【官方消息】
英超轉會窗正式完結，此前路夫斯捷克正式外借到同巿球會富咸，租借期為一個球季並據報不設買斷條款...
.
其實喺早前關於巴克利外借到維拉既文章中都有交待到，需要留意球會既後續操作，當時認為球會有機會同時將路夫斯捷克外借，甚至會添置多一名新中場球員，而最終只達成首項，並未有作出任何補充收購。
.
以宏觀黎睇，路夫斯捷克離隊後藍軍既中場人手由七個大幅縮減至五個，當中包括佐真奴、高華錫、簡迪、蒙特以及仍在養傷既基爾摩亞，就算勉強計埋夏弗斯其實人手都係相當緊絀，如果再細分球員特質同職能的話，就會發現喺巴克利同路夫斯捷克同時離隊之後，我地係缺乏有能力橫跨戰區作戰既中場球員。
.
所謂既橫跨戰區作戰能力，係指球員能夠同時處理中場以及前場兩個區域既工作，中場職責上包括持球推進、個人突破、長短傳視野等基本特質，而將皮球運上前場後，更要有能力捕捉由禁區頂以至禁區內既射門機會，巴克利以及路夫斯捷克兩者的確能勝任有關工作，只係前者雖然做到但喺質素上實在太過平庸同多甩漏，而後者自大傷過後一直無法重拾狀態。
.
至於其他人選方面，高華錫的確精於推進以及擁有最後一傳等高水準元素，但奈何球員實在沒有太多射門意欲，而蒙特於林伯特手下亦開始愈趨「工兵化」，敢於遠射及插入禁區但喺視野傳送方面實在未夠火候，至於簡迪，職責上亦只係將佢既推進覆蓋面放大，但無助球隊處理禁區附近範圍既工作，相反較大機會倚重進攻元素更多元化既夏弗斯作為重點，不過要留意哩位德國球員並不擅於協防，意味住喺中場組合需要平衡攻守兩方面的話，簡迪就將會係伙拍夏弗斯既第一人選。
.
延伸討論太多，講番路夫斯捷克，個人認為佢喺林伯特既構圖之中仍然係佔一席位，相比於巴克利未來留隊既機會更高，球員今次亦係自大前季外借到水晶宮後第二次成為「出租車」一員，同時顯出路夫斯捷克想為爭進未來藍軍一席既決心，不過要留意既係佢今季外借球隊富咸，雖然球員有能力勝任當中正選，但以富咸既人腳同質素比起當日佢外借到水晶宮既環境惡劣得多，再加上球員狀態不及當年，難免有機會出現跟著球隊愈踢愈沉既跡象，哩一點實在值得注視。
.
雖然英超轉會窗已關，不過仍有部份聯賽轉會窗尚未結束，意味住真禾達、雲真高等人仍有機會離開，而喺及後時間亦會以文章方式為車路士今個轉會窗作一次總結。
.
《岩睇既比個Like支持我地啊！》
作者 : BluexLion車迷手記
圖片來源 : Daily Mail
-------------------------------
同場加映《半場換走獨自走上隊巴 服從紀律務必為首要條件 馬高斯阿朗素的藍橋生涯經已完結？》
https://bit.ly/3lkpk1X
.
#Chelsea #車路士 #路夫斯捷克 #富咸
高斯計租借 在 [請益] 房子門柱前有電線桿和電桶- 看板home-sale - 批踢踢實業坊 的推薦與評價