「有時候，有時候，我會相信一切有盡頭。」
可能係我水瓶座既性格啦，自細就抱住彿系人生觀
去看待自己既未來，一直都相信只要緣份到了，
應有既就自然有，無既亦無需要強求。對於食野
我都係咁諗，唔好去諗幾時要減肥，想食就食，
肚餓就食，唔好為難自己，緣份到了，自然就會
瘦咖啦。所以我今晚黎到尖沙咀日式居酒屋「鮨真」，
享受住270度維港夜景，係呢個氣氛底下，
就算自己一個食，都無咁毒呀！👇
-
📌鮨真 · おまかせ · (櫻) - $1480/Person
♦先付け -
▪ 粒貝BB · 鰻魚苗 · 日本車海老 -
▫ 先黎個前菜拼盤，粒貝寄居係個貝殼裡面，
可能細細粒好Cute，所以叫佢BB啦。食落好鮮甜，
口感結實爽脆，清新舒服；鰻魚苗表面晶瑩剔透，
好似水晶粉咁，入口夠滑溜，口感Q彈，雪一聲
就吞左落肚，幾得意；車海老其實係熟蝦，肉質夠厚，
食落爽彈好重蝦味，配埋蛋黃醋一齊食特別夾。
-
♦刺し身 · 8点 -
▪ 針魚 -
▪ 蜜柑鯛 -
▫ 再黎就係8款刺身陸續上，Omakase既最大賣點
就係師傅會因應你既進度已逐件上，可以比你慢慢
享用之餘，又可以保持新鮮既品質。一開波當然係
白身魚行先啦，針魚就最岩啦，師傅係面頭加左
少少梅醬，中間放左少少紫蘇葉，入口非常清新，
唔洗點醬油已經好夠味，唔錯；蜜柑鯛同普通既
鯛魚有少少分別，師傅放左海膽係裡面，而食落
非常新鮮，而且有淡香既蜜柑味。面頭滲左少少
岩鹽，口感好特別，呢個有驚喜！
-
▪ 鰤魚 -
▪ 鰆魚 -
▫ 一邊目睹師傅將新鮮既鰤魚慢慢切件，呢個就係
Omakase其中一個賣點。鰤魚亦姐係油甘魚，肉質
粉嫩帶光澤，忽感肥厚軟腍，口感非常柔軟，甘香
之中帶好重既油香；鰆魚亦都係第一次食，師傅將
魚皮先用明火輕輕燒過，聞到陣陣既焦香味，
面頭放上柚子胡椒，將個鮮味迫哂出黎，
入口濃郁鮮甜，無得輸！
-
▪ 鰹魚 -
▪ 銀鱈魚 -
▫ 鰹魚主張以外表乾爽為主，魚味濃郁為見稱，
就咁睇佢既肉質深紅色，好搶眼。師傅係面頭擺左
d紫蘇葉絲、蒜蓉、芝麻，再用醬油搽係面，
食落果種甘香係口腔裡面瞬間爆發，魚味突出；
銀鱈魚都係著重以燒一燒外皮，再係面頭灑上
烏魚籽粉，再輕輕搽少少醬油。而肉質食落
肥美無筋，油香相當豐富，入口係即化，
可想而知佢既肉係有幾滑溜啦！
-
▪ 大拖羅 -
▪ 醬油燒帶子 -
▫ 輪到最後濃味既出場啦，又點少得我最愛既
大拖羅呢！肉質厚身唔在講，色澤相當新鮮粉嫩，
一食落油脂湧哂出黎，魚香真係可以繞樑三日，
大滿足呀；帶子搽上醬油燒過，離遠都聞到香，
師傅千叮萬囑一定要包埋個紫菜一食，個口感先
Fit哂。紫菜夠乾身薄脆，成舊啪入口，食到帶子既
鮮味同濃濃醬油，夠哂惹味。
-
♦和食 · 二点 -
▪ 松皮燒馬頭魚 -
▫ 刺身過後，整返兩道和食調劑一下先，第一道
馬頭魚，可見魚鱗外皮炸到出奇地脆身，一咬落去
已經聽到響亮既"索索聲"，非同小可，。湯汁經過
魚湯熬製，份外清甜，肉質吸收湯底之後食落
份外鮮嫩，真係無可挑剔！
-
▪ 鮑魚 · 西椒 · 茄子 · 盧荀天婦羅 -
▫ 輪到天婦羅四食，最矚目既當然係原隻鮑魚啦，
經過油炸食落鮮味仲係返到。炸到金黃香脆唔在講，
非常爽口彈牙。加埋盧荀清甜，外面炸得乾身，
但裡面仲食到好水潤，認真唔錯。
-
♦寿司 · 6貫 -
▪ 海膽 -
▪ 白蝦仔 -
▪ 深海池魚 -
▫ 食完和食係時侯最後享受師傅既刀功啦，
不過今次貪得意叫左師傅特登幫我一次過上哂，
平時Omakase正式應該係逐件上咖。先黎個鮮橙色既
海膽，一入口鮮味濃郁，質感軟滑，咁Creamy既
口感已經要大讚；再黎透光既白蝦仔，面頭放左
少少薑蓉，口感綿密彈牙，甜味相當突出；
深海池魚就當然唔會輸啦，肉質爽滑彈潤，
比池魚更加清甜！
-
▪ 赤貝 -
▪ 左口魚邊 -
▪ 吞拿魚面珠墩 -
▫ 赤貝肉質肥美，色澤帶紅潤，食落鮮甜爽口，
貝殼類黎講我比較鍾意赤貝；左口魚邊當然用黎
火炙啦，輕輕燒過油份更加豐富，用左蒜醬油漬、
蔥花、芝麻，唔洗點鼓油已經夠哂入味，齒頰留香；
吞拿魚面珠墩都係第一次試呀，呢間Omakase
用既刺身都係因應季節性，食到好多特別既部位。
原來面珠墩肉係好有咬口，就咁睇以為係食緊
和牛刺身，魚油味相當香濃，但唔會好膩，好有特色。
-
♦稻庭うどん/吸物 -
▪ 大蜆味噌湯 -
▫ 用左大大隻蜆做主角，相當吸引，味道濃厚之餘，
蜆肉肥美鮮甜，配上嫩滑既昆布，啖啖滋味唔洗講野！
-
♦水菓子 -
▪ 熊本士多啤梨 -
▪ 富良野蜜瓜 -
▫ 深紅色既熊本出產既士多啤梨軟硬適中，比較圓身，
食落果肉札實，特別鮮甜；近年人氣急升既富良野
蜜瓜亦係水果既代表作，瓜肉色澤似金黃，
甜度適中，嫩滑多汁，無得輸。
-
♦デザート -
▪ 豆腐雪糕 -
▫ 最後食埋個甜品就完滿結束今次既Omakase之旅，
豆腐味既雪糕香濃得黎又唔會太"漏"，可以一解
食左咁多刺身既油膩感，唔錯。
-
📍 鮨真 - Sushi Ma Japanese Restaurant
🎈尖沙咀亞士厘道17-19號20樓
鰤魚油甘魚分別 在 油甘魚小知識~ 鰤鱼(Buri) Japanese amberjack 鰤魚又稱青甘 的推薦與評價
“出世”有加官進爵和出人頭地的寓意，於是日本人愛把鰤魚當成婚嫁大禮，被當做喜慶的魚。 鰤魚屬洄游性魚類，每年冬季鰤魚南下產卵，此時捕撈上來的成年鰤 ... ... <看更多>