺得好奇怪， 停車問下啲老華僑，點解咁得意兩個姓合併？
據說，東漢時期，為咗避諱漢明帝劉莊，莊姓族人全部改姓嚴，免招殺身之禍，漢朝滅亡之後，部分人改回姓莊，部份保留姓嚴， 所以莊嚴同宗，一直留存到今日。
可能，著名漫畫家阿蟲（原名嚴以敬），凍齡美女藝人米雪（ 原名嚴惠玲），本來都係姓莊。
其實，喺馬來西亞呢一類南洋地方，中國人自清末民初，就開始大量越洋謀生，當地保存咗好多中國嘅民間風俗、傳統、禮教，反而，中國喺文化大革命「除四舊」 期間， 好多傳統都煙消灰滅，好多禮教都蕩然無存。
古人真係有先見之明，「禮失而求諸野」， 應該就係咁嘅意思，中國漢唐盛世嘅時候，馬六甲爪哇呢啲，正正就係野蠻之地。
今日嘅故事到此為止。
莊嚴？ 睇你點睇……
李懂媽
馬來西亞 芙蓉鎮 在 芙蓉镇挂在瀑布上的千年古镇~太美了 - ATW Travel- Malaysia 的推薦與評價
【芙蓉镇】挂在瀑布上的千年古镇，芙蓉镇依山傍水，绿树环绕，古镇最大的特色，就是悬崖瀑布。 -- 欢迎投稿游记| 合作邀约 投稿/合作邀约: m.me/Yolopapa ... <看更多>