《無異之局》荒村異聞（九）
為咗尋找岳少嘅遊魂，我利用無二交低落嚟嘅指南針喺深山裡面穿梭。半路差啲就俾一股神秘力量吸入「黑暗」之中，好在喺千鈞一髮間俾一位少女救咗，而眼前呢個少女唔單止認識岳少，仲話要將佢嘅遺言話俾無二知……
「你唔通就係無二？」少女問。
「唔係，我係佢嘅助手。」呢個對答不禁令我諗返起Cheryl上門求助嗰次，「但無二就喺附近，我可以帶妳去搵佢……」我慢慢撐起身，呢刻身體依然係有得虛弱。
「嗯，就咁話。」少女點頭，再望咗眼石階嗰邊，「何況我哋都唔應該再留喺度……」
達成共識後，我哋當然馬上行動。呢刻天色已經黑到唔開電筒係完全睇唔到路，好在我仲勉強知道回頭路點行。
唔知無二嗰邊而家點？雖然分開嘅時候佢要一打二。但我知道佢係冇問題，好可能呢刻已經成功制伏嗰對孖生姐妹。
「係嘞，我叫做韋家聰……妳呢？」我邊行邊問。
「蘇子儀。」少女跟喺我後面，不時會擰轉頭望。
＝＝＝＝＝＝＝＝＝
另一篇長故《扮工鬥室》Patreon 連載中！歡迎訂閱支持！
https://www.patreon.com/echoofheart
《荒村異聞》連載中：
https://www.facebook.com/pg/Echo.of.Heart/photos/?tab=album&album_id=2067100083421797&__tn__=-UC-R
《惡夢島》全集：
https://www.facebook.com/pg/Echo.of.Heart/photos/?tab=album&album_id=1861298627335278
《極樂謊園》全集：
https://www.facebook.com/pg/Echo.of.Heart/photos/?tab=album&album_id=1736011713197304
【廣告】《無異之初》、《無異之地》各大書局有售！
＝＝＝＝＝＝＝＝＝
既然子儀知道岳少嘅遺言，即係佢哋肯定係曾經見過面。但到底係死嗰刻定係之後嘅事？佢又會唔會知道岳少係點死？
「子儀，介唔介意話俾我知妳係點知岳少嘅遺言？」所以，我決定趁機會追問下，「妳係咪見過佢？」
「就係尋晚嘅事。」子儀回應：「岳少報夢同我講話佢俾奸人所害，然後佢叫我上嚟呢座山等……佢深信無二一定會出現，到時我就可以將遺言交待畀佢。」
居然係報夢而唔係見到遊魂？呢點確實係幾出乎我意料，不過更意外嘅係……
「咪住先，即係妳已經喺度等咗成日？」我問。
「嗯。」
「咁如果我哋唔出現，妳咪要一直等落去囉？」
「我係會咁做……」子儀堅定咁講：「岳少曾經幫過我一個大忙，既然生前冇辦法報答，死後我絕對唔會令佢失望。」
「咁妳係咪知道佢俾邊個殺死？」我終於追問到最關鍵嘅問題。
「佢當時冇講……話要我交托遺言本來已經係強人所難，知道埋兇手係邊個嘅話只會更加危險。佢話只要無二聽完段遺言，自然會有頭緒。」
可惡，偏偏又係冇咗最重要嘅部份……但既然岳少咁講，我都只可以相信無二聽完真係會知道答案。
「咁樣……」我正想轉去問佢點解會知道禁地嘅事，下一秒先注意到佢停低咗落嚟，目光一直盯住後方，「子儀？」
「佢哋要追上嚟喇。」
「佢哋？」
「『黑影』。」
就喺佢講完一刻，一股寒氣從我哋頭先行過嘅位置飄嚟。除咗刺骨，仲有種強烈嘅壓迫感。我注意到頭頂開始有樹葉飄落嚟，過程仲加速枯萎，直至變成枯葉接觸地面嘅瞬間就好似玻璃咁粉碎……
接住，有另一個身影出現喺電筒光最遠所照到嘅位置。正如子儀所講，眼前之物的確係「黑影」，無論係全身上下都係黑成一團……
「阿聰，我唔可以跟你過去喇。」子儀突然講。
「吓？點解……」
「遺言！」佢轉身望過嚟，表情相當著急，「阿聰，你要聽清楚……岳少當時喺夢入面係咁同我講：『對唔住，我冇辦法遵守承諾，要先行一步……但若果你堅持想完成目標。就試下去搵我嘅死黨阿域，佢可以話俾你知嗰樣嘢收埋喺邊度。』」
「阿域？」呢個名聽落好熟口面，但呢刻情況實在太危急，所以一時三刻醒唔起邊到聽過。
「靠你喇……你一定將段遺言講畀無二聽！」語畢，子儀就轉身面對眼前嘅黑影，「你快啲走喇！再留喺度你係會死！」
「等陣先……點解妳唔可以一齊走！？」
「因為佢哋嘅目標係我，所有嘢都係我一手搞出嚟……」
「但只要我哋搵返無二，佢一定可以解決……」
「太遲喇，」子儀毫不畏懼咁行過去，「我哋唔會夠快，一個生好過兩個死……」
「妳等陣……」
「走呀！」
佢一大嗌完，又有兩個「黑影」分別出現喺左右兩側。我雖然好想幫手，但理智話俾我知過去只係死路一條。所以，我只能懦弱咁轉身跑，希望盡快趕到無二面前，再叫佢過嚟扭轉呢一切。
一直跑，其實好快已經擺脫寒意，身體亦都變得冇咁虛弱。但我都唔敢放慢腳步，跑嘅過程又差少少俾碎石絆倒……轉眼間我就衝出樹林，去返頭先同無二分開嘅大草地。
呢刻，無二正正就企咗喺度，相安無事咁望過嚟。我初時仲未見到嗰對孖生姐妹，直至跑到過去，先注意到佢哋背脊朝天咁攤咗喺地下……雙手雙腳都被綁住咗。
事實同我想像出入唔大，無二果然成功制伏佢哋……但呢個並唔係重點。
「嘩……你做乜要跑返嚟？俾女鬼追呀？」無二笑住問。
「嗄……唔係……」我一邊喘氣一邊回應：「嗰邊有個女仔俾班黑影追殺緊……嗄……你快啲過去救佢……」
「女仔？」無二皺起眉，「無理由，係咪太黑搞到你認錯遊魂做人……」
「唔係，個女仔叫做蘇子儀……嗄……佢係岳少嘅朋友！」
「哈，又作多個朋友出嚟！」蝶冷笑一聲，「我同家姐守咗喺呢座山成晚，除咗你哋之外根本冇感應到其他人嘅氣息！」
「既然輸咗就唔好咁多嘢講喇。」無二唔客氣咁應：「靜靜地感受下泥土氣息咪幾好。」
「哼……如果我頭先用嘅係『皇錢劍』，結果一定唔係咁……」燕唔忿氣咁講。
「哈哈，妳唔係以為董炎呢個老屎忽會借傳幫之寶俾你亂嚟嘛？」無二乾笑兩聲之後望過嚟講：「阿聰，帶我去喇。」
「但佢哋……」
「唔洗理喇。」佢行到我旁邊嘅時候細細聲講：「我只係隨便綁住佢哋，最多用一個鐘就可以鬆綁。」
「咁如果佢哋解唔開……」
「咪過幾日睇下有冇屍體發現案嘅新聞囉。」無二黑心咁講：「唔好婦人之仁喇……你唔係想救人咩？」
「嗯……」的確，對比起嚟子儀嗰邊係更重要，「跟我嚟。」
我同無二好快就趕返去最初遇見「黑影」嘅位置。雖然一來一回十分鐘都冇，但趕到現場已經見唔到蘇子儀，嗰三個「黑影」亦都消失咗。
「就係呢度？」無二問，彎低身執起地上面一片枯葉。
「係……可惡！始終都係趕唔切！」我自責咁講：「頭先我應該留喺度幫佢……至少用萬化紙應該係可以拖延一陣等我哋離開……」
「錯喇，你走係啱。」無二回應：「雖然唔係親眼見到唔敢肯定，但你頭先見到嘅『黑影』好大機會係守護結界嘅『黑使者』。」
「守護……白湖村嘅結界？」
「嗯，又係白笑燭嘅傑作。當年佢同另外三位天師封印『白湖村』之後，就創造咗幾個『黑使者』守住呢度，就算有人圖謀不軌想解開結界，都可以第一時間通知佢……但照道理呢班『黑使者』應該係唔會傷害一般人先係。」無二思考咗兩秒再講：「其中一個解釋，就係裡面嘅妖邪之物果然開始蠢蠢欲動……」
「咁我哋……係咪救唔到佢？」我只係關心呢點。
「好遺憾，係。」無二決斷咁講：「如果結界嘅情況真係咁壞，我就唔可以再靠近……」可能見我未明，佢再進一步解釋：「因為我嘅靈力太強，萬一同裡面嘅妖物產生共振，就只會進一步影響個結界嘅穩定。」
「所以你頭先先會派我過去搵岳少嘅遊魂。」就因為我嘅靈力根本不值一提。
「冇錯……個女仔同你分開之前有冇講過啲咩？」
「有……佢話岳少報夢俾佢，要佢將遺言交托畀你。」
無二聽完個目光瞬間變得銳利起嚟。
「阿聰，我哋落山先……呢段路你就慢慢同我講返發生過咩事。」
等我由頭到尾講完成件事，我同無二已經落返山去到的士面前。可能見我仲係一臉自責，無二先嘆咗口氣然後講：
「阿聰，呢刻最重要係拯救我哋仲可以救到嘅人。蘇子儀既然為咗報答而選擇嚟呢度，佢事前肯定都衡量過風險，亦都有所覺悟……我哋而家可以做嘅，就係憑住岳少留低嘅遺言，繼續完成我哋嘅目標，呢個先係回應佢哋最好嘅做法。」
「嗯……」我上車之後問：「即係……我哋而家要去搵岳少嘅死黨阿域？」
「冇錯，你而家應該記得佢係邊個啦？」
「嗯。」冷靜落嚟，我終於記得今朝喺後樓梯用隱蔽術嘅時候見過呢個人，「就係今朝揸刀行頭嘅男人……但我哋點先可以說服佢話俾我哋知『斷魂玉』收埋喺邊？」
基本上我同無二係一致認為遺言入面嘅『嗰樣嘢』就係指『斷魂玉』。
「呢點慢慢再諗……萬事起頭難，首先係要諗計同佢接觸。」
「聽落好似已經好難……」
唔通……又要再次闖入「城寨」？
「咁又未必。」坐喺司機位嘅無二轉頭望過嚟，「阿聰，唔好咁沮喪喇……等我帶你去一個地方開心下。」
「吓？」我愕然，「去邊？」
雖然無二從來唔算一個正經嘅人，但斷估都唔會喺呢個氣氛下帶我去酒吧或者夜場呢啲地方啩？
「當然係如初屋企。」
說罷，佢就即刻踩油門開車。
（待續）
睇完又鍾意嘅，記住俾個 like 同分享開去呀。
Patreon 正式有連載啦！長篇故事《扮工鬥室》集歡樂、恐怖、愛情於一身……會更加似我以前嘅風格，遲下仲會有投票互動添。希望大家多多訂閱支持！
https://www.patreon.com/echoofheart
第一集（試閱）：
https://www.facebook.com/Echo.of.Heart/posts/2085452518253220?__tn__=K-R
第二集（試閱）：
https://www.facebook.com/Echo.of.Heart/posts/2091293244335814?__tn__=K-R
－－－－－－－－－－－－－－－－
【地方的無默媽資助計劃】（試行中）
近年作者生存空間越收越窄，大眾結業更加似係雪上加霜。所以推出資助計劃，希望各位可以直接課金支持。計劃並唔係強制性，一蚊可以，想繼續免費睇亦無妨，有心就可。
Payme 連結：
https://payme.hsbc/echoofheart
轉數快 FPS ID：6065460
計畫緣由及詳細內容：
https://bit.ly/39b5Fuw
－－－－－－－－－－－－－－－－－
IG：echoofheart
鬼湖全集連載 在 柯式野生活- 2021.02 [在山上10天! ⛰ #十日縱橫鬼湖全集D1 ]... 的推薦與評價
十日縱橫鬼湖全集 D1 ] 這一趟，深入中央山脈南南段為期10天; 我們踏入天堂，歷經煉獄，最後走回人間。 / 探訪神池、大小鬼湖、紅鬼湖等人蹤罕至山域。這次路 ... <看更多>